𑁯. 𑀧𑀤𑀼𑀫𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁭. ‘‘𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄, 𑀯𑀭𑀥𑀫𑁆𑀫𑀧𑁆𑀧𑀯𑀢𑁆𑀢𑀓𑁄;

𑀯𑀲𑁆𑀲𑀢𑁂 [𑀯𑀲𑁆𑀲𑁂𑀢𑀺 (?)] 𑀅𑀫𑀢𑀁 𑀯𑀼𑀝𑁆𑀞𑀺𑀁, 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀫𑀳𑀸𑀚𑀦𑀁.

𑁬𑁮. ‘‘𑀲𑀥𑀚𑀁 [𑀲𑀤𑀡𑁆𑀟𑀁 (𑀲𑀻.)] 𑀧𑀤𑀼𑀫𑀁 𑀕𑀬𑁆𑀳, 𑀅𑀟𑁆𑀠𑀓𑁄𑀲𑁂 𑀞𑀺𑀢𑁄 𑀅𑀳𑀁;

𑀧𑀤𑀼𑀫𑀼𑀢𑁆𑀢𑀭𑀫𑀼𑀦𑀺𑀲𑁆𑀲, 𑀧𑀳𑀝𑁆𑀞𑁄 𑀉𑀓𑁆𑀔𑀺𑀧𑀺𑀫𑀫𑁆𑀩𑀭𑁂.

𑁬𑁯. ‘‘𑀆𑀕𑀘𑁆𑀙𑀦𑁆𑀢𑁂 𑀘 𑀧𑀤𑀼𑀫𑁂, 𑀅𑀩𑁆𑀪𑀼𑀢𑁄 𑀆𑀲𑀺 𑀢𑀸𑀯𑀤𑁂;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀕𑁆𑀕𑀡𑁆𑀳𑀺 𑀯𑀤𑀢𑀁 𑀯𑀭𑁄.

𑁭𑁦. ‘‘𑀓𑀭𑀲𑁂𑀝𑁆𑀞𑁂𑀦 𑀧𑀕𑁆𑀕𑀬𑁆𑀳, 𑀚𑀮𑀚𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁭𑁧. ‘‘‘𑀬𑁂𑀦𑀺𑀤𑀁 𑀧𑀤𑀼𑀫𑀁 𑀔𑀺𑀢𑁆𑀢𑀁, 𑀲𑀩𑁆𑀩𑀜𑁆𑀜𑀼𑀫𑁆𑀳𑀺 𑀯𑀺𑀦𑀸𑀬𑀓𑁂 [𑀲𑀩𑁆𑀩𑀜𑁆𑀜𑀼𑀢𑀫𑀦𑀸𑀬𑀓𑁂 (𑀲𑁆𑀬𑀸. 𑀓.)];

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁭𑁨. ‘‘‘𑀢𑀺𑀁𑀲𑀓𑀧𑁆𑀧𑀸𑀦𑀺 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀲𑀢𑁆𑀢𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁭𑁩. ‘‘‘𑀢𑀢𑁆𑀣 𑀧𑀢𑁆𑀢𑀁 𑀕𑀡𑁂𑀢𑁆𑀯𑀸𑀦, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀆𑀓𑀸𑀲𑀢𑁄 𑀧𑀼𑀧𑁆𑀨𑀯𑀼𑀝𑁆𑀞𑀺, 𑀅𑀪𑀺𑀯𑀲𑁆𑀲𑀺𑀲𑁆𑀲𑀢𑀻 𑀢𑀤𑀸.

𑁭𑁪. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀦𑀸𑀫𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁭𑁫. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁭𑁬. ‘‘𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀓𑀼𑀘𑁆𑀙𑀺𑀫𑁆𑀳𑀸, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄;

𑀚𑀸𑀢𑀺𑀬𑀸 𑀧𑀜𑁆𑀘𑀯𑀲𑁆𑀲𑁄𑀳𑀁, 𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀁.

𑁭𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀤𑀼𑀫𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀤𑀼𑀫𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.