𑁧𑁭. 𑀥𑀫𑁆𑀫𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑁄

𑁧. 𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀥𑀫𑁆𑀫𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸, 𑀅𑀢𑀺𑀭𑁄𑀘𑀢𑀺 𑀲𑀤𑁂𑀯𑀓𑁂.

𑁨. 𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁩. 𑀬𑀤𑀸 𑀩𑀼𑀤𑁆𑀥𑁄 𑀥𑀫𑁆𑀫𑀤𑀲𑁆𑀲𑀻, 𑀯𑀺𑀦𑁂𑀲𑀺 𑀲𑀜𑁆𑀚𑀬𑀁 𑀇𑀲𑀺𑀁;

𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁪. 𑀬𑀤𑀸 𑀲𑀓𑁆𑀓𑁄 𑀉𑀧𑀸𑀕𑀜𑁆𑀙𑀺, 𑀲𑀧𑀭𑀺𑀲𑁄 𑀯𑀺𑀦𑀸𑀬𑀓𑀁;

𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀢𑀲𑁆𑀲𑀸𑀧𑀺 𑀤𑁂𑀯𑀤𑁂𑀯𑀲𑁆𑀲, 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀅𑀳𑀼𑀁 [𑀆𑀲𑀼𑀁 (𑀲𑀻. 𑀲𑁆𑀬𑀸.)];

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁬. 𑀬𑀤𑀸 𑀩𑀼𑀤𑁆𑀥𑁄 𑀥𑀫𑁆𑀫𑀤𑀲𑁆𑀲𑀻, 𑀲𑀭𑀡𑁂 𑀯𑀲𑁆𑀲𑀁 𑀉𑀧𑀸𑀕𑀫𑀺;

𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 [𑀓𑁄𑀝𑀺𑀲𑀳𑀲𑁆𑀲𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁.)], 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁭. 𑀧𑀼𑀦𑀸𑀧𑀭𑀁 𑀬𑀤𑀸 𑀩𑀼𑀤𑁆𑀥𑁄, 𑀤𑁂𑀯𑀢𑁄 𑀏𑀢𑀺 𑀫𑀸𑀦𑀼𑀲𑀁;

𑀢𑀤𑀸𑀧𑀺 𑀲𑀢𑀓𑁄𑀝𑀻𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁮. 𑀧𑀼𑀦𑀸𑀧𑀭𑀁 𑀬𑀤𑀸 𑀩𑀼𑀤𑁆𑀥𑁄, 𑀧𑀓𑀸𑀲𑁂𑀲𑀺 𑀥𑀼𑀢𑁂 𑀕𑀼𑀡𑁂;

𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁯. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀲𑀓𑁆𑀓𑁄 𑀆𑀲𑀺𑀁 𑀧𑀼𑀭𑀺𑀦𑁆𑀤𑀤𑁄;

𑀤𑀺𑀩𑁆𑀩𑁂𑀦 𑀕𑀦𑁆𑀥𑀫𑀸𑀮𑁂𑀦, 𑀢𑀼𑀭𑀺𑀬𑁂𑀦𑀸𑀪𑀺𑀧𑀽𑀚𑀬𑀺𑀁.

𑁧𑁦. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀤𑁂𑀯𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁧. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁨. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁩. 𑀲𑀭𑀡𑀁 𑀦𑀸𑀫 𑀦𑀕𑀭𑀁, 𑀲𑀭𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀦𑀦𑁆𑀤𑀸 𑀦𑀸𑀫 𑀚𑀦𑀺𑀓𑀸, 𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁪. 𑀅𑀝𑁆𑀞𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀅𑀭𑀚𑁄 𑀯𑀺𑀭𑀚𑁄 𑀲𑀼𑀤𑀲𑁆𑀲𑀦𑁄, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁫. 𑀢𑀺𑀘𑀢𑁆𑀢𑀸𑀭𑀻𑀲𑀲𑀳𑀲𑁆𑀲𑀸𑀦𑀺 [𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸𑀦𑀺 (𑀲𑁆𑀬𑀸. 𑀓𑀁.)], 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀺𑀘𑀺𑀓𑁄𑀴𑀺 𑀦𑀸𑀫 𑀦𑀸𑀭𑀻, 𑀅𑀢𑁆𑀭𑀚𑁄 𑀧𑀼𑀜𑁆𑀜𑀯𑀟𑁆𑀠𑀦𑁄.

𑁧𑁬. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀧𑀸𑀲𑀸𑀤𑁂𑀦𑀸𑀪𑀺𑀦𑀺𑀓𑁆𑀔𑀫𑀺;

𑀲𑀢𑁆𑀢𑀸𑀳𑀁 𑀧𑀥𑀸𑀦𑀘𑀸𑀭𑀁, 𑀅𑀘𑀭𑀻 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁧𑁭. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀥𑀫𑁆𑀫𑀤𑀲𑁆𑀲𑀻 𑀦𑀭𑀸𑀲𑀪𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀫𑀺𑀕𑀤𑀸𑀬𑁂 𑀦𑀭𑀼𑀢𑁆𑀢𑀫𑁄.

𑁧𑁮. 𑀧𑀤𑀼𑀫𑁄 𑀨𑀼𑀲𑁆𑀲𑀤𑁂𑀯𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀼𑀦𑁂𑀢𑁆𑀢𑁄 [𑀲𑀼𑀤𑀢𑁆𑀢𑁄 (𑀲𑁆𑀬𑀸. 𑀓𑀁.)] 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁯. 𑀔𑁂𑀫𑀸 𑀘 𑀲𑀘𑁆𑀘𑀦𑀸𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀩𑀺𑀫𑁆𑀩𑀺𑀚𑀸𑀮𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁦. 𑀲𑀼𑀪𑀤𑁆𑀤𑁄 𑀓𑀝𑀺𑀲𑁆𑀲𑀳𑁄 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀲𑀸𑀴𑀺𑀬𑀸 [𑀲𑀸𑀮𑀺𑀲𑀸 (𑀲𑁆𑀬𑀸. 𑀓𑀁.)] 𑀘 𑀓𑀴𑀺𑀬𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁧. 𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀅𑀲𑀻𑀢𑀺𑀳𑀢𑁆𑀣𑀫𑀼𑀕𑁆𑀕𑀢𑁄;

𑀅𑀢𑀺𑀭𑁄𑀘𑀢𑀺 𑀢𑁂𑀚𑁂𑀦, 𑀤𑀲𑀲𑀳𑀲𑁆𑀲𑀺𑀫𑁆𑀳𑀺 𑀥𑀸𑀢𑀼𑀬𑀸.

𑁨𑁨. 𑀲𑀼𑀨𑀼𑀮𑁆𑀮𑁄 𑀲𑀸𑀮𑀭𑀸𑀚𑀸𑀯, 𑀯𑀺𑀚𑁆𑀚𑀽𑀯 𑀕𑀕𑀦𑁂 𑀬𑀣𑀸;

𑀫𑀚𑁆𑀛𑀦𑁆𑀳𑀺𑀓𑁂𑀯 𑀲𑀽𑀭𑀺𑀬𑁄, 𑀏𑀯𑀁 𑀲𑁄 𑀉𑀧𑀲𑁄𑀪𑀣.

𑁨𑁩. 𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀲𑀫𑀓𑀁 𑀆𑀲𑀺 𑀚𑀻𑀯𑀺𑀢𑀁;

𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀮𑁄𑀓𑁂 𑀅𑀝𑁆𑀞𑀸𑀲𑀺 𑀘𑀓𑁆𑀔𑀼𑀫𑀸.

𑁨𑁪. 𑀑𑀪𑀸𑀲𑀁 𑀤𑀲𑁆𑀲𑀬𑀺𑀢𑁆𑀯𑀸𑀦, 𑀯𑀺𑀫𑀮𑀁 𑀓𑀢𑁆𑀯𑀸𑀦 𑀲𑀸𑀲𑀦𑀁;

𑀘𑀯𑀺 𑀘𑀦𑁆𑀤𑁄𑀯 𑀕𑀕𑀦𑁂, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁫. 𑀥𑀫𑁆𑀫𑀤𑀲𑁆𑀲𑀻 𑀫𑀳𑀸𑀯𑀻𑀭𑁄, 𑀲𑀸𑀮𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯𑀲𑁆𑀲 𑀣𑀽𑀧𑀯𑀭𑁄, 𑀢𑀻𑀡𑀺𑀬𑁄𑀚𑀦𑀫𑀼𑀕𑁆𑀕𑀢𑁄𑀢𑀺.

𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀧𑀦𑁆𑀦𑀭𑀲𑀫𑁄.