𑁨𑁫. 𑀓𑁄𑀡𑀸𑀕𑀫𑀦𑀩𑀼𑀤𑁆𑀥𑀯𑀁𑀲𑁄

𑁧. 𑀓𑀓𑀼𑀲𑀦𑁆𑀥𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀓𑁄𑀡𑀸𑀕𑀫𑀦𑁄 𑀦𑀸𑀫 𑀚𑀺𑀦𑁄, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄.

𑁨. 𑀤𑀲𑀥𑀫𑁆𑀫𑁂 𑀧𑀽𑀭𑀬𑀺𑀢𑁆𑀯𑀸𑀦, 𑀓𑀦𑁆𑀢𑀸𑀭𑀁 𑀲𑀫𑀢𑀺𑀓𑁆𑀓𑀫𑀺;

𑀧𑀯𑀸𑀳𑀺𑀬 𑀫𑀮𑀁 𑀲𑀩𑁆𑀩𑀁, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩. 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀓𑁄𑀡𑀸𑀕𑀫𑀦𑀦𑀸𑀬𑀓𑁂;

𑀢𑀺𑀁𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪. 𑀧𑀸𑀝𑀺𑀳𑀻𑀭𑀁 𑀓𑀭𑁄𑀦𑁆𑀢𑁂 𑀘, 𑀧𑀭𑀯𑀸𑀤𑀧𑁆𑀧𑀫𑀤𑁆𑀤𑀦𑁂;

𑀯𑀻𑀲𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀢𑀢𑁄 𑀯𑀺𑀓𑀼𑀩𑁆𑀩𑀦𑀁 𑀓𑀢𑁆𑀯𑀸, 𑀚𑀺𑀦𑁄 𑀤𑁂𑀯𑀧𑀼𑀭𑀁 𑀕𑀢𑁄;

𑀯𑀲𑀢𑁂 𑀢𑀢𑁆𑀣 𑀲𑀫𑁆𑀩𑀼𑀤𑁆𑀥𑁄, 𑀲𑀺𑀮𑀸𑀬 𑀧𑀡𑁆𑀟𑀼𑀓𑀫𑁆𑀩𑀮𑁂.

𑁬. 𑀧𑀓𑀭𑀡𑁂 𑀲𑀢𑁆𑀢 𑀤𑁂𑀲𑁂𑀦𑁆𑀢𑁄, 𑀯𑀲𑁆𑀲𑀁 𑀯𑀲𑀢𑀺 𑀲𑁄 𑀫𑀼𑀦𑀺;

𑀤𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁭. 𑀢𑀲𑁆𑀲𑀸𑀧𑀺 𑀤𑁂𑀯𑀤𑁂𑀯𑀲𑁆𑀲, 𑀏𑀓𑁄 𑀆𑀲𑀺 𑀲𑀫𑀸𑀕𑀫𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮. 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀢𑀤𑀸 𑀆𑀲𑀺 𑀲𑀫𑀸𑀕𑀫𑁄;

𑀑𑀖𑀸𑀦𑀫𑀢𑀺𑀓𑁆𑀓𑀦𑁆𑀢𑀸𑀦𑀁, 𑀪𑀺𑀚𑁆𑀚𑀺𑀢𑀸𑀦𑀜𑁆𑀘 𑀫𑀘𑁆𑀘𑀼𑀬𑀸.

𑁯. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀧𑀩𑁆𑀩𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀲𑀫𑁆𑀧𑀦𑁆𑀦𑁄, 𑀅𑀦𑀦𑁆𑀢𑀩𑀮𑀯𑀸𑀳𑀦𑁄.

𑁧𑁦. 𑀲𑀫𑁆𑀩𑀼𑀤𑁆𑀥𑀤𑀲𑁆𑀲𑀦𑀁 𑀕𑀦𑁆𑀢𑁆𑀯𑀸, 𑀲𑀼𑀢𑁆𑀯𑀸 𑀥𑀫𑁆𑀫𑀫𑀦𑀼𑀢𑁆𑀢𑀭𑀁;

𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀚𑀺𑀦𑀲𑀗𑁆𑀖𑀁, 𑀤𑀸𑀦𑀁 𑀤𑀢𑁆𑀯𑀸 𑀬𑀤𑀺𑀘𑁆𑀙𑀓𑀁.

𑁧𑁧. 𑀧𑀝𑁆𑀝𑀼𑀡𑁆𑀡𑀁 𑀘𑀻𑀦𑀧𑀝𑁆𑀝𑀜𑁆𑀘, 𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀫𑁆𑀧𑀺 𑀘;

𑀲𑁄𑀯𑀡𑁆𑀡𑀧𑀸𑀤𑀼𑀓𑀜𑁆𑀘𑁂𑀯, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀲𑀸𑀯𑀓𑁂.

𑁧𑁨. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩. ‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁪. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁫. 𑀲𑀩𑁆𑀩𑀜𑁆𑀜𑀼𑀢𑀁 𑀕𑀯𑁂𑀲𑀦𑁆𑀢𑁄, 𑀤𑀸𑀦𑀁 𑀤𑀢𑁆𑀯𑀸 𑀦𑀭𑀼𑀢𑁆𑀢𑀫𑁂;

𑀑𑀳𑀸𑀬𑀸𑀳𑀁 𑀫𑀳𑀸𑀭𑀚𑁆𑀚𑀁, 𑀧𑀩𑁆𑀩𑀚𑀺𑀁 𑀚𑀺𑀦𑀲𑀦𑁆𑀢𑀺𑀓𑁂 [𑀢𑀲𑁆𑀲 𑀲𑀦𑁆𑀢𑀺𑀓𑁂 (𑀲𑀻.)].

𑁧𑁬. 𑀦𑀕𑀭𑀁 𑀲𑁄𑀪𑀯𑀢𑀻 𑀦𑀸𑀫, 𑀲𑁄𑀪𑁄 𑀦𑀸𑀫𑀸𑀲𑀺 𑀔𑀢𑁆𑀢𑀺𑀬𑁄;

𑀯𑀲𑀢𑁂 𑀢𑀢𑁆𑀣 𑀦𑀕𑀭𑁂, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀳𑀸𑀓𑀼𑀮𑀁.

𑁧𑁭. 𑀩𑁆𑀭𑀸𑀳𑁆𑀫𑀡𑁄 𑀬𑀜𑁆𑀜𑀤𑀢𑁆𑀢𑁄 𑀘, 𑀆𑀲𑀺 𑀩𑀼𑀤𑁆𑀥𑀲𑁆𑀲 𑀲𑁄 𑀧𑀺𑀢𑀸;

𑀉𑀢𑁆𑀢𑀭𑀸 𑀦𑀸𑀫 𑀚𑀦𑀺𑀓𑀸, 𑀓𑁄𑀡𑀸𑀕𑀫𑀦𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁮. 𑀢𑀻𑀡𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀢𑀼𑀲𑀺𑀢𑀲𑀦𑁆𑀢𑀼𑀲𑀺𑀢𑀲𑀦𑁆𑀢𑀼𑀝𑁆𑀞𑀸, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁯. 𑀅𑀦𑀽𑀦𑀲𑁄𑀴𑀲𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀭𑀼𑀘𑀺𑀕𑀢𑁆𑀢𑀸 𑀦𑀸𑀫 𑀦𑀸𑀭𑀻, 𑀲𑀢𑁆𑀣𑀯𑀸𑀳𑁄 𑀦𑀸𑀫 𑀅𑀢𑁆𑀭𑀚𑁄.

𑁨𑁦. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀙𑀫𑀸𑀲𑀁 𑀧𑀥𑀸𑀦𑀘𑀸𑀭𑀁, 𑀅𑀘𑀭𑀻 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁨𑁧. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀓𑁄𑀡𑀸𑀕𑀫𑀦𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀫𑀺𑀕𑀤𑀸𑀬𑁂 𑀦𑀭𑀼𑀢𑁆𑀢𑀫𑁄.

𑁨𑁨. 𑀪𑀺𑀬𑁆𑀬𑀲𑁄 𑀉𑀢𑁆𑀢𑀭𑁄 𑀦𑀸𑀫, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑁄𑀢𑁆𑀣𑀺𑀚𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀓𑁄𑀡𑀸𑀕𑀫𑀦𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁩. 𑀲𑀫𑀼𑀤𑁆𑀤𑀸 𑀉𑀢𑁆𑀢𑀭𑀸 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀉𑀤𑀼𑀫𑁆𑀩𑀭𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁪. 𑀉𑀕𑁆𑀕𑁄 𑀘 𑀲𑁄𑀫𑀤𑁂𑀯𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀲𑀻𑀯𑀮𑀸 𑀘𑁂𑀯 𑀲𑀸𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁫. 𑀉𑀘𑁆𑀘𑀢𑁆𑀢𑀦𑁂𑀦 𑀲𑁄 𑀩𑀼𑀤𑁆𑀥𑁄, 𑀢𑀺𑀁𑀲𑀳𑀢𑁆𑀣𑀲𑀫𑀼𑀕𑁆𑀕𑀢𑁄;

𑀉𑀓𑁆𑀓𑀸𑀫𑀼𑀔𑁂 𑀬𑀣𑀸 𑀓𑀫𑁆𑀩𑀼, 𑀏𑀯𑀁 𑀭𑀁𑀲𑀻𑀳𑀺 𑀫𑀡𑁆𑀟𑀺𑀢𑁄.

𑁨𑁬. 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀩𑀼𑀤𑁆𑀥𑀲𑁆𑀲 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁭. 𑀥𑀫𑁆𑀫𑀘𑁂𑀢𑀺𑀁 𑀲𑀫𑀼𑀲𑁆𑀲𑁂𑀢𑁆𑀯𑀸, 𑀥𑀫𑁆𑀫𑀤𑀼𑀲𑁆𑀲𑀯𑀺𑀪𑀽𑀲𑀺𑀢𑀁;

𑀥𑀫𑁆𑀫𑀧𑀼𑀧𑁆𑀨𑀕𑀼𑀴𑀁 𑀓𑀢𑁆𑀯𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁮. 𑀫𑀳𑀸𑀯𑀺𑀮𑀸𑀲𑁄 𑀢𑀲𑁆𑀲 𑀚𑀦𑁄, 𑀲𑀺𑀭𑀺𑀥𑀫𑁆𑀫𑀧𑁆𑀧𑀓𑀸𑀲𑀦𑁄;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁨𑁯. 𑀓𑁄𑀡𑀸𑀕𑀫𑀦𑁄 𑀲𑀫𑁆𑀩𑀼𑀤𑁆𑀥𑁄, 𑀧𑀩𑁆𑀩𑀢𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀥𑀸𑀢𑀼𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑀢𑁄𑀢𑀺.

𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀢𑁂𑀯𑀻𑀲𑀢𑀺𑀫𑁄.