𑁧. 𑀬𑀲𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀫𑀳𑀸𑀲𑀫𑀼𑀤𑁆𑀤𑀁 𑀑𑀕𑁆𑀕𑀬𑁆𑀳, 𑀪𑀯𑀦𑀁 𑀫𑁂 𑀲𑀼𑀦𑀺𑀫𑁆𑀫𑀺𑀢𑀁;

𑀲𑀼𑀦𑀺𑀫𑁆𑀫𑀺𑀢𑀸 𑀧𑁄𑀓𑁆𑀔𑀭𑀡𑀻, 𑀘𑀓𑁆𑀓𑀯𑀸𑀓𑀽𑀧𑀓𑀽𑀚𑀺𑀢𑀸.

𑁨. ‘‘𑀫𑀦𑁆𑀤𑀸𑀭𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀧𑀤𑀼𑀫𑀼𑀧𑁆𑀧𑀮𑀓𑁂𑀳𑀺 𑀘;

𑀦𑀤𑀻 𑀘 𑀲𑀦𑁆𑀤𑀢𑁂 𑀢𑀢𑁆𑀣, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸.

𑁩. ‘‘𑀫𑀘𑁆𑀙𑀓𑀘𑁆𑀙𑀧𑀲𑀜𑁆𑀙𑀦𑁆𑀦𑀸, 𑀦𑀸𑀦𑀸𑀤𑀺𑀚𑀲𑀫𑁄𑀢𑁆𑀣𑀝𑀸 [𑀦𑀸𑀦𑀸𑀫𑀺𑀕𑀲𑀫𑁄𑀢𑁆𑀣𑀝𑀸 (𑀲𑁆𑀬𑀸.)];

𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀤𑀸, 𑀓𑁄𑀓𑀺𑀮𑀸𑀤𑀻𑀳𑀺 𑀯𑀕𑁆𑀕𑀼𑀳𑀺.

𑁪. ‘‘𑀧𑀸𑀭𑁂𑀯𑀢𑀸 𑀭𑀯𑀺𑀳𑀁𑀲𑀸, 𑀘𑀓𑁆𑀓𑀯𑀸𑀓𑀸 𑀦𑀤𑀻𑀘𑀭𑀸;

𑀢𑀺𑀢𑁆𑀢𑀺𑀭𑀸 𑀲𑀸𑀴𑀺𑀓𑀸 𑀘𑁂𑀢𑁆𑀣, 𑀧𑀸𑀯𑀓𑀸 [𑀲𑀫𑁆𑀩𑀓𑀸 (𑀓.)] 𑀚𑀻𑀯𑀁𑀚𑀻𑀯𑀓𑀸.

𑁫. ‘‘𑀳𑀁𑀲𑀸𑀓𑁄𑀜𑁆𑀘𑀸𑀪𑀺𑀦𑀤𑀺𑀢𑀸, 𑀓𑁄𑀲𑀺𑀬𑀸 𑀧𑀺𑀗𑁆𑀕𑀮𑀸 [𑀧𑀺𑀗𑁆𑀕𑀮𑀻 (𑀲𑀻.), 𑀲𑀺𑀗𑁆𑀕𑀮𑀻, 𑀲𑀺𑀗𑁆𑀖𑀮𑀻 (𑀓.)] 𑀩𑀳𑀽;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀫𑀡𑀺𑀫𑀼𑀢𑁆𑀢𑀧𑀯𑀸𑀴𑀺𑀓𑀸.

𑁬. ‘‘𑀲𑀩𑁆𑀩𑁂 𑀲𑁄𑀡𑁆𑀡𑀫𑀬𑀸 𑀭𑀼𑀓𑁆𑀔𑀸, 𑀦𑀸𑀦𑀸𑀔𑀦𑁆𑀥𑀲𑀫𑁂𑀭𑀺𑀢𑀸;

𑀉𑀚𑁆𑀚𑁄𑀢𑁂𑀦𑁆𑀢𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀪𑀯𑀦𑀁 𑀲𑀩𑁆𑀩𑀓𑀸𑀮𑀺𑀓𑀁.

𑁭. ‘‘𑀲𑀝𑁆𑀞𑀺𑀢𑀼𑀭𑀺𑀬𑀲𑀳𑀲𑁆𑀲𑀸𑀦𑀺, 𑀲𑀸𑀬𑀁 𑀧𑀸𑀢𑁄 𑀧𑀯𑀚𑁆𑀚𑀭𑁂;

𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁮. ‘‘𑀅𑀪𑀺𑀦𑀺𑀓𑁆𑀔𑀫𑁆𑀫 𑀪𑀯𑀦𑀸, 𑀲𑀼𑀫𑁂𑀥𑀁 𑀮𑁄𑀓𑀦𑀸𑀬𑀓𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀦𑁆𑀤𑀬𑀺𑀁 𑀢𑀁 [𑀲𑀩𑁆𑀩𑀤𑀲𑁆𑀲𑀺𑀁 (𑀓.)] 𑀫𑀳𑀸𑀬𑀲𑀁.

𑁯. ‘‘𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀲𑀲𑀗𑁆𑀖𑀁 𑀢𑀁 𑀦𑀺𑀫𑀦𑁆𑀢𑀬𑀺𑀁;

𑀅𑀥𑀺𑀯𑀸𑀲𑁂𑀲𑀺 𑀲𑁄 𑀥𑀻𑀭𑁄, 𑀲𑀼𑀫𑁂𑀥𑁄 𑀮𑁄𑀓𑀦𑀸𑀬𑀓𑁄.

𑁧𑁦. ‘‘𑀫𑀫 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸, 𑀉𑀬𑁆𑀬𑁄𑀚𑁂𑀲𑀺 𑀫𑀳𑀸𑀫𑀼𑀦𑀺;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀪𑀯𑀦𑀁 𑀫𑁂 𑀉𑀧𑀸𑀕𑀫𑀺𑀁.

𑁧𑁧. ‘‘𑀆𑀫𑀦𑁆𑀢𑀬𑀺𑀁 𑀧𑀭𑀺𑀚𑀦𑀁, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸;

‘𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀩𑀼𑀤𑁆𑀥𑁄, 𑀪𑀯𑀦𑀁 𑀆𑀕𑀫𑀺𑀲𑁆𑀲𑀢𑀺’.

𑁧𑁨. ‘‘‘𑀮𑀸𑀪𑀸 𑀅𑀫𑁆𑀳𑀁 𑀲𑀼𑀮𑀤𑁆𑀥𑀸 𑀦𑁄, 𑀬𑁂 𑀯𑀲𑀸𑀫 𑀢𑀯𑀦𑁆𑀢𑀺𑀓𑁂;

𑀫𑀬𑀫𑁆𑀧𑀺 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀧𑀽𑀚𑀬𑀺𑀲𑁆𑀲𑀸𑀫 𑀲𑀢𑁆𑀣𑀼𑀦𑁄’.

𑁧𑁩. ‘‘𑀅𑀦𑁆𑀦𑀁 𑀧𑀸𑀦𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀓𑀸𑀮𑀁 𑀆𑀭𑁄𑀘𑀬𑀺𑀁 𑀅𑀳𑀁;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀉𑀧𑁂𑀲𑀺 𑀮𑁄𑀓𑀦𑀸𑀬𑀓𑁄.

𑁧𑁪. ‘‘𑀧𑀜𑁆𑀘𑀗𑁆𑀕𑀺𑀓𑁂𑀳𑀺 𑀢𑀼𑀭𑀺𑀬𑁂𑀳𑀺, 𑀧𑀘𑁆𑀘𑀼𑀕𑁆𑀕𑀫𑀫𑀓𑀸𑀲𑀳𑀁;

𑀲𑀩𑁆𑀩𑀲𑁄𑀡𑁆𑀡𑀫𑀬𑁂 𑀧𑀻𑀞𑁂, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁧𑁫. ‘‘𑀉𑀧𑀭𑀺𑀘𑁆𑀙𑀤𑀦𑀁 𑀆𑀲𑀺, 𑀲𑀩𑁆𑀩𑀲𑁄𑀡𑁆𑀡𑀫𑀬𑀁 𑀢𑀤𑀸;

𑀩𑀻𑀚𑀦𑀻𑀬𑁄 𑀧𑀯𑀸𑀬𑀦𑁆𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀢𑁆𑀢𑀭𑀁.

𑁧𑁬. ‘‘𑀧𑀳𑀽𑀢𑁂𑀦𑀦𑁆𑀦𑀧𑀸𑀦𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀢𑀧𑁆𑀧𑀬𑀺𑀁;

𑀧𑀘𑁆𑀘𑁂𑀓𑀤𑀼𑀲𑁆𑀲𑀬𑀼𑀕𑀮𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀤𑀸𑀲𑀳𑀁.

𑁧𑁭. ‘‘𑀬𑀁 𑀯𑀤𑁂𑀢𑀺 𑀲𑀼𑀫𑁂𑀥𑁄 𑀲𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁮. ‘‘‘𑀬𑁄 𑀫𑀁 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀲𑀩𑁆𑀩𑁂 𑀇𑀫𑁂 𑀘 𑀢𑀧𑁆𑀧𑀬𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁧𑁯. ‘‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸𑀬𑀁, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁨𑁦. ‘‘‘𑀉𑀧𑀕𑀘𑁆𑀙𑀢𑀺 𑀬𑀁 𑀬𑁄𑀦𑀺𑀁, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀲𑀩𑁆𑀩𑀲𑁄𑀡𑁆𑀡𑀫𑀬𑀁 𑀢𑀲𑁆𑀲, 𑀙𑀤𑀦𑀁 𑀥𑀸𑀭𑀬𑀺𑀲𑁆𑀲𑀢𑀺.

𑁨𑁧. ‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁨𑁨. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁨𑁩. ‘‘‘𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀢𑀺’;

𑀘𑀺𑀢𑀓𑁂 𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑀺, 𑀳𑁂𑀝𑁆𑀞𑀸 𑀙𑀢𑁆𑀢𑀫𑁆𑀳𑀺 𑀟𑀬𑁆𑀳𑀣.

𑁨𑁪. ‘‘𑀲𑀸𑀫𑀜𑁆𑀜𑀁 𑀫𑁂 𑀅𑀦𑀼𑀧𑁆𑀧𑀢𑁆𑀢𑀁, 𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑀸;

𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑀦𑁆𑀢𑀸𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺.

𑁨𑁫. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀩𑁆𑀩𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁬. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀬𑀲𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀬𑀲𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.