𑁩. 𑀲𑀻𑀯𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁪. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁫𑁫. ‘‘𑀲𑀻𑀮𑀁 𑀢𑀲𑁆𑀲 𑀅𑀲𑀗𑁆𑀔𑁂𑀬𑁆𑀬𑀁, 𑀲𑀫𑀸𑀥𑀺 𑀯𑀚𑀺𑀭𑀽𑀧𑀫𑁄;

𑀅𑀲𑀗𑁆𑀔𑁂𑀬𑁆𑀬𑀁 𑀜𑀸𑀡𑀯𑀭𑀁, 𑀯𑀺𑀫𑀼𑀢𑁆𑀢𑀺 𑀘 𑀅𑀦𑁄𑀧𑀫𑀸.

𑁫𑁬. ‘‘𑀫𑀦𑀼𑀚𑀸𑀫𑀭𑀦𑀸𑀕𑀸𑀦𑀁, 𑀩𑁆𑀭𑀳𑁆𑀫𑀸𑀦𑀜𑁆𑀘 𑀲𑀫𑀸𑀕𑀫𑁂;

𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀓𑀺𑀡𑁆𑀡𑁂, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀦𑀸𑀬𑀓𑁄.

𑁫𑁭. ‘‘𑀲𑀲𑀸𑀯𑀓𑀁 𑀫𑀳𑀸𑀮𑀸𑀪𑀺𑀁, 𑀧𑀼𑀜𑁆𑀜𑀯𑀦𑁆𑀢𑀁 𑀚𑀼𑀢𑀺𑀦𑁆𑀥𑀭𑀁;

𑀞𑀧𑁂𑀲𑀺 𑀏𑀢𑀤𑀕𑁆𑀕𑀫𑁆𑀳𑀺, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄.

𑁫𑁮. ‘‘𑀢𑀤𑀸𑀳𑀁 𑀔𑀢𑁆𑀢𑀺𑀬𑁄 𑀆𑀲𑀺𑀁, 𑀦𑀕𑀭𑁂 𑀳𑀁𑀲𑀲𑀯𑁆𑀳𑀬𑁂;

𑀲𑀼𑀢𑁆𑀯𑀸 𑀚𑀺𑀦𑀲𑁆𑀲 𑀢𑀁 𑀯𑀸𑀓𑁆𑀬𑀁, 𑀲𑀸𑀯𑀓𑀲𑁆𑀲 𑀕𑀼𑀡𑀁 𑀩𑀳𑀼𑀁.

𑁫𑁯. ‘‘𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀲𑀢𑁆𑀢𑀸𑀳𑀁, 𑀪𑁄𑀚𑀬𑀺𑀢𑁆𑀯𑀸 𑀲𑀲𑀸𑀯𑀓𑀁;

𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁.

𑁬𑁦. ‘‘𑀢𑀤𑀸 𑀫𑀁 𑀯𑀺𑀦𑀢𑀁 𑀧𑀸𑀤𑁂, 𑀤𑀺𑀲𑁆𑀯𑀸𑀦 𑀧𑀼𑀭𑀺𑀲𑀸𑀲𑀪𑁄;

𑀲𑀭𑁂𑀦 𑀫𑀳𑀢𑀸 𑀯𑀻𑀭𑁄 [𑀲𑀼𑀲𑁆𑀲𑀭𑁂𑀦 𑀫𑀳𑀸𑀯𑀻𑀭𑁄 (𑀲𑀻. 𑀧𑀻.)], 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁬𑁧. ‘‘‘𑀢𑀢𑁄 𑀚𑀺𑀦𑀲𑁆𑀲 𑀯𑀘𑀦𑀁, 𑀲𑁄𑀢𑀼𑀓𑀸𑀫𑀸 𑀫𑀳𑀸𑀚𑀦𑀸;

𑀤𑁂𑀯𑀤𑀸𑀦𑀯𑀕𑀦𑁆𑀥𑀩𑁆𑀩𑀸, 𑀩𑁆𑀭𑀳𑁆𑀫𑀸𑀦𑁄 𑀘 𑀫𑀳𑀺𑀤𑁆𑀥𑀺𑀓𑀸’.

𑁬𑁨. ‘‘𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑁂𑀯, 𑀦𑀫𑀲𑁆𑀲𑀺𑀁𑀲𑀼 𑀓𑀢𑀜𑁆𑀚𑀮𑀻;

‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫.

𑁬𑁩. ‘‘‘𑀔𑀢𑁆𑀢𑀺𑀬𑁂𑀦 𑀫𑀳𑀸𑀤𑀸𑀦𑀁, 𑀤𑀺𑀦𑁆𑀦𑀁 𑀲𑀢𑁆𑀢𑀸𑀳𑀺𑀓𑀫𑁆𑀧𑀺 𑀯𑁄 [𑀲𑀢𑁆𑀢𑀳𑀺𑀓𑀁 𑀫𑀺 𑀯𑁄 (𑀲𑀻.), 𑀲𑀢𑁆𑀢𑀳𑀺𑀓𑀸𑀥𑀺𑀓𑀁 (𑀲𑁆𑀬𑀸.), 𑀲𑀢𑁆𑀢𑀳𑀺𑀓𑀁 𑀯𑀺𑀪𑁄 (𑀧𑀻.)];

𑀲𑁄𑀢𑀼𑀓𑀸𑀫𑀸 𑀨𑀮𑀁 𑀢𑀲𑁆𑀲, 𑀩𑁆𑀬𑀸𑀓𑀭𑁄𑀳𑀺 𑀫𑀳𑀸𑀫𑀼𑀦𑁂’.

𑁬𑁪. ‘‘𑀢𑀢𑁄 𑀅𑀯𑁄𑀘 𑀪𑀕𑀯𑀸, ‘𑀲𑀼𑀡𑀸𑀣 𑀫𑀫 𑀪𑀸𑀲𑀺𑀢𑀁;

𑀅𑀧𑁆𑀧𑀫𑁂𑀬𑁆𑀬𑀫𑁆𑀳𑀺 𑀩𑀼𑀤𑁆𑀥𑀫𑁆𑀳𑀺, 𑀲𑀲𑀗𑁆𑀖𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀸 [𑀲𑀁𑀖𑀫𑁆𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 (𑀲𑀻. 𑀧𑀻.)].

𑁬𑁫. ‘‘‘𑀤𑀓𑁆𑀔𑀺𑀡𑀸 𑀢𑀸𑀬 [𑀤𑀓𑁆𑀔𑀺𑀡𑀸𑀤𑀸𑀬 (𑀲𑁆𑀬𑀸. 𑀧𑀻.)] 𑀓𑁄 𑀯𑀢𑁆𑀢𑀸, 𑀅𑀧𑁆𑀧𑀫𑁂𑀬𑁆𑀬𑀨𑀮𑀸 𑀳𑀺 𑀲𑀸;

𑀅𑀧𑀺 𑀘𑁂 𑀲 𑀫𑀳𑀸𑀪𑁄𑀕𑁄, 𑀞𑀸𑀦𑀁 𑀧𑀢𑁆𑀣𑁂𑀢𑀺 𑀉𑀢𑁆𑀢𑀫𑀁.

𑁬𑁬. ‘‘‘𑀮𑀸𑀪𑀻 𑀯𑀺𑀧𑀼𑀮𑀮𑀸𑀪𑀸𑀦𑀁, 𑀬𑀣𑀸 𑀪𑀺𑀓𑁆𑀔𑀼 𑀲𑀼𑀤𑀲𑁆𑀲𑀦𑁄;

𑀢𑀣𑀸𑀳𑀫𑁆𑀧𑀺 𑀪𑀯𑁂𑀬𑁆𑀬𑀦𑁆𑀢𑀺, 𑀮𑀘𑁆𑀙𑀲𑁂 𑀢𑀁 𑀅𑀦𑀸𑀕𑀢𑁂.

𑁬𑁭. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁬𑁮. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀻𑀯𑀮𑀺 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁬𑁯. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑁄 𑀅𑀳𑀁.

𑁭𑁦. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑀺𑀧𑀲𑁆𑀲𑀻 𑀮𑁄𑀓𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀘𑀸𑀭𑀼𑀤𑀲𑁆𑀲𑀦𑁄, 𑀲𑀩𑁆𑀩𑀥𑀫𑁆𑀫𑀯𑀺𑀧𑀲𑁆𑀲𑀓𑁄.

𑁭𑁧. ‘‘𑀢𑀤𑀸𑀳𑀁 𑀩𑀦𑁆𑀥𑀼𑀫𑀢𑀺𑀬𑀁, 𑀓𑀼𑀮𑀲𑁆𑀲𑀜𑁆𑀜𑀢𑀭𑀲𑁆𑀲 𑀘;

𑀤𑀬𑀺𑀢𑁄 𑀧𑀲𑁆𑀲𑀺𑀢𑁄 𑀘𑁂𑀯, 𑀆𑀲𑀺𑀁 𑀓𑀫𑁆𑀫𑀦𑁆𑀢𑀯𑀸𑀯𑀝𑁄 [𑀓𑀫𑁆𑀫𑀦𑁆𑀢𑀩𑁆𑀬𑀸𑀯𑀝𑁄 (𑀲𑀻. 𑀲𑁆𑀬𑀸. 𑀓.)].

𑁭𑁨. ‘‘𑀢𑀤𑀸 𑀅𑀜𑁆𑀜𑀢𑀭𑁄 𑀧𑀽𑀕𑁄, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄;

𑀧𑀭𑀺𑀯𑁂𑀲𑀁 𑀅𑀓𑀸𑀭𑀬𑀺, 𑀫𑀳𑀦𑁆𑀢𑀫𑀢𑀺𑀯𑀺𑀲𑁆𑀲𑀼𑀢𑀁.

𑁭𑁩. ‘‘𑀦𑀺𑀝𑁆𑀞𑀺𑀢𑁂 𑀘 𑀫𑀳𑀸𑀤𑀸𑀦𑁂, 𑀤𑀤𑀼𑀁 𑀔𑀚𑁆𑀚𑀓𑀲𑀜𑁆𑀳𑀺𑀢𑀁;

𑀦𑀯𑀁 𑀤𑀥𑀺𑀁 𑀫𑀥𑀼𑀜𑁆𑀘𑁂𑀯, 𑀯𑀺𑀘𑀺𑀦𑀁 𑀦𑁂𑀯 𑀅𑀤𑁆𑀤𑀲𑀼𑀁.

𑁭𑁪. ‘‘𑀢𑀤𑀸𑀳𑀁 𑀢𑀁 𑀕𑀳𑁂𑀢𑁆𑀯𑀸𑀦, 𑀦𑀯𑀁 𑀤𑀥𑀺𑀁 𑀫𑀥𑀼𑀫𑁆𑀧𑀺 𑀘;

𑀓𑀫𑁆𑀫𑀲𑁆𑀲𑀸𑀫𑀺𑀖𑀭𑀁 𑀕𑀘𑁆𑀙𑀺𑀁, 𑀢𑀫𑁂𑀲𑀦𑁆𑀢𑀸 𑀫𑀫𑀤𑁆𑀤𑀲𑀼𑀁.

𑁭𑁫. ‘‘𑀲𑀳𑀲𑁆𑀲𑀫𑀧𑀺 𑀤𑀢𑁆𑀯𑀸𑀦, 𑀦𑀸𑀮𑀪𑀺𑀁𑀲𑀼 𑀘 𑀢𑀁 𑀤𑁆𑀯𑀬𑀁;

𑀢𑀢𑁄𑀳𑀁 𑀏𑀯𑀁 𑀘𑀺𑀦𑁆𑀢𑁂𑀲𑀺𑀁, ‘𑀦𑁂𑀢𑀁 𑀳𑁂𑀲𑁆𑀲𑀢𑀺 𑀑𑀭𑀓𑀁.

𑁭𑁬. ‘‘‘𑀬𑀣𑀸 𑀇𑀫𑁂 𑀚𑀦𑀸 𑀲𑀩𑁆𑀩𑁂, 𑀲𑀓𑁆𑀓𑀭𑁄𑀦𑁆𑀢𑀺 𑀢𑀣𑀸𑀕𑀢𑀁;

𑀅𑀳𑀫𑁆𑀧𑀺 𑀓𑀸𑀭𑀁 𑀓𑀲𑁆𑀲𑀸𑀫𑀺, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂’.

𑁭𑁭. ‘‘𑀢𑀤𑀸𑀳𑀫𑁂𑀯𑀁 𑀘𑀺𑀦𑁆𑀢𑁂𑀢𑁆𑀯𑀸, 𑀤𑀥𑀺𑀁 𑀫𑀥𑀼𑀜𑁆𑀘 𑀏𑀓𑀢𑁄;

𑀫𑀤𑁆𑀤𑀺𑀢𑁆𑀯𑀸 𑀮𑁄𑀓𑀦𑀸𑀣𑀲𑁆𑀲, 𑀲𑀲𑀗𑁆𑀖𑀲𑁆𑀲 𑀅𑀤𑀸𑀲𑀳𑀁.

𑁭𑁮. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁭𑁯. ‘‘𑀧𑀼𑀦𑀸𑀳𑀁 𑀩𑀸𑀭𑀸𑀡𑀲𑀺𑀬𑀁, 𑀭𑀸𑀚𑀸 𑀳𑀼𑀢𑁆𑀯𑀸 𑀫𑀳𑀸𑀬𑀲𑁄;

𑀲𑀢𑁆𑀢𑀼𑀓𑀲𑁆𑀲 𑀢𑀤𑀸 𑀤𑀼𑀝𑁆𑀞𑁄, 𑀤𑁆𑀯𑀸𑀭𑀭𑁄𑀥𑀫𑀓𑀸𑀭𑀬𑀺𑀁.

𑁮𑁦. ‘‘𑀢𑀤𑀸 𑀢𑀧𑀲𑁆𑀲𑀺𑀦𑁄 𑀭𑀼𑀤𑁆𑀥𑀸, 𑀏𑀓𑀸𑀳𑀁 𑀭𑀓𑁆𑀔𑀺𑀢𑀸 𑀅𑀳𑀼𑀁;

𑀢𑀢𑁄 𑀢𑀲𑁆𑀲 𑀯𑀺𑀧𑀸𑀓𑁂𑀦, 𑀧𑀸𑀧𑀢𑀺𑀁 [𑀧𑀸𑀧𑀺𑀝𑁆𑀞𑀁 (𑀲𑁆𑀬𑀸.) 𑀧𑀸𑀧𑀢𑁆𑀢𑀁 (𑀓.)] 𑀦𑀺𑀭𑀬𑀁 𑀪𑀼𑀲𑀁.

𑁮𑁧. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑁄𑀳𑀁 𑀓𑁄𑀮𑀺𑀬𑁂 𑀧𑀼𑀭𑁂;

𑀲𑀼𑀧𑁆𑀧𑀯𑀸𑀲𑀸 𑀘 𑀫𑁂 𑀫𑀸𑀢𑀸, 𑀫𑀳𑀸𑀮𑀺 𑀮𑀺𑀘𑁆𑀙𑀯𑀻 𑀧𑀺𑀢𑀸.

𑁮𑁨. ‘‘𑀔𑀢𑁆𑀢𑀺𑀬𑁂 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀤𑁆𑀯𑀸𑀭𑀭𑁄𑀥𑀲𑁆𑀲 𑀯𑀸𑀳𑀲𑀸;

𑀲𑀢𑁆𑀢 𑀯𑀲𑁆𑀲𑀸𑀦𑀺 𑀦𑀺𑀯𑀲𑀺𑀁, 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀤𑀼𑀓𑁆𑀔𑀺𑀢𑁄.

𑁮𑁩. ‘‘𑀲𑀢𑁆𑀢𑀸𑀳𑀁 𑀤𑁆𑀯𑀸𑀭𑀫𑀽𑀴𑁆𑀳𑁄𑀳𑀁, 𑀫𑀳𑀸𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑁄;

𑀫𑀸𑀢𑀸 𑀫𑁂 𑀙𑀦𑁆𑀤𑀤𑀸𑀦𑁂𑀦, 𑀏𑀯𑀁 𑀆𑀲𑀺 𑀲𑀼𑀤𑀼𑀓𑁆𑀔𑀺𑀢𑀸.

𑁮𑁪. ‘‘𑀲𑀼𑀯𑀢𑁆𑀣𑀺𑀢𑁄𑀳𑀁 𑀦𑀺𑀓𑁆𑀔𑀦𑁆𑀢𑁄, 𑀩𑀼𑀤𑁆𑀥𑁂𑀦 𑀅𑀦𑀼𑀓𑀫𑁆𑀧𑀺𑀢𑁄;

𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁂𑀬𑁂𑀯, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁮𑁫. ‘‘𑀉𑀧𑀚𑁆𑀛𑀸 𑀲𑀸𑀭𑀺𑀧𑀼𑀢𑁆𑀢𑁄 𑀫𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀺𑀤𑁆𑀥𑀺𑀓𑁄;

𑀓𑁂𑀲𑁂 𑀑𑀭𑁄𑀧𑀬𑀦𑁆𑀢𑁄 𑀫𑁂, 𑀅𑀦𑀼𑀲𑀸𑀲𑀺 𑀫𑀳𑀸𑀫𑀢𑀺.

𑁮𑁬. ‘‘𑀓𑁂𑀲𑁂𑀲𑀼 𑀙𑀺𑀚𑁆𑀚𑀫𑀸𑀦𑁂𑀲𑀼, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀤𑁂𑀯𑀸 𑀦𑀸𑀕𑀸 𑀫𑀦𑀼𑀲𑁆𑀲𑀸 𑀘, 𑀧𑀘𑁆𑀘𑀬𑁂 𑀉𑀧𑀦𑁂𑀦𑁆𑀢𑀺 𑀫𑁂.

𑁮𑁭. ‘‘𑀧𑀤𑀼𑀫𑀼𑀢𑁆𑀢𑀭𑀦𑀸𑀣𑀜𑁆𑀘, 𑀯𑀺𑀧𑀲𑁆𑀲𑀺𑀜𑁆𑀘 𑀯𑀺𑀦𑀸𑀬𑀓𑀁;

𑀬𑀁 𑀧𑀽𑀚𑀬𑀺𑀁 𑀧𑀫𑀼𑀤𑀺𑀢𑁄, 𑀧𑀘𑁆𑀘𑀬𑁂𑀳𑀺 𑀯𑀺𑀲𑁂𑀲𑀢𑁄.

𑁮𑁮. ‘‘𑀢𑀢𑁄 𑀢𑁂𑀲𑀁 𑀯𑀺𑀲𑁂𑀲𑁂𑀦, 𑀓𑀫𑁆𑀫𑀸𑀦𑀁 𑀯𑀺𑀧𑀼𑀮𑀼𑀢𑁆𑀢𑀫𑀁;

𑀮𑀸𑀪𑀁 𑀮𑀪𑀸𑀫𑀺 𑀲𑀩𑁆𑀩𑀢𑁆𑀣, 𑀯𑀦𑁂 𑀕𑀸𑀫𑁂 𑀚𑀮𑁂 𑀣𑀮𑁂.

𑁮𑁯. ‘‘𑀭𑁂𑀯𑀢𑀁 𑀤𑀲𑁆𑀲𑀦𑀢𑁆𑀣𑀸𑀬, 𑀬𑀤𑀸 𑀬𑀸𑀢𑀺 𑀯𑀺𑀦𑀸𑀬𑀓𑁄;

𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺, 𑀲𑀳 𑀮𑁄𑀓𑀕𑁆𑀕𑀦𑀸𑀬𑀓𑁄.

𑁯𑁦. ‘‘𑀢𑀤𑀸 𑀤𑁂𑀯𑁄𑀧𑀡𑀻𑀢𑁂𑀳𑀺, 𑀫𑀫𑀢𑁆𑀣𑀸𑀬 𑀫𑀳𑀸𑀫𑀢𑀺;

𑀧𑀘𑁆𑀘𑀬𑁂𑀳𑀺 𑀫𑀳𑀸𑀯𑀻𑀭𑁄, 𑀲𑀲𑀗𑁆𑀖𑁄 𑀮𑁄𑀓𑀦𑀸𑀬𑀓𑁄.

𑁯𑁧. ‘‘𑀉𑀧𑀝𑁆𑀞𑀺𑀢𑁄 𑀫𑀬𑀸 𑀩𑀼𑀤𑁆𑀥𑁄, 𑀕𑀦𑁆𑀢𑁆𑀯𑀸 𑀭𑁂𑀯𑀢𑀫𑀤𑁆𑀤𑀲;

𑀢𑀢𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁯𑁨. ‘‘‘𑀮𑀸𑀪𑀻𑀦𑀁 𑀲𑀻𑀯𑀮𑀺 𑀅𑀕𑁆𑀕𑁄, 𑀫𑀫 𑀲𑀺𑀲𑁆𑀲𑁂𑀲𑀼 𑀪𑀺𑀓𑁆𑀔𑀯𑁄’;

𑀲𑀩𑁆𑀩𑀮𑁄𑀓𑀳𑀺𑀢𑁄 𑀲𑀢𑁆𑀣𑀸, 𑀓𑀺𑀢𑁆𑀢𑀬𑀻 𑀧𑀭𑀺𑀲𑀸𑀲𑀼 𑀫𑀁.

𑁯𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁯𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁯𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀻𑀯𑀮𑀺𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.