𑁧𑁫. 𑀧𑀺𑀬𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑁄

𑁧. 𑀲𑀼𑀚𑀸𑀢𑀲𑁆𑀲 𑀅𑀧𑀭𑁂𑀦, 𑀲𑀬𑀫𑁆𑀪𑀽 𑀮𑁄𑀓𑀦𑀸𑀬𑀓𑁄;

𑀤𑀼𑀭𑀸𑀲𑀤𑁄 𑀅𑀲𑀫𑀲𑀫𑁄, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀬𑀲𑁄.

𑁨. 𑀲𑁄𑀧𑀺 𑀩𑀼𑀤𑁆𑀥𑁄 𑀅𑀫𑀺𑀢𑀬𑀲𑁄, 𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀢𑀺;

𑀲𑀩𑁆𑀩𑀁 𑀢𑀫𑀁 𑀦𑀺𑀳𑀦𑁆𑀢𑁆𑀯𑀸𑀦, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁩. 𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀅𑀳𑁂𑀲𑀼𑀁 𑀅𑀪𑀺𑀲𑀫𑀬𑀸 𑀢𑀬𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪. 𑀲𑀼𑀤𑀲𑁆𑀲𑀦𑁄 𑀤𑁂𑀯𑀭𑀸𑀚𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀭𑁄𑀘𑀬𑀺;

𑀢𑀲𑁆𑀲 𑀤𑀺𑀝𑁆𑀞𑀺𑀁 𑀯𑀺𑀦𑁄𑀤𑁂𑀦𑁆𑀢𑁄, 𑀲𑀢𑁆𑀣𑀸 𑀥𑀫𑁆𑀫𑀫𑀤𑁂𑀲𑀬𑀺.

𑁫. 𑀚𑀦𑀲𑀦𑁆𑀦𑀺𑀧𑀸𑀢𑁄 𑀅𑀢𑀼𑀮𑁄, 𑀫𑀳𑀸𑀲𑀦𑁆𑀦𑀺𑀧𑀢𑀻 𑀢𑀤𑀸;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. 𑀬𑀤𑀸 𑀤𑁄𑀡𑀫𑀼𑀔𑀁 𑀳𑀢𑁆𑀣𑀺𑀁, 𑀯𑀺𑀦𑁂𑀲𑀺 𑀦𑀭𑀲𑀸𑀭𑀣𑀺;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁭. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀢𑀲𑁆𑀲𑀸𑀧𑀺 𑀧𑀺𑀬𑀤𑀲𑁆𑀲𑀺𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁮. 𑀢𑀢𑁄 𑀧𑀭𑀁 𑀦𑀯𑀼𑀢𑀺𑀓𑁄𑀝𑀻, 𑀲𑀫𑀺𑀁𑀲𑀼 𑀏𑀓𑀢𑁄 𑀫𑀼𑀦𑀻;

𑀢𑀢𑀺𑀬𑁂 𑀲𑀦𑁆𑀦𑀺𑀧𑀸𑀢𑀫𑁆𑀳𑀺, 𑀅𑀲𑀻𑀢𑀺𑀓𑁄𑀝𑀺𑀬𑁄 𑀅𑀳𑀽.

𑁯. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀓𑀲𑁆𑀲𑀧𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 [𑀫𑀸𑀦𑀯𑁄 (𑀲𑁆𑀬𑀸. 𑀓𑀁.)];

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽.

𑁧𑁦. 𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀲𑀸𑀤𑀁 𑀚𑀦𑀬𑀺𑀁 𑀅𑀳𑀁;

𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀳𑀺, 𑀲𑀗𑁆𑀖𑀸𑀭𑀸𑀫𑀁 𑀅𑀫𑀸𑀧𑀬𑀺𑀁.

𑁧𑁧. 𑀢𑀲𑁆𑀲 𑀤𑀢𑁆𑀯𑀸𑀦 𑀆𑀭𑀸𑀫𑀁, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀲𑀭𑀡𑁂 𑀧𑀜𑁆𑀘 𑀲𑀻𑀮𑁂 𑀘 [𑀲𑀭𑀡𑀁 𑀧𑀜𑁆𑀘𑀲𑀻𑀮𑀜𑁆𑀘 (𑀲𑀻.)], 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬𑀺𑀁.

𑁧𑁨. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁪. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁫. 𑀲𑀼𑀥𑀜𑁆𑀜𑀁 𑀦𑀸𑀫 𑀦𑀕𑀭𑀁, 𑀲𑀼𑀤𑀢𑁆𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀘𑀦𑁆𑀤𑀸 𑀦𑀸𑀫𑀸𑀲𑀺 𑀚𑀦𑀺𑀓𑀸, 𑀧𑀺𑀬𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁬. 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀲𑀼𑀦𑀺𑀫𑁆𑀫𑀮𑀯𑀺𑀫𑀮𑀕𑀺𑀭𑀺𑀕𑀼𑀳𑀸, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁭. 𑀢𑁂𑀢𑁆𑀢𑀺𑀁𑀲𑀲𑀳𑀲𑁆𑀲𑀸𑀦𑀺 𑀘, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀺𑀫𑀮𑀸 𑀦𑀸𑀫 𑀦𑀸𑀭𑀻 𑀘, 𑀓𑀜𑁆𑀘𑀦𑀸𑀯𑁂𑀴𑁄 𑀦𑀸𑀫 𑀅𑀢𑁆𑀭𑀚𑁄.

𑁧𑁮. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀭𑀣𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀙𑀫𑀸𑀲𑀁 𑀧𑀥𑀸𑀦𑀘𑀸𑀭𑀁, 𑀅𑀘𑀭𑀻 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁧𑁯. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀉𑀲𑀪𑀼𑀬𑁆𑀬𑀸𑀦𑁂 𑀫𑀦𑁄𑀭𑀫𑁂.

𑁨𑁦. 𑀧𑀸𑀮𑀺𑀢𑁄 𑀲𑀩𑁆𑀩𑀤𑀲𑁆𑀲𑀻 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑁄𑀪𑀺𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀧𑀺𑀬𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁧. 𑀲𑀼𑀚𑀸𑀢𑀸 𑀥𑀫𑁆𑀫𑀤𑀺𑀦𑁆𑀦𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀓𑀓𑀼𑀥𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁨. 𑀲𑀦𑁆𑀥𑀓𑁄 𑀥𑀫𑁆𑀫𑀓𑁄 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀯𑀺𑀲𑀸𑀔𑀸 𑀥𑀫𑁆𑀫𑀤𑀺𑀦𑁆𑀦𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁩. 𑀲𑁄𑀧𑀺 𑀩𑀼𑀤𑁆𑀥𑁄 𑀅𑀫𑀺𑀢𑀬𑀲𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀅𑀲𑀻𑀢𑀺𑀳𑀢𑁆𑀣𑀫𑀼𑀩𑁆𑀩𑁂𑀥𑁄, 𑀲𑀸𑀮𑀭𑀸𑀚𑀸𑀯 𑀤𑀺𑀲𑁆𑀲𑀢𑀺.

𑁨𑁪. 𑀅𑀕𑁆𑀕𑀺𑀘𑀦𑁆𑀤𑀲𑀽𑀭𑀺𑀬𑀸𑀦𑀁, 𑀦𑀢𑁆𑀣𑀺 𑀢𑀸𑀤𑀺𑀲𑀺𑀓𑀸 𑀧𑀪𑀸;

𑀬𑀣𑀸 𑀅𑀳𑀼 𑀧𑀪𑀸 𑀢𑀲𑁆𑀲, 𑀅𑀲𑀫𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁫. 𑀢𑀲𑁆𑀲𑀸𑀧𑀺 𑀤𑁂𑀯𑀤𑁂𑀯𑀲𑁆𑀲, 𑀆𑀬𑀼 𑀢𑀸𑀯𑀢𑀓𑀁 𑀅𑀳𑀼;

𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀮𑁄𑀓𑁂 𑀅𑀝𑁆𑀞𑀸𑀲𑀺 𑀘𑀓𑁆𑀔𑀼𑀫𑀸.

𑁨𑁬. 𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀬𑀼𑀕𑀸𑀦𑀺𑀧𑀺 𑀢𑀸𑀦𑀺 𑀅𑀢𑀼𑀮𑀺𑀬𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁨𑁭. 𑀧𑀺𑀬𑀤𑀲𑁆𑀲𑀻 𑀫𑀼𑀦𑀺𑀯𑀭𑁄, 𑀅𑀲𑁆𑀲𑀢𑁆𑀣𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯𑀲𑁆𑀲 𑀚𑀺𑀦𑀣𑀽𑀧𑁄, 𑀢𑀻𑀡𑀺𑀬𑁄𑀚𑀦𑀫𑀼𑀕𑁆𑀕𑀢𑁄𑀢𑀺.

𑀧𑀺𑀬𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀢𑁂𑀭𑀲𑀫𑁄.