𑁭. 𑀅𑀪𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁯𑁫. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁧𑁯𑁬. ‘‘𑀲𑀭𑀡𑀕𑀫𑀦𑁂 𑀓𑀺𑀜𑁆𑀘𑀺, 𑀦𑀺𑀯𑁂𑀲𑁂𑀲𑀺 𑀢𑀣𑀸𑀕𑀢𑁄;

𑀓𑀺𑀜𑁆𑀘𑀺 𑀲𑀻𑀮𑁂 𑀦𑀺𑀯𑁂𑀲𑁂𑀲𑀺, 𑀤𑀲𑀓𑀫𑁆𑀫𑀧𑀣𑀼𑀢𑁆𑀢𑀫𑁂.

𑁧𑁯𑁭. ‘‘𑀤𑁂𑀢𑀺 𑀓𑀲𑁆𑀲𑀘𑀺 𑀲𑁄 𑀯𑀻𑀭𑁄, 𑀲𑀸𑀫𑀜𑁆𑀜𑀨𑀮𑀫𑀼𑀢𑁆𑀢𑀫𑀁;

𑀲𑀫𑀸𑀧𑀢𑁆𑀢𑀻 𑀢𑀣𑀸 𑀅𑀝𑁆𑀞, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀯𑀘𑁆𑀙𑀢𑀺.

𑁧𑁯𑁮. ‘‘𑀙𑀴𑀪𑀺𑀜𑁆𑀜𑀸𑀲𑀼 𑀬𑁄𑀚𑁂𑀲𑀺, 𑀓𑀺𑀜𑁆𑀘𑀺 𑀲𑀢𑁆𑀢𑀁 𑀦𑀭𑀼𑀢𑁆𑀢𑀫𑁄;

𑀤𑁂𑀢𑀺 𑀓𑀲𑁆𑀲𑀘𑀺 𑀦𑀸𑀣𑁄 𑀲𑁄, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸.

𑁧𑁯𑁯. ‘‘𑀩𑁄𑀥𑀦𑁂𑀬𑁆𑀬𑀁 𑀧𑀚𑀁 𑀤𑀺𑀲𑁆𑀯𑀸, 𑀅𑀲𑀗𑁆𑀔𑁂𑀬𑁆𑀬𑀫𑁆𑀧𑀺 𑀬𑁄𑀚𑀦𑀁 [𑀅𑀲𑀗𑁆𑀔𑁂𑀬𑁆𑀬𑁂𑀧𑀺 𑀬𑁄𑀚𑀦𑁂 𑀲𑀻. 𑀲𑁆𑀬𑀸. 𑀧𑀻.)];

𑀔𑀡𑁂𑀦 𑀉𑀧𑀕𑀦𑁆𑀢𑁆𑀯𑀸𑀦, 𑀯𑀺𑀦𑁂𑀢𑀺 𑀦𑀭𑀲𑀸𑀭𑀣𑀺.

𑁨𑁦𑁦. ‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀅𑀳𑁄𑀲𑀺𑀁 𑀩𑁆𑀭𑀸𑀳𑁆𑀫𑀡𑀢𑁆𑀭𑀚𑁄;

𑀧𑀸𑀭𑀕𑀽 𑀲𑀩𑁆𑀩𑀯𑁂𑀤𑀸𑀦𑀁, 𑀯𑁂𑀬𑁆𑀬𑀸𑀓𑀭𑀡𑀲𑀫𑁆𑀫𑀢𑁄.

𑁨𑁦𑁧. ‘‘𑀦𑀺𑀭𑀼𑀢𑁆𑀢𑀺𑀬𑀸 𑀘 𑀓𑀼𑀲𑀮𑁄, 𑀦𑀺𑀖𑀡𑁆𑀟𑀼𑀫𑁆𑀳𑀺 𑀯𑀺𑀲𑀸𑀭𑀤𑁄;

𑀧𑀤𑀓𑁄 𑀓𑁂𑀝𑀼𑀪𑀯𑀺𑀤𑀽, 𑀙𑀦𑁆𑀤𑁄𑀯𑀺𑀘𑀺𑀢𑀺𑀓𑁄𑀯𑀺𑀤𑁄.

𑁨𑁦𑁨. ‘‘𑀚𑀗𑁆𑀖𑀸𑀯𑀺𑀳𑀸𑀭𑀁 𑀯𑀺𑀘𑀭𑀁, 𑀳𑀁𑀲𑀸𑀭𑀸𑀫𑀫𑀼𑀧𑁂𑀘𑁆𑀘𑀳𑀁;

𑀅𑀤𑁆𑀤𑀲𑀁 𑀯𑀭𑀤𑀁 [𑀯𑀤𑀢𑀁 (𑀲𑀻. 𑀧𑀻.), 𑀧𑀯𑀭𑀁 (𑀲𑁆𑀬𑀸.)] 𑀲𑁂𑀝𑁆𑀞𑀁, 𑀫𑀳𑀸𑀚𑀦𑀧𑀼𑀭𑀓𑁆𑀔𑀢𑀁.

𑁨𑁦𑁩. ‘‘𑀤𑁂𑀲𑁂𑀦𑁆𑀢𑀁 𑀯𑀺𑀭𑀚𑀁 𑀥𑀫𑁆𑀫𑀁, 𑀧𑀘𑁆𑀘𑀦𑀻𑀓𑀫𑀢𑀻 𑀅𑀳𑀁;

𑀉𑀧𑁂𑀢𑁆𑀯𑀸 𑀢𑀲𑁆𑀲 𑀓𑀮𑁆𑀬𑀸𑀡𑀁, 𑀲𑀼𑀢𑁆𑀯𑀸𑀦 𑀯𑀺𑀫𑀮𑀁 𑀅𑀳𑀁 [𑀯𑀸𑀓𑁆𑀬𑀸𑀦𑀺, 𑀲𑀼𑀢𑁆𑀯𑀸𑀦 𑀯𑀺𑀫𑀮𑀸𑀦𑀳𑀁 (𑀲𑀻. 𑀲𑁆𑀬𑀸. 𑀧𑀻.)].

𑁨𑁦𑁪. ‘‘𑀩𑁆𑀬𑀸𑀳𑀢𑀁 𑀧𑀼𑀦𑀭𑀼𑀢𑁆𑀢𑀁 𑀯𑀸, 𑀅𑀧𑀢𑁆𑀣𑀁 𑀯𑀸 𑀦𑀺𑀭𑀢𑁆𑀣𑀓𑀁;

𑀦𑀸𑀤𑁆𑀤𑀲𑀁 𑀢𑀲𑁆𑀲 𑀫𑀼𑀦𑀺𑀦𑁄, 𑀢𑀢𑁄 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁨𑁦𑁫. ‘‘𑀦𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀲𑀩𑁆𑀩𑀲𑀢𑁆𑀢𑀯𑀺𑀲𑀸𑀭𑀤𑁄;

𑀦𑀺𑀧𑀼𑀡𑁄 𑀩𑀼𑀤𑁆𑀥𑀯𑀘𑀦𑁂, 𑀅𑀳𑁄𑀲𑀺𑀁 𑀕𑀼𑀡𑀺𑀲𑀫𑁆𑀫𑀢𑁄.

𑁨𑁦𑁬. ‘‘𑀢𑀤𑀸 𑀘𑀢𑀲𑁆𑀲𑁄 𑀕𑀸𑀣𑀸𑀬𑁄, 𑀕𑀦𑁆𑀣𑀬𑀺𑀢𑁆𑀯𑀸 𑀲𑀼𑀩𑁆𑀬𑀜𑁆𑀚𑀦𑀸;

𑀲𑀦𑁆𑀣𑀯𑀺𑀢𑁆𑀯𑀸 𑀢𑀺𑀮𑁄𑀓𑀕𑁆𑀕𑀁, 𑀤𑁂𑀲𑀬𑀺𑀲𑁆𑀲𑀁 𑀤𑀺𑀦𑁂 𑀤𑀺𑀦𑁂.

𑁨𑁦𑁭. ‘‘𑀯𑀺𑀭𑀢𑁆𑀢𑁄𑀲𑀺 𑀫𑀳𑀸𑀯𑀻𑀭𑁄, 𑀲𑀁𑀲𑀸𑀭𑁂 𑀲𑀪𑀬𑁂 𑀯𑀲𑀁;

𑀓𑀭𑀼𑀡𑀸𑀬 𑀦 𑀦𑀺𑀩𑁆𑀩𑀸𑀬𑀺, 𑀢𑀢𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺.

𑁨𑁦𑁮. ‘‘𑀧𑀼𑀣𑀼𑀚𑁆𑀚𑀦𑁄 𑀯𑀬𑁄 𑀲𑀦𑁆𑀢𑁄, 𑀦 𑀓𑀺𑀮𑁂𑀲𑀯𑀲𑁄 𑀅𑀳𑀼;

𑀲𑀫𑁆𑀧𑀚𑀸𑀦𑁄 𑀲𑀢𑀺𑀬𑀼𑀢𑁆𑀢𑁄, 𑀢𑀲𑁆𑀫𑀸 𑀏𑀲𑁄 𑀅𑀘𑀺𑀦𑁆𑀢𑀺𑀬𑁄.

𑁨𑁦𑁯. ‘‘𑀤𑀼𑀩𑁆𑀩𑀮𑀸𑀦𑀺 𑀓𑀺𑀮𑁂𑀲𑀸𑀦𑀺, 𑀬𑀲𑁆𑀲𑀸𑀲𑀬𑀕𑀢𑀸𑀦𑀺 𑀫𑁂;

𑀜𑀸𑀡𑀕𑁆𑀕𑀺𑀧𑀭𑀺𑀤𑀟𑁆𑀠𑀸𑀦𑀺, 𑀦 𑀔𑀻𑀬𑀺𑀁𑀲𑀼 𑀢𑀫𑀩𑁆𑀪𑀼𑀢𑀁.

𑁨𑁧𑁦. ‘‘𑀬𑁄 𑀲𑀩𑁆𑀩𑀮𑁄𑀓𑀲𑁆𑀲 𑀕𑀭𑀼, 𑀮𑁄𑀓𑁄 [𑀮𑁄𑀓𑁂 (𑀲𑁆𑀬𑀸. 𑀓.)] 𑀬𑀲𑁆𑀲 𑀢𑀣𑀸 𑀕𑀭𑀼;

𑀢𑀣𑀸𑀧𑀺 𑀮𑁄𑀓𑀸𑀘𑀭𑀺𑀬𑁄, 𑀮𑁄𑀓𑁄 𑀢𑀲𑁆𑀲𑀸𑀦𑀼𑀯𑀢𑁆𑀢𑀓𑁄.

𑁨𑁧𑁧. ‘‘𑀏𑀯𑀫𑀸𑀤𑀻𑀳𑀺 𑀲𑀫𑁆𑀩𑀼𑀤𑁆𑀥𑀁, 𑀓𑀺𑀢𑁆𑀢𑀬𑀁 𑀥𑀫𑁆𑀫𑀤𑁂𑀲𑀦𑀁;

𑀬𑀸𑀯𑀚𑀻𑀯𑀁 𑀓𑀭𑀺𑀢𑁆𑀯𑀸𑀦, 𑀕𑀢𑁄 𑀲𑀕𑁆𑀕𑀁 𑀢𑀢𑁄 𑀘𑀼𑀢𑁄.

𑁨𑁧𑁨. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀓𑀺𑀢𑁆𑀢𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁨𑁧𑁩. ‘‘𑀤𑁂𑀯𑀮𑁄𑀓𑁂 𑀫𑀳𑀸𑀭𑀚𑁆𑀚𑀁, 𑀧𑀸𑀤𑁂𑀲𑀺𑀁 𑀓𑀜𑁆𑀘𑀦𑀕𑁆𑀖𑀺𑀬𑀁 [𑀤𑀺𑀩𑁆𑀩𑀸𑀦𑀼𑀪𑁄𑀚𑀳𑀁 𑀢𑀤𑀸 (𑀲𑁆𑀬𑀸.), 𑀭𑀚𑁆𑀚𑀁 𑀧𑀸𑀤𑁂𑀲𑀺 𑀓𑀁𑀘𑀬𑀁 (𑀲𑀻.)];

𑀘𑀓𑁆𑀓𑀯𑀢𑁆𑀢𑀻 𑀫𑀳𑀸𑀭𑀚𑁆𑀚𑀁, 𑀩𑀳𑀼𑀲𑁄𑀦𑀼𑀪𑀯𑀺𑀁 𑀅𑀳𑀁.

𑁨𑁧𑁪. ‘‘𑀤𑀼𑀯𑁂 𑀪𑀯𑁂 𑀧𑀚𑀸𑀬𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀅𑀜𑁆𑀜𑀁 𑀕𑀢𑀺𑀁 𑀦 𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁨𑁧𑁫. ‘‘𑀤𑀼𑀯𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀅𑀣 𑀩𑁆𑀭𑀸𑀳𑁆𑀫𑀡𑁂;

𑀦𑀻𑀘𑁂 𑀓𑀼𑀮𑁂 𑀦 𑀚𑀸𑀬𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁨𑁧𑁬. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀕𑀺𑀭𑀺𑀩𑁆𑀩𑀚𑀧𑀼𑀭𑀼𑀢𑁆𑀢𑀫𑁂;

𑀭𑀜𑁆𑀜𑁄𑀳𑀁 𑀩𑀺𑀫𑁆𑀩𑀺𑀲𑀸𑀭𑀲𑁆𑀲, 𑀧𑀼𑀢𑁆𑀢𑁄 𑀦𑀸𑀫𑁂𑀦 𑀘𑀸𑀪𑀬𑁄.

𑁨𑁧𑁭. ‘‘𑀧𑀸𑀧𑀫𑀺𑀢𑁆𑀢𑀯𑀲𑀁 𑀕𑀦𑁆𑀢𑁆𑀯𑀸, 𑀦𑀺𑀕𑀡𑁆𑀞𑁂𑀦 𑀯𑀺𑀫𑁄𑀳𑀺𑀢𑁄;

𑀧𑁂𑀲𑀺𑀢𑁄 𑀦𑀸𑀝𑀧𑀼𑀢𑁆𑀢𑁂𑀦, 𑀩𑀼𑀤𑁆𑀥𑀲𑁂𑀝𑁆𑀞𑀫𑀼𑀧𑁂𑀘𑁆𑀘𑀳𑀁.

𑁨𑁧𑁮. ‘‘𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀧𑀼𑀡𑀁 𑀧𑀜𑁆𑀳𑀁, 𑀲𑀼𑀢𑁆𑀯𑀸 𑀩𑁆𑀬𑀸𑀓𑀭𑀡𑀼𑀢𑁆𑀢𑀫𑀁;

𑀧𑀩𑁆𑀩𑀚𑀺𑀢𑁆𑀯𑀸𑀦 𑀦𑀘𑀺𑀭𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁨𑁧𑁯. ‘‘𑀓𑀺𑀢𑁆𑀢𑀬𑀺𑀢𑁆𑀯𑀸 𑀚𑀺𑀦𑀯𑀭𑀁, 𑀓𑀺𑀢𑁆𑀢𑀺𑀢𑁄 𑀳𑁄𑀫𑀺 𑀲𑀩𑁆𑀩𑀤𑀸;

𑀲𑀼𑀕𑀦𑁆𑀥𑀤𑁂𑀳𑀯𑀤𑀦𑁄, 𑀆𑀲𑀺𑀁 𑀲𑀼𑀔𑀲𑀫𑀧𑁆𑀧𑀺𑀢𑁄.

𑁨𑁨𑁦. ‘‘𑀢𑀺𑀓𑁆𑀔𑀳𑀸𑀲𑀮𑀳𑀼𑀧𑀜𑁆𑀜𑁄, 𑀫𑀳𑀸𑀧𑀜𑁆𑀜𑁄 𑀢𑀣𑁂𑀯𑀳𑀁;

𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑁄 𑀘, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸.

𑁨𑁨𑁧. ‘‘𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀧𑀤𑀼𑀫𑀼𑀢𑁆𑀢𑀭𑀸𑀳𑀁, 𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀲𑀫𑀁 𑀲𑀬𑀫𑁆𑀪𑀼𑀁;

𑀦 𑀕𑀘𑁆𑀙𑀺 𑀓𑀧𑁆𑀧𑀸𑀦𑀺 𑀅𑀧𑀸𑀬𑀪𑀽𑀫𑀺𑀁, 𑀲𑀢𑀁 𑀲𑀳𑀲𑁆𑀲𑀸𑀦𑀺 𑀩𑀮𑁂𑀦 𑀢𑀲𑁆𑀲.

𑁨𑁨𑁨. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁨𑁩. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁨𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀪𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀪𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.