𑁪. 𑀯𑀗𑁆𑀕𑀻𑀲𑀢𑁆𑀣𑁂𑀭𑀅𑀧𑀤𑀸𑀦𑀁

𑁯𑁬. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁯𑁭. ‘‘𑀬𑀣𑀸𑀧𑀺 𑀲𑀸𑀕𑀭𑁂 𑀊𑀫𑀺, 𑀕𑀕𑀦𑁂 𑀯𑀺𑀬 𑀢𑀸𑀭𑀓𑀸;

𑀏𑀯𑀁 𑀧𑀸𑀯𑀘𑀦𑀁 𑀢𑀲𑁆𑀲, 𑀅𑀭𑀳𑀦𑁆𑀢𑁂𑀳𑀺 𑀘𑀺𑀢𑁆𑀢𑀺𑀢𑀁.

𑁯𑁮. ‘‘𑀲𑀤𑁂𑀯𑀸𑀲𑀼𑀭𑀦𑀸𑀕𑁂𑀳𑀺, 𑀫𑀦𑀼𑀚𑁂𑀳𑀺 𑀧𑀼𑀭𑀓𑁆𑀔𑀢𑁄;

𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀓𑀺𑀡𑁆𑀡𑁂, 𑀚𑀦𑀫𑀚𑁆𑀛𑁂 𑀚𑀺𑀦𑀼𑀢𑁆𑀢𑀫𑁄.

𑁯𑁯. ‘‘𑀧𑀪𑀸𑀳𑀺 𑀅𑀦𑀼𑀭𑀜𑁆𑀚𑀦𑁆𑀢𑁄, 𑀮𑁄𑀓𑁂 [𑀮𑁄𑀓𑀁 (𑀲𑀻.)] 𑀮𑁄𑀓𑀦𑁆𑀢𑀕𑀽 𑀚𑀺𑀦𑁄;

𑀯𑀘𑀦𑁂𑀦 𑀯𑀺𑀩𑁄𑀥𑁂𑀦𑁆𑀢𑁄, 𑀯𑁂𑀦𑁂𑀬𑁆𑀬𑀧𑀤𑀼𑀫𑀸𑀦𑀺 𑀲𑁄.

𑁧𑁦𑁦. ‘‘𑀯𑁂𑀲𑀸𑀭𑀚𑁆𑀚𑁂𑀳𑀺 𑀲𑀫𑁆𑀧𑀦𑁆𑀦𑁄, 𑀘𑀢𑀽𑀳𑀺 𑀧𑀼𑀭𑀺𑀲𑀼𑀢𑁆𑀢𑀫𑁄;

𑀧𑀳𑀻𑀦𑀪𑀬𑀲𑀸𑀭𑀚𑁆𑀚𑁄, 𑀔𑁂𑀫𑀧𑁆𑀧𑀢𑁆𑀢𑁄 𑀯𑀺𑀲𑀸𑀭𑀤𑁄.

𑁧𑁦𑁧. ‘‘𑀆𑀲𑀪𑀁 𑀧𑀯𑀭𑀁 𑀞𑀸𑀦𑀁, 𑀩𑀼𑀤𑁆𑀥𑀪𑀽𑀫𑀺𑀜𑁆𑀘 𑀓𑁂𑀯𑀮𑀁;

𑀧𑀝𑀺𑀚𑀸𑀦𑀸𑀢𑀺 𑀮𑁄𑀓𑀕𑁆𑀕𑁄, 𑀦𑀢𑁆𑀣𑀺 𑀲𑀜𑁆𑀘𑁄𑀤𑀓𑁄 𑀓𑁆𑀯𑀘𑀺.

𑁧𑁦𑁨. ‘‘𑀲𑀻𑀳𑀦𑀸𑀤𑀫𑀲𑀫𑁆𑀪𑀻𑀢𑀁, 𑀦𑀤𑀢𑁄 𑀢𑀲𑁆𑀲 𑀢𑀸𑀤𑀺𑀦𑁄;

𑀤𑁂𑀯𑁄 𑀦𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸, 𑀧𑀝𑀺𑀯𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺.

𑁧𑁦𑁩. ‘‘𑀤𑁂𑀲𑁂𑀦𑁆𑀢𑁄 𑀧𑀯𑀭𑀁 𑀥𑀫𑁆𑀫𑀁, 𑀲𑀦𑁆𑀢𑀸𑀭𑁂𑀦𑁆𑀢𑁄 𑀲𑀤𑁂𑀯𑀓𑀁;

𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄.

𑁧𑁦𑁪. ‘‘𑀧𑀝𑀺𑀪𑀸𑀦𑀯𑀢𑀁 𑀅𑀕𑁆𑀕𑀁, 𑀲𑀸𑀯𑀓𑀁 𑀲𑀸𑀥𑀼𑀲𑀫𑁆𑀫𑀢𑀁;

𑀕𑀼𑀡𑀁 𑀩𑀳𑀼𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀢𑀁.

𑁧𑁦𑁫. ‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀩𑁆𑀭𑀸𑀳𑁆𑀫𑀡𑁄 𑀲𑀸𑀥𑀼𑀲𑀫𑁆𑀫𑀢𑁄;

𑀲𑀩𑁆𑀩𑀯𑁂𑀤𑀯𑀺𑀤𑀽 𑀚𑀸𑀢𑁄, 𑀯𑀸𑀕𑀻𑀲𑁄 𑀯𑀸𑀤𑀺𑀲𑀽𑀤𑀦𑁄.

𑁧𑁦𑁬. ‘‘𑀉𑀧𑁂𑀘𑁆𑀘 𑀢𑀁 𑀫𑀳𑀸𑀯𑀻𑀭𑀁, 𑀲𑀼𑀢𑁆𑀯𑀸𑀳𑀁 𑀥𑀫𑁆𑀫𑀤𑁂𑀲𑀦𑀁;

𑀧𑀻𑀢𑀺𑀯𑀭𑀁 𑀧𑀝𑀺𑀮𑀪𑀺𑀁, 𑀲𑀸𑀯𑀓𑀲𑁆𑀲 𑀕𑀼𑀡𑁂 𑀭𑀢𑁄.

𑁧𑁦𑁭. ‘‘𑀦𑀺𑀫𑀦𑁆𑀢𑁂𑀢𑁆𑀯𑀸𑀯 𑀲𑀼𑀕𑀢𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀦𑁆𑀤𑀦𑀁;

𑀲𑀢𑁆𑀢𑀸𑀳𑀁 𑀪𑁄𑀚𑀬𑀺𑀢𑁆𑀯𑀸𑀳𑀁, 𑀤𑀼𑀲𑁆𑀲𑁂𑀳𑀘𑁆𑀙𑀸𑀤𑀬𑀺𑀁 𑀢𑀤𑀸.

𑁧𑁦𑁮. ‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀓𑀢𑁄𑀓𑀸𑀲𑁄 𑀓𑀢𑀜𑁆𑀚𑀮𑀻;

𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑀝𑁆𑀞𑁄, 𑀲𑀦𑁆𑀣𑀯𑀺𑀁 𑀚𑀺𑀦𑀫𑀼𑀢𑁆𑀢𑀫𑀁.

𑁧𑁦𑁯. ‘‘‘𑀦𑀫𑁄 𑀢𑁂 𑀯𑀸𑀤𑀺𑀫𑀤𑁆𑀤𑀦 [𑀯𑀸𑀤𑀺𑀲𑀤𑁆𑀤𑀼𑀮 (𑀲𑀻. 𑀧𑀻.), 𑀯𑀸𑀤𑀺𑀲𑀽𑀤𑀦 (𑀲𑁆𑀬𑀸.)], 𑀦𑀫𑁄 𑀢𑁂 𑀇𑀲𑀺𑀲𑀢𑁆𑀢𑀫 [𑀧𑀼𑀭𑀺𑀲𑀼𑀢𑁆𑀢𑀫 (𑀲𑀻. 𑀧𑀻.)];

𑀦𑀫𑁄 𑀢𑁂 𑀲𑀩𑁆𑀩𑀮𑁄𑀓𑀕𑁆𑀕, 𑀦𑀫𑁄 𑀢𑁂 𑀅𑀪𑀬𑀗𑁆𑀓𑀭.

𑁧𑁧𑁦. ‘‘‘𑀦𑀫𑁄 𑀢𑁂 𑀫𑀸𑀭𑀫𑀣𑀦 [𑀫𑀸𑀭𑀫𑀲𑀦 (𑀅𑀝𑁆𑀞.)], 𑀦𑀫𑁄 𑀢𑁂 𑀤𑀺𑀝𑁆𑀞𑀺𑀲𑀽𑀤𑀦;

𑀦𑀫𑁄 𑀢𑁂 𑀲𑀦𑁆𑀢𑀺𑀲𑀼𑀔𑀤, 𑀦𑀫𑁄 𑀢𑁂 𑀲𑀭𑀡𑀗𑁆𑀓𑀭.

𑁧𑁧𑁧. ‘‘‘𑀅𑀦𑀸𑀣𑀸𑀦𑀁 𑀪𑀯𑀁 𑀦𑀸𑀣𑁄, 𑀪𑀻𑀢𑀸𑀦𑀁 𑀅𑀪𑀬𑀧𑁆𑀧𑀤𑁄;

𑀯𑀺𑀲𑁆𑀲𑀸𑀫𑀪𑀽𑀫𑀺 [𑀯𑀺𑀲𑁆𑀲𑀸𑀲𑀁 𑀪𑀽𑀫𑀺 (𑀲𑁆𑀬𑀸.), 𑀯𑀺𑀲𑁆𑀲𑀸𑀦𑀪𑀽𑀫𑀺 (𑀧𑀻.)] 𑀲𑀦𑁆𑀢𑀸𑀦𑀁, 𑀲𑀭𑀡𑀁 𑀲𑀭𑀡𑁂𑀲𑀺𑀦𑀁’.

𑁧𑁧𑁨. ‘‘𑀏𑀯𑀫𑀸𑀤𑀻𑀳𑀺 𑀲𑀫𑁆𑀩𑀼𑀤𑁆𑀥𑀁, 𑀲𑀦𑁆𑀣𑀯𑀺𑀢𑁆𑀯𑀸 𑀫𑀳𑀸𑀕𑀼𑀡𑀁;

𑀅𑀯𑁄𑀘𑀁 𑀯𑀸𑀤𑀺𑀲𑀽𑀤𑀲𑁆𑀲 [𑀯𑀸𑀤𑀺𑀲𑀽𑀭𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)], 𑀕𑀢𑀺𑀁 𑀧𑀧𑁆𑀧𑁄𑀫𑀺 𑀪𑀺𑀓𑁆𑀔𑀼𑀦𑁄.

𑁧𑁧𑁩. ‘‘𑀢𑀤𑀸 𑀅𑀯𑁄𑀘 𑀪𑀕𑀯𑀸, 𑀅𑀦𑀦𑁆𑀢𑀧𑀝𑀺𑀪𑀸𑀦𑀯𑀸;

‘𑀬𑁄 𑀲𑁄 𑀩𑀼𑀤𑁆𑀥𑀁 𑀅𑀪𑁄𑀚𑁂𑀲𑀺, 𑀲𑀢𑁆𑀢𑀸𑀳𑀁 𑀲𑀳𑀲𑀸𑀯𑀓𑀁.

𑁧𑁧𑁪. ‘‘‘𑀕𑀼𑀡𑀜𑁆𑀘 𑀫𑁂 𑀧𑀓𑀺𑀢𑁆𑀢𑁂𑀲𑀺, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀏𑀲𑁄 𑀧𑀢𑁆𑀣𑀬𑀢𑁂 𑀞𑀸𑀦𑀁, 𑀯𑀸𑀤𑀺𑀲𑀽𑀤𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁧𑁧𑁫. ‘‘‘𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀮𑀘𑁆𑀙𑀲𑁂 𑀢𑀁 𑀫𑀦𑁄𑀭𑀣𑀁;

𑀤𑁂𑀯𑀫𑀸𑀦𑀼𑀲𑀲𑀫𑁆𑀧𑀢𑁆𑀢𑀺𑀁, 𑀅𑀦𑀼𑀪𑁄𑀢𑁆𑀯𑀸 𑀅𑀦𑀧𑁆𑀧𑀓𑀁.

𑁧𑁧𑁬. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁧𑁭. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀯𑀗𑁆𑀕𑀻𑀲𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁧𑁧𑁮. ‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀲𑀺𑀁, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀢𑀣𑀸𑀕𑀢𑀁.

𑁧𑁧𑁯. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀼𑀲𑀺𑀢𑀁 [𑀢𑀸𑀯𑀢𑀺𑀁𑀲𑀁 (𑀲𑁆𑀬𑀸.)] 𑀅𑀕𑀫𑀸𑀲𑀳𑀁.

𑁧𑁨𑁦. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑁄 𑀯𑀺𑀧𑁆𑀧𑀓𑀼𑀮𑁂 [𑀧𑀭𑀺𑀩𑁆𑀩𑀸𑀚𑀓𑀼𑀮𑁂 (𑀲𑀻. 𑀲𑁆𑀬𑀸. 𑀧𑀻.)] 𑀅𑀳𑀁;

𑀧𑀘𑁆𑀘𑀸𑀚𑀸𑀢𑁄 [𑀲𑀫𑁆𑀧𑀢𑁆𑀢𑁄 𑀘 (𑀓.)] 𑀬𑀤𑀸 𑀆𑀲𑀺𑀁, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄.

𑁧𑁨𑁧. ‘‘𑀲𑀩𑁆𑀩𑀯𑁂𑀤𑀯𑀺𑀤𑀽 𑀚𑀸𑀢𑁄, 𑀯𑀸𑀤𑀲𑀢𑁆𑀣𑀯𑀺𑀲𑀸𑀭𑀤𑁄;

𑀯𑀸𑀤𑀺𑀲𑁆𑀲𑀭𑁄 [𑀯𑀕𑁆𑀕𑀼𑀲𑁆𑀲𑀭𑁄 (𑀲𑁆𑀬𑀸. 𑀧𑀻.)] 𑀘𑀺𑀢𑁆𑀢𑀓𑀣𑀻, 𑀧𑀭𑀯𑀸𑀤𑀧𑁆𑀧𑀫𑀤𑁆𑀤𑀦𑁄.

𑁧𑁨𑁨. ‘‘𑀯𑀗𑁆𑀕𑁂 𑀚𑀸𑀢𑁄𑀢𑀺 𑀯𑀗𑁆𑀕𑀻𑀲𑁄, 𑀯𑀘𑀦𑁂 𑀇𑀲𑁆𑀲𑀭𑁄𑀢𑀺 𑀯𑀸;

𑀯𑀗𑁆𑀕𑀻𑀲𑁄 𑀇𑀢𑀺 𑀫𑁂 𑀦𑀸𑀫𑀁, 𑀅𑀪𑀯𑀻 𑀮𑁄𑀓𑀲𑀫𑁆𑀫𑀢𑀁.

𑁧𑁨𑁩. ‘‘𑀬𑀤𑀸𑀳𑀁 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀞𑀺𑀢𑁄 𑀧𑀞𑀫𑀬𑁄𑀩𑁆𑀩𑀦𑁂;

𑀢𑀤𑀸 𑀭𑀸𑀚𑀕𑀳𑁂 𑀭𑀫𑁆𑀫𑁂, 𑀲𑀸𑀭𑀺𑀧𑀼𑀢𑁆𑀢𑀫𑀳𑀤𑁆𑀤𑀲𑀁 [𑀫𑀣𑀤𑁆𑀤𑀲𑀁 (𑀲𑀻. 𑀧𑀻.), 𑀘 𑀅𑀤𑁆𑀤𑀲𑀁 (𑀲𑁆𑀬𑀸.)].

𑀧𑀜𑁆𑀘𑀯𑀻𑀲𑀢𑀺𑀫𑀁 𑀪𑀸𑀡𑀯𑀸𑀭𑀁.

𑁧𑁨𑁪. ‘‘𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀁 𑀢𑀁, 𑀧𑀢𑁆𑀢𑀧𑀸𑀡𑀺𑀁 𑀲𑀼𑀲𑀁𑀯𑀼𑀢𑀁;

𑀅𑀮𑁄𑀮𑀓𑁆𑀔𑀺𑀁 𑀫𑀺𑀢𑀪𑀸𑀡𑀺𑀁, 𑀬𑀼𑀕𑀫𑀢𑁆𑀢𑀁 𑀦𑀺𑀤𑀓𑁆𑀔𑀺𑀢𑀁 [𑀦𑀺𑀭𑀺𑀓𑁆𑀔𑀢𑀁 (𑀲𑀻. 𑀧𑀻.), 𑀉𑀤𑀺𑀓𑁆𑀔𑀢𑀁 (𑀲𑁆𑀬𑀸.)].

𑁧𑁨𑁫. ‘‘𑀢𑀁 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑁄 𑀳𑀼𑀢𑁆𑀯𑀸, 𑀅𑀯𑁄𑀘𑀁 𑀫𑀫𑀦𑀼𑀘𑁆𑀙𑀯𑀁 [𑀫𑀦𑀦𑀼𑀘𑁆𑀙𑀯𑀁 (𑀲𑀻. 𑀲𑁆𑀬𑀸.)];

𑀓𑀡𑀺𑀓𑀸𑀭𑀁𑀯 𑀦𑀺𑀘𑀺𑀢𑀁 [𑀓𑀡𑀺𑀓𑀸𑀭𑀧𑀭𑀺𑀘𑀺𑀢𑀁 (𑀧𑀻.), 𑀔𑀡𑀺𑀓𑀁 𑀞𑀸𑀦𑀭𑀘𑀺𑀢𑀁 (𑀲𑀻.)], 𑀘𑀺𑀢𑁆𑀢𑀁 𑀕𑀸𑀣𑀸𑀧𑀤𑀁 𑀅𑀳𑀁.

𑁧𑁨𑁬. ‘‘𑀆𑀘𑀺𑀓𑁆𑀔𑀺 𑀲𑁄 𑀫𑁂 𑀲𑀢𑁆𑀣𑀸𑀭𑀁, 𑀲𑀫𑁆𑀩𑀼𑀤𑁆𑀥𑀁 𑀮𑁄𑀓𑀦𑀸𑀬𑀓𑀁;

𑀢𑀤𑀸 𑀲𑁄 𑀧𑀡𑁆𑀟𑀺𑀢𑁄 𑀯𑀻𑀭𑁄, 𑀉𑀢𑁆𑀢𑀭𑀺𑀁 [𑀉𑀢𑁆𑀢𑀭𑀁 (𑀲𑀻. 𑀧𑀻.)] 𑀲𑀫𑀯𑁄𑀘 𑀫𑁂.

𑁧𑁨𑁭. ‘‘𑀯𑀺𑀭𑀸𑀕𑀲𑀁𑀳𑀺𑀢𑀁 𑀯𑀸𑀓𑁆𑀬𑀁, 𑀓𑀢𑁆𑀯𑀸 𑀤𑀼𑀤𑁆𑀤𑀲𑀫𑀼𑀢𑁆𑀢𑀫𑀁;

𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑁂𑀳𑀺, 𑀢𑁄𑀲𑀺𑀢𑁄 𑀢𑁂𑀦 𑀢𑀸𑀤𑀺𑀦𑀸.

𑁧𑁨𑁮. ‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, ‘𑀧𑀩𑁆𑀩𑀸𑀚𑁂𑀳𑀻’𑀢𑀺 𑀫𑀁 𑀩𑁆𑀭𑀯𑀺;

𑀢𑀢𑁄 𑀫𑀁 𑀲 𑀫𑀳𑀸𑀧𑀜𑁆𑀜𑁄, 𑀩𑀼𑀤𑁆𑀥𑀲𑁂𑀝𑁆𑀞𑀫𑀼𑀧𑀸𑀦𑀬𑀺.

𑁧𑁨𑁯. ‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀦𑀺𑀲𑀻𑀤𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂;

𑀫𑀫𑀸𑀳 𑀯𑀤𑀢𑀁 𑀲𑁂𑀝𑁆𑀞𑁄, 𑀓𑀘𑁆𑀘𑀺 𑀯𑀗𑁆𑀕𑀻𑀲 𑀚𑀸𑀦𑀸𑀲𑀺 [𑀲𑀘𑁆𑀘𑀁 𑀯𑀗𑁆𑀕𑀻𑀲 𑀓𑀘𑁆𑀘𑀺 𑀢𑁂 (𑀲𑁆𑀬𑀸.)].

𑁧𑁩𑁦. ‘‘𑀓𑀺𑀜𑁆𑀘𑀺 𑀲𑀺𑀧𑁆𑀧𑀦𑁆𑀢𑀺 𑀢𑀲𑁆𑀲𑀸𑀳𑀁, ‘𑀚𑀸𑀦𑀸𑀫𑀻’𑀢𑀺 𑀘 𑀅𑀩𑁆𑀭𑀯𑀺𑀁;

𑀫𑀢𑀲𑀻𑀲𑀁 𑀯𑀦𑀘𑁆𑀙𑀼𑀤𑁆𑀥𑀁, 𑀅𑀧𑀺 𑀩𑀸𑀭𑀲𑀯𑀲𑁆𑀲𑀺𑀓𑀁;

𑀢𑀯 𑀯𑀺𑀚𑁆𑀚𑀸𑀯𑀺𑀲𑁂𑀲𑁂𑀦, 𑀲𑀘𑁂 𑀲𑀓𑁆𑀓𑁄𑀲𑀺 𑀯𑀸𑀘𑀬 [𑀪𑀸𑀲𑀬 (𑀲𑀻. 𑀧𑀻.)].

𑁧𑁩𑁧. ‘‘𑀆𑀫𑁄𑀢𑀺 𑀫𑁂 𑀧𑀝𑀺𑀜𑁆𑀜𑀸𑀢𑁂, 𑀢𑀻𑀡𑀺 𑀲𑀻𑀲𑀸𑀦𑀺 𑀤𑀲𑁆𑀲𑀬𑀺;

𑀦𑀺𑀭𑀬𑀦𑀭𑀤𑁂𑀯𑁂𑀲𑀼, 𑀉𑀧𑀧𑀦𑁆𑀦𑁂 𑀅𑀯𑀸𑀘𑀬𑀺𑀁.

𑁧𑁩𑁨. ‘‘𑀢𑀤𑀸 𑀔𑀻𑀡𑀸𑀲𑀯𑀲𑁆𑀲𑁂𑀯 [𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 (𑀲𑀻. 𑀧𑀻.)], 𑀲𑀻𑀲𑀁 𑀤𑀲𑁆𑀲𑁂𑀲𑀺 𑀦𑀸𑀬𑀓𑁄;

𑀢𑀢𑁄𑀳𑀁 𑀯𑀺𑀳𑀢𑀸𑀭𑀩𑁆𑀪𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀬𑀸𑀘𑀺𑀲𑀁.

𑁧𑁩𑁩. ‘‘𑀧𑀩𑁆𑀩𑀚𑀺𑀢𑁆𑀯𑀸𑀦 𑀲𑀼𑀕𑀢𑀁, 𑀲𑀦𑁆𑀣𑀯𑀸𑀫𑀺 𑀢𑀳𑀺𑀁 𑀢𑀳𑀺𑀁;

𑀢𑀢𑁄 𑀫𑀁 𑀓𑀩𑁆𑀩𑀯𑀺𑀢𑁆𑀢𑁄𑀲𑀺 [𑀓𑀯𑀺𑀘𑀺𑀢𑁆𑀢𑁄𑀢𑀺 (𑀲𑁆𑀬𑀸. 𑀧𑀻.)], 𑀉𑀚𑁆𑀛𑀸𑀬𑀦𑁆𑀢𑀺𑀳 𑀪𑀺𑀓𑁆𑀔𑀯𑁄.

𑁧𑁩𑁪. ‘‘𑀢𑀢𑁄 𑀯𑀻𑀫𑀁𑀲𑀦𑀢𑁆𑀣𑀁 𑀫𑁂, 𑀆𑀳 𑀩𑀼𑀤𑁆𑀥𑁄 𑀯𑀺𑀦𑀸𑀬𑀓𑁄;

𑀢𑀓𑁆𑀓𑀺𑀓𑀸 𑀧𑀦𑀺𑀫𑀸 𑀕𑀸𑀣𑀸, 𑀞𑀸𑀦𑀲𑁄 𑀧𑀝𑀺𑀪𑀦𑁆𑀢𑀺 𑀢𑀁.

𑁧𑁩𑁫. ‘‘𑀦 𑀓𑀩𑁆𑀩𑀯𑀺𑀢𑁆𑀢𑁄𑀳𑀁 𑀯𑀻𑀭, 𑀞𑀸𑀦𑀲𑁄 𑀧𑀝𑀺𑀪𑀦𑁆𑀢𑀺 𑀫𑀁;

𑀢𑁂𑀦 𑀳𑀺 𑀤𑀸𑀦𑀺 𑀯𑀗𑁆𑀕𑀻𑀲, 𑀞𑀸𑀦𑀲𑁄 𑀲𑀦𑁆𑀣𑀯𑀸𑀳𑀺 𑀫𑀁.

𑁧𑁩𑁬. ‘‘𑀢𑀤𑀸𑀳𑀁 𑀲𑀦𑁆𑀣𑀯𑀺𑀁 𑀯𑀻𑀭𑀁, 𑀕𑀸𑀣𑀸𑀳𑀺 𑀇𑀲𑀺𑀲𑀢𑁆𑀢𑀫𑀁;

𑀞𑀸𑀦𑀲𑁄 𑀫𑁂 𑀢𑀤𑀸 𑀢𑀼𑀝𑁆𑀞𑁄, 𑀚𑀺𑀦𑁄 𑀅𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁧𑁩𑁭. ‘‘𑀧𑀝𑀺𑀪𑀸𑀦𑁂𑀦 𑀘𑀺𑀢𑁆𑀢𑁂𑀦, 𑀅𑀜𑁆𑀜𑁂𑀲𑀫𑀢𑀺𑀫𑀜𑁆𑀜𑀳𑀁;

𑀧𑁂𑀲𑀮𑁂 𑀢𑁂𑀦 𑀲𑀁𑀯𑀺𑀕𑁆𑀕𑁄, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁩𑁮. ‘‘‘𑀧𑀝𑀺𑀪𑀸𑀦𑀯𑀢𑀁 𑀅𑀕𑁆𑀕𑁄, 𑀅𑀜𑁆𑀜𑁄 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺;

𑀬𑀣𑀸𑀬𑀁 𑀪𑀺𑀓𑁆𑀔𑀼 𑀯𑀗𑁆𑀕𑀻𑀲𑁄, 𑀏𑀯𑀁 𑀥𑀸𑀭𑁂𑀣 𑀪𑀺𑀓𑁆𑀔𑀯𑁄’.

𑁧𑁩𑁯. ‘‘𑀲𑀢𑀲𑀳𑀲𑁆𑀲𑁂 𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥;

𑀲𑀼𑀫𑀼𑀢𑁆𑀢𑁄 𑀲𑀭𑀯𑁂𑀕𑁄𑀯 𑀓𑀺𑀮𑁂𑀲𑁂 𑀛𑀸𑀧𑀬𑀺𑀁 𑀫𑀫.

𑁧𑁪𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁪𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀗𑁆𑀕𑀻𑀲𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.