𑁫. 𑀦𑀦𑁆𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁪𑁩. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁧𑁪𑁪. ‘‘𑀳𑀺𑀢𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀲𑀼𑀔𑀸𑀬 𑀯𑀤𑀢𑀁 𑀯𑀭𑁄;

𑀅𑀢𑁆𑀣𑀸𑀬 𑀧𑀼𑀭𑀺𑀲𑀸𑀚𑀜𑁆𑀜𑁄, 𑀧𑀝𑀺𑀧𑀦𑁆𑀦𑁄 𑀲𑀤𑁂𑀯𑀓𑁂.

𑁧𑁪𑁫. ‘‘𑀬𑀲𑀕𑁆𑀕𑀧𑀢𑁆𑀢𑁄 𑀲𑀺𑀭𑀺𑀫𑀸, 𑀓𑀺𑀢𑁆𑀢𑀺𑀯𑀡𑁆𑀡𑀪𑀢𑁄 [𑀓𑀺𑀢𑁆𑀢𑀺𑀯𑀡𑁆𑀡 𑀪𑀝𑁄 (𑀲𑁆𑀬𑀸. 𑀓.)] 𑀚𑀺𑀦𑁄;

𑀧𑀽𑀚𑀺𑀢𑁄 𑀲𑀩𑁆𑀩𑀮𑁄𑀓𑀲𑁆𑀲, 𑀤𑀺𑀲𑀸 𑀲𑀩𑁆𑀩𑀸𑀲𑀼 𑀯𑀺𑀲𑁆𑀲𑀼𑀢𑁄.

𑁧𑁪𑁬. ‘‘𑀉𑀢𑁆𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀲𑁄, 𑀯𑀻𑀢𑀺𑀯𑀢𑁆𑀢𑀓𑀣𑀁𑀓𑀣𑁄;

𑀧𑀭𑀺𑀧𑀼𑀡𑁆𑀡𑀫𑀦𑀲𑀗𑁆𑀓𑀧𑁆𑀧𑁄, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁧𑁪𑁭. ‘‘𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲, 𑀉𑀧𑁆𑀧𑀸𑀤𑁂𑀢𑀸 𑀦𑀭𑀼𑀢𑁆𑀢𑀫𑁄;

𑀅𑀦𑀓𑁆𑀔𑀸𑀢𑀜𑁆𑀘 𑀅𑀓𑁆𑀔𑀸𑀲𑀺, 𑀅𑀲𑀜𑁆𑀚𑀸𑀢𑀜𑁆𑀘 𑀲𑀜𑁆𑀚𑀦𑀻.

𑁧𑁪𑁮. ‘‘𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 [𑀲𑁄 𑀫𑀕𑁆𑀕𑀯𑀺𑀤𑀽 (𑀲𑀻. 𑀧𑀻.)] 𑀘, 𑀫𑀕𑁆𑀕𑀓𑁆𑀔𑀸𑀬𑀻 𑀦𑀭𑀸𑀲𑀪𑁄;

𑀫𑀕𑁆𑀕𑀲𑁆𑀲 𑀓𑀼𑀲𑀮𑁄 𑀲𑀢𑁆𑀣𑀸, 𑀲𑀸𑀭𑀣𑀻𑀦𑀁 𑀯𑀭𑀼𑀢𑁆𑀢𑀫𑁄 [𑀦𑀭𑀼𑀢𑁆𑀢𑀫𑁄 (𑀲𑁆𑀬𑀸.)].

𑁧𑁪𑁯. ‘‘𑀢𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀦𑀸𑀬𑀓𑁄;

𑀦𑀺𑀫𑀼𑀕𑁆𑀕𑁂 𑀓𑀸𑀫𑀧𑀗𑁆𑀓𑀫𑁆𑀳𑀺 [𑀫𑁄𑀳𑀧𑀗𑁆𑀓𑀫𑁆𑀳𑀺 (𑀲𑀻. 𑀲𑁆𑀬𑀸.), 𑀫𑁄𑀳𑀫𑀕𑁆𑀕𑀫𑁆𑀳𑀺 (𑀧𑀻.)], 𑀲𑀫𑀼𑀤𑁆𑀥𑀭𑀢𑀺 𑀧𑀸𑀡𑀺𑀦𑁂.

𑁧𑁫𑁦. ‘‘𑀪𑀺𑀓𑁆𑀔𑀼𑀦𑀻𑀦𑀁 𑀑𑀯𑀤𑀦𑁂, 𑀲𑀸𑀯𑀓𑀁 𑀲𑁂𑀝𑁆𑀞𑀲𑀫𑁆𑀫𑀢𑀁;

𑀯𑀡𑁆𑀡𑀬𑀁 𑀏𑀢𑀤𑀕𑁆𑀕𑀫𑁆𑀳𑀺, 𑀧𑀜𑁆𑀜𑀧𑁂𑀲𑀺 𑀫𑀳𑀸𑀫𑀼𑀦𑀺.

𑁧𑁫𑁧. ‘‘𑀢𑀁 𑀲𑀼𑀢𑁆𑀯𑀸𑀳𑀁 𑀧𑀫𑀼𑀤𑀺𑀢𑁄, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀪𑁄𑀚𑀬𑀺𑀢𑁆𑀯𑀸 𑀲𑀲𑀗𑁆𑀖𑀁 𑀢𑀁, 𑀧𑀢𑁆𑀣𑀬𑀺𑀁 𑀞𑀸𑀦𑀫𑀼𑀢𑁆𑀢𑀫𑀁.

𑁧𑁫𑁨. ‘‘𑀢𑀤𑀸 𑀧𑀫𑀼𑀤𑀺𑀢𑁄 𑀦𑀸𑀣𑁄, 𑀫𑀁 𑀅𑀯𑁄𑀘 𑀫𑀳𑀸𑀇𑀲𑀺;

‘𑀲𑀼𑀔𑀻 𑀪𑀯𑀲𑁆𑀲𑀼 𑀤𑀻𑀖𑀸𑀯𑀼 [𑀤𑀻𑀖𑀸𑀬𑀼 (𑀲𑀻. 𑀲𑁆𑀬𑀸.)], 𑀮𑀘𑁆𑀙𑀲𑁂 𑀢𑀁 𑀫𑀦𑁄𑀭𑀣𑀁.

𑁧𑁫𑁩. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁫𑁪. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀦𑀦𑁆𑀤𑀓𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁧𑁫𑁫. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑁄 𑀅𑀳𑀁.

𑁧𑁫𑁬. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑁄 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀁;

𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁂 𑀯𑀭𑁂, 𑀇𑀤𑁆𑀥𑁂 𑀨𑀻𑀢𑁂 𑀫𑀳𑀤𑁆𑀥𑀦𑁂.

𑁧𑁫𑁭. ‘‘𑀧𑀼𑀭𑀧𑁆𑀧𑀯𑁂𑀲𑁂 𑀲𑀼𑀕𑀢𑀁, 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑁄;

𑀚𑁂𑀢𑀸𑀭𑀸𑀫𑀧𑀝𑀺𑀕𑁆𑀕𑀸𑀳𑁂, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁧𑁫𑁮. ‘‘𑀦𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀢𑀢𑁄𑀳𑀁 𑀢𑀺𑀡𑁆𑀡𑀲𑀁𑀲𑀸𑀭𑁄, 𑀲𑀸𑀲𑀺𑀢𑁄 𑀲𑀩𑁆𑀩𑀤𑀲𑁆𑀲𑀺𑀦𑀸.

𑁧𑁫𑁯. ‘‘𑀪𑀺𑀓𑁆𑀔𑀼𑀦𑀻𑀦𑀁 𑀥𑀫𑁆𑀫𑀓𑀣𑀁, 𑀧𑀝𑀺𑀧𑀼𑀘𑁆𑀙𑀸𑀓𑀭𑀺𑀁 𑀅𑀳𑀁;

𑀲𑀸𑀲𑀺𑀢𑀸 𑀢𑀸 𑀫𑀬𑀸 𑀲𑀩𑁆𑀩𑀸, 𑀅𑀪𑀯𑀺𑀁𑀲𑀼 𑀅𑀦𑀸𑀲𑀯𑀸.

𑁧𑁬𑁦. ‘‘𑀲𑀢𑀸𑀦𑀺 𑀧𑀜𑁆𑀘𑀦𑀽𑀦𑀸𑀦𑀺, 𑀢𑀤𑀸 𑀢𑀼𑀝𑁆𑀞𑁄 𑀫𑀳𑀸𑀳𑀺𑀢𑁄;

𑀪𑀺𑀓𑁆𑀔𑀼𑀦𑀻𑀦𑀁 𑀑𑀯𑀤𑀢𑀁, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺 𑀫𑀁.

𑁧𑁬𑁧. ‘‘𑀲𑀢𑀲𑀳𑀲𑁆𑀲𑁂 𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥;

𑀲𑀼𑀫𑀼𑀢𑁆𑀢𑁄 𑀲𑀭𑀯𑁂𑀕𑁄𑀯, 𑀓𑀺𑀮𑁂𑀲𑁂 𑀛𑀸𑀧𑀬𑀺𑀁 𑀫𑀫.

𑁧𑁬𑁨. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁬𑁩. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁬𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀦𑁆𑀤𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀦𑁆𑀤𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.