𑁪. 𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁫. ‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀫𑀳𑀸𑀩𑁄𑀥𑀺𑀫𑀳𑁄 𑀅𑀳𑀼;

𑀯𑀺𑀘𑀺𑀢𑁆𑀢𑀁 𑀖𑀝𑀫𑀸𑀤𑀸𑀬, 𑀕𑀦𑁆𑀥𑁄𑀤𑀓𑀫𑀤𑀸𑀲𑀳𑀁.

𑁨𑁬. ‘‘𑀦𑁆𑀳𑀸𑀦𑀓𑀸𑀮𑁂 𑀘 𑀩𑁄𑀥𑀺𑀬𑀸, 𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀣;

𑀦𑀺𑀦𑁆𑀦𑀸𑀤𑁄 𑀘 𑀫𑀳𑀸 𑀆𑀲𑀺, 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸.

𑁨𑁭. ‘‘𑀢𑁂𑀦𑁂𑀯𑀸𑀲𑀦𑀺𑀯𑁂𑀕𑁂𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 [𑀓𑀸𑀮𑀓𑀢𑁄 (𑀲𑀻. 𑀲𑁆𑀬𑀸.)] 𑀅𑀳𑀁 [𑀅𑀳𑀼𑀁 (𑀲𑀻.)];

𑀤𑁂𑀯𑀮𑁄𑀓𑁂 𑀞𑀺𑀢𑁄 𑀲𑀦𑁆𑀢𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀳𑀁.

𑁨𑁮. ‘‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀦𑁄 𑀲𑀢𑁆𑀣𑀼𑀲𑀫𑁆𑀧𑀤𑀸;

𑀓𑀴𑁂𑀯𑀭𑀁 [𑀓𑀮𑁂𑀩𑀭𑀁 (𑀲𑀻.)] 𑀫𑁂 𑀧𑀢𑀺𑀢𑀁, 𑀤𑁂𑀯𑀮𑁄𑀓𑁂 𑀭𑀫𑀸𑀫𑀳𑀁.

𑁨𑁯. ‘‘‘𑀉𑀩𑁆𑀩𑀺𑀤𑁆𑀥𑀁 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑀪𑀽𑀫𑀁 𑀲𑀫𑀼𑀕𑁆𑀕𑀢𑀁;

𑀓𑀜𑁆𑀜𑀸𑀲𑀢𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁩𑁦. ‘‘‘𑀆𑀩𑀸𑀥𑀸 𑀫𑁂 𑀦 𑀯𑀺𑀚𑁆𑀚𑀦𑁆𑀢𑀺, 𑀲𑁄𑀓𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺;

𑀧𑀭𑀺𑀴𑀸𑀳𑀁 𑀦 𑀧𑀲𑁆𑀲𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁩𑁧. ‘‘‘𑀅𑀝𑁆𑀞𑀯𑀻𑀲𑁂 𑀓𑀧𑁆𑀧𑀲𑀢𑁂, 𑀭𑀸𑀚𑀸 𑀲𑀁𑀯𑀲𑀺𑀢𑁄 𑀅𑀳𑀼𑀁;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄’.

𑁩𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀦𑁆𑀥𑁄𑀤𑀓𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.