𑁮. 𑀮𑁄𑀫𑀲𑀓𑀗𑁆𑀕𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁨𑁫. ‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

𑁨𑁨𑁬. ‘‘𑀢𑀤𑀸𑀳𑀁 𑀘𑀦𑁆𑀤𑀦𑁄 𑀘𑁂𑀯, 𑀧𑀩𑁆𑀩𑀚𑀺𑀢𑁆𑀯𑀸𑀦 𑀲𑀸𑀲𑀦𑁂;

𑀆𑀧𑀸𑀡𑀓𑁄𑀝𑀺𑀓𑀁 𑀥𑀫𑁆𑀫𑀁, 𑀧𑀽𑀭𑀬𑀺𑀢𑁆𑀯𑀸𑀦 𑀲𑀸𑀲𑀦𑁂.

𑁨𑁨𑁭. ‘‘𑀢𑀢𑁄 𑀘𑀼𑀢𑀸 𑀲𑀦𑁆𑀢𑀼𑀲𑀺𑀢𑀁, 𑀉𑀧𑀧𑀦𑁆𑀦𑀸 𑀉𑀪𑁄 𑀫𑀬𑀁;

𑀢𑀢𑁆𑀣 𑀤𑀺𑀩𑁆𑀩𑁂𑀳𑀺 𑀦𑀘𑁆𑀘𑁂𑀳𑀺, 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀘.

𑁨𑁨𑁮. ‘‘𑀭𑀽𑀧𑀸𑀤𑀺𑀤𑀲𑀳𑀗𑁆𑀕𑁂𑀳𑀺, 𑀅𑀪𑀺𑀪𑁄𑀢𑁆𑀯𑀸𑀦 𑀲𑁂𑀲𑀓𑁂;

𑀬𑀸𑀯𑀢𑀸𑀬𑀼𑀁 𑀯𑀲𑀺𑀢𑁆𑀯𑀸𑀦, 𑀅𑀦𑀼𑀪𑁄𑀢𑁆𑀯𑀸 𑀫𑀳𑀸𑀲𑀼𑀔𑀁.

𑁨𑁨𑁯. ‘‘𑀢𑀢𑁄 𑀘𑀯𑀺𑀢𑁆𑀯𑀸 𑀢𑀺𑀤𑀲𑀁, 𑀘𑀦𑁆𑀤𑀦𑁄 𑀉𑀧𑀧𑀚𑁆𑀚𑀣;

𑀅𑀳𑀁 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁, 𑀅𑀚𑀸𑀬𑀺𑀁 𑀲𑀸𑀓𑀺𑀬𑀢𑁆𑀭𑀚𑁄.

𑁨𑁩𑁦. ‘‘𑀬𑀤𑀸 𑀉𑀤𑀸𑀬𑀺𑀢𑁆𑀣𑁂𑀭𑁂𑀦, 𑀅𑀚𑁆𑀛𑀺𑀝𑁆𑀞𑁄 𑀮𑁄𑀓𑀦𑀸𑀬𑀓𑁄;

𑀅𑀦𑀼𑀓𑀫𑁆𑀧𑀺𑀬 𑀲𑀓𑁆𑀬𑀸𑀦𑀁, 𑀉𑀧𑁂𑀲𑀺 𑀓𑀧𑀺𑀮𑀯𑁆𑀳𑀬𑀁.

𑁨𑁩𑁧. ‘‘𑀢𑀤𑀸𑀢𑀺𑀫𑀸𑀦𑀺𑀦𑁄 𑀲𑀓𑁆𑀬𑀸, 𑀦 𑀩𑀼𑀤𑁆𑀥𑀲𑁆𑀲 𑀕𑀼𑀡𑀜𑁆𑀜𑀼𑀦𑁄;

𑀧𑀡𑀫𑀦𑁆𑀢𑀺 𑀦 𑀲𑀫𑁆𑀩𑀼𑀤𑁆𑀥𑀁, 𑀚𑀸𑀢𑀺𑀣𑀤𑁆𑀥𑀸 𑀅𑀦𑀸𑀤𑀭𑀸.

𑁨𑁩𑁨. ‘‘𑀢𑁂𑀲𑀁 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀆𑀓𑀸𑀲𑁂 𑀘𑀗𑁆𑀓𑀫𑀻 𑀚𑀺𑀦𑁄;

𑀧𑀚𑁆𑀚𑀼𑀦𑁆𑀦𑁄 𑀯𑀺𑀬 𑀯𑀲𑁆𑀲𑀺𑀢𑁆𑀣, 𑀧𑀚𑁆𑀚𑀮𑀺𑀢𑁆𑀣 𑀬𑀣𑀸 𑀲𑀺𑀔𑀻.

𑁨𑁩𑁩. ‘‘𑀤𑀲𑁆𑀲𑁂𑀢𑁆𑀯𑀸 𑀭𑀽𑀧𑀫𑀢𑀼𑀮𑀁, 𑀧𑀼𑀦 𑀅𑀦𑁆𑀢𑀭𑀥𑀸𑀬𑀣;

𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸, 𑀅𑀳𑁄𑀲𑀺 𑀧𑀼𑀦𑀭𑁂𑀓𑀓𑁄.

𑁨𑁩𑁪. ‘‘𑀅𑀦𑁆𑀥𑀓𑀸𑀭𑀁 𑀧𑀓𑀸𑀲𑀜𑁆𑀘, 𑀤𑀲𑁆𑀲𑀬𑀺𑀢𑁆𑀯𑀸 𑀅𑀦𑁂𑀓𑀥𑀸;

𑀧𑀸𑀝𑀺𑀳𑁂𑀭𑀁 𑀓𑀭𑀺𑀢𑁆𑀯𑀸𑀦, 𑀯𑀺𑀦𑀬𑀻 𑀜𑀸𑀢𑀓𑁂 𑀫𑀼𑀦𑀺.

𑁨𑁩𑁫. ‘‘𑀘𑀸𑀢𑀼𑀤𑁆𑀤𑀻𑀧𑁄 𑀫𑀳𑀸𑀫𑁂𑀖𑁄, 𑀢𑀸𑀯𑀤𑁂𑀯 𑀧𑀯𑀲𑁆𑀲𑀣;

𑀢𑀤𑀸 𑀳𑀺 𑀚𑀸𑀢𑀓𑀁 𑀩𑀼𑀤𑁆𑀥𑁄, 𑀯𑁂𑀲𑁆𑀲𑀦𑁆𑀢𑀭𑀫𑀤𑁂𑀲𑀬𑀺.

𑁨𑁩𑁬. ‘‘𑀢𑀤𑀸 𑀢𑁂 𑀔𑀢𑁆𑀢𑀺𑀬𑀸 𑀲𑀩𑁆𑀩𑁂, 𑀦𑀺𑀳𑀦𑁆𑀢𑁆𑀯𑀸 𑀚𑀸𑀢𑀺𑀚𑀁 𑀫𑀤𑀁;

𑀉𑀧𑁂𑀲𑀼𑀁 𑀲𑀭𑀡𑀁 𑀩𑀼𑀤𑁆𑀥𑀁, 𑀆𑀳 𑀲𑀼𑀤𑁆𑀥𑁄𑀤𑀦𑁄 𑀢𑀤𑀸.

𑁨𑁩𑁭. ‘‘‘𑀇𑀤𑀁 𑀢𑀢𑀺𑀬𑀁 𑀢𑀯 𑀪𑀽𑀭𑀺𑀧𑀜𑁆𑀜, 𑀧𑀸𑀤𑀸𑀦𑀺 𑀯𑀦𑁆𑀤𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀼;

𑀬𑀤𑀸𑀪𑀺𑀚𑀸𑀢𑁄 𑀧𑀣𑀯𑀻 𑀧𑀓𑀫𑁆𑀧𑀬𑀻, 𑀬𑀤𑀸 𑀘 𑀢𑀁 𑀦𑀚𑁆𑀚𑀳𑀺 𑀚𑀫𑁆𑀩𑀼𑀙𑀸𑀬𑀸’.

𑁨𑁩𑁮. ‘‘𑀢𑀤𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀢𑀁, 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑁄;

𑀧𑀩𑁆𑀩𑀚𑀺𑀢𑁆𑀯𑀸𑀦 𑀢𑀢𑁆𑀣𑁂𑀯, 𑀦𑀺𑀯𑀲𑀺𑀁 𑀫𑀸𑀢𑀼𑀧𑀽𑀚𑀓𑁄.

𑁨𑁩𑁯. ‘‘𑀘𑀦𑁆𑀤𑀦𑁄 𑀤𑁂𑀯𑀧𑀼𑀢𑁆𑀢𑁄 𑀫𑀁, 𑀉𑀧𑀕𑀦𑁆𑀢𑁆𑀯𑀸𑀦𑀼𑀧𑀼𑀘𑁆𑀙𑀣;

𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀢𑀤𑀸, 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀁 𑀦𑀬𑀁.

𑁨𑁪𑁦. ‘‘𑀘𑁄𑀤𑀺𑀢𑁄𑀳𑀁 𑀢𑀤𑀸 𑀢𑁂𑀦, 𑀉𑀧𑁂𑀘𑁆𑀘 𑀦𑀭𑀦𑀸𑀬𑀓𑀁;

𑀪𑀤𑁆𑀤𑁂𑀓𑀭𑀢𑁆𑀢𑀁 𑀲𑀼𑀢𑁆𑀯𑀸𑀦, 𑀲𑀁𑀯𑀺𑀕𑁆𑀕𑁄 𑀯𑀦𑀫𑀸𑀫𑀓𑁄.

𑁨𑁪𑁧. ‘‘𑀢𑀤𑀸 𑀫𑀸𑀢𑀭𑀫𑀧𑀼𑀘𑁆𑀙𑀺𑀁, 𑀯𑀦𑁂 𑀯𑀘𑁆𑀙𑀸𑀫𑀺 𑀏𑀓𑀓𑁄;

𑀲𑀼𑀔𑀼𑀫𑀸𑀮𑁄𑀢𑀺 𑀫𑁂 𑀫𑀸𑀢𑀸, 𑀯𑀸𑀭𑀬𑀻 𑀢𑀁 [𑀢𑁂 (𑀲𑁆𑀬𑀸. 𑀧𑀻. 𑀓.)] 𑀢𑀤𑀸 𑀯𑀘𑀁.

𑁨𑁪𑁨. ‘‘𑀓𑀸𑀲𑀁 [𑀤𑀩𑁆𑀩𑀁 (𑀲𑀻. 𑀲𑁆𑀬𑀸. 𑀧𑀻.)] 𑀓𑀼𑀲𑀁 𑀧𑁄𑀝𑀓𑀺𑀮𑀁, 𑀉𑀲𑀻𑀭𑀁 𑀫𑀼𑀜𑁆𑀚𑀧𑀩𑁆𑀩𑀚𑀁 [𑀫𑀼𑀜𑁆𑀚𑀩𑀩𑁆𑀩𑀚𑀁 (𑀲𑀻. 𑀧𑀻.)];

𑀉𑀭𑀲𑀸 𑀧𑀦𑀼𑀤𑀺𑀲𑁆𑀲𑀸𑀫𑀺, 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬𑀁.

𑁨𑁪𑁩. ‘‘𑀢𑀤𑀸 𑀯𑀦𑀁 𑀧𑀯𑀺𑀝𑁆𑀞𑁄𑀳𑀁, 𑀲𑀭𑀺𑀢𑁆𑀯𑀸 𑀚𑀺𑀦𑀲𑀸𑀲𑀦𑀁;

𑀪𑀤𑁆𑀤𑁂𑀓𑀭𑀢𑁆𑀢𑀑𑀯𑀸𑀤𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁨𑁪𑁪. ‘‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬, 𑀦𑀧𑁆𑀧𑀝𑀺𑀓𑀗𑁆𑀔𑁂 𑀅𑀦𑀸𑀕𑀢𑀁;

𑀬𑀤𑀢𑀻𑀢𑀁 𑀧𑀳𑀻𑀦𑀁 𑀢𑀁, 𑀅𑀧𑁆𑀧𑀢𑁆𑀢𑀜𑁆𑀘 𑀅𑀦𑀸𑀕𑀢𑀁.

𑁨𑁪𑁫. ‘‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀫𑀦𑀼𑀩𑁆𑀭𑀽𑀳𑀬𑁂.

𑁨𑁪𑁬. ‘‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀁, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦 𑀳𑀺 𑀦𑁄 𑀲𑀗𑁆𑀕𑀭𑀁 [𑀲𑀗𑁆𑀓𑀭𑀁 (𑀓.)] 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸.

𑁨𑁪𑁭. ‘‘‘𑀏𑀯𑀁𑀯𑀺𑀳𑀸𑀭𑀺𑀁 𑀆𑀢𑀸𑀧𑀺𑀁, 𑀅𑀳𑁄𑀭𑀢𑁆𑀢𑀫𑀢𑀦𑁆𑀤𑀺𑀢𑀁;

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀺’.

𑁨𑁪𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁪𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁫𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀮𑁄𑀫𑀲𑀓𑀗𑁆𑀕𑀺𑀬𑁄 [𑀮𑁄𑀫𑀲𑀗𑁆𑀔𑀺𑀬𑁄 (𑀲𑁆𑀬𑀸. 𑀓.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀮𑁄𑀫𑀲𑀓𑀗𑁆𑀕𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.