𑁬. 𑀩𑀻𑀚𑀦𑀺𑀯𑀕𑁆𑀕𑁄

𑁧. 𑀯𑀺𑀥𑀽𑀧𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀩𑀻𑀚𑀦𑀺𑀓𑀸 [𑀯𑀻𑀚𑀦𑀺𑀓𑀸 (𑀲𑀻. 𑀲𑁆𑀬𑀸.)] 𑀫𑀬𑀸 𑀤𑀺𑀦𑁆𑀦𑀸, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄.

𑁨. ‘‘𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀧𑀕𑁆𑀕𑀳𑁂𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑀫𑁆𑀩𑀼𑀤𑁆𑀥𑀫𑀪𑀺𑀯𑀸𑀤𑁂𑀢𑁆𑀯𑀸, 𑀧𑀓𑁆𑀓𑀫𑀺𑀁 𑀉𑀢𑁆𑀢𑀭𑀸𑀫𑀼𑀔𑁄.

𑁩. ‘‘𑀩𑀻𑀚𑀦𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀲𑀢𑁆𑀣𑀸 𑀮𑁄𑀓𑀕𑁆𑀕𑀦𑀸𑀬𑀓𑁄 [𑀮𑁄𑀓𑁂 𑀅𑀦𑀼𑀢𑁆𑀢𑀭𑁄 (𑀲𑀻.)];

𑀪𑀺𑀓𑁆𑀔𑀼𑀲𑀗𑁆𑀖𑁂 𑀞𑀺𑀢𑁄 𑀲𑀦𑁆𑀢𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁪. ‘‘‘𑀇𑀫𑀺𑀦𑀸 𑀩𑀻𑀚𑀦𑀺𑀤𑀸𑀦𑁂𑀦, 𑀘𑀺𑀢𑁆𑀢𑀲𑁆𑀲 𑀧𑀡𑀺𑀥𑀻𑀳𑀺 [𑀘𑁂𑀢𑀦𑀸𑀧𑀡𑀺𑀥𑀻𑀳𑀺 (𑀅𑀜𑁆𑀜𑀢𑁆𑀣)] 𑀘;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀢𑀺’.

𑁫. ‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀘𑁂𑀢𑁄𑀕𑀼𑀡𑀲𑀫𑀸𑀳𑀺𑀢𑁄;

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀁.

𑁬. ‘‘𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀩𑀻𑀚𑀫𑀸𑀦𑀲𑀦𑀸𑀫𑀓𑀸;

𑀲𑁄𑀴𑀲𑀸𑀲𑀺𑀁𑀲𑀼 𑀭𑀸𑀚𑀸𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀺𑀥𑀽𑀧𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀺𑀥𑀽𑀧𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀲𑀢𑀭𑀁𑀲𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁮. ‘‘𑀉𑀩𑁆𑀩𑀺𑀤𑁆𑀥𑀁 𑀲𑁂𑀮𑀫𑀸𑀭𑀼𑀬𑁆𑀳, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄;

𑀧𑀩𑁆𑀩𑀢𑀲𑁆𑀲𑀸𑀯𑀺𑀤𑀽𑀭𑀫𑁆𑀳𑀺, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽.

𑁯. ‘‘𑀉𑀧𑀯𑀺𑀝𑁆𑀞𑀁 𑀫𑀳𑀸𑀯𑀻𑀭𑀁, 𑀤𑁂𑀯𑀤𑁂𑀯𑀁 𑀦𑀭𑀸𑀲𑀪𑀁;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁧𑁦. ‘‘‘𑀏𑀲 𑀩𑀼𑀤𑁆𑀥𑁄 𑀫𑀳𑀸𑀯𑀻𑀭𑁄, 𑀯𑀭𑀥𑀫𑁆𑀫𑀧𑁆𑀧𑀓𑀸𑀲𑀓𑁄;

𑀚𑀮𑀢𑀺 𑀅𑀕𑁆𑀕𑀺𑀔𑀦𑁆𑀥𑁄𑀯, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄.

𑁧𑁧. ‘‘‘𑀫𑀳𑀸𑀲𑀫𑀼𑀤𑁆𑀤𑁄𑀯‘𑀓𑁆𑀔𑀼𑀩𑁆𑀪𑁄 [’𑀓𑁆𑀔𑁄𑀪𑁄 (𑀲𑀻. 𑀲𑁆𑀬𑀸.)], 𑀅𑀡𑁆𑀡𑀯𑁄𑀯 𑀤𑀼𑀭𑀼𑀢𑁆𑀢𑀭𑁄;

𑀫𑀺𑀕𑀭𑀸𑀚𑀸𑀯𑀲𑀫𑁆𑀪𑀻𑀢𑁄 [𑀙𑀫𑁆𑀪𑀺𑀢𑁄 (𑀓.)], 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀘𑀓𑁆𑀔𑀼𑀫𑀸’.

𑁧𑁨. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀤𑀼𑀫𑀼𑀢𑁆𑀢𑀭𑀦𑀸𑀬𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁩. ‘‘‘𑀬𑁂𑀦𑀸𑀬𑀁 [𑀬𑁂𑀦𑀸𑀳𑀁 (𑀓.)] 𑀅𑀜𑁆𑀚𑀮𑀻 𑀤𑀺𑀦𑁆𑀦𑁄, 𑀩𑀼𑀤𑁆𑀥𑀲𑁂𑀝𑁆𑀞𑁄 𑀘 𑀣𑁄𑀫𑀺𑀢𑁄;

𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁧𑁪. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀅𑀗𑁆𑀕𑀻𑀭𑀲𑀲𑀦𑀸𑀫𑀓𑁄;

𑀯𑀺𑀯𑀝𑁆𑀝𑀘𑁆𑀙𑀤𑁄 [𑀯𑀺𑀯𑀢𑁆𑀣𑀘𑁆𑀙𑀤𑁆𑀤𑁄 (𑀲𑀻.)] 𑀲𑀫𑁆𑀩𑀼𑀤𑁆𑀥𑁄, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀸𑀯𑀤𑁂.

𑁧𑁫. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀢𑀭𑀁𑀲𑀻𑀢𑀺 𑀦𑀸𑀫𑁂𑀦, 𑀅𑀭𑀳𑀸 𑀲𑁄 𑀪𑀯𑀺𑀲𑁆𑀲𑀢𑀺’.

𑁧𑁬. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀲𑀢𑀭𑀁𑀲𑀺𑀫𑁆𑀳𑀺 𑀦𑀸𑀫𑁂𑀦, 𑀧𑀪𑀸 𑀦𑀺𑀤𑁆𑀥𑀸𑀯𑀢𑁂 𑀫𑀫.

𑁧𑁭. ‘‘𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀛𑀸𑀬𑀻 𑀛𑀸𑀦𑀭𑀢𑁄 𑀅𑀳𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁧𑁮. ‘‘𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀘𑀢𑀼𑀭𑁄 𑀭𑀸𑀫𑀦𑀸𑀫𑀓𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀢𑀭𑀁𑀲𑀺 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀢𑀭𑀁𑀲𑀺𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁦. ‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀺𑀦𑁄;

𑀲𑀬𑀦𑀁 𑀢𑀲𑁆𑀲 𑀧𑀸𑀤𑀸𑀲𑀺𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁨𑁧. ‘‘𑀢𑁂𑀦 𑀲𑀬𑀦𑀤𑀸𑀦𑁂𑀦, 𑀲𑀼𑀔𑁂𑀢𑁆𑀢𑁂 𑀩𑀻𑀚𑀲𑀫𑁆𑀧𑀤𑀸;

𑀪𑁄𑀕𑀸 𑀦𑀺𑀩𑁆𑀩𑀢𑁆𑀢𑀭𑁂 𑀢𑀲𑁆𑀲, 𑀲𑀬𑀦𑀲𑁆𑀲 𑀇𑀤𑀁 𑀨𑀮𑀁.

𑁨𑁨. ‘‘𑀆𑀓𑀸𑀲𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀥𑀸𑀭𑁂𑀫𑀺 𑀧𑀣𑀯𑀺𑀁 𑀇𑀫𑀁;

𑀧𑀸𑀡𑁂𑀲𑀼 𑀫𑁂 𑀇𑀲𑁆𑀲𑀭𑀺𑀬𑀁, 𑀲𑀬𑀦𑀲𑁆𑀲 𑀇𑀤𑀁 𑀨𑀮𑀁.

𑁨𑁩. ‘‘𑀧𑀜𑁆𑀘𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀅𑀝𑁆𑀞 𑀆𑀲𑀼𑀁 𑀫𑀳𑀸𑀢𑁂𑀚𑀸 [𑀫𑀳𑀸𑀯𑀭𑀸 (𑀲𑀻.), 𑀫𑀳𑀸𑀯𑀻𑀭𑀸 (𑀲𑁆𑀬𑀸.)];

𑀘𑀢𑀼𑀢𑁆𑀢𑀺𑀁𑀲𑁂 𑀓𑀧𑁆𑀧𑀲𑀢𑁂, 𑀘𑀢𑀼𑀭𑁄 𑀘 𑀫𑀳𑀩𑁆𑀩𑀮𑀸.

𑁨𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀬𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁫. ‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀫𑀳𑀸𑀩𑁄𑀥𑀺𑀫𑀳𑁄 𑀅𑀳𑀼;

𑀯𑀺𑀘𑀺𑀢𑁆𑀢𑀁 𑀖𑀝𑀫𑀸𑀤𑀸𑀬, 𑀕𑀦𑁆𑀥𑁄𑀤𑀓𑀫𑀤𑀸𑀲𑀳𑀁.

𑁨𑁬. ‘‘𑀦𑁆𑀳𑀸𑀦𑀓𑀸𑀮𑁂 𑀘 𑀩𑁄𑀥𑀺𑀬𑀸, 𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀣;

𑀦𑀺𑀦𑁆𑀦𑀸𑀤𑁄 𑀘 𑀫𑀳𑀸 𑀆𑀲𑀺, 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸.

𑁨𑁭. ‘‘𑀢𑁂𑀦𑁂𑀯𑀸𑀲𑀦𑀺𑀯𑁂𑀕𑁂𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 [𑀓𑀸𑀮𑀓𑀢𑁄 (𑀲𑀻. 𑀲𑁆𑀬𑀸.)] 𑀅𑀳𑀁 [𑀅𑀳𑀼𑀁 (𑀲𑀻.)];

𑀤𑁂𑀯𑀮𑁄𑀓𑁂 𑀞𑀺𑀢𑁄 𑀲𑀦𑁆𑀢𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀳𑀁.

𑁨𑁮. ‘‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀦𑁄 𑀲𑀢𑁆𑀣𑀼𑀲𑀫𑁆𑀧𑀤𑀸;

𑀓𑀴𑁂𑀯𑀭𑀁 [𑀓𑀮𑁂𑀩𑀭𑀁 (𑀲𑀻.)] 𑀫𑁂 𑀧𑀢𑀺𑀢𑀁, 𑀤𑁂𑀯𑀮𑁄𑀓𑁂 𑀭𑀫𑀸𑀫𑀳𑀁.

𑁨𑁯. ‘‘‘𑀉𑀩𑁆𑀩𑀺𑀤𑁆𑀥𑀁 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑀪𑀽𑀫𑀁 𑀲𑀫𑀼𑀕𑁆𑀕𑀢𑀁;

𑀓𑀜𑁆𑀜𑀸𑀲𑀢𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁩𑁦. ‘‘‘𑀆𑀩𑀸𑀥𑀸 𑀫𑁂 𑀦 𑀯𑀺𑀚𑁆𑀚𑀦𑁆𑀢𑀺, 𑀲𑁄𑀓𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺;

𑀧𑀭𑀺𑀴𑀸𑀳𑀁 𑀦 𑀧𑀲𑁆𑀲𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁩𑁧. ‘‘‘𑀅𑀝𑁆𑀞𑀯𑀻𑀲𑁂 𑀓𑀧𑁆𑀧𑀲𑀢𑁂, 𑀭𑀸𑀚𑀸 𑀲𑀁𑀯𑀲𑀺𑀢𑁄 𑀅𑀳𑀼𑀁;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄’.

𑁩𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀦𑁆𑀥𑁄𑀤𑀓𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀑𑀧𑀯𑀬𑁆𑀳𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁩. ‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀆𑀚𑀸𑀦𑀻𑀬𑀫𑀤𑀸𑀲𑀳𑀁;

𑀦𑀺𑀬𑁆𑀬𑀸𑀤𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁂 [𑀲𑀫𑁆𑀩𑀼𑀤𑁆𑀥𑀁 (𑀲𑀻. 𑀓.)], 𑀅𑀕𑀫𑀸𑀲𑀺𑀁 𑀲𑀓𑀁 𑀖𑀭𑀁.

𑁩𑁪. ‘‘𑀤𑁂𑀯𑀮𑁄 𑀦𑀸𑀫 𑀦𑀸𑀫𑁂𑀦, 𑀲𑀢𑁆𑀣𑀼𑀦𑁄 𑀅𑀕𑁆𑀕𑀲𑀸𑀯𑀓𑁄;

𑀯𑀭𑀥𑀫𑁆𑀫𑀲𑁆𑀲 𑀤𑀸𑀬𑀸𑀤𑁄, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁩𑁫. ‘‘𑀲𑀧𑀢𑁆𑀢𑀪𑀸𑀭𑁄 𑀪𑀕𑀯𑀸, 𑀆𑀚𑀸𑀦𑁂𑀬𑁆𑀬𑁄 𑀦 𑀓𑀧𑁆𑀧𑀢𑀺;

𑀢𑀯 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀅𑀥𑀺𑀯𑀸𑀲𑁂𑀲𑀺 𑀘𑀓𑁆𑀔𑀼𑀫𑀸.

𑁩𑁬. ‘‘𑀅𑀕𑁆𑀖𑀸𑀧𑁂𑀢𑁆𑀯𑀸 𑀯𑀸𑀢𑀚𑀯𑀁, 𑀲𑀺𑀦𑁆𑀥𑀯𑀁 𑀲𑀻𑀖𑀯𑀸𑀳𑀦𑀁;

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀔𑀫𑀦𑀻𑀬𑀫𑀤𑀸𑀲𑀳𑀁.

𑁩𑁭. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁 [𑀤𑁂𑀯𑁂 𑀘 𑀫𑀸𑀦𑀼𑀲𑁂 𑀪𑀯𑁂 (𑀲𑀻. 𑀓.)];

𑀔𑀫𑀦𑀻𑀬𑀁 𑀯𑀸𑀢𑀚𑀯𑀁, 𑀘𑀺𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑀢𑁂 [𑀆𑀚𑀸𑀦𑀻𑀬𑀸 𑀯𑀸𑀢𑀚𑀯𑀸, 𑀯𑀺𑀢𑁆𑀢𑀺 𑀦𑀺𑀩𑁆𑀩𑀢𑁆𑀢𑀭𑁂 (𑀲𑁆𑀬𑀸.), 𑀔𑀫𑀦𑀻𑀬𑀸 𑀯𑀸𑀢𑀚𑀯𑀸, 𑀘𑀺𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀭𑁂 (𑀲𑀻.)] 𑀫𑀫.

𑁩𑁮. ‘‘𑀮𑀸𑀪𑀁 𑀢𑁂𑀲𑀁 𑀲𑀼𑀮𑀤𑁆𑀥𑀁𑀯, 𑀬𑁂 𑀮𑀪𑀦𑁆𑀢𑀼𑀧𑀲𑀫𑁆𑀧𑀤𑀁;

𑀧𑀼𑀦𑀧𑀺 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀁, 𑀩𑀼𑀤𑁆𑀥𑁄 𑀮𑁄𑀓𑁂 𑀲𑀘𑁂 𑀪𑀯𑁂.

𑁩𑁯. ‘‘𑀅𑀝𑁆𑀞𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀁𑀳𑀁, 𑀭𑀸𑀚𑀸 𑀆𑀲𑀺𑀁 𑀫𑀳𑀩𑁆𑀩𑀮𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀚𑀫𑁆𑀩𑀼𑀲𑀡𑁆𑀟𑀲𑁆𑀲 [𑀚𑀫𑁆𑀩𑀼𑀤𑀻𑀧𑀲𑁆𑀲 (𑀲𑁆𑀬𑀸.), 𑀚𑀫𑁆𑀩𑀼𑀫𑀡𑁆𑀟𑀲𑁆𑀲 (𑀓.)] 𑀚𑀫𑁆𑀩𑀼𑀇𑀲𑁆𑀲𑀭𑁄.

𑁪𑁦. ‘‘𑀇𑀤𑀁 𑀧𑀘𑁆𑀙𑀺𑀫𑀓𑀁 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀧𑀢𑁆𑀢𑁄𑀲𑁆𑀫𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

𑁪𑁧. ‘‘𑀘𑀢𑀼𑀢𑀺𑀁𑀲𑀲𑀳𑀲𑁆𑀲𑀫𑁆𑀳𑀺, 𑀫𑀳𑀸𑀢𑁂𑀚𑁄𑀲𑀺 𑀔𑀢𑁆𑀢𑀺𑀬𑁄;

𑀲𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀑𑀧𑀯𑀬𑁆𑀳𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀑𑀧𑀯𑀬𑁆𑀳𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀲𑀧𑀭𑀺𑀯𑀸𑀭𑀸𑀲𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁩. ‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀧𑀺𑀡𑁆𑀟𑀧𑀸𑀢𑀁 𑀅𑀤𑀸𑀲𑀳𑀁;

𑀕𑀦𑁆𑀢𑁆𑀯𑀸 𑀓𑀺𑀮𑀺𑀝𑁆𑀞𑀓𑀁 𑀞𑀸𑀦𑀁 [𑀢𑀁 𑀪𑁄𑀚𑀦𑀝𑁆𑀞𑀸𑀦𑀁 (𑀲𑀻.)], 𑀫𑀮𑁆𑀮𑀺𑀓𑀸𑀳𑀺 𑀧𑀭𑀺𑀓𑁆𑀔𑀺𑀢𑀁 [𑀧𑀭𑀺𑀓𑁆𑀔𑀺𑀧𑀺𑀁 (𑀲𑀻.)].

𑁪𑁪. ‘‘𑀢𑀫𑁆𑀳𑀸𑀲𑀦𑀫𑁆𑀳𑀺 𑀆𑀲𑀻𑀦𑁄, 𑀩𑀼𑀤𑁆𑀥𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀅𑀓𑀺𑀢𑁆𑀢𑀬𑀺 𑀧𑀺𑀡𑁆𑀟𑀧𑀸𑀢𑀁, 𑀉𑀚𑀼𑀪𑀽𑀢𑁄 𑀲𑀫𑀸𑀳𑀺𑀢𑁄.

𑁪𑁫. ‘‘𑀬𑀣𑀸𑀧𑀺 𑀪𑀤𑁆𑀤𑀓𑁂 𑀔𑁂𑀢𑁆𑀢𑁂, 𑀩𑀻𑀚𑀁 𑀅𑀧𑁆𑀧𑀫𑁆𑀧𑀺 𑀭𑁄𑀧𑀺𑀢𑀁;

𑀲𑀫𑁆𑀫𑀸 𑀥𑀸𑀭𑀁 𑀧𑀯𑁂𑀘𑁆𑀙𑀦𑁆𑀢𑁂, 𑀨𑀮𑀁 𑀢𑁄𑀲𑁂𑀢𑀺 𑀓𑀲𑁆𑀲𑀓𑀁.

𑁪𑁬. ‘‘𑀢𑀣𑁂𑀯𑀸𑀬𑀁 𑀧𑀺𑀡𑁆𑀟𑀧𑀸𑀢𑁄, 𑀲𑀼𑀔𑁂𑀢𑁆𑀢𑁂 𑀭𑁄𑀧𑀺𑀢𑁄 𑀢𑀬𑀸;

𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀳𑀺, 𑀨𑀮𑀁 𑀢𑁂 [𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀳𑀺, 𑀨𑀮𑀢𑁄 (𑀲𑀻.)] 𑀢𑁄𑀲𑀬𑀺𑀲𑁆𑀲𑀢𑀺 [𑀢𑀧𑁆𑀧𑀬𑀺𑀲𑁆𑀲𑀢𑀺 (𑀓.)].

𑁪𑁭. ‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄;

𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸𑀦, 𑀧𑀓𑁆𑀓𑀸𑀫𑀺 𑀉𑀢𑁆𑀢𑀭𑀸𑀫𑀼𑀔𑁄.

𑁪𑁮. ‘‘𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘 𑀧𑀜𑁆𑀘𑀲𑀼;

𑀧𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀧𑀭𑀺𑀯𑀸𑀭𑀸𑀲𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀧𑀭𑀺𑀯𑀸𑀭𑀸𑀲𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀧𑀜𑁆𑀘𑀤𑀻𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁦. ‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄;

𑀲𑀤𑁆𑀤𑀳𑀺𑀢𑁆𑀯𑀸𑀦 [𑀲𑀼𑀲𑀡𑁆𑀞𑀳𑀺𑀢𑁆𑀯𑀸 (𑀲𑀻.)] 𑀲𑀤𑁆𑀥𑀫𑁆𑀫𑁂, 𑀉𑀚𑀼𑀤𑀺𑀝𑁆𑀞𑀺 𑀅𑀳𑁄𑀲𑀳𑀁.

𑁫𑁧. ‘‘𑀧𑀤𑀻𑀧𑀤𑀸𑀦𑀁 𑀧𑀸𑀤𑀸𑀲𑀺𑀁, 𑀧𑀭𑀺𑀯𑀸𑀭𑁂𑀢𑁆𑀯𑀸𑀦 𑀩𑁄𑀥𑀺𑀬𑀁;

𑀲𑀤𑁆𑀤𑀳𑀦𑁆𑀢𑁄 𑀧𑀤𑀻𑀧𑀸𑀦𑀺, 𑀅𑀓𑀭𑀺𑀁 𑀢𑀸𑀯𑀤𑁂 𑀅𑀳𑀁.

𑁫𑁨. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀆𑀓𑀸𑀲𑁂 𑀉𑀓𑁆𑀓𑀁 𑀥𑀸𑀭𑁂𑀦𑁆𑀢𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁩. ‘‘𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀲𑁂𑀮𑀁, 𑀲𑀫𑀢𑀺𑀕𑁆𑀕𑀬𑁆𑀳 𑀧𑀩𑁆𑀩𑀢𑀁;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀤𑀲𑁆𑀲𑀦𑀁 𑀅𑀦𑀼𑀪𑁄𑀫𑀳𑀁.

𑁫𑁪. ‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀧𑀢𑁆𑀢𑁄𑀫𑁆𑀳𑀺 𑀆𑀲𑀯𑀓𑁆𑀔𑀬𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀲𑀸𑀲𑀦𑁂.

𑁫𑁫. ‘‘𑀘𑀢𑀼𑀢𑁆𑀢𑀺𑀁𑀲𑁂 𑀓𑀧𑁆𑀧𑀲𑀢𑁂, 𑀲𑀢𑀘𑀓𑁆𑀔𑀼𑀲𑀦𑀸𑀫𑀓𑀸;

𑀭𑀸𑀚𑀸𑀳𑁂𑀲𑀼𑀁 𑀫𑀳𑀸𑀢𑁂𑀚𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁫𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀜𑁆𑀘𑀤𑀻𑀧𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀜𑁆𑀘𑀤𑀻𑀧𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀥𑀚𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁭. ‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀩𑁄𑀥𑀺𑀬𑀸 𑀧𑀸𑀤𑀧𑀼𑀢𑁆𑀢𑀫𑁂;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀥𑀚𑀫𑀸𑀭𑁄𑀧𑀬𑀺𑀁 𑀅𑀳𑀁.

𑁫𑁮. ‘‘𑀧𑀢𑀺𑀢𑀧𑀢𑁆𑀢𑀸𑀦𑀺 𑀕𑀡𑁆𑀳𑀺𑀢𑁆𑀯𑀸, 𑀩𑀳𑀺𑀤𑁆𑀥𑀸 𑀙𑀟𑁆𑀟𑀬𑀺𑀁 𑀅𑀳𑀁;

𑀅𑀦𑁆𑀢𑁄𑀲𑀼𑀤𑁆𑀥𑀁 𑀩𑀳𑀺𑀲𑀼𑀤𑁆𑀥𑀁, 𑀅𑀥𑀺𑀫𑀼𑀢𑁆𑀢𑀫𑀦𑀸𑀲𑀯𑀁.

𑁫𑁯. ‘‘𑀲𑀫𑁆𑀫𑀼𑀔𑀸 𑀯𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀅𑀯𑀦𑁆𑀤𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄.

𑁬𑁦. ‘‘𑀪𑀺𑀓𑁆𑀔𑀼𑀲𑀗𑁆𑀖𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣;

‘‘‘𑀇𑀫𑀺𑀦𑀸 𑀥𑀚𑀤𑀸𑀦𑁂𑀦, 𑀉𑀧𑀝𑁆𑀞𑀸𑀦𑁂𑀦 𑀘𑀽𑀪𑀬𑀁.

𑁬𑁧. ‘‘‘𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀲𑁄 𑀦 𑀕𑀘𑁆𑀙𑀢𑀺;

𑀤𑁂𑀯𑁂𑀲𑀼 𑀤𑁂𑀯𑀲𑁄𑀪𑀕𑁆𑀬𑀁, 𑀅𑀦𑀼𑀪𑁄𑀲𑁆𑀲𑀢𑀺𑀦𑀧𑁆𑀧𑀓𑀁.

𑁬𑁨. ‘‘‘𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀜𑁆𑀘, 𑀭𑀸𑀚𑀸 𑀭𑀝𑁆𑀞𑁂 𑀪𑀯𑀺𑀲𑁆𑀲𑀢𑀺;

𑀉𑀕𑁆𑀕𑀢𑁄 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁬𑁩. ‘‘‘𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑁂𑀪𑀺𑀭𑀫𑀺𑀲𑁆𑀲𑀢𑀺’.

𑁬𑁪. ‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄𑀫𑁆𑀳𑀺, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁬𑁫. ‘‘𑀏𑀓𑀧𑀜𑁆𑀜𑀸𑀲𑀲𑀳𑀲𑁆𑀲𑁂, 𑀓𑀧𑁆𑀧𑁂 𑀉𑀕𑁆𑀕𑀢𑀲𑀯𑁆𑀳𑀬𑁄 [𑀲𑀯𑁆𑀳𑀬𑀸 (𑀲𑁆𑀬𑀸.)];

𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲𑁂, 𑀔𑀢𑁆𑀢𑀺𑀬𑁄 𑀫𑁂𑀖𑀲𑀯𑁆𑀳𑀬𑁄 [𑀔𑀢𑁆𑀢𑀺𑀬𑀸 𑀔𑁂𑀫𑀲𑀯𑁆𑀳𑀬𑀸 (𑀲𑁆𑀬𑀸.)].

𑁬𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀥𑀚𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀥𑀚𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.