𑁫𑁬. 𑀬𑀲𑀯𑀕𑁆𑀕𑁄

𑁧. 𑀬𑀲𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀫𑀳𑀸𑀲𑀫𑀼𑀤𑁆𑀤𑀁 𑀑𑀕𑁆𑀕𑀬𑁆𑀳, 𑀪𑀯𑀦𑀁 𑀫𑁂 𑀲𑀼𑀦𑀺𑀫𑁆𑀫𑀺𑀢𑀁;

𑀲𑀼𑀦𑀺𑀫𑁆𑀫𑀺𑀢𑀸 𑀧𑁄𑀓𑁆𑀔𑀭𑀡𑀻, 𑀘𑀓𑁆𑀓𑀯𑀸𑀓𑀽𑀧𑀓𑀽𑀚𑀺𑀢𑀸.

𑁨. ‘‘𑀫𑀦𑁆𑀤𑀸𑀭𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀧𑀤𑀼𑀫𑀼𑀧𑁆𑀧𑀮𑀓𑁂𑀳𑀺 𑀘;

𑀦𑀤𑀻 𑀘 𑀲𑀦𑁆𑀤𑀢𑁂 𑀢𑀢𑁆𑀣, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸.

𑁩. ‘‘𑀫𑀘𑁆𑀙𑀓𑀘𑁆𑀙𑀧𑀲𑀜𑁆𑀙𑀦𑁆𑀦𑀸, 𑀦𑀸𑀦𑀸𑀤𑀺𑀚𑀲𑀫𑁄𑀢𑁆𑀣𑀝𑀸 [𑀦𑀸𑀦𑀸𑀫𑀺𑀕𑀲𑀫𑁄𑀢𑁆𑀣𑀝𑀸 (𑀲𑁆𑀬𑀸.)];

𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀤𑀸, 𑀓𑁄𑀓𑀺𑀮𑀸𑀤𑀻𑀳𑀺 𑀯𑀕𑁆𑀕𑀼𑀳𑀺.

𑁪. ‘‘𑀧𑀸𑀭𑁂𑀯𑀢𑀸 𑀭𑀯𑀺𑀳𑀁𑀲𑀸, 𑀘𑀓𑁆𑀓𑀯𑀸𑀓𑀸 𑀦𑀤𑀻𑀘𑀭𑀸;

𑀢𑀺𑀢𑁆𑀢𑀺𑀭𑀸 𑀲𑀸𑀴𑀺𑀓𑀸 𑀘𑁂𑀢𑁆𑀣, 𑀧𑀸𑀯𑀓𑀸 [𑀲𑀫𑁆𑀩𑀓𑀸 (𑀓.)] 𑀚𑀻𑀯𑀁𑀚𑀻𑀯𑀓𑀸.

𑁫. ‘‘𑀳𑀁𑀲𑀸𑀓𑁄𑀜𑁆𑀘𑀸𑀪𑀺𑀦𑀤𑀺𑀢𑀸, 𑀓𑁄𑀲𑀺𑀬𑀸 𑀧𑀺𑀗𑁆𑀕𑀮𑀸 [𑀧𑀺𑀗𑁆𑀕𑀮𑀻 (𑀲𑀻.), 𑀲𑀺𑀗𑁆𑀕𑀮𑀻, 𑀲𑀺𑀗𑁆𑀖𑀮𑀻 (𑀓.)] 𑀩𑀳𑀽;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀫𑀡𑀺𑀫𑀼𑀢𑁆𑀢𑀧𑀯𑀸𑀴𑀺𑀓𑀸.

𑁬. ‘‘𑀲𑀩𑁆𑀩𑁂 𑀲𑁄𑀡𑁆𑀡𑀫𑀬𑀸 𑀭𑀼𑀓𑁆𑀔𑀸, 𑀦𑀸𑀦𑀸𑀔𑀦𑁆𑀥𑀲𑀫𑁂𑀭𑀺𑀢𑀸;

𑀉𑀚𑁆𑀚𑁄𑀢𑁂𑀦𑁆𑀢𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀪𑀯𑀦𑀁 𑀲𑀩𑁆𑀩𑀓𑀸𑀮𑀺𑀓𑀁.

𑁭. ‘‘𑀲𑀝𑁆𑀞𑀺𑀢𑀼𑀭𑀺𑀬𑀲𑀳𑀲𑁆𑀲𑀸𑀦𑀺, 𑀲𑀸𑀬𑀁 𑀧𑀸𑀢𑁄 𑀧𑀯𑀚𑁆𑀚𑀭𑁂;

𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁮. ‘‘𑀅𑀪𑀺𑀦𑀺𑀓𑁆𑀔𑀫𑁆𑀫 𑀪𑀯𑀦𑀸, 𑀲𑀼𑀫𑁂𑀥𑀁 𑀮𑁄𑀓𑀦𑀸𑀬𑀓𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀦𑁆𑀤𑀬𑀺𑀁 𑀢𑀁 [𑀲𑀩𑁆𑀩𑀤𑀲𑁆𑀲𑀺𑀁 (𑀓.)] 𑀫𑀳𑀸𑀬𑀲𑀁.

𑁯. ‘‘𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀲𑀲𑀗𑁆𑀖𑀁 𑀢𑀁 𑀦𑀺𑀫𑀦𑁆𑀢𑀬𑀺𑀁;

𑀅𑀥𑀺𑀯𑀸𑀲𑁂𑀲𑀺 𑀲𑁄 𑀥𑀻𑀭𑁄, 𑀲𑀼𑀫𑁂𑀥𑁄 𑀮𑁄𑀓𑀦𑀸𑀬𑀓𑁄.

𑁧𑁦. ‘‘𑀫𑀫 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸, 𑀉𑀬𑁆𑀬𑁄𑀚𑁂𑀲𑀺 𑀫𑀳𑀸𑀫𑀼𑀦𑀺;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀪𑀯𑀦𑀁 𑀫𑁂 𑀉𑀧𑀸𑀕𑀫𑀺𑀁.

𑁧𑁧. ‘‘𑀆𑀫𑀦𑁆𑀢𑀬𑀺𑀁 𑀧𑀭𑀺𑀚𑀦𑀁, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸;

‘𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀩𑀼𑀤𑁆𑀥𑁄, 𑀪𑀯𑀦𑀁 𑀆𑀕𑀫𑀺𑀲𑁆𑀲𑀢𑀺’.

𑁧𑁨. ‘‘‘𑀮𑀸𑀪𑀸 𑀅𑀫𑁆𑀳𑀁 𑀲𑀼𑀮𑀤𑁆𑀥𑀸 𑀦𑁄, 𑀬𑁂 𑀯𑀲𑀸𑀫 𑀢𑀯𑀦𑁆𑀢𑀺𑀓𑁂;

𑀫𑀬𑀫𑁆𑀧𑀺 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀧𑀽𑀚𑀬𑀺𑀲𑁆𑀲𑀸𑀫 𑀲𑀢𑁆𑀣𑀼𑀦𑁄’.

𑁧𑁩. ‘‘𑀅𑀦𑁆𑀦𑀁 𑀧𑀸𑀦𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀓𑀸𑀮𑀁 𑀆𑀭𑁄𑀘𑀬𑀺𑀁 𑀅𑀳𑀁;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀉𑀧𑁂𑀲𑀺 𑀮𑁄𑀓𑀦𑀸𑀬𑀓𑁄.

𑁧𑁪. ‘‘𑀧𑀜𑁆𑀘𑀗𑁆𑀕𑀺𑀓𑁂𑀳𑀺 𑀢𑀼𑀭𑀺𑀬𑁂𑀳𑀺, 𑀧𑀘𑁆𑀘𑀼𑀕𑁆𑀕𑀫𑀫𑀓𑀸𑀲𑀳𑀁;

𑀲𑀩𑁆𑀩𑀲𑁄𑀡𑁆𑀡𑀫𑀬𑁂 𑀧𑀻𑀞𑁂, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁧𑁫. ‘‘𑀉𑀧𑀭𑀺𑀘𑁆𑀙𑀤𑀦𑀁 𑀆𑀲𑀺, 𑀲𑀩𑁆𑀩𑀲𑁄𑀡𑁆𑀡𑀫𑀬𑀁 𑀢𑀤𑀸;

𑀩𑀻𑀚𑀦𑀻𑀬𑁄 𑀧𑀯𑀸𑀬𑀦𑁆𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀢𑁆𑀢𑀭𑀁.

𑁧𑁬. ‘‘𑀧𑀳𑀽𑀢𑁂𑀦𑀦𑁆𑀦𑀧𑀸𑀦𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀢𑀧𑁆𑀧𑀬𑀺𑀁;

𑀧𑀘𑁆𑀘𑁂𑀓𑀤𑀼𑀲𑁆𑀲𑀬𑀼𑀕𑀮𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀤𑀸𑀲𑀳𑀁.

𑁧𑁭. ‘‘𑀬𑀁 𑀯𑀤𑁂𑀢𑀺 𑀲𑀼𑀫𑁂𑀥𑁄 𑀲𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁮. ‘‘‘𑀬𑁄 𑀫𑀁 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀲𑀩𑁆𑀩𑁂 𑀇𑀫𑁂 𑀘 𑀢𑀧𑁆𑀧𑀬𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁧𑁯. ‘‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸𑀬𑀁, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁨𑁦. ‘‘‘𑀉𑀧𑀕𑀘𑁆𑀙𑀢𑀺 𑀬𑀁 𑀬𑁄𑀦𑀺𑀁, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀲𑀩𑁆𑀩𑀲𑁄𑀡𑁆𑀡𑀫𑀬𑀁 𑀢𑀲𑁆𑀲, 𑀙𑀤𑀦𑀁 𑀥𑀸𑀭𑀬𑀺𑀲𑁆𑀲𑀢𑀺.

𑁨𑁧. ‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁨𑁨. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁨𑁩. ‘‘‘𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀢𑀺’;

𑀘𑀺𑀢𑀓𑁂 𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑀺, 𑀳𑁂𑀝𑁆𑀞𑀸 𑀙𑀢𑁆𑀢𑀫𑁆𑀳𑀺 𑀟𑀬𑁆𑀳𑀣.

𑁨𑁪. ‘‘𑀲𑀸𑀫𑀜𑁆𑀜𑀁 𑀫𑁂 𑀅𑀦𑀼𑀧𑁆𑀧𑀢𑁆𑀢𑀁, 𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑀸;

𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑀦𑁆𑀢𑀸𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺.

𑁨𑁫. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀩𑁆𑀩𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁬. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀬𑀲𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀬𑀲𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀦𑀤𑀻𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁯. ‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀧𑀺𑀡𑁆𑀟𑀘𑀸𑀭𑀁 𑀘𑀭𑀦𑁆𑀢𑀲𑁆𑀲, 𑀯𑀸𑀭𑀢𑁄 𑀉𑀢𑁆𑀢𑀫𑀁 𑀬𑀲𑀁;

𑀅𑀕𑁆𑀕𑀨𑀮𑀁 𑀕𑀳𑁂𑀢𑁆𑀯𑀸𑀦, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁩𑁦. ‘‘𑀢𑁂𑀦 𑀓𑀫𑁆𑀫𑁂𑀦 𑀤𑁂𑀯𑀺𑀦𑁆𑀤𑁄, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀲𑀫𑁆𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

𑁩𑁧. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀕𑁆𑀕𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁨. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁩. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀤𑀻𑀓𑀲𑁆𑀲𑀧𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀤𑀻𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀕𑀬𑀸𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫. ‘‘𑀅𑀚𑀺𑀦𑀘𑀫𑁆𑀫𑀯𑀢𑁆𑀣𑁄𑀳𑀁 [𑀅𑀚𑀺𑀦𑀯𑀢𑁆𑀢𑀁 𑀦𑀺𑀯𑀢𑁆𑀢𑁄𑀳𑀁 (𑀲𑀻.)], 𑀔𑀸𑀭𑀺𑀪𑀸𑀭𑀥𑀭𑁄 𑀢𑀤𑀸;

𑀔𑀸𑀭𑀺𑀓𑀁 𑀳𑀸𑀭𑀬𑀺𑀢𑁆𑀯𑀸𑀦, 𑀓𑁄𑀮𑀁 𑀅𑀳𑀸𑀲𑀺 𑀅𑀲𑁆𑀲𑀫𑀁.

𑁩𑁬. ‘‘𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀏𑀓𑁄 𑀅𑀤𑀼𑀢𑀺𑀬𑁄 𑀚𑀺𑀦𑁄;

𑀫𑀫𑀲𑁆𑀲𑀫𑀁 𑀉𑀧𑀸𑀕𑀘𑁆𑀙𑀺, 𑀚𑁄𑀢𑁂𑀦𑁆𑀢𑁄 𑀲𑀩𑁆𑀩𑀓𑀸𑀮𑀺𑀓𑀁.

𑁩𑁭. ‘‘𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀲𑀼𑀩𑁆𑀩𑀢𑀁;

𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀓𑁄𑀮𑀁 𑀩𑀼𑀤𑁆𑀥𑀲𑁆𑀲𑀤𑀸𑀲𑀳𑀁.

𑁩𑁮. ‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑁄𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁯. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁦. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀬𑀸𑀓𑀲𑁆𑀲𑀧𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀬𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀓𑀺𑀫𑀺𑀮𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁨. ‘‘𑀦𑀺𑀩𑁆𑀩𑀼𑀢𑁂 𑀓𑀓𑀼𑀲𑀦𑁆𑀥𑀫𑁆𑀳𑀺, 𑀩𑁆𑀭𑀸𑀳𑁆𑀫𑀡𑀫𑁆𑀳𑀺 𑀯𑀼𑀲𑀻𑀫𑀢𑀺;

𑀕𑀳𑁂𑀢𑁆𑀯𑀸 𑀲𑀮𑀮𑀁 𑀫𑀸𑀮𑀁, 𑀫𑀡𑁆𑀟𑀧𑀁 𑀓𑀸𑀭𑀬𑀺𑀁 𑀅𑀳𑀁.

𑁪𑁩. ‘‘𑀢𑀸𑀯𑀢𑀺𑀁𑀲𑀁 𑀕𑀢𑁄 𑀲𑀦𑁆𑀢𑁄, 𑀮𑀪𑀺𑀫𑁆𑀳 [𑀮𑀪𑀸𑀫𑀺 (𑀓.)] 𑀩𑁆𑀬𑀫𑁆𑀳𑀫𑀼𑀢𑁆𑀢𑀫𑀁;

𑀅𑀜𑁆𑀜𑁂 𑀤𑁂𑀯𑁂𑀢𑀺𑀭𑁄𑀘𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁪. ‘‘𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀘𑀗𑁆𑀓𑀫𑀦𑁆𑀢𑁄 𑀞𑀺𑀢𑁄 𑀘𑀳𑀁;

𑀙𑀦𑁆𑀦𑁄 𑀲𑀮𑀮𑀧𑀼𑀧𑁆𑀨𑁂𑀳𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁫. ‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀫𑁆𑀳𑀺, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁬. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀺𑀫𑀺𑀮𑁄 [𑀓𑀺𑀫𑁆𑀩𑀺𑀮𑁄 (𑀲𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀺𑀫𑀺𑀮𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀯𑀚𑁆𑀚𑀻𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁯. ‘‘𑀲𑀳𑀲𑁆𑀲𑀭𑀁𑀲𑀻 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀯𑀺𑀯𑁂𑀓𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀦, 𑀕𑁄𑀘𑀭𑀸𑀬𑀸𑀪𑀺𑀦𑀺𑀓𑁆𑀔𑀫𑀺.

𑁫𑁦. ‘‘𑀨𑀮𑀳𑀢𑁆𑀣𑁄 𑀅𑀳𑀁 𑀤𑀺𑀲𑁆𑀯𑀸, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀯𑀡𑁆𑀝𑀁 𑀅𑀤𑀤𑀺𑀁 𑀨𑀮𑀁.

𑁫𑁧. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁨. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁩. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀚𑁆𑀚𑀻𑀧𑀼𑀢𑁆𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀚𑁆𑀚𑀻𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀉𑀢𑁆𑀢𑀭𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁫. ‘‘𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀯𑀺𑀯𑁂𑀓𑀓𑀸𑀫𑁄 𑀪𑀕𑀯𑀸, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺.

𑁫𑁬. ‘‘𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀦, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁫𑁭. ‘‘𑀯𑀺𑀚𑁆𑀚𑀥𑀭𑁄 𑀢𑀤𑀸 𑀆𑀲𑀺𑀁, 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀅𑀳𑀁;

𑀢𑀺𑀲𑀽𑀮𑀁 𑀲𑀼𑀕𑀢𑀁 𑀕𑀬𑁆𑀳, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

𑁫𑁮. ‘‘𑀧𑀩𑁆𑀩𑀢𑀕𑁆𑀕𑁂 𑀬𑀣𑀸 𑀅𑀕𑁆𑀕𑀺, 𑀧𑀼𑀡𑁆𑀡𑀫𑀸𑀬𑁂𑀯 𑀘𑀦𑁆𑀤𑀺𑀫𑀸;

𑀯𑀦𑀁 𑀑𑀪𑀸𑀲𑀢𑁂 𑀩𑀼𑀤𑁆𑀥𑁄, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

𑁫𑁯. ‘‘𑀯𑀦𑀕𑁆𑀕𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀩𑀼𑀤𑁆𑀥𑀭𑀁𑀲𑀻𑀪𑀺𑀥𑀸𑀯𑀭𑁂 [𑀩𑀼𑀤𑁆𑀥𑀭𑀁𑀲𑀻 𑀯𑀺𑀥𑀸𑀯𑀭𑁂 (𑀲𑀻. 𑀓.)];

𑀦𑀴𑀕𑁆𑀕𑀺𑀯𑀡𑁆𑀡𑀲𑀗𑁆𑀓𑀸𑀲𑀸 [𑀦𑀴𑀕𑁆𑀕𑀺𑀯 𑀦𑀲𑀗𑁆𑀓𑀸𑀲𑀁 (𑀲𑀻.)], 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁬𑁦. ‘‘𑀯𑀺𑀘𑀺𑀦𑀁 𑀅𑀤𑁆𑀤𑀲𑀁 𑀧𑀼𑀧𑁆𑀨𑀁, 𑀓𑀡𑀺𑀓𑀸𑀭𑀁 𑀤𑁂𑀯𑀕𑀦𑁆𑀥𑀺𑀓𑀁;

𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 𑀆𑀤𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀫𑀧𑀽𑀚𑀬𑀺𑀁.

𑁬𑁧. ‘‘𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 𑀫𑁂 𑀢𑀤𑀸;

𑀉𑀤𑁆𑀥𑀁 𑀯𑀡𑁆𑀝𑀸 𑀅𑀥𑁄𑀧𑀢𑁆𑀢𑀸, 𑀙𑀸𑀬𑀁 𑀓𑀼𑀩𑁆𑀩𑀦𑁆𑀢𑀺 𑀲𑀢𑁆𑀣𑀼𑀦𑁄.

𑁬𑁨. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁬𑁩. ‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀓𑀡𑀺𑀓𑀸𑀭𑀻𑀢𑀺 [𑀓𑀡𑀺𑀓𑀸𑀭𑁄𑀢𑀺 (𑀲𑀻.)] 𑀜𑀸𑀬𑀢𑀺;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑁬𑁪. ‘‘𑀲𑀳𑀲𑁆𑀲𑀓𑀡𑁆𑀟𑀁 𑀲𑀢𑀪𑁂𑀡𑁆𑀟𑀼, 𑀥𑀚𑀸𑀮𑀼 𑀳𑀭𑀺𑀢𑀸𑀫𑀬𑀁;

𑀲𑀢𑀲𑀳𑀲𑁆𑀲𑀦𑀺𑀬𑁆𑀬𑀽𑀳𑀸 [𑀲𑀢𑀲𑀳𑀲𑁆𑀲𑀸𑀦𑀺 𑀩𑁆𑀬𑀽𑀳𑀸𑀦𑀺 (𑀲𑀻.)], 𑀩𑁆𑀬𑀫𑁆𑀳𑁂 𑀧𑀸𑀢𑀼𑀪𑀯𑀺𑀁𑀲𑀼 [𑀧𑀸𑀢𑀼𑀭𑀳𑀁𑀲𑀼 (𑀲𑀻.), 𑀧𑀸𑀢𑀼𑀭𑀳𑀺𑀁𑀲𑀼 (𑀓.)] 𑀫𑁂.

𑁬𑁫. ‘‘𑀲𑁄𑀡𑁆𑀡𑀫𑀬𑀸 𑀫𑀡𑀺𑀫𑀬𑀸, 𑀮𑁄𑀳𑀺𑀢𑀗𑁆𑀓𑀫𑀬𑀸𑀧𑀺 𑀘;

𑀨𑀮𑀺𑀓𑀸𑀧𑀺 𑀘 𑀧𑀮𑁆𑀮𑀗𑁆𑀓𑀸, 𑀬𑁂𑀦𑀺𑀘𑁆𑀙𑀓𑀸 𑀬𑀤𑀺𑀘𑁆𑀙𑀓𑀸.

𑁬𑁬. ‘‘𑀫𑀳𑀸𑀭𑀳𑀜𑁆𑀘 𑀲𑀬𑀦𑀁, 𑀢𑀽𑀮𑀺𑀓𑀸 𑀯𑀺𑀓𑀢𑀻𑀬𑀼𑀢𑀁;

𑀉𑀤𑁆𑀥𑀮𑁄𑀫𑀺𑀜𑁆𑀘 𑀏𑀓𑀦𑁆𑀢𑀁, 𑀩𑀺𑀫𑁆𑀩𑁄𑀳𑀦𑀲𑀫𑀸𑀬𑀼𑀢𑀁.

𑁬𑁭. ‘‘𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀘𑀭𑀦𑁆𑀢𑁄 𑀤𑁂𑀯𑀘𑀸𑀭𑀺𑀓𑀁;

𑀬𑀣𑀸 𑀇𑀘𑁆𑀙𑀸𑀫𑀺 [𑀬𑀣𑀸 𑀕𑀘𑁆𑀙𑀸𑀫𑀺 (𑀲𑀻.)] 𑀕𑀫𑀦𑀁, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑁄.

𑁬𑁮. ‘‘𑀧𑀼𑀧𑁆𑀨𑀲𑁆𑀲 𑀳𑁂𑀝𑁆𑀞𑀸 𑀢𑀺𑀝𑁆𑀞𑀸𑀫𑀺, 𑀉𑀧𑀭𑀺𑀘𑁆𑀙𑀤𑀦𑀁 𑀫𑀫;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀓𑀡𑀺𑀓𑀸𑀭𑁂𑀳𑀺 𑀙𑀸𑀤𑀺𑀢𑀁.

𑁬𑁯. ‘‘𑀲𑀝𑁆𑀞𑀺𑀢𑀼𑀭𑀺𑀬𑀲𑀳𑀲𑁆𑀲𑀸𑀦𑀺, 𑀲𑀸𑀬𑀧𑀸𑀢𑀁 𑀉𑀧𑀝𑁆𑀞𑀳𑀼𑀁;

𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀦𑀺𑀘𑁆𑀘𑀁, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸.

𑁭𑁦. ‘‘𑀢𑀢𑁆𑀣 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺, 𑀢𑀸𑀮𑁂𑀳𑀺 𑀯𑀸𑀤𑀺𑀢𑁂𑀳𑀺 𑀘;

𑀭𑀫𑀸𑀫𑀺 𑀔𑀺𑀟𑁆𑀟𑀸 𑀭𑀢𑀺𑀬𑀸, 𑀫𑁄𑀤𑀸𑀫𑀺 𑀓𑀸𑀫𑀓𑀸𑀫𑀳𑀁.