𑁪. 𑀅𑀥𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁨. ‘‘𑀅𑀪𑀺𑀪𑀽 𑀦𑀸𑀫 𑀲𑁄 𑀪𑀺𑀓𑁆𑀔𑀼, 𑀲𑀺𑀔𑀺𑀦𑁄 𑀅𑀕𑁆𑀕𑀲𑀸𑀯𑀓𑁄;

𑀫𑀳𑀸𑀦𑀼𑀪𑀸𑀯𑁄 𑀢𑁂𑀯𑀺𑀚𑁆𑀚𑁄, 𑀳𑀺𑀫𑀯𑀦𑁆𑀢𑀁 𑀉𑀧𑀸𑀕𑀫𑀺.

𑁨𑁩. ‘‘𑀅𑀳𑀫𑁆𑀧𑀺 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀭𑀫𑀡𑀻𑀬𑀲𑁆𑀲𑀫𑁂 𑀇𑀲𑀺;

𑀯𑀲𑀸𑀫𑀺 𑀅𑀧𑁆𑀧𑀫𑀜𑁆𑀜𑀸𑀲𑀼, 𑀇𑀤𑁆𑀥𑀻𑀲𑀼 𑀘 𑀢𑀤𑀸 𑀯𑀲𑀻.

𑁨𑁪. ‘‘𑀧𑀓𑁆𑀔𑀺𑀚𑀸𑀢𑁄 𑀯𑀺𑀬𑀸𑀓𑀸𑀲𑁂, 𑀧𑀩𑁆𑀩𑀢𑀁 𑀅𑀥𑀺𑀯𑀢𑁆𑀢𑀬𑀺𑀁 [𑀅𑀪𑀺𑀧𑀢𑁆𑀣𑀬𑀺𑀁 (𑀲𑁆𑀬𑀸.), 𑀅𑀪𑀺𑀫𑀢𑁆𑀣𑀬𑀺𑀁 (𑀓.), 𑀅𑀥𑀺𑀯𑀢𑁆𑀣𑀬𑀺𑀦𑁆𑀢𑀺 𑀧𑀩𑁆𑀩𑀢𑀲𑁆𑀲 𑀉𑀧𑀭𑀺 𑀕𑀘𑁆𑀙𑀺𑀦𑁆𑀢𑀺𑀅𑀢𑁆𑀣𑁄];

𑀅𑀥𑁄𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀆𑀕𑀘𑁆𑀙𑀺𑀁 [𑀅𑀕𑀘𑁆𑀙𑀺𑀁 (𑀓.)] 𑀧𑀩𑁆𑀩𑀢𑀁 𑀅𑀳𑀁.

𑁨𑁫. ‘‘𑀲𑀢𑁆𑀢 𑀧𑀼𑀧𑁆𑀨𑀸𑀦𑀺 𑀕𑀡𑁆𑀳𑀺𑀢𑁆𑀯𑀸, 𑀫𑀢𑁆𑀣𑀓𑁂 𑀑𑀓𑀺𑀭𑀺𑀁 𑀅𑀳𑀁;

𑀆𑀮𑁄𑀓𑀺𑀢𑁂 [𑀆𑀮𑁄𑀓𑀺𑀢𑁄 (𑀲𑁆𑀬𑀸.)] 𑀘 𑀯𑀻𑀭𑁂𑀦, 𑀧𑀓𑁆𑀓𑀸𑀫𑀺𑀁 𑀧𑀸𑀘𑀺𑀦𑀸𑀫𑀼𑀔𑁄.

𑁨𑁬. ‘‘𑀆𑀯𑀸𑀲𑀁 𑀅𑀪𑀺𑀲𑀫𑁆𑀪𑁄𑀲𑀺𑀁, 𑀧𑀢𑁆𑀯𑀸𑀦 𑀅𑀲𑁆𑀲𑀫𑀁 𑀅𑀳𑀁;

𑀔𑀸𑀭𑀺𑀪𑀸𑀭𑀁 𑀕𑀳𑁂𑀢𑁆𑀯𑀸𑀦, 𑀧𑀸𑀬𑀸𑀲𑀺𑀁 [𑀧𑀸𑀯𑀺𑀲𑀺𑀁 (𑀲𑀻.)] 𑀧𑀩𑁆𑀩𑀢𑀦𑁆𑀢𑀭𑀁.

𑁨𑁭. ‘‘𑀅𑀚𑀕𑀭𑁄 𑀫𑀁 𑀧𑀻𑀴𑁂𑀲𑀺, 𑀖𑁄𑀭𑀭𑀽𑀧𑁄 𑀫𑀳𑀩𑁆𑀩𑀮𑁄;

𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁨𑁮. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀥𑁄𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀥𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.