𑁨𑁭. 𑀕𑁄𑀢𑀫𑀩𑀼𑀤𑁆𑀥𑀯𑀁𑀲𑁄

𑁧. 𑀅𑀳𑀫𑁂𑀢𑀭𑀳𑀺 𑀲𑀫𑁆𑀩𑀼𑀤𑁆𑀥𑁄 [𑀩𑀼𑀤𑁆𑀥𑁄 (𑀲𑀻.)], 𑀕𑁄𑀢𑀫𑁄 𑀲𑀓𑁆𑀬𑀯𑀟𑁆𑀠𑀦𑁄;

𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁨. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺𑀁;

𑀅𑀝𑁆𑀞𑀸𑀭𑀲𑀦𑁆𑀦𑀁 𑀓𑁄𑀝𑀻𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁩. 𑀢𑀢𑁄 𑀧𑀭𑀜𑁆𑀘 𑀤𑁂𑀲𑁂𑀦𑁆𑀢𑁂, 𑀦𑀭𑀤𑁂𑀯𑀲𑀫𑀸𑀕𑀫𑁂;

𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑁄, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁪. 𑀇𑀥𑁂𑀯𑀸𑀳𑀁 𑀏𑀢𑀭𑀳𑀺, 𑀑𑀯𑀤𑀺𑀁 𑀫𑀫 𑀅𑀢𑁆𑀭𑀚𑀁;

𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑁄, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀏𑀓𑁄𑀲𑀺 𑀲𑀦𑁆𑀦𑀺𑀧𑀸𑀢𑁄 𑀫𑁂, 𑀲𑀸𑀯𑀓𑀸𑀦𑀁 𑀫𑀳𑁂𑀲𑀺𑀦𑀁;

𑀅𑀟𑁆𑀠𑀢𑁂𑀴𑀲𑀲𑀢𑀸𑀦𑀁, 𑀪𑀺𑀓𑁆𑀔𑀽𑀦𑀸𑀲𑀺 𑀲𑀫𑀸𑀕𑀫𑁄.

𑁬. 𑀯𑀺𑀭𑁄𑀘𑀫𑀸𑀦𑁄 𑀯𑀺𑀫𑀮𑁄, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑀕𑁄;

𑀤𑀤𑀸𑀫𑀺 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀫𑀡𑀻𑀯 𑀲𑀩𑁆𑀩𑀓𑀸𑀫𑀤𑁄.

𑁭. 𑀨𑀮𑀫𑀸𑀓𑀗𑁆𑀔𑀫𑀸𑀦𑀸𑀦𑀁, 𑀪𑀯𑀘𑁆𑀙𑀦𑁆𑀤𑀚𑀳𑁂𑀲𑀺𑀦𑀁;

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀫𑀺, 𑀅𑀦𑀼𑀓𑀫𑁆𑀧𑀸𑀬 𑀧𑀸𑀡𑀺𑀦𑀁.

𑁮. 𑀤𑀲𑀯𑀻𑀲𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀏𑀓𑀤𑁆𑀯𑀺𑀦𑁆𑀦𑀁 𑀅𑀪𑀺𑀲𑀫𑀬𑁄, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑁄.

𑁯. 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁, 𑀇𑀤𑁆𑀥𑀁 𑀨𑀻𑀢𑀁 𑀲𑀼𑀨𑀼𑀮𑁆𑀮𑀺𑀢𑀁;

𑀇𑀥 𑀫𑀬𑁆𑀳𑀁 𑀲𑀓𑁆𑀬𑀫𑀼𑀦𑀺𑀦𑁄, 𑀲𑀸𑀲𑀦𑀁 𑀲𑀼𑀯𑀺𑀲𑁄𑀥𑀺𑀢𑀁.

𑁧𑁦. 𑀅𑀦𑀸𑀲𑀯𑀸 𑀯𑀻𑀢𑀭𑀸𑀕𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀪𑀺𑀓𑁆𑀔𑀽𑀦𑁂𑀓𑀲𑀢𑀸 𑀲𑀩𑁆𑀩𑁂, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁧𑁧. 𑀇𑀤𑀸𑀦𑀺 𑀬𑁂 𑀏𑀢𑀭𑀳𑀺, 𑀚𑀳𑀦𑁆𑀢𑀺 𑀫𑀸𑀦𑀼𑀲𑀁 𑀪𑀯𑀁;

𑀅𑀧𑁆𑀧𑀢𑁆𑀢𑀫𑀸𑀦𑀲𑀸 𑀲𑁂𑀔𑀸, 𑀢𑁂 𑀪𑀺𑀓𑁆𑀔𑀽 𑀯𑀺𑀜𑁆𑀜𑀼𑀕𑀭𑀳𑀺𑀢𑀸.

𑁧𑁨. 𑀅𑀭𑀺𑀬𑀜𑁆𑀘 𑀲𑀁𑀣𑁄𑀫𑀬𑀦𑁆𑀢𑀸, 𑀲𑀤𑀸 𑀥𑀫𑁆𑀫𑀭𑀢𑀸 𑀚𑀦𑀸;

𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺 𑀲𑀢𑀺𑀫𑀦𑁆𑀢𑁄, 𑀲𑀁𑀲𑀸𑀭𑀲𑀭𑀺𑀢𑀁 𑀕𑀢𑀸.

𑁧𑁩. 𑀦𑀕𑀭𑀁 𑀓𑀧𑀺𑀮𑀯𑀢𑁆𑀣𑀼 𑀫𑁂, 𑀭𑀸𑀚𑀸 𑀲𑀼𑀤𑁆𑀥𑁄𑀤𑀦𑁄 𑀧𑀺𑀢𑀸;

𑀫𑀬𑁆𑀳𑀁 𑀚𑀦𑁂𑀢𑁆𑀢𑀺𑀓𑀸 𑀫𑀸𑀢𑀸, 𑀫𑀸𑀬𑀸𑀤𑁂𑀯𑀻𑀢𑀺 𑀯𑀼𑀘𑁆𑀘𑀢𑀺.

𑁧𑁪. 𑀏𑀓𑀽𑀦𑀢𑀺𑀁𑀲𑀯𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛𑀳𑀁 𑀯𑀲𑀺𑀁;

𑀭𑀫𑁆𑀫𑁄 𑀲𑀼𑀭𑀫𑁆𑀫𑁄 𑀲𑀼𑀪𑀓𑁄, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁫. 𑀘𑀢𑁆𑀢𑀸𑀭𑀻𑀲𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀪𑀤𑁆𑀤𑀓𑀜𑁆𑀘𑀦𑀸 𑀦𑀸𑀫 𑀦𑀸𑀭𑀻, 𑀭𑀸𑀳𑀼𑀮𑁄 𑀦𑀸𑀫 𑀅𑀢𑁆𑀭𑀚𑁄.

𑁧𑁬. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀅𑀲𑁆𑀲𑀬𑀸𑀦𑁂𑀦 𑀦𑀺𑀓𑁆𑀔𑀫𑀺𑀁;

𑀙𑀩𑁆𑀩𑀲𑁆𑀲𑀁 𑀧𑀥𑀸𑀦𑀘𑀸𑀭𑀁, 𑀅𑀘𑀭𑀺𑀁 𑀤𑀼𑀓𑁆𑀓𑀭𑀁 𑀅𑀳𑀁.

𑁧𑁭. 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂, 𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀫𑀬𑀸;

𑀅𑀳𑀁 𑀕𑁄𑀢𑀫𑀲𑀫𑁆𑀩𑀼𑀤𑁆𑀥𑁄, 𑀲𑀭𑀡𑀁 𑀲𑀩𑁆𑀩𑀧𑀸𑀡𑀺𑀦𑀁.

𑁧𑁮. 𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑁄 𑀘, 𑀤𑁆𑀯𑁂 𑀪𑀺𑀓𑁆𑀔𑀽 𑀅𑀕𑁆𑀕𑀲𑀸𑀯𑀓𑀸;

𑀆𑀦𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀦𑁆𑀢𑀺𑀓𑀸𑀯𑀘𑀭𑁄 𑀫𑀫;

𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀪𑀺𑀓𑁆𑀔𑀼𑀦𑀻 𑀅𑀕𑁆𑀕𑀲𑀸𑀯𑀺𑀓𑀸.

𑁧𑁯. 𑀘𑀺𑀢𑁆𑀢𑁄 𑀳𑀢𑁆𑀣𑀸𑀴𑀯𑀓𑁄 𑀘, 𑀅𑀕𑁆𑀕𑀼𑀧𑀝𑁆𑀞𑀸𑀓𑀼𑀧𑀸𑀲𑀓𑀸;

𑀦𑀦𑁆𑀤𑀫𑀸𑀢𑀸 𑀘 𑀉𑀢𑁆𑀢𑀭𑀸, 𑀅𑀕𑁆𑀕𑀼𑀧𑀝𑁆𑀞𑀺𑀓𑀼𑀧𑀸𑀲𑀺𑀓𑀸.

𑁨𑁦. 𑀅𑀳𑀁 𑀅𑀲𑁆𑀲𑀢𑁆𑀣𑀫𑀽𑀮𑀫𑁆𑀳𑀺, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀩𑁆𑀬𑀸𑀫𑀧𑁆𑀧𑀪𑀸 𑀲𑀤𑀸 𑀫𑀬𑁆𑀳𑀁, 𑀲𑁄𑀴𑀲𑀳𑀢𑁆𑀣𑀫𑀼𑀕𑁆𑀕𑀢𑀸.

𑁨𑁧. 𑀅𑀧𑁆𑀧𑀁 𑀯𑀲𑁆𑀲𑀲𑀢𑀁 𑀆𑀬𑀼, 𑀇𑀤𑀸𑀦𑁂𑀢𑀭𑀳𑀺 𑀯𑀺𑀚𑁆𑀚𑀢𑀺;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄𑀳𑀁, 𑀢𑀸𑀭𑁂𑀫𑀺 𑀚𑀦𑀢𑀁 𑀩𑀳𑀼𑀁.

𑁨𑁨. 𑀞𑀧𑀬𑀺𑀢𑁆𑀯𑀸𑀦 𑀥𑀫𑁆𑀫𑀼𑀓𑁆𑀓𑀁, 𑀧𑀘𑁆𑀙𑀺𑀫𑀁 𑀚𑀦𑀩𑁄𑀥𑀦𑀁;

𑀅𑀳𑀫𑁆𑀧𑀺 𑀦𑀘𑀺𑀭𑀲𑁆𑀲𑁂𑀯, 𑀲𑀤𑁆𑀥𑀺𑀁 𑀲𑀸𑀯𑀓𑀲𑀗𑁆𑀖𑀢𑁄;

𑀇𑀥𑁂𑀯 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀁, 𑀅𑀕𑁆𑀕𑀻 𑀯𑀸𑀳𑀸𑀭𑀲𑀗𑁆𑀔𑀬𑀸.

𑁨𑁩. 𑀢𑀸𑀦𑀺 𑀘 𑀅𑀢𑀼𑀮𑀢𑁂𑀚𑀸𑀦𑀺, 𑀇𑀫𑀸𑀦𑀺 𑀘 𑀤𑀲𑀩𑀮𑀸𑀦𑀺 [𑀬𑀲𑀩𑀮𑀸𑀦𑀺 (𑀅𑀝𑁆𑀞.)];

𑀅𑀬𑀜𑁆𑀘 𑀕𑀼𑀡𑀥𑀸𑀭𑀡𑁄 𑀤𑁂𑀳𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀯𑀺𑀘𑀺𑀢𑁆𑀢𑁄.

𑁨𑁪. 𑀤𑀲 𑀤𑀺𑀲𑀸 𑀧𑀪𑀸𑀲𑁂𑀢𑁆𑀯𑀸, 𑀲𑀢𑀭𑀁𑀲𑀻𑀯 𑀙𑀧𑁆𑀧𑀪𑀸;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀲𑁆𑀲𑀦𑁆𑀢𑀺, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸𑀢𑀺.

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀧𑀜𑁆𑀘𑀯𑀻𑀲𑀢𑀺𑀫𑁄.