𑁬. 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬𑁫. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁧𑁬𑁬. ‘‘𑀦𑀸𑀬𑀓𑀸𑀦𑀁 𑀯𑀭𑁄 𑀲𑀢𑁆𑀣𑀸, 𑀕𑀼𑀡𑀸𑀕𑀼𑀡𑀯𑀺𑀤𑀽 𑀚𑀺𑀦𑁄;

𑀓𑀢𑀜𑁆𑀜𑀽 𑀓𑀢𑀯𑁂𑀤𑀻 𑀘, 𑀢𑀺𑀢𑁆𑀣𑁂 𑀬𑁄𑀚𑁂𑀢𑀺 𑀧𑀸𑀡𑀺𑀦𑁂 [𑀧𑀸𑀡𑀺𑀦𑁄 (𑀲𑀻. 𑀲𑁆𑀬𑀸 𑀧𑀻.)].

𑁧𑁬𑁭. ‘‘𑀲𑀩𑁆𑀩𑀜𑁆𑀜𑀼𑀢𑁂𑀦 𑀜𑀸𑀡𑁂𑀦, 𑀢𑀼𑀮𑀬𑀺𑀢𑁆𑀯𑀸 𑀤𑀬𑀸𑀲𑀬𑁄;

𑀤𑁂𑀲𑁂𑀢𑀺 𑀧𑀯𑀭𑀁 𑀥𑀫𑁆𑀫𑀁, 𑀅𑀦𑀦𑁆𑀢𑀕𑀼𑀡𑀲𑀜𑁆𑀘𑀬𑁄.

𑁧𑁬𑁮. ‘‘𑀲 𑀓𑀤𑀸𑀘𑀺 𑀫𑀳𑀸𑀯𑀻𑀭𑁄, 𑀅𑀦𑀦𑁆𑀢𑀚𑀺𑀦𑀲𑀁𑀲𑀭𑀺 [𑀅𑀦𑀦𑁆𑀢𑀚𑀦𑀲𑀁𑀲𑀤𑀺 (𑀲𑀻.), 𑀅𑀦𑀦𑁆𑀢𑀚𑀦𑀲𑀁𑀲𑀼𑀥𑀺 (𑀲𑁆𑀬𑀸.), 𑀅𑀦𑀦𑁆𑀢𑀚𑀦𑀲𑀁𑀲𑀭𑀻 (𑀧𑀻.)];

𑀤𑁂𑀲𑁂𑀢𑀺 𑀫𑀥𑀼𑀭𑀁 𑀥𑀫𑁆𑀫𑀁, 𑀘𑀢𑀼𑀲𑀘𑁆𑀘𑀽𑀧𑀲𑀜𑁆𑀳𑀺𑀢𑀁.

𑁧𑁬𑁯. ‘‘𑀲𑀼𑀢𑁆𑀯𑀸𑀦 𑀢𑀁 𑀥𑀫𑁆𑀫𑀯𑀭𑀁, 𑀆𑀤𑀺𑀫𑀚𑁆𑀛𑀦𑁆𑀢𑀲𑁄𑀪𑀡𑀁;

𑀧𑀸𑀡𑀲𑀢𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁧𑁭𑁦. ‘‘𑀦𑀺𑀦𑁆𑀦𑀸𑀤𑀺𑀢𑀸 𑀢𑀤𑀸 𑀪𑀽𑀫𑀺, 𑀕𑀚𑁆𑀚𑀺𑀁𑀲𑀼 𑀘 𑀧𑀬𑁄𑀥𑀭𑀸;

𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑀺𑀁𑀲𑀼, 𑀤𑁂𑀯𑀩𑁆𑀭𑀳𑁆𑀫𑀦𑀭𑀸𑀲𑀼𑀭𑀸.

𑁧𑁭𑁧. ‘‘‘𑀅𑀳𑁄 𑀓𑀸𑀭𑀼𑀡𑀺𑀓𑁄 𑀲𑀢𑁆𑀣𑀸, 𑀅𑀳𑁄 𑀲𑀤𑁆𑀥𑀫𑁆𑀫𑀤𑁂𑀲𑀦𑀸;

𑀅𑀳𑁄 𑀪𑀯𑀲𑀫𑀼𑀤𑁆𑀤𑀫𑁆𑀳𑀺, 𑀦𑀺𑀫𑀼𑀕𑁆𑀕𑁂 𑀉𑀤𑁆𑀥𑀭𑀻 𑀚𑀺𑀦𑁄’.

𑁧𑁭𑁨. ‘‘𑀏𑀯𑀁 𑀧𑀯𑁂𑀤𑀚𑀸𑀢𑁂𑀲𑀼, 𑀲𑀦𑀭𑀸𑀫𑀭𑀩𑁆𑀭𑀳𑁆𑀫𑀲𑀼;

𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀕𑁆𑀕𑀁, 𑀲𑀸𑀯𑀓𑀁 𑀯𑀡𑁆𑀡𑀬𑀻 𑀚𑀺𑀦𑁄.

𑁧𑁭𑁩. ‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑁄𑀫𑀘𑁆𑀘𑀓𑀼𑀮𑁂 𑀅𑀳𑀼𑀁;

𑀧𑀸𑀲𑀸𑀤𑀺𑀓𑁄 𑀤𑀲𑁆𑀲𑀦𑀺𑀬𑁄, 𑀧𑀳𑀽𑀢𑀥𑀦𑀥𑀜𑁆𑀜𑀯𑀸.

𑁧𑁭𑁪. ‘‘𑀳𑀁𑀲𑀸𑀭𑀸𑀫𑀫𑀼𑀧𑁂𑀘𑁆𑀘𑀸𑀳𑀁, 𑀯𑀦𑁆𑀤𑀺𑀢𑁆𑀯𑀸 𑀢𑀁 𑀢𑀣𑀸𑀕𑀢𑀁;

𑀲𑀼𑀡𑀺𑀢𑁆𑀯𑀸 𑀫𑀥𑀼𑀭𑀁 𑀥𑀫𑁆𑀫𑀁, 𑀓𑀸𑀭𑀁 𑀓𑀢𑁆𑀯𑀸 𑀘 𑀢𑀸𑀤𑀺𑀦𑁄.

𑁧𑁭𑁫. ‘‘𑀦𑀺𑀧𑀘𑁆𑀘 𑀧𑀸𑀤𑀫𑀽𑀮𑁂𑀳𑀁, 𑀇𑀫𑀁 𑀯𑀘𑀦𑀫𑀩𑁆𑀭𑀯𑀺𑀁;

‘𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀕𑁆𑀕𑁄, 𑀬𑁄 𑀢𑀬𑀸 𑀲𑀦𑁆𑀣𑀼𑀢𑁄 [𑀬𑁄 𑀢𑀯 𑀲𑀸𑀲𑀦𑁂 (𑀲𑁆𑀬𑀸.)] 𑀫𑀼𑀦𑁂.

𑁧𑁭𑁬. ‘‘‘𑀢𑀸𑀤𑀺𑀲𑁄 𑀳𑁄𑀫𑀳𑀁 𑀯𑀻𑀭 [𑀢𑀸𑀤𑀺𑀲𑁄𑀳𑀁 𑀫𑀳𑀸𑀯𑀻𑀭 (𑀲𑁆𑀬𑀸. 𑀓.)], 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀸𑀲𑀦𑁂’;

𑀢𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀲𑀺𑀜𑁆𑀘𑀦𑁆𑀢𑁄 𑀯𑀸 𑀫𑀢𑁂𑀦 𑀫𑀁.

𑁧𑁭𑁭. ‘‘𑀆𑀳 𑀫𑀁 ‘𑀧𑀼𑀢𑁆𑀢 𑀉𑀢𑁆𑀢𑀺𑀝𑁆𑀞, 𑀮𑀘𑁆𑀙𑀲𑁂 𑀢𑀁 𑀫𑀦𑁄𑀭𑀣𑀁;

𑀓𑀣𑀁 𑀦𑀸𑀫 𑀚𑀺𑀦𑁂 𑀓𑀸𑀭𑀁, 𑀓𑀢𑁆𑀯𑀸𑀦 𑀯𑀺𑀨𑀮𑁄 𑀲𑀺𑀬𑀸.

𑁧𑁭𑁮. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁭𑁯. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀉𑀤𑀸𑀬𑀺 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁧𑁮𑁦. ‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀘𑀭𑀺𑀁, 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸𑀬𑀓𑀁.

𑁧𑁮𑁧. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁮𑁨. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀭𑀫𑁆𑀫𑁂 𑀓𑀧𑀺𑀮𑀯𑀢𑁆𑀣𑀯𑁂;

𑀚𑀸𑀢𑁄 𑀫𑀳𑀸𑀫𑀘𑁆𑀘𑀓𑀼𑀮𑁂, 𑀲𑀼𑀤𑁆𑀥𑁄𑀤𑀦𑀫𑀳𑀻𑀧𑀢𑁂 [𑀲𑀼𑀤𑁆𑀥𑁄𑀤𑀦𑁄 𑀫𑀳𑀻𑀧𑀢𑀺 (𑀲𑁆𑀬𑀸.)].

𑁧𑁮𑁩. ‘‘𑀢𑀤𑀸 𑀅𑀚𑀸𑀬𑀺 𑀲𑀺𑀤𑁆𑀥𑀢𑁆𑀣𑁄, 𑀭𑀫𑁆𑀫𑁂 𑀮𑀼𑀫𑁆𑀩𑀺𑀦𑀺𑀓𑀸𑀦𑀦𑁂;

𑀳𑀺𑀢𑀸𑀬 𑀲𑀩𑁆𑀩𑀮𑁄𑀓𑀲𑁆𑀲, 𑀲𑀼𑀔𑀸𑀬 𑀘 𑀦𑀭𑀸𑀲𑀪𑁄.

𑁧𑁮𑁪. ‘‘𑀢𑀤𑀳𑁂𑀯 𑀅𑀳𑀁 𑀚𑀸𑀢𑁄, 𑀲𑀳 𑀢𑁂𑀦𑁂𑀯 𑀯𑀟𑁆𑀠𑀺𑀢𑁄;

𑀧𑀺𑀬𑁄 𑀲𑀳𑀸𑀬𑁄 𑀤𑀬𑀺𑀢𑁄, 𑀯𑀺𑀬𑀢𑁆𑀢𑁄 𑀦𑀻𑀢𑀺𑀓𑁄𑀯𑀺𑀤𑁄.

𑁧𑁮𑁫. ‘‘𑀏𑀓𑀽𑀦𑀢𑀺𑀁𑀲𑁄 𑀯𑀬𑀲𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀕𑀸𑀭𑀢𑁄 [𑀦𑀺𑀓𑁆𑀔𑀦𑁆𑀢𑁄 𑀧𑀩𑁆𑀩𑀚𑀺𑀢𑁆𑀣𑀲𑁄 (𑀲𑀻. 𑀲𑁆𑀬𑀸.)];

𑀙𑀩𑁆𑀩𑀲𑁆𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀆𑀲𑀺 𑀩𑀼𑀤𑁆𑀥𑁄 𑀯𑀺𑀦𑀸𑀬𑀓𑁄.

𑁧𑁮𑁬. ‘‘𑀚𑁂𑀢𑁆𑀯𑀸 𑀲𑀲𑁂𑀦𑀓𑀁 𑀫𑀸𑀭𑀁, 𑀔𑁂𑀧𑀬𑀺𑀢𑁆𑀯𑀸𑀦 𑀆𑀲𑀯𑁂;

𑀪𑀯𑀡𑁆𑀡𑀯𑀁 𑀢𑀭𑀺𑀢𑁆𑀯𑀸𑀦, 𑀩𑀼𑀤𑁆𑀥𑁄 𑀆𑀲𑀺 𑀲𑀤𑁂𑀯𑀓𑁂.

𑁧𑁮𑁭. ‘‘𑀇𑀲𑀺𑀯𑁆𑀳𑀬𑀁 𑀕𑀫𑀺𑀢𑁆𑀯𑀸𑀦 [𑀇𑀲𑀺𑀯𑁆𑀳𑀬𑀁 𑀧𑀢𑀦𑀁 𑀕𑀦𑁆𑀢𑁆𑀯𑀸 (𑀲𑁆𑀬𑀸.)], 𑀯𑀺𑀦𑁂𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂;

𑀢𑀢𑁄 𑀯𑀺𑀦𑁂𑀲𑀺 𑀪𑀕𑀯𑀸, 𑀕𑀦𑁆𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀳𑀺𑀁 𑀢𑀳𑀺𑀁.

𑁧𑁮𑁮. ‘‘𑀯𑁂𑀦𑁂𑀬𑁆𑀬𑁂 𑀯𑀺𑀦𑀬𑀦𑁆𑀢𑁄 𑀲𑁄, 𑀲𑀗𑁆𑀕𑀡𑁆𑀳𑀦𑁆𑀢𑁄 𑀲𑀤𑁂𑀯𑀓𑀁;

𑀉𑀧𑁂𑀘𑁆𑀘 𑀫𑀕𑀥𑁂 𑀕𑀺𑀭𑀺𑀁 [𑀫𑀸𑀕𑀤𑀕𑀺𑀭𑀺𑀁 (𑀲𑀻.), 𑀫𑀗𑁆𑀕𑀮𑀸𑀕𑀺𑀭𑀺𑀁 (𑀧𑀻.)], 𑀯𑀺𑀳𑀭𑀺𑀢𑁆𑀣 𑀢𑀤𑀸 𑀚𑀺𑀦𑁄.

𑁧𑁮𑁯. ‘‘𑀢𑀤𑀸 𑀲𑀼𑀤𑁆𑀥𑁄𑀤𑀦𑁂𑀦𑀸𑀳𑀁, 𑀪𑀽𑀫𑀺𑀧𑀸𑀮𑁂𑀦 𑀧𑁂𑀲𑀺𑀢𑁄;

𑀕𑀦𑁆𑀢𑁆𑀯𑀸 𑀤𑀺𑀲𑁆𑀯𑀸 𑀤𑀲𑀩𑀮𑀁, 𑀧𑀩𑁆𑀩𑀚𑀺𑀢𑁆𑀯𑀸𑀭𑀳𑀸 𑀅𑀳𑀼𑀁.

𑁧𑁯𑁦. ‘‘𑀢𑀤𑀸 𑀫𑀳𑁂𑀲𑀺𑀁 𑀬𑀸𑀘𑀺𑀢𑁆𑀯𑀸, 𑀧𑀸𑀧𑀬𑀺𑀁 𑀓𑀧𑀺𑀮𑀯𑁆𑀳𑀬𑀁;

𑀢𑀢𑁄 𑀧𑀼𑀭𑀸𑀳𑀁 𑀕𑀦𑁆𑀢𑁆𑀯𑀸𑀦, 𑀧𑀲𑀸𑀤𑁂𑀲𑀺𑀁 𑀫𑀳𑀸𑀓𑀼𑀮𑀁.

𑁧𑁯𑁧. ‘‘𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀫𑀁 𑀫𑀳𑀸𑀧𑀭𑀺𑀲𑀸𑀬 𑀲𑁄 [𑀫𑀫𑀸𑀳 𑀧𑀼𑀭𑀺𑀲𑀸𑀲𑀪𑁄 (𑀲𑁆𑀬𑀸. 𑀧𑀻.)];

𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀕𑁆𑀕𑀁, 𑀧𑀜𑁆𑀜𑀸𑀧𑁂𑀲𑀺 𑀯𑀺𑀦𑀸𑀬𑀓𑁄.

𑁧𑁯𑁨. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁯𑁩. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁯𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀸𑀴𑀼𑀤𑀸𑀬𑀺𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.