𑁪. 𑀓𑁄𑀡𑁆𑀟𑀜𑁆𑀜𑀩𑀼𑀤𑁆𑀥𑀯𑀁𑀲𑁄

𑁧. 𑀤𑀻𑀧𑀗𑁆𑀓𑀭𑀲𑁆𑀲 𑀅𑀧𑀭𑁂𑀦, 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀦𑀸𑀬𑀓𑁄;

𑀅𑀦𑀦𑁆𑀢𑀢𑁂𑀚𑁄 𑀅𑀫𑀺𑀢𑀬𑀲𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀸𑀲𑀤𑁄.

𑁨. 𑀥𑀭𑀡𑀽𑀧𑀫𑁄 𑀔𑀫𑀦𑁂𑀦, 𑀲𑀻𑀮𑁂𑀦 𑀲𑀸𑀕𑀭𑀽𑀧𑀫𑁄;

𑀲𑀫𑀸𑀥𑀺𑀦𑀸 𑀫𑁂𑀭𑀽𑀧𑀫𑁄, 𑀜𑀸𑀡𑁂𑀦 𑀕𑀕𑀦𑀽𑀧𑀫𑁄.

𑁩. 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕-𑀫𑀕𑁆𑀕𑀲𑀘𑁆𑀘𑀧𑁆𑀧𑀓𑀸𑀲𑀦𑀁;

𑀧𑀓𑀸𑀲𑁂𑀲𑀺 𑀲𑀤𑀸 𑀩𑀼𑀤𑁆𑀥𑁄, 𑀳𑀺𑀢𑀸𑀬 𑀲𑀩𑁆𑀩𑀧𑀸𑀡𑀺𑀦𑀁.

𑁪. 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀓𑁄𑀡𑁆𑀟𑀜𑁆𑀜𑁂 𑀮𑁄𑀓𑀦𑀸𑀬𑀓𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀢𑀢𑁄 𑀧𑀭𑀫𑁆𑀧𑀺 𑀤𑁂𑀲𑁂𑀦𑁆𑀢𑁂, 𑀦𑀭𑀫𑀭𑀽𑀦𑀁 𑀲𑀫𑀸𑀕𑀫𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. 𑀢𑀺𑀢𑁆𑀣𑀺𑀬𑁂 𑀅𑀪𑀺𑀫𑀤𑁆𑀤𑀦𑁆𑀢𑁄, 𑀬𑀤𑀸 𑀥𑀫𑁆𑀫𑀫𑀤𑁂𑀲𑀬𑀺;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁭. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀓𑁄𑀡𑁆𑀟𑀜𑁆𑀜𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮. 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀤𑀼𑀢𑀺𑀬𑁄 𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀦𑀯𑀼𑀢𑀺𑀓𑁄𑀝𑀺𑀦𑀁.

𑁯. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀫𑀼𑀤𑁆𑀤𑀁 𑀅𑀦𑁆𑀢𑀫𑀦𑁆𑀢𑁂𑀦, 𑀇𑀲𑁆𑀲𑀭𑀺𑀬𑀁 𑀯𑀢𑁆𑀢𑀬𑀸𑀫𑀳𑀁.

𑁧𑁦. 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀯𑀺𑀫𑀮𑀸𑀦𑀁 𑀫𑀳𑁂𑀲𑀺𑀦𑀁;

𑀲𑀳 𑀮𑁄𑀓𑀕𑁆𑀕𑀦𑀸𑀣𑁂𑀦, 𑀧𑀭𑀫𑀦𑁆𑀦𑁂𑀦 𑀢𑀧𑁆𑀧𑀬𑀺𑀁.

𑁧𑁧. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀓𑁄𑀡𑁆𑀟𑀜𑁆𑀜𑁄 𑀮𑁄𑀓𑀦𑀸𑀬𑀓𑁄;

‘‘𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁨. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁;

𑀅𑀲𑁆𑀲𑀢𑁆𑀣𑀫𑀽𑀮𑁂 𑀲𑀫𑁆𑀩𑀼𑀤𑁆𑀥𑁄, 𑀩𑀼𑀚𑁆𑀛𑀺𑀲𑁆𑀲𑀢𑀺 𑀫𑀳𑀸𑀬𑀲𑁄.

𑁧𑁩. ‘‘𑀇𑀫𑀲𑁆𑀲 𑀚𑀦𑀺𑀓𑀸 𑀫𑀸𑀢𑀸, 𑀫𑀸𑀬𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫, 𑀅𑀬𑀁 𑀳𑁂𑀲𑁆𑀲𑀢𑀺 𑀕𑁄𑀢𑀫𑁄.

𑁧𑁪. ‘‘𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑁄 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀓𑀸;

𑀆𑀦𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀉𑀧𑀝𑁆𑀞𑀺𑀲𑁆𑀲𑀢𑀺𑀫𑀁 𑀚𑀺𑀦𑀁.

𑁧𑁫. ‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀲𑁆𑀲𑀢𑁆𑀣𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁬. ‘‘𑀘𑀺𑀢𑁆𑀢𑁄 𑀘 𑀳𑀢𑁆𑀣𑀸𑀴𑀯𑀓𑁄, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀝𑁆𑀞𑀓𑀸;

𑀦𑀦𑁆𑀤𑀫𑀸𑀢𑀸 𑀘 𑀉𑀢𑁆𑀢𑀭𑀸, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀝𑁆𑀞𑀺𑀓𑀸;

𑀆𑀬𑀼 𑀯𑀲𑁆𑀲𑀲𑀢𑀁 𑀢𑀲𑁆𑀲, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄’’.

𑁧𑁭. 𑀇𑀤𑀁 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀅𑀲𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀩𑀼𑀤𑁆𑀥𑀩𑀻𑀚𑀁 𑀓𑀺𑀭 𑀅𑀬𑀁.

𑁧𑁮. 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀸 𑀯𑀢𑁆𑀢𑀦𑁆𑀢𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺 𑀳𑀲𑀦𑁆𑀢𑀺 𑀘;

𑀓𑀢𑀜𑁆𑀚𑀮𑀻 𑀦𑀫𑀲𑁆𑀲𑀦𑁆𑀢𑀺, 𑀤𑀲𑀲𑀳𑀲𑁆𑀲𑀺𑀤𑁂𑀯𑀢𑀸.

𑁧𑁯. ‘‘𑀬𑀤𑀺𑀫𑀲𑁆𑀲 𑀮𑁄𑀓𑀦𑀸𑀣𑀲𑁆𑀲, 𑀯𑀺𑀭𑀚𑁆𑀛𑀺𑀲𑁆𑀲𑀸𑀫 𑀲𑀸𑀲𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁨𑁦. ‘‘𑀬𑀣𑀸 𑀫𑀦𑀼𑀲𑁆𑀲𑀸 𑀦𑀤𑀺𑀁 𑀢𑀭𑀦𑁆𑀢𑀸, 𑀧𑀝𑀺𑀢𑀺𑀢𑁆𑀣𑀁 𑀯𑀺𑀭𑀚𑁆𑀛𑀺𑀬;

𑀳𑁂𑀝𑁆𑀞𑀸𑀢𑀺𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀉𑀢𑁆𑀢𑀭𑀦𑁆𑀢𑀺 𑀫𑀳𑀸𑀦𑀤𑀺𑀁.

𑁨𑁧. ‘‘𑀏𑀯𑀫𑁂𑀯 𑀫𑀬𑀁 𑀲𑀩𑁆𑀩𑁂, 𑀬𑀤𑀺 𑀫𑀼𑀜𑁆𑀘𑀸𑀫𑀺𑀫𑀁 𑀚𑀺𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁨𑁨. 𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀢𑀫𑁂𑀯 𑀅𑀢𑁆𑀣𑀁 𑀲𑀸𑀥𑁂𑀦𑁆𑀢𑁄, 𑀫𑀳𑀸𑀭𑀚𑁆𑀚𑀁 𑀚𑀺𑀦𑁂 𑀅𑀤𑀁;

𑀫𑀳𑀸𑀭𑀚𑁆𑀚𑀁 𑀤𑀤𑀺𑀢𑁆𑀯𑀸𑀦 [𑀘𑀚𑀺𑀢𑁆𑀯𑀸 (𑀲𑀻.)], 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁨𑁩. 𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀜𑁆𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀦, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁨𑁪. 𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳𑀁.

𑁨𑁫. 𑀦𑀕𑀭𑀁 𑀭𑀫𑁆𑀫𑀯𑀢𑀻 𑀦𑀸𑀫, 𑀲𑀼𑀦𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀚𑀸𑀢𑀸 𑀦𑀸𑀫 𑀚𑀦𑀺𑀓𑀸, 𑀓𑁄𑀡𑁆𑀟𑀜𑁆𑀜𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁬. 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺 [𑀅𑀕𑀸𑀭𑀫𑀚𑁆𑀛𑁂 𑀘 𑀲𑁄 𑀯𑀲𑀺 (𑀲𑁆𑀬𑀸.)];

𑀲𑀼𑀘𑀺 𑀲𑀼𑀭𑀼𑀘𑀺 𑀲𑀼𑀪𑁄 𑀘, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁨𑁭. 𑀢𑀻𑀡𑀺𑀲𑀢𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀭𑀼𑀘𑀺𑀤𑁂𑀯𑀻 𑀦𑀸𑀫 𑀦𑀸𑀭𑀻, 𑀯𑀺𑀚𑀺𑀢𑀲𑁂𑀦𑁄 𑀅𑀢𑁆𑀭𑀚𑁄.

𑁨𑁮. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀭𑀣𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀤𑀲𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁨𑁯. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀓𑁄𑀡𑁆𑀟𑀜𑁆𑀜𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀤𑁂𑀯𑀸𑀦𑀁 𑀦𑀕𑀭𑀼𑀢𑁆𑀢𑀫𑁂.

𑁩𑁦. 𑀪𑀤𑁆𑀤𑁄 𑀘𑁂𑀯 𑀲𑀼𑀪𑀤𑁆𑀤𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀅𑀦𑀼𑀭𑀼𑀤𑁆𑀥𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀓𑁄𑀡𑁆𑀟𑀜𑁆𑀜𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁧. 𑀢𑀺𑀲𑁆𑀲𑀸 𑀘 𑀉𑀧𑀢𑀺𑀲𑁆𑀲𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀲𑀸𑀮𑀓𑀮𑁆𑀬𑀸𑀡𑀺𑀓𑁄 𑀩𑁄𑀥𑀺, 𑀓𑁄𑀡𑁆𑀟𑀜𑁆𑀜𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁨. 𑀲𑁄𑀡𑁄 𑀘 𑀉𑀧𑀲𑁄𑀡𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀦𑀦𑁆𑀤𑀸 𑀘𑁂𑀯 𑀲𑀺𑀭𑀻𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁩𑁩. 𑀲𑁄 𑀅𑀝𑁆𑀞𑀸𑀲𑀻𑀢𑀺 𑀳𑀢𑁆𑀣𑀸𑀦𑀺, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀲𑁄𑀪𑀢𑁂 𑀉𑀴𑀼𑀭𑀸𑀚𑀸𑀯 𑀲𑀽𑀭𑀺𑀬𑁄 𑀫𑀚𑁆𑀛𑀦𑁆𑀳𑀺𑀓𑁂 𑀬𑀣𑀸.

𑁩𑁪. 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁫. 𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀺, 𑀯𑀺𑀘𑀺𑀢𑁆𑀢𑀸 𑀆𑀲𑀺 𑀫𑁂𑀤𑀦𑀻;

𑀬𑀣𑀸 𑀕𑀕𑀦𑀫𑀼𑀴𑀽𑀳𑀺, 𑀏𑀯𑀁 𑀲𑁄 𑀉𑀧𑀲𑁄𑀪𑀣.

𑁩𑁬. 𑀢𑁂𑀧𑀺 𑀦𑀸𑀕𑀸 𑀅𑀧𑁆𑀧𑀫𑁂𑀬𑁆𑀬𑀸, 𑀅𑀲𑀗𑁆𑀔𑁄𑀪𑀸 𑀤𑀼𑀭𑀸𑀲𑀤𑀸;

𑀯𑀺𑀚𑁆𑀚𑀼𑀧𑀸𑀢𑀁𑀯 𑀤𑀲𑁆𑀲𑁂𑀢𑁆𑀯𑀸, 𑀦𑀺𑀩𑁆𑀩𑀼𑀢𑀸 𑀢𑁂 𑀫𑀳𑀸𑀬𑀲𑀸.

𑁩𑁭. 𑀲𑀸 𑀘 𑀅𑀢𑀼𑀮𑀺𑀬𑀸 𑀚𑀺𑀦𑀲𑁆𑀲 𑀇𑀤𑁆𑀥𑀺, 𑀜𑀸𑀡𑀧𑀭𑀺𑀪𑀸𑀯𑀺𑀢𑁄 𑀘 𑀲𑀫𑀸𑀥𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁩𑁮. 𑀓𑁄𑀡𑁆𑀟𑀜𑁆𑀜𑁄 𑀧𑀯𑀭𑁄 𑀩𑀼𑀤𑁆𑀥𑁄, 𑀘𑀦𑁆𑀤𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯 𑀘𑁂𑀢𑀺𑀬𑁄 𑀘𑀺𑀢𑁆𑀢𑁄, 𑀲𑀢𑁆𑀢 𑀬𑁄𑀚𑀦𑀫𑀼𑀲𑁆𑀲𑀺𑀢𑁄𑀢𑀺.

𑀓𑁄𑀡𑁆𑀟𑀜𑁆𑀜𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀤𑀼𑀢𑀺𑀬𑁄.