𑁭. 𑀧𑀜𑁆𑀘𑀤𑀻𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁦. ‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄;

𑀲𑀤𑁆𑀤𑀳𑀺𑀢𑁆𑀯𑀸𑀦 [𑀲𑀼𑀲𑀡𑁆𑀞𑀳𑀺𑀢𑁆𑀯𑀸 (𑀲𑀻.)] 𑀲𑀤𑁆𑀥𑀫𑁆𑀫𑁂, 𑀉𑀚𑀼𑀤𑀺𑀝𑁆𑀞𑀺 𑀅𑀳𑁄𑀲𑀳𑀁.

𑁫𑁧. ‘‘𑀧𑀤𑀻𑀧𑀤𑀸𑀦𑀁 𑀧𑀸𑀤𑀸𑀲𑀺𑀁, 𑀧𑀭𑀺𑀯𑀸𑀭𑁂𑀢𑁆𑀯𑀸𑀦 𑀩𑁄𑀥𑀺𑀬𑀁;

𑀲𑀤𑁆𑀤𑀳𑀦𑁆𑀢𑁄 𑀧𑀤𑀻𑀧𑀸𑀦𑀺, 𑀅𑀓𑀭𑀺𑀁 𑀢𑀸𑀯𑀤𑁂 𑀅𑀳𑀁.

𑁫𑁨. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀆𑀓𑀸𑀲𑁂 𑀉𑀓𑁆𑀓𑀁 𑀥𑀸𑀭𑁂𑀦𑁆𑀢𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁩. ‘‘𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀲𑁂𑀮𑀁, 𑀲𑀫𑀢𑀺𑀕𑁆𑀕𑀬𑁆𑀳 𑀧𑀩𑁆𑀩𑀢𑀁;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀤𑀲𑁆𑀲𑀦𑀁 𑀅𑀦𑀼𑀪𑁄𑀫𑀳𑀁.

𑁫𑁪. ‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀧𑀢𑁆𑀢𑁄𑀫𑁆𑀳𑀺 𑀆𑀲𑀯𑀓𑁆𑀔𑀬𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀲𑀸𑀲𑀦𑁂.

𑁫𑁫. ‘‘𑀘𑀢𑀼𑀢𑁆𑀢𑀺𑀁𑀲𑁂 𑀓𑀧𑁆𑀧𑀲𑀢𑁂, 𑀲𑀢𑀘𑀓𑁆𑀔𑀼𑀲𑀦𑀸𑀫𑀓𑀸;

𑀭𑀸𑀚𑀸𑀳𑁂𑀲𑀼𑀁 𑀫𑀳𑀸𑀢𑁂𑀚𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁫𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀜𑁆𑀘𑀤𑀻𑀧𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀜𑁆𑀘𑀤𑀻𑀧𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.