𑁩. 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀯𑀁𑀲𑁄

𑁧. 𑀢𑀤𑀸 𑀢𑁂 𑀪𑁄𑀚𑀬𑀺𑀢𑁆𑀯𑀸𑀦, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀉𑀧𑀕𑀘𑁆𑀙𑀼𑀁 𑀲𑀭𑀡𑀁 𑀢𑀲𑁆𑀲, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑁨. 𑀲𑀭𑀡𑀸𑀕𑀫𑀦𑁂 𑀓𑀜𑁆𑀘𑀺, 𑀦𑀺𑀯𑁂𑀲𑁂𑀲𑀺 𑀢𑀣𑀸𑀕𑀢𑁄;

𑀓𑀜𑁆𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼, 𑀲𑀻𑀮𑁂 𑀤𑀲𑀯𑀺𑀥𑁂 𑀧𑀭𑀁.

𑁩. 𑀓𑀲𑁆𑀲𑀘𑀺 𑀤𑁂𑀢𑀺 𑀲𑀸𑀫𑀜𑁆𑀜𑀁, 𑀘𑀢𑀼𑀭𑁄 𑀨𑀮𑀫𑀼𑀢𑁆𑀢𑀫𑁂;

𑀓𑀲𑁆𑀲𑀘𑀺 𑀅𑀲𑀫𑁂 𑀥𑀫𑁆𑀫𑁂, 𑀤𑁂𑀢𑀺 𑀲𑁄 𑀧𑀝𑀺𑀲𑀫𑁆𑀪𑀺𑀤𑀸.

𑁪. 𑀓𑀲𑁆𑀲𑀘𑀺 𑀯𑀭𑀲𑀫𑀸𑀧𑀢𑁆𑀢𑀺𑀬𑁄, 𑀅𑀝𑁆𑀞 𑀤𑁂𑀢𑀺 𑀦𑀭𑀸𑀲𑀪𑁄;

𑀢𑀺𑀲𑁆𑀲𑁄 𑀓𑀲𑁆𑀲𑀘𑀺 𑀯𑀺𑀚𑁆𑀚𑀸𑀬𑁄, 𑀙𑀴𑀪𑀺𑀜𑁆𑀜𑀸 𑀧𑀯𑁂𑀘𑁆𑀙𑀢𑀺.

𑁫. 𑀢𑁂𑀦 𑀬𑁄𑀕𑁂𑀦 𑀚𑀦𑀓𑀸𑀬𑀁, 𑀑𑀯𑀤𑀢𑀺 𑀫𑀳𑀸𑀫𑀼𑀦𑀺;

𑀢𑁂𑀦 𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑀁.

𑁬. 𑀫𑀳𑀸𑀳𑀦𑀼𑀲𑀪𑀓𑁆𑀔𑀦𑁆𑀥𑁄, 𑀤𑀻𑀧𑀗𑁆𑀓𑀭𑀲𑁆𑀲 𑀦𑀸𑀫𑀓𑁄;

𑀩𑀳𑀽 𑀚𑀦𑁂 𑀢𑀸𑀭𑀬𑀢𑀺, 𑀧𑀭𑀺𑀫𑁄𑀘𑁂𑀢𑀺 𑀤𑀼𑀕𑁆𑀕𑀢𑀺𑀁.

𑁭. 𑀩𑁄𑀥𑀦𑁂𑀬𑁆𑀬𑀁 𑀚𑀦𑀁 𑀤𑀺𑀲𑁆𑀯𑀸, 𑀲𑀢𑀲𑀳𑀲𑁆𑀲𑁂𑀧𑀺 𑀬𑁄𑀚𑀦𑁂;

𑀔𑀡𑁂𑀦 𑀉𑀧𑀕𑀦𑁆𑀢𑁆𑀯𑀸𑀦, 𑀩𑁄𑀥𑁂𑀢𑀺 𑀢𑀁 𑀫𑀳𑀸𑀫𑀼𑀦𑀺.

𑁮. 𑀧𑀞𑀫𑀸𑀪𑀺𑀲𑀫𑀬𑁂 𑀩𑀼𑀤𑁆𑀥𑁄, 𑀓𑁄𑀝𑀺𑀲𑀢𑀫𑀩𑁄𑀥𑀬𑀺;

𑀤𑀼𑀢𑀺𑀬𑀸𑀪𑀺𑀲𑀫𑀬𑁂 𑀦𑀸𑀣𑁄, 𑀦𑀯𑀼𑀢𑀺𑀓𑁄𑀝𑀺𑀫𑀩𑁄𑀥𑀬𑀺.

𑁯. 𑀬𑀤𑀸 𑀘 𑀤𑁂𑀯𑀪𑀯𑀦𑀫𑁆𑀳𑀺, 𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑀬𑀺;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁧𑁦. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁧. 𑀧𑀼𑀦 𑀦𑀸𑀭𑀤𑀓𑀽𑀝𑀫𑁆𑀳𑀺, 𑀧𑀯𑀺𑀯𑁂𑀓𑀕𑀢𑁂 𑀚𑀺𑀦𑁂;

𑀔𑀻𑀡𑀸𑀲𑀯𑀸 𑀯𑀻𑀢𑀫𑀮𑀸, 𑀲𑀫𑀺𑀁𑀲𑀼 𑀲𑀢𑀓𑁄𑀝𑀺𑀬𑁄.

𑁧𑁨. 𑀬𑀫𑁆𑀳𑀺 𑀓𑀸𑀮𑁂 𑀫𑀳𑀸𑀯𑀻𑀭𑁄, 𑀲𑀼𑀤𑀲𑁆𑀲𑀦𑀲𑀺𑀮𑀼𑀘𑁆𑀘𑀬𑁂;

𑀦𑀯𑀓𑁄𑀝𑀺𑀲𑀳𑀲𑁆𑀲𑁂𑀳𑀺, 𑀧𑀯𑀸𑀭𑁂𑀲𑀺 𑀫𑀳𑀸𑀫𑀼𑀦𑀺.

𑁧𑁩. 𑀤𑀲𑀯𑀻𑀲𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀏𑀓𑀤𑁆𑀯𑀺𑀦𑁆𑀦𑀁 𑀅𑀪𑀺𑀲𑀫𑀬𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸.

𑁧𑁪. 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁, 𑀇𑀤𑁆𑀥𑀁 𑀨𑀻𑀢𑀁 𑀅𑀳𑀽 𑀢𑀤𑀸;

𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑀁 𑀲𑀼𑀯𑀺𑀲𑁄𑀥𑀺𑀢𑀁.

𑁧𑁫. 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀤𑀻𑀧𑀗𑁆𑀓𑀭𑀁 𑀮𑁄𑀓𑀯𑀺𑀤𑀼𑀁, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀩𑁆𑀩𑀤𑀸.

𑁧𑁬. 𑀬𑁂 𑀓𑁂𑀘𑀺 𑀢𑁂𑀦 𑀲𑀫𑀬𑁂𑀦, 𑀚𑀳𑀦𑁆𑀢𑀺 𑀫𑀸𑀦𑀼𑀲𑀁 𑀪𑀯𑀁;

𑀅𑀧𑀢𑁆𑀢𑀫𑀸𑀦𑀲𑀸 𑀲𑁂𑀔𑀸, 𑀕𑀭𑀳𑀺𑀢𑀸 𑀪𑀯𑀦𑁆𑀢𑀺 𑀢𑁂.

𑁧𑁭. 𑀲𑀼𑀧𑀼𑀧𑁆𑀨𑀺𑀢𑀁 𑀧𑀸𑀯𑀘𑀦𑀁, 𑀅𑀭𑀳𑀦𑁆𑀢𑁂𑀳𑀺 𑀢𑀸𑀤𑀺𑀳𑀺;

𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀺, 𑀉𑀧𑀲𑁄𑀪𑀢𑀺 𑀲𑀩𑁆𑀩𑀤𑀸.

𑁧𑁮. 𑀦𑀕𑀭𑀁 𑀭𑀫𑁆𑀫𑀯𑀢𑀻 𑀦𑀸𑀫, 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀫𑁂𑀥𑀸 𑀦𑀸𑀫 𑀚𑀦𑀺𑀓𑀸, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁯. 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺 [𑀅𑀚𑁆𑀛𑀸𑀯𑀲𑀻 𑀚𑀺𑀦𑁄 (𑀲𑁆𑀬𑀸. 𑀓.)];

𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁨𑁦. 𑀢𑀻𑀡𑀺𑀲𑀢𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀧𑀤𑀼𑀫𑀸 𑀦𑀸𑀫 𑀲𑀸 𑀦𑀸𑀭𑀻, 𑀉𑀲𑀪𑀓𑁆𑀔𑀦𑁆𑀥𑁄 𑀅𑀢𑁆𑀭𑀚𑁄.

𑁨𑁧. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀤𑀲𑀫𑀸𑀲𑀸𑀦𑀺, 𑀧𑀥𑀸𑀦𑁂 𑀧𑀤𑀳𑀻 𑀚𑀺𑀦𑁄.

𑁨𑁨. 𑀧𑀥𑀸𑀦𑀘𑀸𑀭𑀁 𑀘𑀭𑀺𑀢𑁆𑀯𑀸𑀦, 𑀅𑀩𑀼𑀚𑁆𑀛𑀺 𑀫𑀸𑀦𑀲𑀁 𑀫𑀼𑀦𑀺;

𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺.

𑁨𑁩. 𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀦𑀦𑁆𑀤𑀸𑀭𑀸𑀫𑁂 𑀲𑀺𑀭𑀻𑀖𑀭𑁂 [𑀲𑀺𑀭𑀻𑀥𑀭𑁂 (𑀲𑀻.)];

𑀦𑀺𑀲𑀺𑀦𑁆𑀦𑁄 𑀲𑀺𑀭𑀻𑀲𑀫𑀽𑀮𑀫𑁆𑀳𑀺, 𑀅𑀓𑀸 𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀁.

𑁨𑁪. 𑀲𑀼𑀫𑀗𑁆𑀕𑀮𑁄 𑀘 𑀢𑀺𑀲𑁆𑀲𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀸𑀕𑀢𑁄 [𑀲𑁄𑀪𑀺𑀢𑁄 (𑀓.)] 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁫. 𑀦𑀦𑁆𑀤𑀸 𑀘𑁂𑀯 𑀲𑀼𑀦𑀦𑁆𑀤𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀧𑀺𑀧𑁆𑀨𑀮𑀻𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁬. 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 [𑀢𑀧𑀲𑁆𑀲𑀼𑀪𑀮𑁆𑀮𑀺𑀓𑀸 (𑀲𑀻.)] 𑀦𑀸𑀫, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀲𑀺𑀭𑀺𑀫𑀸 𑀓𑁄𑀡𑀸 𑀉𑀧𑀝𑁆𑀞𑀺𑀓𑀸, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁭. 𑀅𑀲𑀻𑀢𑀺𑀳𑀢𑁆𑀣𑀫𑀼𑀩𑁆𑀩𑁂𑀥𑁄, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀲𑁄𑀪𑀢𑀺 𑀤𑀻𑀧𑀭𑀼𑀓𑁆𑀔𑁄𑀯, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

𑁨𑁮. 𑀲𑀢𑀲𑀳𑀲𑁆𑀲𑀯𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁯. 𑀚𑁄𑀢𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑀁;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁩𑁦. 𑀲𑀸 𑀘 𑀇𑀤𑁆𑀥𑀺 𑀲𑁄 𑀘 𑀬𑀲𑁄, 𑀢𑀸𑀦𑀺 𑀘 𑀧𑀸𑀤𑁂𑀲𑀼 𑀘𑀓𑁆𑀓𑀭𑀢𑀦𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁 [𑀲𑀫𑀦𑁆𑀢𑀭𑀳𑀺𑀢𑀁 (𑀲𑀻. 𑀲𑁆𑀬𑀸. 𑀓.)], 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸 [𑀲𑀩𑁆𑀩𑀲𑀗𑁆𑀔𑀸𑀭𑀸𑀢𑀺 (𑀲𑀩𑁆𑀩𑀢𑁆𑀣)].

𑁩𑁧. 𑀤𑀻𑀧𑀗𑁆𑀓𑀭𑁄 𑀚𑀺𑀦𑁄 𑀲𑀢𑁆𑀣𑀸, 𑀦𑀦𑁆𑀤𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯𑀲𑁆𑀲 𑀚𑀺𑀦𑀣𑀽𑀧𑁄, 𑀙𑀢𑁆𑀢𑀺𑀁𑀲𑀼𑀩𑁆𑀩𑁂𑀥𑀬𑁄𑀚𑀦𑁄𑀢𑀺.

𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀧𑀞𑀫𑁄.