𑁨𑁯. 𑀥𑀸𑀢𑀼𑀪𑀸𑀚𑀦𑀻𑀬𑀓𑀣𑀸

𑁧. 𑀫𑀳𑀸𑀕𑁄𑀢𑀫𑁄 𑀚𑀺𑀦𑀯𑀭𑁄, 𑀓𑀼𑀲𑀺𑀦𑀸𑀭𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀥𑀸𑀢𑀼𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑀢𑁄.

𑁨. 𑀏𑀓𑁄 𑀅𑀚𑀸𑀢𑀲𑀢𑁆𑀢𑀼𑀲𑁆𑀲, 𑀏𑀓𑁄 𑀯𑁂𑀲𑀸𑀮𑀺𑀬𑀸 𑀧𑀼𑀭𑁂;

𑀏𑀓𑁄 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁, 𑀏𑀓𑁄 𑀘 𑀅𑀮𑁆𑀮𑀓𑀧𑁆𑀧𑀓𑁂.

𑁩. 𑀏𑀓𑁄 𑀘 𑀭𑀸𑀫𑀕𑀸𑀫𑀫𑁆𑀳𑀺, 𑀏𑀓𑁄 𑀘 𑀯𑁂𑀞𑀤𑀻𑀧𑀓𑁂;

𑀏𑀓𑁄 𑀧𑀸𑀯𑁂𑀬𑁆𑀬𑀓𑁂 𑀫𑀮𑁆𑀮𑁂, 𑀏𑀓𑁄 𑀘 𑀓𑁄𑀲𑀺𑀦𑀸𑀭𑀓𑁂.

𑁪. 𑀓𑀼𑀫𑁆𑀪𑀲𑁆𑀲 𑀣𑀽𑀧𑀁 𑀓𑀸𑀭𑁂𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀤𑁄𑀡𑀲𑀯𑁆𑀳𑀬𑁄;

𑀅𑀗𑁆𑀕𑀸𑀭𑀣𑀽𑀧𑀁 𑀓𑀸𑀭𑁂𑀲𑀼𑀁, 𑀫𑁄𑀭𑀺𑀬𑀸 𑀢𑀼𑀝𑁆𑀞𑀫𑀸𑀦𑀲𑀸.

𑁫. 𑀅𑀝𑁆𑀞 𑀲𑀸𑀭𑀻𑀭𑀺𑀓𑀸 𑀣𑀽𑀧𑀸, 𑀦𑀯𑀫𑁄 𑀓𑀼𑀫𑁆𑀪𑀘𑁂𑀢𑀺𑀬𑁄;

𑀅𑀗𑁆𑀕𑀸𑀭𑀣𑀽𑀧𑁄 𑀤𑀲𑀫𑁄, 𑀢𑀤𑀸𑀬𑁂𑀯 𑀧𑀢𑀺𑀝𑁆𑀞𑀺𑀢𑁄.

𑁬. 𑀉𑀡𑁆𑀳𑀻𑀲𑀁 𑀘𑀢𑀲𑁆𑀲𑁄 𑀤𑀸𑀞𑀸, 𑀅𑀓𑁆𑀔𑀓𑀸 𑀤𑁆𑀯𑁂 𑀘 𑀥𑀸𑀢𑀼𑀬𑁄;

𑀅𑀲𑀫𑁆𑀪𑀺𑀦𑁆𑀦𑀸 𑀇𑀫𑀸 𑀲𑀢𑁆𑀢, 𑀲𑁂𑀲𑀸 𑀪𑀺𑀦𑁆𑀦𑀸𑀯 𑀥𑀸𑀢𑀼𑀬𑁄.

𑁭. 𑀫𑀳𑀦𑁆𑀢𑀸 𑀫𑀼𑀕𑁆𑀕𑀫𑀢𑁆𑀢𑀸 𑀘 [𑀫𑀼𑀕𑁆𑀕𑀫𑀸𑀲𑀸𑀯 (𑀓.)], 𑀫𑀚𑁆𑀛𑀺𑀫𑀸 𑀪𑀺𑀦𑁆𑀦𑀢𑀡𑁆𑀟𑀼𑀮𑀸;

𑀔𑀼𑀤𑁆𑀤𑀓𑀸 𑀲𑀸𑀲𑀧𑀫𑀢𑁆𑀢𑀸 𑀘, 𑀦𑀸𑀦𑀸𑀯𑀡𑁆𑀡𑀸 𑀘 𑀥𑀸𑀢𑀼𑀬𑁄.

𑁮. 𑀫𑀳𑀦𑁆𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀘, 𑀫𑀼𑀢𑁆𑀢𑀯𑀡𑁆𑀡𑀸 𑀘 𑀫𑀚𑁆𑀛𑀺𑀫𑀸;

𑀔𑀼𑀤𑁆𑀤𑀓𑀸 𑀫𑀓𑀼𑀮𑀯𑀡𑁆𑀡𑀸 𑀘, 𑀲𑁄𑀴𑀲𑀤𑁄𑀡𑀫𑀢𑁆𑀢𑀺𑀓𑀸.

𑁯. 𑀫𑀳𑀦𑁆𑀢𑀸 𑀧𑀜𑁆𑀘 𑀦𑀸𑀴𑀺𑀬𑁄, 𑀦𑀸𑀴𑀺𑀬𑁄 𑀧𑀜𑁆𑀘 𑀫𑀚𑁆𑀛𑀺𑀫𑀸;

𑀔𑀼𑀤𑁆𑀤𑀓𑀸 𑀙 𑀦𑀸𑀴𑀻 𑀘𑁂𑀯, 𑀏𑀢𑀸 𑀲𑀩𑁆𑀩𑀸𑀧𑀺 𑀥𑀸𑀢𑀼𑀬𑁄.

𑁧𑁦. 𑀉𑀡𑁆𑀳𑀻𑀲𑀁 𑀲𑀻𑀳𑀴𑁂 𑀤𑀻𑀧𑁂, 𑀩𑁆𑀭𑀳𑁆𑀫𑀮𑁄𑀓𑁂 𑀘 𑀯𑀸𑀫𑀓𑀁;

𑀲𑀻𑀳𑀴𑁂 𑀤𑀓𑁆𑀔𑀺𑀡𑀓𑁆𑀔𑀜𑁆𑀘, 𑀲𑀩𑁆𑀩𑀸𑀧𑁂𑀢𑀸 𑀧𑀢𑀺𑀝𑁆𑀞𑀺𑀢𑀸.

𑁧𑁧. 𑀏𑀓𑀸 𑀤𑀸𑀞𑀸 𑀢𑀺𑀤𑀲𑀧𑀼𑀭𑁂, 𑀏𑀓𑀸 𑀦𑀸𑀕𑀧𑀼𑀭𑁂 𑀅𑀳𑀼;

𑀏𑀓𑀸 𑀕𑀦𑁆𑀥𑀸𑀭𑀯𑀺𑀲𑀬𑁂, 𑀏𑀓𑀸 𑀓𑀮𑀺𑀗𑁆𑀕𑀭𑀸𑀚𑀺𑀦𑁄.

𑁧𑁨. 𑀘𑀢𑁆𑀢𑀸𑀮𑀻𑀲𑀲𑀫𑀸 𑀤𑀦𑁆𑀢𑀸, 𑀓𑁂𑀲𑀸 𑀮𑁄𑀫𑀸 𑀘 𑀲𑀩𑁆𑀩𑀲𑁄;

𑀤𑁂𑀯𑀸 𑀳𑀭𑀺𑀁𑀲𑀼 𑀏𑀓𑁂𑀓𑀁, 𑀘𑀓𑁆𑀓𑀯𑀸𑀴𑀧𑀭𑀫𑁆𑀧𑀭𑀸.

𑁧𑁩. 𑀯𑀚𑀺𑀭𑀸𑀬𑀁 𑀪𑀕𑀯𑀢𑁄, 𑀧𑀢𑁆𑀢𑁄 𑀤𑀡𑁆𑀟𑀜𑁆𑀘 𑀘𑀻𑀯𑀭𑀁;

𑀦𑀺𑀯𑀸𑀲𑀦𑀁 𑀓𑀼𑀮𑀖𑀭𑁂, 𑀧𑀘𑁆𑀘𑀢𑁆𑀣𑀭𑀡𑀁 𑀓𑀧𑀺𑀮𑀯𑁆𑀳𑀬𑁂 [𑀲𑀺𑀮𑀯𑁆𑀳𑀬𑁂 (𑀲𑁆𑀬𑀸.)].

𑁧𑁪. 𑀧𑀸𑀝𑀮𑀺𑀧𑀼𑀢𑁆𑀢𑀧𑀼𑀭𑀫𑁆𑀳𑀺, 𑀓𑀭𑀡𑀁 𑀓𑀸𑀬𑀩𑀦𑁆𑀥𑀦𑀁;

𑀘𑀫𑁆𑀧𑀸𑀬𑀼𑀤𑀓𑀲𑀸𑀝𑀺𑀬𑀁, 𑀉𑀡𑁆𑀡𑀮𑁄𑀫𑀜𑁆𑀘 𑀓𑁄𑀲𑀮𑁂.

𑁧𑁫. 𑀓𑀸𑀲𑀸𑀯𑀁 𑀩𑁆𑀭𑀳𑁆𑀫𑀮𑁄𑀓𑁂 𑀘, 𑀯𑁂𑀞𑀦𑀁 𑀢𑀺𑀤𑀲𑁂 𑀧𑀼𑀭𑁂;

𑀦𑀺𑀲𑀻𑀤𑀦𑀁 𑀅𑀯𑀦𑁆𑀢𑀻𑀲𑀼, 𑀭𑀝𑁆𑀞𑁂 [𑀤𑁂𑀯𑀭𑀝𑁆𑀞𑁂 (𑀲𑁆𑀬𑀸.)] 𑀅𑀢𑁆𑀣𑀭𑀡𑀁 𑀢𑀤𑀸.

𑁧𑁬. 𑀅𑀭𑀡𑀻 𑀘 𑀫𑀺𑀣𑀺𑀮𑀸𑀬𑀁, 𑀯𑀺𑀤𑁂𑀳𑁂 𑀧𑀭𑀺𑀲𑀸𑀯𑀦𑀁;

𑀯𑀸𑀲𑀺 𑀲𑀽𑀘𑀺𑀖𑀭𑀜𑁆𑀘𑀸𑀧𑀺, 𑀇𑀦𑁆𑀤𑀧𑀢𑁆𑀣𑀧𑀼𑀭𑁂 𑀢𑀤𑀸.

𑁧𑁭. 𑀧𑀭𑀺𑀓𑁆𑀔𑀸𑀭𑀸 𑀅𑀯𑀲𑁂𑀲𑀸, 𑀚𑀦𑀧𑀤𑁂 𑀅𑀧𑀭𑀦𑁆𑀢𑀓𑁂;

𑀧𑀭𑀺𑀪𑀼𑀢𑁆𑀢𑀸𑀦𑀺 𑀫𑀼𑀦𑀺𑀦𑀸, 𑀅𑀓𑀁𑀲𑀼 𑀫𑀦𑀼𑀚𑀸 𑀢𑀤𑀸.

𑁧𑁮. 𑀥𑀸𑀢𑀼𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀕𑁄𑀢𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀧𑀸𑀡𑀻𑀦𑀁 𑀅𑀦𑀼𑀓𑀫𑁆𑀧𑀸𑀬, 𑀅𑀳𑀼 𑀧𑁄𑀭𑀸𑀡𑀺𑀓𑀁 𑀢𑀤𑀸𑀢𑀺.

𑀥𑀸𑀢𑀼𑀪𑀸𑀚𑀦𑀻𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.