𑁨𑁬. 𑀓𑀲𑁆𑀲𑀧𑀩𑀼𑀤𑁆𑀥𑀯𑀁𑀲𑁄

𑁧. 𑀓𑁄𑀡𑀸𑀕𑀫𑀦𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀥𑀫𑁆𑀫𑀭𑀸𑀚𑀸 𑀧𑀪𑀗𑁆𑀓𑀭𑁄.

𑁨. 𑀲𑀜𑁆𑀙𑀟𑁆𑀟𑀺𑀢𑀁 𑀓𑀼𑀮𑀫𑀽𑀮𑀁, 𑀩𑀳𑁆𑀯𑀦𑁆𑀦𑀧𑀸𑀦𑀪𑁄𑀚𑀦𑀁;

𑀤𑀢𑁆𑀯𑀸𑀦 𑀬𑀸𑀘𑀓𑁂 𑀤𑀸𑀦𑀁, 𑀧𑀽𑀭𑀬𑀺𑀢𑁆𑀯𑀸𑀦 𑀫𑀸𑀦𑀲𑀁;

𑀉𑀲𑀪𑁄𑀯 𑀆𑀴𑀓𑀁 𑀪𑁂𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩. 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀓𑀲𑁆𑀲𑀧𑁂 𑀮𑁄𑀓𑀦𑀸𑀬𑀓𑁂;

𑀯𑀻𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪. 𑀘𑀢𑀼𑀫𑀸𑀲𑀁 𑀬𑀤𑀸 𑀩𑀼𑀤𑁆𑀥𑁄, 𑀮𑁄𑀓𑁂 𑀘𑀭𑀢𑀺 𑀘𑀸𑀭𑀺𑀓𑀁;

𑀤𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀬𑀫𑀓𑀁 𑀯𑀺𑀓𑀼𑀩𑁆𑀩𑀦𑀁 𑀓𑀢𑁆𑀯𑀸, 𑀜𑀸𑀡𑀥𑀸𑀢𑀼𑀁 𑀧𑀓𑀺𑀢𑁆𑀢𑀬𑀺;

𑀧𑀜𑁆𑀘𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. 𑀲𑀼𑀥𑀫𑁆𑀫𑀸 𑀤𑁂𑀯𑀧𑀼𑀭𑁂 𑀭𑀫𑁆𑀫𑁂, 𑀢𑀢𑁆𑀣 𑀥𑀫𑁆𑀫𑀁 𑀧𑀓𑀺𑀢𑁆𑀢𑀬𑀺;

𑀢𑀻𑀡𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑁂𑀯𑀸𑀦𑀁 𑀩𑁄𑀥𑀬𑀻 𑀚𑀺𑀦𑁄.

𑁭. 𑀦𑀭𑀤𑁂𑀯𑀲𑁆𑀲 𑀬𑀓𑁆𑀔𑀲𑁆𑀲, 𑀅𑀧𑀭𑁂 𑀥𑀫𑁆𑀫𑀤𑁂𑀲𑀦𑁂;

𑀏𑀢𑁂𑀲𑀸𑀦𑀁 𑀅𑀪𑀺𑀲𑀫𑀬𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸.

𑁮. 𑀢𑀲𑁆𑀲𑀸𑀧𑀺 𑀤𑁂𑀯𑀤𑁂𑀯𑀲𑁆𑀲, 𑀏𑀓𑁄 𑀆𑀲𑀺 𑀲𑀫𑀸𑀕𑀫𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁯. 𑀯𑀻𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀢𑀤𑀸 𑀆𑀲𑀺 𑀲𑀫𑀸𑀕𑀫𑁄;

𑀅𑀢𑀺𑀓𑁆𑀓𑀦𑁆𑀢𑀪𑀯𑀦𑁆𑀢𑀸𑀦𑀁, 𑀳𑀺𑀭𑀺𑀲𑀻𑀮𑁂𑀦 𑀢𑀸𑀤𑀺𑀦𑀁.

𑁧𑁦. 𑀅𑀳𑀁 𑀢𑀤𑀸 𑀫𑀸𑀡𑀯𑀓𑁄, 𑀚𑁄𑀢𑀺𑀧𑀸𑀮𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽.

𑁧𑁧. 𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑁄;

𑀪𑀽𑀫𑀦𑁆𑀢𑀮𑀺𑀓𑁆𑀔𑀓𑀼𑀲𑀮𑁄, 𑀓𑀢𑀯𑀺𑀚𑁆𑀚𑁄 𑀅𑀦𑀸𑀯𑀬𑁄.

𑁧𑁨. 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄, 𑀖𑀝𑀺𑀓𑀸𑀭𑁄 𑀦𑀸𑀫𑀼𑀧𑀝𑁆𑀞𑀸𑀓𑁄;

𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄, 𑀦𑀺𑀩𑁆𑀩𑀼𑀢𑁄 𑀢𑀢𑀺𑀬𑁂 𑀨𑀮𑁂.

𑁧𑁩. 𑀆𑀤𑀸𑀬 𑀫𑀁 𑀖𑀝𑀻𑀓𑀸𑀭𑁄, 𑀉𑀧𑀕𑀜𑁆𑀙𑀺 𑀓𑀲𑁆𑀲𑀧𑀁 𑀚𑀺𑀦𑀁;

𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁪. 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑀼𑀢𑁆𑀯𑀸, 𑀯𑀢𑁆𑀢𑀸𑀯𑀢𑁆𑀢𑁂𑀲𑀼 𑀓𑁄𑀯𑀺𑀤𑁄;

𑀦 𑀓𑁆𑀯𑀘𑀺 𑀧𑀭𑀺𑀳𑀸𑀬𑀸𑀫𑀺, 𑀧𑀽𑀭𑁂𑀲𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁫. 𑀬𑀸𑀯𑀢𑀸 𑀩𑀼𑀤𑁆𑀥𑀪𑀡𑀺𑀢𑀁, 𑀦𑀯𑀗𑁆𑀕𑀁 𑀚𑀺𑀦𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀦, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁬. 𑀫𑀫 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸, 𑀲𑁄𑀧𑀺 𑀩𑀼𑀤𑁆𑀥𑁄 𑀯𑀺𑀬𑀸𑀓𑀭𑀺;

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁭. ‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁.

𑁧𑁮. ‘‘𑀅𑀚𑀧𑀸𑀮𑀭𑀼𑀓𑁆𑀔𑀫𑀽𑀮𑁂, 𑀦𑀺𑀲𑀻𑀤𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀢𑀢𑁆𑀣 𑀧𑀸𑀬𑀸𑀲𑀁 𑀧𑀕𑁆𑀕𑀬𑁆𑀳, 𑀦𑁂𑀭𑀜𑁆𑀚𑀭𑀫𑀼𑀧𑁂𑀳𑀺𑀢𑀺.

𑁧𑁯. ‘‘𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑀫𑁆𑀳𑀺, 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀬;

𑀧𑀝𑀺𑀬𑀢𑁆𑀢𑀯𑀭𑀫𑀕𑁆𑀕𑁂𑀦, 𑀩𑁄𑀥𑀺𑀫𑀽𑀮𑀫𑀼𑀧𑁂𑀳𑀺𑀢𑀺.

𑁨𑁦. ‘‘𑀢𑀢𑁄 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, 𑀩𑁄𑀥𑀺𑀫𑀡𑁆𑀟𑀁 𑀅𑀦𑀼𑀢𑁆𑀢𑀭𑁄;

𑀅𑀧𑀭𑀸𑀚𑀺𑀢𑀝𑁆𑀞𑀸𑀦𑀫𑁆𑀳𑀺 [𑀅𑀧𑀭𑀸𑀚𑀺𑀢𑀦𑀺𑀲𑀪𑀝𑁆𑀞𑀸𑀦𑁂 (𑀓.)], 𑀩𑁄𑀥𑀺𑀧𑀮𑁆𑀮𑀗𑁆𑀓𑀫𑀼𑀢𑁆𑀢𑀫𑁂;

𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸, 𑀩𑀼𑀚𑁆𑀛𑀺𑀲𑁆𑀲𑀢𑀺 𑀫𑀳𑀸𑀬𑀲𑁄.

𑁨𑁧. ‘‘𑀇𑀫𑀲𑁆𑀲 𑀚𑀦𑀺𑀓𑀸 𑀫𑀸𑀢𑀸, 𑀫𑀸𑀬𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫, 𑀅𑀬𑀁 𑀳𑁂𑀲𑁆𑀲𑀢𑀺 𑀕𑁄𑀢𑀫𑁄.

𑁨𑁨. ‘‘𑀅𑀦𑀸𑀲𑀯𑀸 𑀯𑀻𑀢𑀭𑀸𑀕𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑁄 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀓𑀸;

𑀆𑀦𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀉𑀧𑀝𑁆𑀞𑀺𑀲𑁆𑀲𑀢𑀺𑀫𑀁 𑀚𑀺𑀦𑀁.

𑁨𑁩. ‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀺𑀓𑀸;

𑀅𑀦𑀸𑀲𑀯𑀸 𑀲𑀦𑁆𑀢𑀘𑀺𑀢𑁆𑀢𑀸, 𑀯𑀻𑀢𑀭𑀸𑀕𑀸 𑀲𑀫𑀸𑀳𑀺𑀢𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀲𑁆𑀲𑀢𑁆𑀣𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁪. ‘‘𑀘𑀺𑀢𑁆𑀢𑁄 𑀳𑀢𑁆𑀣𑀸𑀴𑀯𑀓𑁄 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀝𑁆𑀞𑀓𑀸;

𑀦𑀦𑁆𑀤𑀫𑀸𑀢𑀸 𑀘 𑀉𑀢𑁆𑀢𑀭𑀸, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀝𑁆𑀞𑀺𑀓𑀸’’.

𑁨𑁫. 𑀇𑀤𑀁 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀅𑀲𑁆𑀲𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀩𑀼𑀤𑁆𑀥𑀩𑀻𑀚𑀁 𑀓𑀺𑀭 𑀅𑀬𑀁.

𑁨𑁬. 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀸 𑀧𑀯𑀢𑁆𑀢𑀦𑁆𑀢𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺 𑀳𑀲𑀦𑁆𑀢𑀺 𑀘;

𑀓𑀢𑀜𑁆𑀚𑀮𑀻 𑀦𑀫𑀲𑁆𑀲𑀦𑁆𑀢𑀺, 𑀤𑀲𑀲𑀳𑀲𑁆𑀲𑀻 𑀲𑀤𑁂𑀯𑀓𑀸.

𑁨𑁭. ‘‘𑀬𑀤𑀺𑀫𑀲𑁆𑀲 𑀮𑁄𑀓𑀦𑀸𑀣𑀲𑁆𑀲, 𑀯𑀺𑀭𑀚𑁆𑀛𑀺𑀲𑁆𑀲𑀸𑀫 𑀲𑀸𑀲𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁨𑁮. ‘‘𑀬𑀣𑀸 𑀫𑀦𑀼𑀲𑁆𑀲𑀸 𑀦𑀤𑀺𑀁 𑀢𑀭𑀦𑁆𑀢𑀸, 𑀧𑀝𑀺𑀢𑀺𑀢𑁆𑀣𑀁 𑀯𑀺𑀭𑀚𑁆𑀛𑀺𑀬;

𑀳𑁂𑀝𑁆𑀞𑀸 𑀢𑀺𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀉𑀢𑁆𑀢𑀭𑀦𑁆𑀢𑀺 𑀫𑀳𑀸𑀦𑀤𑀺𑀁.

𑁨𑁯. ‘‘𑀏𑀯𑀫𑁂𑀯 𑀫𑀬𑀁 𑀲𑀩𑁆𑀩𑁂, 𑀬𑀤𑀺 𑀫𑀼𑀜𑁆𑀘𑀸𑀫𑀺𑀫𑀁 𑀚𑀺𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁩𑁦. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁩𑁧. 𑀏𑀯𑀫𑀳𑀁 𑀲𑀁𑀲𑀭𑀺𑀢𑁆𑀯𑀸, 𑀧𑀭𑀺𑀯𑀚𑁆𑀚𑁂𑀦𑁆𑀢𑁄 𑀅𑀦𑀸𑀘𑀭𑀁;

𑀤𑀼𑀓𑁆𑀓𑀭𑀜𑁆𑀘 𑀓𑀢𑀁 𑀫𑀬𑁆𑀳𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸.

𑁩𑁨. 𑀦𑀕𑀭𑀁 𑀩𑀸𑀭𑀸𑀡𑀲𑀻 𑀦𑀸𑀫, 𑀓𑀺𑀓𑀻 𑀦𑀸𑀫𑀸𑀲𑀺 𑀔𑀢𑁆𑀢𑀺𑀬𑁄;

𑀯𑀲𑀢𑁂 𑀢𑀢𑁆𑀣 𑀦𑀕𑀭𑁂, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀳𑀸𑀓𑀼𑀮𑀁.

𑁩𑁩. 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀤𑀢𑁆𑀢𑁄𑀯, 𑀆𑀲𑀺 𑀩𑀼𑀤𑁆𑀥𑀲𑁆𑀲 𑀲𑁄 𑀧𑀺𑀢𑀸;

𑀥𑀦𑀯𑀢𑀻 𑀦𑀸𑀫 𑀚𑀦𑀺𑀓𑀸, 𑀓𑀲𑁆𑀲𑀧𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁪. 𑀤𑀼𑀯𑁂 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀳𑀁𑀲𑁄 𑀬𑀲𑁄 𑀲𑀺𑀭𑀺𑀦𑀦𑁆𑀤𑁄, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁩𑁫. 𑀢𑀺𑀲𑁄𑀴𑀲𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑀼𑀦𑀦𑁆𑀤𑀸 𑀦𑀸𑀫 𑀲𑀸 𑀦𑀸𑀭𑀻, 𑀯𑀺𑀚𑀺𑀢𑀲𑁂𑀦𑁄 𑀦𑀸𑀫 𑀅𑀢𑁆𑀭𑀚𑁄.

𑁩𑁬. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀧𑀸𑀲𑀸𑀤𑁂𑀦𑀸𑀪𑀺𑀦𑀺𑀓𑁆𑀔𑀫𑀺;

𑀲𑀢𑁆𑀢𑀸𑀳𑀁 𑀧𑀥𑀸𑀦𑀘𑀸𑀭𑀁, 𑀅𑀘𑀭𑀻 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁩𑁭. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀓𑀲𑁆𑀲𑀧𑁄 𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀫𑀺𑀕𑀤𑀸𑀬𑁂 𑀦𑀭𑀼𑀢𑁆𑀢𑀫𑁄.

𑁩𑁮. 𑀢𑀺𑀲𑁆𑀲𑁄 𑀘 𑀪𑀸𑀭𑀤𑁆𑀯𑀸𑀚𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀩𑁆𑀩𑀫𑀺𑀢𑁆𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀓𑀲𑁆𑀲𑀧𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁯. 𑀅𑀦𑀼𑀴𑀸 𑀉𑀭𑀼𑀯𑁂𑀴𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀦𑀺𑀕𑁆𑀭𑁄𑀥𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁪𑁦. 𑀲𑀼𑀫𑀗𑁆𑀕𑀮𑁄 𑀖𑀝𑀺𑀓𑀸𑀭𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀯𑀺𑀘𑀺𑀢𑀲𑁂𑀦𑀸 𑀪𑀤𑁆𑀤𑀸 [𑀪𑀤𑁆𑀭𑀸 (𑀓.)] 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁪𑁧. 𑀉𑀘𑁆𑀘𑀢𑁆𑀢𑀦𑁂𑀦 𑀲𑁄 𑀩𑀼𑀤𑁆𑀥𑁄, 𑀯𑀻𑀲𑀢𑀺𑀭𑀢𑀦𑀼𑀕𑁆𑀕𑀢𑁄;

𑀯𑀺𑀚𑁆𑀚𑀼𑀮𑀝𑁆𑀞𑀻𑀯 𑀆𑀓𑀸𑀲𑁂, 𑀘𑀦𑁆𑀤𑁄𑀯 𑀕𑀳𑀧𑀽𑀭𑀺𑀢𑁄.

𑁪𑁨. 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁪𑁩. 𑀥𑀫𑁆𑀫𑀢𑀴𑀸𑀓𑀁 𑀫𑀸𑀧𑀬𑀺𑀢𑁆𑀯𑀸, 𑀲𑀻𑀮𑀁 𑀤𑀢𑁆𑀯𑀸 𑀯𑀺𑀮𑁂𑀧𑀦𑀁;

𑀥𑀫𑁆𑀫𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀥𑀫𑁆𑀫𑀫𑀸𑀮𑀁 𑀯𑀺𑀪𑀚𑁆𑀚𑀺𑀬.

𑁪𑁪. 𑀥𑀫𑁆𑀫𑀯𑀺𑀫𑀮𑀫𑀸𑀤𑀸𑀲𑀁, 𑀞𑀧𑀬𑀺𑀢𑁆𑀯𑀸 𑀫𑀳𑀸𑀚𑀦𑁂;

𑀓𑁂𑀘𑀺 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀦𑁆𑀢𑀸, 𑀧𑀲𑁆𑀲𑀦𑁆𑀢𑀼 𑀫𑁂 𑀅𑀮𑀗𑁆𑀓𑀭𑀁.

𑁪𑁫. 𑀲𑀻𑀮𑀓𑀜𑁆𑀘𑀼𑀓𑀁 𑀤𑀢𑁆𑀯𑀸𑀦, 𑀛𑀸𑀦𑀓𑀯𑀘𑀯𑀫𑁆𑀫𑀺𑀢𑀁;

𑀥𑀫𑁆𑀫𑀘𑀫𑁆𑀫𑀁 𑀧𑀸𑀭𑀼𑀧𑀺𑀢𑁆𑀯𑀸, 𑀤𑀢𑁆𑀯𑀸 𑀲𑀦𑁆𑀦𑀸𑀳𑀫𑀼𑀢𑁆𑀢𑀫𑀁.

𑁪𑁬. 𑀲𑀢𑀺𑀨𑀮𑀓𑀁 𑀤𑀢𑁆𑀯𑀸𑀦, 𑀢𑀺𑀔𑀺𑀡𑀜𑀸𑀡𑀓𑀼𑀦𑁆𑀢𑀺𑀫𑀁;

𑀥𑀫𑁆𑀫𑀔𑀕𑁆𑀕𑀯𑀭𑀁 𑀤𑀢𑁆𑀯𑀸, 𑀲𑀻𑀮𑀲𑀁𑀲𑀕𑁆𑀕𑀫𑀤𑁆𑀤𑀦𑀁.

𑁪𑁭. 𑀢𑁂𑀯𑀺𑀚𑁆𑀚𑀸𑀪𑀽𑀲𑀦𑀁 𑀤𑀢𑁆𑀯𑀸𑀦, 𑀆𑀯𑁂𑀴𑀁 𑀘𑀢𑀼𑀭𑁄 𑀨𑀮𑁂;

𑀙𑀴𑀪𑀺𑀜𑁆𑀜𑀸𑀪𑀭𑀡𑀁 𑀤𑀢𑁆𑀯𑀸, 𑀥𑀫𑁆𑀫𑀧𑀼𑀧𑁆𑀨𑀧𑀺𑀴𑀦𑁆𑀥𑀦𑀁.

𑁪𑁮. 𑀲𑀤𑁆𑀥𑀫𑁆𑀫𑀧𑀡𑁆𑀟𑀭𑀘𑁆𑀙𑀢𑁆𑀢𑀁, 𑀤𑀢𑁆𑀯𑀸 𑀧𑀸𑀧𑀦𑀺𑀯𑀸𑀭𑀡𑀁;

𑀫𑀸𑀧𑀬𑀺𑀢𑁆𑀯𑀸𑀪𑀬𑀁 𑀧𑀼𑀧𑁆𑀨𑀁, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁪𑁯. 𑀏𑀲𑁄 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀸𑀲𑀤𑁄;

𑀏𑀲𑁄 𑀳𑀺 𑀥𑀫𑁆𑀫𑀭𑀢𑀦𑁄, 𑀲𑁆𑀯𑀸𑀓𑁆𑀔𑀸𑀢𑁄 𑀏𑀳𑀺𑀧𑀲𑁆𑀲𑀺𑀓𑁄.

𑁫𑁦. 𑀏𑀲𑁄 𑀳𑀺 𑀲𑀗𑁆𑀖𑀭𑀢𑀦𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀢𑁆𑀢𑀭𑁄;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁫𑁧. 𑀫𑀳𑀸𑀓𑀲𑁆𑀲𑀧𑁄 𑀚𑀺𑀦𑁄 𑀲𑀢𑁆𑀣𑀸, 𑀲𑁂𑀢𑀩𑁆𑀬𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯𑀲𑁆𑀲 𑀚𑀺𑀦𑀣𑀽𑀧𑁄, 𑀬𑁄𑀚𑀦𑀼𑀩𑁆𑀩𑁂𑀥𑀫𑀼𑀕𑁆𑀕𑀢𑁄𑀢𑀺.

𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀘𑀢𑀼𑀯𑀻𑀲𑀢𑀺𑀫𑁄.