𑁧𑁯. 𑀢𑀺𑀲𑁆𑀲𑀩𑀼𑀤𑁆𑀥𑀯𑀁𑀲𑁄

𑁧. 𑀲𑀺𑀤𑁆𑀥𑀢𑁆𑀣𑀲𑁆𑀲 𑀅𑀧𑀭𑁂𑀦, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀅𑀦𑀦𑁆𑀢𑀢𑁂𑀚𑁄 𑀅𑀫𑀺𑀢𑀬𑀲𑁄, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄.

𑁨. 𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸, 𑀑𑀪𑀸𑀲𑁂𑀢𑁆𑀯𑀸 𑀲𑀤𑁂𑀯𑀓𑀁;

𑀅𑀦𑀼𑀓𑀫𑁆𑀧𑀓𑁄 𑀫𑀳𑀸𑀯𑀻𑀭𑁄, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

𑁩. 𑀢𑀲𑁆𑀲𑀸𑀧𑀺 𑀅𑀢𑀼𑀮𑀸 𑀇𑀤𑁆𑀥𑀺, 𑀅𑀢𑀼𑀮𑀁 𑀲𑀻𑀮𑀁 𑀲𑀫𑀸𑀥𑀺 𑀘;

𑀲𑀩𑁆𑀩𑀢𑁆𑀣 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁪. 𑀲𑁄 𑀩𑀼𑀤𑁆𑀥𑁄 𑀤𑀲𑀲𑀳𑀲𑁆𑀲𑀺𑀫𑁆𑀳𑀺, 𑀯𑀺𑀜𑁆𑀜𑀸𑀧𑁂𑀲𑀺 𑀕𑀺𑀭𑀁 𑀲𑀼𑀘𑀺𑀁;

𑀓𑁄𑀝𑀺𑀲𑀢𑀸𑀦𑀺 𑀅𑀪𑀺𑀲𑀫𑀺𑀁𑀲𑀼, 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂.

𑁫. 𑀤𑀼𑀢𑀺𑀬𑁄 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑁄 𑀲𑀝𑁆𑀞𑀺𑀓𑁄𑀝𑀺𑀬𑁄;

𑀩𑀦𑁆𑀥𑀦𑀸𑀢𑁄 𑀧𑀫𑁄𑀘𑁂𑀲𑀺, 𑀲𑀢𑁆𑀢𑁂 [𑀲𑀫𑁆𑀧𑀢𑁆𑀢𑁂 (𑀓.)] 𑀦𑀭𑀫𑀭𑀽 𑀢𑀤𑀸.

𑁬. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀢𑀺𑀲𑁆𑀲𑁂 𑀮𑁄𑀓𑀕𑁆𑀕𑀦𑀸𑀬𑀓𑁂;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁭. 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁮. 𑀅𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀧𑀼𑀧𑁆𑀨𑀺𑀢𑀸𑀦𑀁 𑀯𑀺𑀫𑀼𑀢𑁆𑀢𑀺𑀬𑀸.

𑁯. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀲𑀼𑀚𑀸𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀳𑀸𑀪𑁄𑀕𑀁 𑀙𑀟𑁆𑀟𑀬𑀺𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀇𑀲𑀺𑀧𑀩𑁆𑀩𑀚𑀁.

𑁧𑁦. 𑀫𑀬𑀺 𑀧𑀩𑁆𑀩𑀚𑀺𑀢𑁂 𑀲𑀦𑁆𑀢𑁂, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄;

𑀩𑀼𑀤𑁆𑀥𑁄𑀢𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦, 𑀧𑀻𑀢𑀺 𑀫𑁂 𑀉𑀧𑀧𑀚𑁆𑀚𑀣.

𑁧𑁧. 𑀤𑀺𑀩𑁆𑀩𑀁 𑀫𑀦𑁆𑀤𑀸𑀭𑀯𑀁 𑀧𑀼𑀧𑁆𑀨𑀁, 𑀧𑀤𑀼𑀫𑀁 𑀧𑀸𑀭𑀺𑀙𑀢𑁆𑀢𑀓𑀁;

𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀥𑀼𑀦𑀫𑀸𑀦𑁄 𑀉𑀧𑀸𑀕𑀫𑀺𑀁.

𑁧𑁨. 𑀘𑀢𑀼𑀯𑀡𑁆𑀡𑀧𑀭𑀺𑀯𑀼𑀢𑀁, 𑀢𑀺𑀲𑁆𑀲𑀁 𑀮𑁄𑀓𑀕𑁆𑀕𑀦𑀸𑀬𑀓𑀁;

𑀢𑀫𑀳𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸, 𑀫𑀢𑁆𑀣𑀓𑁂 𑀥𑀸𑀭𑀬𑀺𑀁 𑀚𑀺𑀦𑀁.

𑁧𑁩. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀚𑀦𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁪. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁫. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁬. 𑀔𑁂𑀫𑀓𑀁 𑀦𑀸𑀫 𑀦𑀕𑀭𑀁, 𑀚𑀦𑀲𑀦𑁆𑀥𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀧𑀤𑀼𑀫𑀸 𑀦𑀸𑀫 𑀚𑀦𑀺𑀓𑀸, 𑀢𑀺𑀲𑁆𑀲𑀲𑁆𑀲 𑀘 𑀫𑀳𑁂𑀲𑀺𑀦𑁄.

𑁧𑁭. 𑀲𑀢𑁆𑀢𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀕𑀼𑀳𑀸𑀲𑁂𑀮 𑀦𑀸𑀭𑀺𑀲𑀬 𑀦𑀺𑀲𑀪𑀸 [𑀓𑀼𑀫𑀼𑀤𑁄 𑀦𑀸𑀴𑀺𑀬𑁄 𑀧𑀤𑀼𑀫𑁄 (𑀓.)], 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁮. 𑀲𑀫𑀢𑀺𑀁𑀲𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑀼𑀪𑀤𑁆𑀤𑀸𑀦𑀸𑀫𑀺𑀓𑀸 𑀦𑀸𑀭𑀻, 𑀆𑀦𑀦𑁆𑀤𑁄 𑀦𑀸𑀫 𑀅𑀢𑁆𑀭𑀚𑁄.

𑁧𑁯. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀅𑀲𑁆𑀲𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀅𑀝𑁆𑀞𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁨𑁦. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀬𑀲𑀯𑀢𑀺𑀬𑀫𑀼𑀢𑁆𑀢𑀫𑁂.

𑁨𑁧. 𑀩𑁆𑀭𑀳𑁆𑀫𑀤𑁂𑀯𑁄 𑀉𑀤𑀬𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀫𑀗𑁆𑀕𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀢𑀺𑀲𑁆𑀲𑀲𑁆𑀲 𑀘 𑀫𑀳𑁂𑀲𑀺𑀦𑁄.

𑁨𑁨. 𑀨𑀼𑀲𑁆𑀲𑀸 𑀘𑁂𑀯 𑀲𑀼𑀤𑀢𑁆𑀢𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀲𑀦𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁩. 𑀲𑀫𑁆𑀩𑀮𑁄 𑀘 𑀲𑀺𑀭𑀺𑀫𑀸 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀓𑀺𑀲𑀸𑀕𑁄𑀢𑀫𑀻 𑀉𑀧𑀲𑁂𑀦𑀸, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁪. 𑀲𑁄 𑀩𑀼𑀤𑁆𑀥𑁄 𑀲𑀝𑁆𑀞𑀺𑀭𑀢𑀦𑁄, 𑀅𑀳𑀼 𑀉𑀘𑁆𑀘𑀢𑁆𑀢𑀦𑁂 𑀚𑀺𑀦𑁄;

𑀅𑀦𑀽𑀧𑀫𑁄 𑀅𑀲𑀤𑀺𑀲𑁄, 𑀳𑀺𑀫𑀯𑀸 𑀯𑀺𑀬 𑀤𑀺𑀲𑁆𑀲𑀢𑀺.

𑁨𑁫. 𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀆𑀬𑀼 𑀆𑀲𑀺 𑀅𑀦𑀼𑀢𑁆𑀢𑀭𑁄;

𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀮𑁄𑀓𑁂 𑀅𑀝𑁆𑀞𑀸𑀲𑀺 𑀘𑀓𑁆𑀔𑀼𑀫𑀸.

𑁨𑁬. 𑀉𑀢𑁆𑀢𑀫𑀁 𑀧𑀯𑀭𑀁 𑀲𑁂𑀝𑁆𑀞𑀁, 𑀅𑀦𑀼𑀪𑁄𑀢𑁆𑀯𑀸 𑀫𑀳𑀸𑀬𑀲𑀁;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁭. 𑀯𑀮𑀸𑀳𑀓𑁄𑀯 𑀅𑀦𑀺𑀮𑁂𑀦, 𑀲𑀽𑀭𑀺𑀬𑁂𑀦 𑀯𑀺𑀬 𑀉𑀲𑁆𑀲𑀯𑁄;

𑀅𑀦𑁆𑀥𑀓𑀸𑀭𑁄𑀯 𑀧𑀤𑀻𑀧𑁂𑀦, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁮. 𑀢𑀺𑀲𑁆𑀲𑁄 𑀚𑀺𑀦𑀯𑀭𑁄 𑀩𑀼𑀤𑁆𑀥𑁄, 𑀦𑀦𑁆𑀤𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯𑀲𑁆𑀲 𑀚𑀺𑀦𑀣𑀽𑀧𑁄, 𑀢𑀻𑀡𑀺𑀬𑁄𑀚𑀦𑀫𑀼𑀕𑁆𑀕𑀢𑁄𑀢𑀺.

𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀲𑀢𑁆𑀢𑀭𑀲𑀫𑁄.