𑁧𑁮. 𑀲𑀺𑀤𑁆𑀥𑀢𑁆𑀣𑀩𑀼𑀤𑁆𑀥𑀯𑀁𑀲𑁄

𑁧. 𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀅𑀧𑀭𑁂𑀦, 𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀦𑀸𑀬𑀓𑁄;

𑀦𑀺𑀳𑀦𑀺𑀢𑁆𑀯𑀸 𑀢𑀫𑀁 𑀲𑀩𑁆𑀩𑀁, 𑀲𑀽𑀭𑀺𑀬𑁄 𑀅𑀩𑁆𑀪𑀼𑀕𑁆𑀕𑀢𑁄 𑀬𑀣𑀸.

𑁨. 𑀲𑁄𑀧𑀺 𑀧𑀢𑁆𑀯𑀸𑀦 𑀲𑀫𑁆𑀩𑁄𑀥𑀺𑀁, 𑀲𑀦𑁆𑀢𑀸𑀭𑁂𑀦𑁆𑀢𑁄 𑀲𑀤𑁂𑀯𑀓𑀁;

𑀅𑀪𑀺𑀯𑀲𑁆𑀲𑀺 𑀥𑀫𑁆𑀫𑀫𑁂𑀖𑁂𑀦, 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀲𑀤𑁂𑀯𑀓𑀁.

𑁩. 𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀅𑀳𑁂𑀲𑀼𑀁 𑀅𑀪𑀺𑀲𑀫𑀬𑀸 𑀢𑀬𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪. 𑀧𑀼𑀦𑀸𑀧𑀭𑀁 𑀪𑀻𑀫𑀭𑀣𑁂 [𑀳𑀺𑀫𑀭𑀝𑁆𑀞𑁂 (𑀓.)], 𑀬𑀤𑀸 𑀆𑀳𑀦𑀺 𑀤𑀼𑀦𑁆𑀤𑀼𑀪𑀺𑀁;

𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀬𑀤𑀸 𑀩𑀼𑀤𑁆𑀥𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀯𑁂𑀪𑀸𑀭𑁂 𑀲𑁄 𑀧𑀼𑀭𑀼𑀢𑁆𑀢𑀫𑁂;

𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀢𑀲𑁆𑀫𑀺𑀫𑁆𑀧𑀺 𑀤𑁆𑀯𑀺𑀧𑀤𑀼𑀢𑁆𑀢𑀫𑁂;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁭. 𑀓𑁄𑀝𑀺𑀲𑀢𑀸𑀦𑀁 𑀦𑀯𑀼𑀢𑀻𑀦𑀁 [𑀦𑀯𑀼𑀢𑀺𑀬𑀸 (𑀲𑁆𑀬𑀸. 𑀓𑀁.)], 𑀅𑀲𑀻𑀢𑀺𑀬𑀸𑀧𑀺 𑀘 𑀓𑁄𑀝𑀺𑀦𑀁;

𑀏𑀢𑁂 𑀆𑀲𑀼𑀁 𑀢𑀬𑁄 𑀞𑀸𑀦𑀸, 𑀯𑀺𑀫𑀮𑀸𑀦𑀁 𑀲𑀫𑀸𑀕𑀫𑁂.

𑁮. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀫𑀗𑁆𑀕𑀮𑁄 𑀦𑀸𑀫 𑀢𑀸𑀧𑀲𑁄;

𑀉𑀕𑁆𑀕𑀢𑁂𑀚𑁄 𑀤𑀼𑀧𑁆𑀧𑀲𑀳𑁄, 𑀅𑀪𑀺𑀜𑁆𑀜𑀸𑀩𑀮𑀲𑀫𑀸𑀳𑀺𑀢𑁄.

𑁯. 𑀚𑀫𑁆𑀩𑀼𑀢𑁄 𑀨𑀮𑀫𑀸𑀦𑁂𑀢𑁆𑀯𑀸 [𑀨𑀮𑀫𑀸𑀳𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀲𑀺𑀤𑁆𑀥𑀢𑁆𑀣𑀲𑁆𑀲 𑀅𑀤𑀸𑀲𑀳𑀁;

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁦. ‘‘𑀧𑀲𑁆𑀲𑀣 𑀇𑀫𑀁 𑀢𑀸𑀧𑀲𑀁, 𑀚𑀝𑀺𑀮𑀁 𑀉𑀕𑁆𑀕𑀢𑀸𑀧𑀦𑀁;

𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁧. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁨. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁩. 𑀯𑁂𑀪𑀸𑀭𑀁 𑀦𑀸𑀫 𑀦𑀕𑀭𑀁, 𑀉𑀤𑁂𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀨𑀲𑁆𑀲𑀸 𑀦𑀸𑀫 𑀚𑀦𑀺𑀓𑀸, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁪. 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀓𑁄𑀓𑀸𑀲𑀼𑀧𑁆𑀧𑀮𑀓𑁄𑀓𑀦𑀤𑀸, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁫. 𑀢𑀺𑀲𑁄𑀴𑀲𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑁄𑀫𑀦𑀲𑁆𑀲𑀸 𑀦𑀸𑀫 𑀲𑀸 𑀦𑀸𑀭𑀻, 𑀅𑀦𑀼𑀧𑀫𑁄 𑀦𑀸𑀫 𑀅𑀢𑁆𑀭𑀚𑁄.

𑁧𑁬. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀲𑀺𑀯𑀺𑀓𑀸𑀬𑀸𑀪𑀺𑀦𑀺𑀓𑁆𑀔𑀫𑀺;

𑀅𑀦𑀽𑀦𑀤𑀲𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁧𑁭. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀫𑀺𑀕𑀤𑀸𑀬𑁂 𑀦𑀭𑀼𑀢𑁆𑀢𑀫𑁄.

𑁧𑁮. 𑀲𑀫𑁆𑀩𑀮𑁄 𑀘 𑀲𑀼𑀫𑀺𑀢𑁆𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀭𑁂𑀯𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁯. 𑀲𑀻𑀯𑀮𑀸 𑀘 𑀲𑀼𑀭𑀸𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀓𑀡𑀺𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁦. 𑀲𑀼𑀧𑁆𑀧𑀺𑀬𑁄 𑀘 𑀲𑀫𑀼𑀤𑁆𑀤𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀭𑀫𑁆𑀫𑀸 𑀘𑁂𑀯 𑀲𑀼𑀭𑀫𑁆𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁧. 𑀲𑁄 𑀩𑀼𑀤𑁆𑀥𑁄 𑀲𑀝𑁆𑀞𑀺𑀭𑀢𑀦𑀁, 𑀅𑀳𑁄𑀲𑀺 𑀦𑀪𑀫𑀼𑀕𑁆𑀕𑀢𑁄;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀺.

𑁨𑁨. 𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀅𑀢𑀼𑀮𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀮𑁄𑀓𑁂 𑀅𑀝𑁆𑀞𑀸𑀲𑀺 𑀘𑀓𑁆𑀔𑀼𑀫𑀸.

𑁨𑁩. 𑀯𑀺𑀧𑀼𑀮𑀁 𑀧𑀪𑀁 𑀤𑀲𑁆𑀲𑀬𑀺𑀢𑁆𑀯𑀸, 𑀧𑀼𑀧𑁆𑀨𑀸𑀧𑁂𑀢𑁆𑀯𑀸𑀦 𑀲𑀸𑀯𑀓𑁂;

𑀯𑀺𑀮𑀸𑀲𑁂𑀢𑁆𑀯𑀸 𑀲𑀫𑀸𑀧𑀢𑁆𑀬𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁪. 𑀲𑀺𑀤𑁆𑀥𑀢𑁆𑀣𑁄 𑀫𑀼𑀦𑀺𑀯𑀭𑁄 𑀩𑀼𑀤𑁆𑀥𑁄, 𑀅𑀦𑁄𑀫𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯𑀲𑁆𑀲 𑀣𑀽𑀧𑀯𑀭𑁄, 𑀘𑀢𑀼𑀬𑁄𑀚𑀦𑀫𑀼𑀕𑁆𑀕𑀢𑁄𑀢𑀺.

𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀲𑁄𑀴𑀲𑀫𑁄.