𑁧𑁬. 𑀅𑀢𑁆𑀣𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑁄

𑁧. 𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀫𑀳𑀸𑀢𑀫𑀁 𑀦𑀺𑀳𑀦𑁆𑀢𑁆𑀯𑀸𑀦, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁨. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺;

𑀅𑀫𑀢𑁂𑀦 𑀢𑀧𑁆𑀧𑀬𑀻 𑀮𑁄𑀓𑀁, 𑀤𑀲𑀲𑀳𑀲𑁆𑀲𑀺𑀲𑀤𑁂𑀯𑀓𑀁.

𑁩. 𑀢𑀲𑁆𑀲𑀸𑀧𑀺 𑀮𑁄𑀓𑀦𑀸𑀣𑀲𑁆𑀲, 𑀅𑀳𑁂𑀲𑀼𑀁 𑀅𑀪𑀺𑀲𑀫𑀬𑀸 𑀢𑀬𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪. 𑀬𑀤𑀸 𑀩𑀼𑀤𑁆𑀥𑁄 𑀅𑀢𑁆𑀣𑀤𑀲𑁆𑀲𑀻, 𑀘𑀭𑀢𑁂 𑀤𑁂𑀯𑀘𑀸𑀭𑀺𑀓𑀁;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀧𑀼𑀦𑀸𑀧𑀭𑀁 𑀬𑀤𑀸 𑀩𑀼𑀤𑁆𑀥𑁄, 𑀤𑁂𑀲𑁂𑀲𑀺 𑀧𑀺𑀢𑀼𑀲𑀦𑁆𑀢𑀺𑀓𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀢𑀲𑁆𑀲𑀸𑀧𑀺 𑀘 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁭. 𑀅𑀝𑁆𑀞𑀦𑀯𑀼𑀢𑀺𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀝𑁆𑀞𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁮. 𑀅𑀝𑁆𑀞𑀲𑀢𑁆𑀢𑀢𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀯𑀺𑀫𑀮𑀸𑀦𑀁 𑀫𑀳𑁂𑀲𑀺𑀦𑀁.

𑁯. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀲𑀼𑀲𑀻𑀫𑁄 𑀦𑀸𑀫 𑀦𑀸𑀫𑁂𑀦, 𑀫𑀳𑀺𑀬𑀸 𑀲𑁂𑀝𑁆𑀞𑀲𑀫𑁆𑀫𑀢𑁄.

𑁧𑁦. 𑀤𑀺𑀩𑁆𑀩𑀁 𑀫𑀦𑁆𑀤𑀸𑀭𑀯𑀁 𑀧𑀼𑀧𑁆𑀨𑀁, 𑀧𑀤𑀼𑀫𑀁 𑀧𑀸𑀭𑀺𑀙𑀢𑁆𑀢𑀓𑀁;

𑀤𑁂𑀯𑀮𑁄𑀓𑀸𑀳𑀭𑀺𑀢𑁆𑀯𑀸𑀦, 𑀲𑀫𑁆𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁.

𑁧𑁧. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁨. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁩. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀳𑀝𑁆𑀞𑁄 [𑀢𑀼𑀝𑁆𑀞𑁄 (𑀲𑁆𑀬𑀸. 𑀓𑀁.)] 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁪. 𑀲𑁄𑀪𑀡𑀁 𑀦𑀸𑀫 𑀦𑀕𑀭𑀁, 𑀲𑀸𑀕𑀭𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀤𑀲𑁆𑀲𑀦𑀸 𑀦𑀸𑀫 𑀚𑀦𑀺𑀓𑀸, 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁫. 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀅𑀫𑀭𑀕𑀺𑀭𑀺 𑀲𑀼𑀕𑀺𑀭𑀺 𑀯𑀸𑀳𑀦𑀸, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁬. 𑀢𑁂𑀢𑁆𑀢𑀺𑀁𑀲𑀜𑁆𑀘 𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀺𑀲𑀸𑀔𑀸 𑀦𑀸𑀫 𑀦𑀸𑀭𑀻 𑀘, 𑀲𑁂𑀮𑁄 𑀦𑀸𑀫𑀸𑀲𑀺 𑀅𑀢𑁆𑀭𑀚𑁄.

𑁧𑁭. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀅𑀲𑁆𑀲𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀅𑀝𑁆𑀞𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁧𑁮. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀅𑀦𑁄𑀫𑀼𑀬𑁆𑀬𑀸𑀦𑁂 𑀦𑀭𑀸𑀲𑀪𑁄.

𑁧𑁯. 𑀲𑀦𑁆𑀢𑁄 𑀘 𑀉𑀧𑀲𑀦𑁆𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀅𑀪𑀬𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁦. 𑀥𑀫𑁆𑀫𑀸 𑀘𑁂𑀯 𑀲𑀼𑀥𑀫𑁆𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀘𑀫𑁆𑀧𑀓𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁧. 𑀦𑀓𑀼𑀮𑁄 𑀘 𑀦𑀺𑀲𑀪𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀫𑀓𑀺𑀮𑀸 𑀘 𑀲𑀼𑀦𑀦𑁆𑀤𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁨. 𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀅𑀲𑀻𑀢𑀺𑀳𑀢𑁆𑀣𑀫𑀼𑀕𑁆𑀕𑀢𑁄;

𑀲𑁄𑀪𑀢𑁂 𑀲𑀸𑀮𑀭𑀸𑀚𑀸𑀯, 𑀉𑀴𑀼𑀭𑀸𑀚𑀸𑀯 𑀧𑀽𑀭𑀺𑀢𑁄.

𑁨𑁩. 𑀢𑀲𑁆𑀲 𑀧𑀸𑀓𑀢𑀺𑀓𑀸 𑀭𑀁𑀲𑀻, 𑀅𑀦𑁂𑀓𑀲𑀢𑀓𑁄𑀝𑀺𑀬𑁄;

𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸, 𑀨𑀭𑀦𑁆𑀢𑀺 𑀬𑁄𑀚𑀦𑀁 𑀲𑀤𑀸.

𑁨𑁪. 𑀲𑁄𑀧𑀺 𑀩𑀼𑀤𑁆𑀥𑁄 𑀦𑀭𑀸𑀲𑀪𑁄, 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀫𑀼𑀦𑀺;

𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀮𑁄𑀓𑁂 𑀅𑀝𑁆𑀞𑀸𑀲𑀺 𑀘𑀓𑁆𑀔𑀼𑀫𑀸.

𑁨𑁫. 𑀅𑀢𑀼𑀮𑀁 𑀤𑀲𑁆𑀲𑁂𑀢𑁆𑀯𑀸 𑀑𑀪𑀸𑀲𑀁, 𑀯𑀺𑀭𑁄𑀘𑁂𑀢𑁆𑀯𑀸 𑀲𑀤𑁂𑀯𑀓𑁂 [𑀅𑀢𑀼𑀮𑀁 𑀤𑀲𑁆𑀲𑀬𑀺𑀢𑁆𑀯𑀸𑀦, 𑀑𑀪𑀸𑀲𑁂𑀢𑁆𑀯𑀸 𑀲𑀤𑁂𑀯𑀓𑁂 (𑀲𑀻. 𑀓.)];

𑀲𑁄𑀧𑀺 𑀅𑀦𑀺𑀘𑁆𑀘𑀢𑀁 𑀧𑀢𑁆𑀢𑁄, 𑀬𑀣𑀕𑁆𑀕𑀼𑀧𑀸𑀤𑀸𑀦𑀲𑀗𑁆𑀔𑀬𑀸.

𑁨𑁬. 𑀅𑀢𑁆𑀣𑀤𑀲𑁆𑀲𑀻 𑀚𑀺𑀦𑀯𑀭𑁄, 𑀅𑀦𑁄𑀫𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀥𑀸𑀢𑀼𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑀢𑁄𑀢𑀺.

𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀘𑀼𑀤𑁆𑀤𑀲𑀫𑁄.