𑁧𑁩. 𑀲𑀼𑀫𑁂𑀥𑀩𑀼𑀤𑁆𑀥𑀯𑀁𑀲𑁄

𑁧. 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀅𑀧𑀭𑁂𑀦, 𑀲𑀼𑀫𑁂𑀥𑁄 𑀦𑀸𑀫 𑀦𑀸𑀬𑀓𑁄;

𑀤𑀼𑀭𑀸𑀲𑀤𑁄 𑀉𑀕𑁆𑀕𑀢𑁂𑀚𑁄, 𑀲𑀩𑁆𑀩𑀮𑁄𑀓𑀼𑀢𑁆𑀢𑀫𑁄 𑀫𑀼𑀦𑀺.

𑁨. 𑀧𑀲𑀦𑁆𑀦𑀦𑁂𑀢𑁆𑀢𑁄 𑀲𑀼𑀫𑀼𑀔𑁄, 𑀩𑁆𑀭𑀳𑀸 𑀉𑀚𑀼 𑀧𑀢𑀸𑀧𑀯𑀸;

𑀳𑀺𑀢𑁂𑀲𑀻 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀩𑀳𑀽 𑀫𑁄𑀘𑁂𑀲𑀺 𑀩𑀦𑁆𑀥𑀦𑀸.

𑁩. 𑀬𑀤𑀸 𑀩𑀼𑀤𑁆𑀥𑁄 𑀧𑀸𑀧𑀼𑀡𑀺𑀢𑁆𑀯𑀸, 𑀓𑁂𑀯𑀮𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀲𑀼𑀤𑀲𑁆𑀲𑀦𑀫𑁆𑀳𑀺 𑀦𑀕𑀭𑁂, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁪. 𑀢𑀲𑁆𑀲𑀸𑀧𑀺 𑀅𑀪𑀺𑀲𑀫𑀬𑀸 𑀢𑀻𑀡𑀺, 𑀅𑀳𑁂𑀲𑀼𑀁 𑀥𑀫𑁆𑀫𑀤𑁂𑀲𑀦𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀧𑀼𑀦𑀸𑀧𑀭𑀁 𑀓𑀼𑀫𑁆𑀪𑀓𑀡𑁆𑀡𑀁, 𑀬𑀓𑁆𑀔𑀁 𑀲𑁄 𑀤𑀫𑀬𑀻 𑀚𑀺𑀦𑁄;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. 𑀧𑀼𑀦𑀸𑀧𑀭𑀁 𑀅𑀫𑀺𑀢𑀬𑀲𑁄, 𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑀬𑀺;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁭. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀲𑀼𑀫𑁂𑀥𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮. 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀦𑀕𑀭𑀁, 𑀉𑀧𑀕𑀜𑁆𑀙𑀺 𑀚𑀺𑀦𑁄 𑀬𑀤𑀸;

𑀢𑀤𑀸 𑀔𑀻𑀡𑀸𑀲𑀯𑀸 𑀪𑀺𑀓𑁆𑀔𑀽, 𑀲𑀫𑀺𑀁𑀲𑀼 𑀲𑀢𑀓𑁄𑀝𑀺𑀬𑁄.

𑁯. 𑀧𑀼𑀦𑀸𑀧𑀭𑀁 𑀤𑁂𑀯𑀓𑀽𑀝𑁂, 𑀪𑀺𑀓𑁆𑀔𑀽𑀦𑀁 𑀓𑀣𑀺𑀦𑀢𑁆𑀣𑀢𑁂;

𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁦. 𑀧𑀼𑀦𑀸𑀧𑀭𑀁 𑀤𑀲𑀩𑀮𑁄, 𑀬𑀤𑀸 𑀘𑀭𑀢𑀺 𑀘𑀸𑀭𑀺𑀓𑀁;

𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁧. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀉𑀢𑁆𑀢𑀭𑁄 𑀦𑀸𑀫 𑀫𑀸𑀡𑀯𑁄;

𑀅𑀲𑀻𑀢𑀺𑀓𑁄𑀝𑀺𑀬𑁄 𑀫𑀬𑁆𑀳𑀁, 𑀖𑀭𑁂 𑀲𑀦𑁆𑀦𑀺𑀘𑀺𑀢𑀁 𑀥𑀦𑀁.

𑁧𑁨. 𑀓𑁂𑀯𑀮𑀁 𑀲𑀩𑁆𑀩𑀁 𑀤𑀢𑁆𑀯𑀸𑀦, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂;

𑀲𑀭𑀡𑀁 𑀢𑀲𑁆𑀲𑀼𑀧𑀕𑀜𑁆𑀙𑀺𑀁, 𑀧𑀩𑁆𑀩𑀚𑁆𑀚𑀜𑁆𑀘𑀸𑀪𑀺𑀭𑁄𑀘𑀬𑀺𑀁.

𑁧𑁩. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀓𑀭𑁄𑀦𑁆𑀢𑁄 𑀅𑀦𑀼𑀫𑁄𑀤𑀦𑀁;

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁪. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁫. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁬. 𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀜𑁆𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀦, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁭. 𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀪𑀺𑀜𑁆𑀜𑀸𑀲𑀼 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳𑀁.

𑁧𑁮. 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀦𑀕𑀭𑀁, 𑀲𑀼𑀤𑀢𑁆𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀤𑀢𑁆𑀢𑀸 𑀦𑀸𑀫 𑀚𑀦𑀺𑀓𑀸, 𑀲𑀼𑀫𑁂𑀥𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁯. 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀲𑀼𑀘𑀦𑁆𑀤𑀓𑀜𑁆𑀘𑀦𑀲𑀺𑀭𑀺𑀯𑀟𑁆𑀠𑀸, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁨𑁦. 𑀢𑀺𑀲𑁄𑀴𑀲𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑀼𑀫𑀦𑀸 𑀦𑀸𑀫 𑀲𑀸 𑀦𑀸𑀭𑀻, 𑀧𑀼𑀦𑀩𑁆𑀩𑀲𑀼 𑀦𑀸𑀫 𑀅𑀢𑁆𑀭𑀚𑁄.

𑁨𑁧. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀓𑀁 𑀅𑀟𑁆𑀠𑀫𑀸𑀲𑀁, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁨𑁨. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀲𑀼𑀫𑁂𑀥𑁄 𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀲𑀼𑀤𑀲𑁆𑀲𑀦𑀼𑀬𑁆𑀬𑀸𑀦𑀫𑀼𑀢𑁆𑀢𑀫𑁂.

𑁨𑁩. 𑀲𑀭𑀡𑁄 𑀲𑀩𑁆𑀩𑀓𑀸𑀫𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀸𑀕𑀭𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀼𑀫𑁂𑀥𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁪. 𑀭𑀸𑀫𑀸 𑀘𑁂𑀯 𑀲𑀼𑀭𑀸𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀦𑀻𑀧𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁫. 𑀉𑀭𑀼𑀯𑁂𑀮𑀸 𑀬𑀲𑀯𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀬𑀲𑁄𑀥𑀭𑀸 𑀲𑀺𑀭𑀺𑀫𑀸 𑀘 [𑀬𑀲𑀸 𑀦𑀸𑀫 𑀲𑀺𑀭𑀺𑀫𑀸 𑀘 (𑀲𑁆𑀬𑀸. 𑀓𑀁.)], 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁬. 𑀅𑀝𑁆𑀞𑀸𑀲𑀻𑀢𑀺𑀭𑀢𑀦𑀸𑀦𑀺, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀑𑀪𑀸𑀲𑁂𑀢𑀺 𑀤𑀺𑀲𑀸 𑀲𑀩𑁆𑀩𑀸, 𑀘𑀦𑁆𑀤𑁄 𑀢𑀸𑀭𑀕𑀡𑁂 𑀬𑀣𑀸.

𑁨𑁭. 𑀘𑀓𑁆𑀓𑀯𑀢𑁆𑀢𑀺𑀫𑀡𑀻 𑀦𑀸𑀫, 𑀬𑀣𑀸 𑀢𑀧𑀢𑀺 𑀬𑁄𑀚𑀦𑀁;

𑀢𑀣𑁂𑀯 𑀢𑀲𑁆𑀲 𑀭𑀢𑀦𑀁, 𑀲𑀫𑀦𑁆𑀢𑀸 𑀨𑀭𑀢𑀺 𑀬𑁄𑀚𑀦𑀁.

𑁨𑁮. 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁯. 𑀢𑁂𑀯𑀺𑀚𑁆𑀚𑀙𑀴𑀪𑀺𑀜𑁆𑀜𑁂𑀳𑀺, 𑀩𑀮𑀧𑁆𑀧𑀢𑁆𑀢𑁂𑀳𑀺 𑀢𑀸𑀤𑀺𑀳𑀺;

𑀲𑀫𑀸𑀓𑀼𑀮𑀫𑀺𑀤𑀁 𑀆𑀲𑀺, 𑀅𑀭𑀳𑀦𑁆𑀢𑁂𑀳𑀺 𑀲𑀸𑀥𑀼𑀳𑀺.

𑁩𑁦. 𑀢𑁂𑀧𑀺 𑀲𑀩𑁆𑀩𑁂 𑀅𑀫𑀺𑀢𑀬𑀲𑀸, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀦𑀺𑀭𑀽𑀧𑀥𑀻;

𑀜𑀸𑀡𑀸𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸, 𑀦𑀺𑀩𑁆𑀩𑀼𑀢𑀸 𑀢𑁂 𑀫𑀳𑀸𑀬𑀲𑀸.

𑁩𑁧. 𑀲𑀼𑀫𑁂𑀥𑁄 𑀚𑀺𑀦𑀯𑀭𑁄 𑀩𑀼𑀤𑁆𑀥𑁄, 𑀫𑁂𑀥𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀥𑀸𑀢𑀼𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑀢𑁄𑀢𑀺.

𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀏𑀓𑀸𑀤𑀲𑀫𑁄.