𑁨𑁦. 𑀨𑀼𑀲𑁆𑀲𑀩𑀼𑀤𑁆𑀥𑀯𑀁𑀲𑁄

𑁧. 𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀅𑀳𑀼 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀅𑀦𑀼𑀧𑀫𑁄 𑀅𑀲𑀫𑀲𑀫𑁄, 𑀨𑀼𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄.

𑁨. 𑀲𑁄𑀧𑀺 𑀲𑀩𑁆𑀩𑀁 𑀢𑀫𑀁 𑀳𑀦𑁆𑀢𑁆𑀯𑀸, 𑀯𑀺𑀚𑀝𑁂𑀢𑁆𑀯𑀸 𑀫𑀳𑀸𑀚𑀝𑀁;

𑀲𑀤𑁂𑀯𑀓𑀁 𑀢𑀧𑁆𑀧𑀬𑀦𑁆𑀢𑁄, 𑀅𑀪𑀺𑀯𑀲𑁆𑀲𑀺 𑀅𑀫𑀢𑀫𑁆𑀩𑀼𑀦𑀸.

𑁩. 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀨𑀼𑀲𑁆𑀲𑁂 𑀦𑀓𑁆𑀔𑀢𑁆𑀢𑀫𑀗𑁆𑀕𑀮𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪. 𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼;

𑀅𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀨𑀼𑀲𑁆𑀲𑀲𑁆𑀲𑀸𑀧𑀺 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁬. 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁭. 𑀘𑀢𑁆𑀢𑀸𑀭𑀻𑀲𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀯𑁄𑀘𑁆𑀙𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀦𑀁.

𑁮. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀔𑀢𑁆𑀢𑀺𑀬𑁄;

𑀙𑀟𑁆𑀟𑀬𑀺𑀢𑁆𑀯𑀸 𑀫𑀳𑀸𑀭𑀚𑁆𑀚𑀁, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁯. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀨𑀼𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁦. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁧. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁨. 𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀜𑁆𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁩. 𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀩𑁆𑀭𑀳𑁆𑀫𑀁 𑀪𑀸𑀯𑁂𑀢𑁆𑀯 𑀪𑀸𑀯𑀦𑀁;

𑀅𑀪𑀺𑀜𑁆𑀜𑀸𑀲𑀼 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳𑀁.

𑁧𑁪. 𑀓𑀸𑀲𑀺𑀓𑀁 𑀦𑀸𑀫 𑀦𑀕𑀭𑀁, 𑀚𑀬𑀲𑁂𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀺𑀭𑀺𑀫𑀸 𑀦𑀸𑀫 𑀚𑀦𑀺𑀓𑀸, 𑀨𑀼𑀲𑁆𑀲𑀲𑁆𑀲𑀸𑀧𑀺 𑀫𑀳𑁂𑀲𑀺𑀦𑁄.

𑁧𑁫. 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀕𑀭𑀼𑀴𑀧𑀓𑁆𑀔 𑀳𑀁𑀲 𑀲𑀼𑀯𑀡𑁆𑀡𑀪𑀸𑀭𑀸, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁬. 𑀢𑀺𑀁𑀲𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀓𑀺𑀲𑀸𑀕𑁄𑀢𑀫𑀻 𑀦𑀸𑀫 𑀦𑀸𑀭𑀻, 𑀅𑀦𑀽𑀧𑀫𑁄 𑀦𑀸𑀫 𑀅𑀢𑁆𑀭𑀚𑁄.

𑁧𑁭. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀙𑀫𑀸𑀲𑀁 𑀧𑀥𑀸𑀦𑀘𑀸𑀭𑀁, 𑀅𑀘𑀭𑀻 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁧𑁮. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀨𑀼𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀫𑀺𑀕𑀤𑀸𑀬𑁂 𑀦𑀭𑀼𑀢𑁆𑀢𑀫𑁄.

𑁧𑁯. 𑀲𑀼𑀭𑀓𑁆𑀔𑀺𑀢𑁄 𑀥𑀫𑁆𑀫𑀲𑁂𑀦𑁄, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀪𑀺𑀬𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀨𑀼𑀲𑁆𑀲𑀲𑁆𑀲𑀸𑀧𑀺 𑀫𑀳𑁂𑀲𑀺𑀦𑁄.

𑁨𑁦. 𑀘𑀸𑀮𑀸 𑀘 𑀉𑀧𑀘𑀸𑀮𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀆𑀫𑀡𑁆𑀟𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁧. 𑀥𑀦𑀜𑁆𑀘𑀬𑁄 𑀯𑀺𑀲𑀸𑀔𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀧𑀤𑀼𑀫𑀸 𑀘𑁂𑀯 𑀦𑀸𑀕𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁨. 𑀅𑀝𑁆𑀞𑀧𑀡𑁆𑀡𑀸𑀲𑀭𑀢𑀦𑀁, 𑀲𑁄𑀧𑀺 𑀅𑀘𑁆𑀘𑀼𑀕𑁆𑀕𑀢𑁄 𑀫𑀼𑀦𑀺;

𑀲𑁄𑀪𑀢𑁂 𑀲𑀢𑀭𑀁𑀲𑀻𑀯, 𑀉𑀴𑀼𑀭𑀸𑀚𑀸𑀯 𑀧𑀽𑀭𑀺𑀢𑁄.

𑁨𑁩. 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁪. 𑀑𑀯𑀤𑀺𑀢𑁆𑀯𑀸 𑀩𑀳𑀽 𑀲𑀢𑁆𑀢𑁂, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀩𑀳𑀽 𑀚𑀦𑁂;

𑀲𑁄𑀧𑀺 𑀲𑀢𑁆𑀣𑀸 𑀅𑀢𑀼𑀮𑀬𑀲𑁄, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁫. 𑀨𑀼𑀲𑁆𑀲𑁄 𑀚𑀺𑀦𑀯𑀭𑁄 𑀲𑀢𑁆𑀣𑀸, 𑀲𑁂𑀦𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀥𑀸𑀢𑀼𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑀢𑁄𑀢𑀺.

𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀅𑀝𑁆𑀞𑀸𑀭𑀲𑀫𑁄.