𑁧𑁪. 𑀲𑀼𑀚𑀸𑀢𑀩𑀼𑀤𑁆𑀥𑀯𑀁𑀲𑁄

𑁧. 𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀲𑀼𑀚𑀸𑀢𑁄 𑀦𑀸𑀫 𑀦𑀸𑀬𑀓𑁄;

𑀲𑀻𑀳𑀳𑀦𑀼𑀲𑀪𑀓𑁆𑀔𑀦𑁆𑀥𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀸𑀲𑀤𑁄.

𑁨. 𑀘𑀦𑁆𑀤𑁄𑀯 𑀯𑀺𑀫𑀮𑁄 𑀲𑀼𑀤𑁆𑀥𑁄, 𑀲𑀢𑀭𑀁𑀲𑀻𑀯 𑀧𑀢𑀸𑀧𑀯𑀸;

𑀏𑀯𑀁 𑀲𑁄𑀪𑀢𑀺 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀦𑁆𑀢𑁄 𑀲𑀺𑀭𑀺𑀬𑀸 𑀲𑀤𑀸.

𑁩. 𑀧𑀸𑀧𑀼𑀡𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀓𑁂𑀯𑀮𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀲𑀼𑀫𑀗𑁆𑀕𑀮𑀫𑁆𑀳𑀺 𑀦𑀕𑀭𑁂, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁪. 𑀤𑁂𑀲𑁂𑀦𑁆𑀢𑁂 [𑀤𑁂𑀲𑁂𑀦𑁆𑀢𑁄 (𑀲𑁆𑀬𑀸. 𑀓𑀁.)] 𑀧𑀯𑀭𑀁 𑀥𑀫𑁆𑀫𑀁, 𑀲𑀼𑀚𑀸𑀢𑁂 𑀮𑁄𑀓𑀦𑀸𑀬𑀓𑁂 [𑀲𑀼𑀚𑀸𑀢𑁄 𑀮𑁄𑀓𑀦𑀸𑀬𑀓𑁄 (𑀲𑁆𑀬𑀸. 𑀓𑀁.)];

𑀅𑀲𑀻𑀢𑀺𑀓𑁄𑀝𑀻 𑀅𑀪𑀺𑀲𑀫𑀺𑀁𑀲𑀼, 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂.

𑁫. 𑀬𑀤𑀸 𑀲𑀼𑀚𑀸𑀢𑁄 𑀅𑀫𑀺𑀢𑀬𑀲𑁄, 𑀤𑁂𑀯𑁂 𑀯𑀲𑁆𑀲𑀁 𑀉𑀧𑀸𑀕𑀫𑀺;

𑀲𑀢𑁆𑀢𑀢𑀺𑀁𑀲𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. 𑀬𑀤𑀸 𑀲𑀼𑀚𑀸𑀢𑁄 𑀅𑀲𑀫𑀲𑀫𑁄, 𑀉𑀧𑀕𑀘𑁆𑀙𑀺 𑀧𑀺𑀢𑀼𑀲𑀦𑁆𑀢𑀺𑀓𑀁;

𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀁 [𑀲𑀢𑁆𑀢𑀢𑀺𑀁𑀲𑀲𑀳𑀲𑁆𑀲𑀸𑀦𑀁 (𑀲𑀻.)], 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁭. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀲𑀼𑀚𑀸𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮. 𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑀸𑀦𑀁, 𑀅𑀧𑁆𑀧𑀢𑁆𑀢𑀸𑀦𑀁 𑀪𑀯𑀸𑀪𑀯𑁂;

𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀺, 𑀧𑀞𑀫𑀁 𑀲𑀦𑁆𑀦𑀺𑀧𑀢𑀺𑀁𑀲𑀼 𑀢𑁂.

𑁯. 𑀧𑀼𑀦𑀸𑀧𑀭𑀁 𑀲𑀦𑁆𑀦𑀺𑀧𑀸𑀢𑁂, 𑀢𑀺𑀤𑀺𑀯𑁄𑀭𑁄𑀳𑀡𑁂 𑀚𑀺𑀦𑁂;

𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁦. 𑀉𑀧𑀲𑀗𑁆𑀓𑀫𑀦𑁆𑀢𑁄 𑀦𑀭𑀸𑀲𑀪𑀁, 𑀢𑀲𑁆𑀲 𑀬𑁄 𑀅𑀕𑁆𑀕𑀲𑀸𑀯𑀓𑁄;

𑀘𑀢𑀽𑀳𑀺 𑀲𑀢𑀲𑀳𑀲𑁆𑀲𑁂𑀳𑀺, 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺.

𑁧𑁧. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄;

𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀆𑀲𑀺𑀁, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁨. 𑀮𑁄𑀓𑁂 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀉𑀧𑀕𑀦𑁆𑀢𑁆𑀯𑀸𑀦 𑀯𑀦𑁆𑀤𑀺𑀁 𑀲𑁄, 𑀲𑀼𑀚𑀸𑀢𑀁 𑀮𑁄𑀓𑀦𑀸𑀬𑀓𑀁.

𑁧𑁩. 𑀘𑀢𑀼𑀤𑀻𑀧𑁂 𑀫𑀳𑀸𑀭𑀚𑁆𑀚𑀁, 𑀭𑀢𑀦𑁂 𑀲𑀢𑁆𑀢 𑀉𑀢𑁆𑀢𑀫𑁂;

𑀩𑀼𑀤𑁆𑀥𑁂 𑀦𑀺𑀬𑁆𑀬𑀸𑀤𑀬𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁪. 𑀆𑀭𑀸𑀫𑀺𑀓𑀸 𑀚𑀦𑀧𑀤𑁂, 𑀉𑀝𑁆𑀞𑀸𑀦𑀁 𑀧𑀝𑀺𑀧𑀺𑀡𑁆𑀟𑀺𑀬;

𑀉𑀧𑀦𑁂𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁.

𑁧𑁫. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 [𑀢𑀤𑀸 (𑀲𑁆𑀬𑀸. 𑀓𑀁.)] 𑀩𑁆𑀬𑀸𑀓𑀸𑀲𑀺, 𑀤𑀲𑀲𑀳𑀲𑁆𑀲𑀺𑀫𑁆𑀳𑀺 𑀇𑀲𑁆𑀲𑀭𑁄;

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁬. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁭. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀳𑀸𑀲𑀁 𑀚𑀦𑁂𑀲𑀳𑀁;

𑀅𑀥𑀺𑀝𑁆𑀞𑀳𑀺𑀁 𑀯𑀢𑀁 𑀉𑀕𑁆𑀕𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁮. 𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀜𑁆𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀦, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁯. 𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀩𑁆𑀭𑀳𑁆𑀫𑀁 𑀪𑀸𑀯𑁂𑀢𑁆𑀯 𑀪𑀸𑀯𑀦𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳𑀁.

𑁨𑁦. 𑀲𑀼𑀫𑀗𑁆𑀕𑀮𑀁 𑀦𑀸𑀫 𑀦𑀕𑀭𑀁, 𑀉𑀕𑁆𑀕𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀸𑀢𑀸 𑀧𑀪𑀸𑀯𑀢𑀻 𑀦𑀸𑀫, 𑀲𑀼𑀚𑀸𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁧. 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀲𑀺𑀭𑀻 𑀉𑀧𑀲𑀺𑀭𑀻 𑀦𑀦𑁆𑀤𑁄, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁨𑁨. 𑀢𑁂𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑀺𑀭𑀺𑀦𑀦𑁆𑀤𑀸 𑀦𑀸𑀫 𑀦𑀸𑀭𑀻, 𑀉𑀧𑀲𑁂𑀦𑁄 𑀦𑀸𑀫 𑀅𑀢𑁆𑀭𑀚𑁄.

𑁨𑁩. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀅𑀲𑁆𑀲𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀦𑀯𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁨𑁪. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀲𑀼𑀚𑀸𑀢𑁄 𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀲𑀼𑀫𑀗𑁆𑀕𑀮𑀼𑀬𑁆𑀬𑀸𑀦𑀫𑀼𑀢𑁆𑀢𑀫𑁂.

𑁨𑁫. 𑀲𑀼𑀤𑀲𑁆𑀲𑀦𑁄 𑀲𑀼𑀤𑁂𑀯𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀦𑀸𑀭𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀼𑀚𑀸𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁬. 𑀦𑀸𑀕𑀸 𑀘 𑀦𑀸𑀕𑀲𑀫𑀸𑀮𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀯𑁂𑀴𑀽𑀢𑀺 𑀯𑀼𑀘𑁆𑀘𑀢𑀺.

𑁨𑁭. 𑀲𑁄 𑀘 𑀭𑀼𑀓𑁆𑀔𑁄 𑀖𑀦𑀓𑁆𑀔𑀦𑁆𑀥𑁄 [𑀖𑀦𑀭𑀼𑀘𑀺𑀭𑁄 (𑀲𑀻. 𑀓.)], 𑀅𑀘𑁆𑀙𑀺𑀤𑁆𑀤𑁄 𑀳𑁄𑀢𑀺 𑀧𑀢𑁆𑀢𑀺𑀓𑁄;

𑀉𑀚𑀼 𑀯𑀁𑀲𑁄 𑀩𑁆𑀭𑀳𑀸 𑀳𑁄𑀢𑀺, 𑀤𑀲𑁆𑀲𑀦𑀻𑀬𑁄 𑀫𑀦𑁄𑀭𑀫𑁄.

𑁨𑁮. 𑀏𑀓𑀓𑁆𑀔𑀦𑁆𑀥𑁄 𑀧𑀯𑀟𑁆𑀠𑀺𑀢𑁆𑀯𑀸, 𑀢𑀢𑁄 𑀲𑀸𑀔𑀸 𑀧𑀪𑀺𑀚𑁆𑀚𑀢𑀺;

𑀬𑀣𑀸 𑀲𑀼𑀩𑀤𑁆𑀥𑁄 𑀫𑁄𑀭𑀳𑀢𑁆𑀣𑁄, 𑀏𑀯𑀁 𑀲𑁄𑀪𑀢𑀺 𑀲𑁄 𑀤𑀼𑀫𑁄.

𑁨𑁯. 𑀦 𑀢𑀲𑁆𑀲 𑀓𑀡𑁆𑀝𑀓𑀸 𑀳𑁄𑀦𑁆𑀢𑀺, 𑀦𑀸𑀧𑀺 𑀙𑀺𑀤𑁆𑀤𑀁 𑀫𑀳𑀸 𑀅𑀳𑀼;

𑀯𑀺𑀢𑁆𑀣𑀺𑀡𑁆𑀡𑀲𑀸𑀔𑁄 𑀅𑀯𑀺𑀭𑀮𑁄, 𑀲𑀦𑁆𑀤𑀘𑁆𑀙𑀸𑀬𑁄 𑀫𑀦𑁄𑀭𑀫𑁄.

𑁩𑁦. 𑀲𑀼𑀤𑀢𑁆𑀢𑁄 𑀘𑁂𑀯 𑀘𑀺𑀢𑁆𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀲𑀼𑀪𑀤𑁆𑀤𑀸 𑀘 𑀧𑀤𑀼𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁩𑁧. 𑀧𑀜𑁆𑀜𑀸𑀲𑀭𑀢𑀦𑁄 𑀆𑀲𑀺, 𑀉𑀘𑁆𑀘𑀢𑁆𑀢𑀦𑁂𑀦 𑀲𑁄 𑀚𑀺𑀦𑁄;

𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑁂𑀢𑁄, 𑀲𑀩𑁆𑀩𑀕𑀼𑀡𑀫𑀼𑀧𑀸𑀕𑀢𑁄.

𑁩𑁨. 𑀢𑀲𑁆𑀲 𑀧𑀪𑀸 𑀅𑀲𑀫𑀲𑀫𑀸, 𑀦𑀺𑀤𑁆𑀥𑀸𑀯𑀢𑀺 𑀲𑀫𑀦𑁆𑀢𑀢𑁄;

𑀅𑀧𑁆𑀧𑀫𑀸𑀡𑁄 𑀅𑀢𑀼𑀮𑀺𑀬𑁄, 𑀑𑀧𑀫𑁆𑀫𑁂𑀳𑀺 𑀅𑀦𑀽𑀧𑀫𑁄.

𑁩𑁩. 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁪. 𑀬𑀣𑀸𑀧𑀺 𑀲𑀸𑀕𑀭𑁂 𑀊𑀫𑀻, 𑀕𑀕𑀦𑁂 𑀢𑀸𑀭𑀓𑀸 𑀬𑀣𑀸;

𑀏𑀯𑀁 𑀢𑀤𑀸 𑀧𑀸𑀯𑀘𑀦𑀁, 𑀅𑀭𑀳𑀦𑁆𑀢𑁂𑀳𑀺 𑀘𑀺𑀢𑁆𑀢𑀺𑀢𑀁 [𑀘𑀺𑀢𑁆𑀢𑀓𑀁 (𑀲𑁆𑀬𑀸. 𑀓𑀁.)].

𑁩𑁫. 𑀲𑁄 𑀘 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀕𑀼𑀡𑀸𑀦𑀺 𑀘 𑀢𑀸𑀦𑀺 𑀅𑀢𑀼𑀮𑀺𑀬𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁩𑁬. 𑀲𑀼𑀚𑀸𑀢𑁄 𑀚𑀺𑀦𑀯𑀭𑁄 𑀩𑀼𑀤𑁆𑀥𑁄, 𑀲𑀺𑀮𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯 𑀢𑀲𑁆𑀲 𑀘𑁂𑀢𑀺𑀬𑁄 [𑀢𑀢𑁆𑀣𑁂𑀯 𑀘𑁂𑀢𑀺𑀬𑁄 𑀲𑀢𑁆𑀣𑀼 (𑀲𑁆𑀬𑀸. 𑀓𑀁.)], 𑀢𑀻𑀡𑀺𑀕𑀸𑀯𑀼𑀢𑀫𑀼𑀕𑁆𑀕𑀢𑁄𑀢𑀺.

𑀲𑀼𑀚𑀸𑀢𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀤𑁆𑀯𑀸𑀤𑀲𑀫𑁄.