𑁯. 𑀭𑀸𑀥𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁯𑁬. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀮𑁄𑀓𑀯𑀺𑀤𑀽 𑀫𑀼𑀦𑀺;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

𑁨𑁯𑁭. ‘‘𑀑𑀯𑀸𑀤𑀓𑁄 𑀯𑀺𑀜𑁆𑀜𑀸𑀧𑀓𑁄, 𑀢𑀸𑀭𑀓𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀤𑁂𑀲𑀦𑀸𑀓𑀼𑀲𑀮𑁄 𑀩𑀼𑀤𑁆𑀥𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁯𑁮. ‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀫𑁆𑀧𑀢𑁆𑀢𑁂 𑀢𑀺𑀢𑁆𑀣𑀺𑀬𑁂 𑀲𑀩𑁆𑀩𑁂, 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀧𑀺.

𑁨𑁯𑁯. ‘‘𑀏𑀯𑀁 𑀦𑀺𑀭𑀸𑀓𑀼𑀮𑀁 𑀆𑀲𑀺, 𑀲𑀼𑀜𑁆𑀜𑀢𑀁 𑀢𑀺𑀢𑁆𑀣𑀺𑀬𑁂𑀳𑀺 𑀘;

𑀯𑀺𑀘𑀺𑀢𑁆𑀢𑀁 𑀅𑀭𑀳𑀦𑁆𑀢𑁂𑀳𑀺, 𑀯𑀲𑀻𑀪𑀽𑀢𑁂𑀳𑀺 𑀢𑀸𑀤𑀺𑀪𑀺.

𑁩𑁦𑁦. ‘‘𑀭𑀢𑀦𑀸𑀦𑀝𑁆𑀞𑀧𑀜𑁆𑀜𑀸𑀲𑀁, 𑀉𑀕𑁆𑀕𑀢𑁄 𑀲𑁄 𑀫𑀳𑀸𑀫𑀼𑀦𑀺;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄.

𑁩𑁦𑁧. ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁦𑁨. ‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽;

𑀉𑀧𑁂𑀘𑁆𑀘 𑀢𑀁 𑀦𑀭𑀯𑀭𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁.

𑁩𑁦𑁩. ‘‘𑀧𑀜𑁆𑀜𑀧𑁂𑀦𑁆𑀢𑀁 𑀫𑀳𑀸𑀯𑀻𑀭𑀁, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑀁;

𑀧𑀝𑀺𑀪𑀸𑀦𑁂𑀬𑁆𑀬𑀓𑀁 𑀪𑀺𑀓𑁆𑀔𑀼𑀁, 𑀏𑀢𑀤𑀕𑁆𑀕𑁂 𑀯𑀺𑀦𑀸𑀬𑀓𑀁.

𑁩𑁦𑁪. ‘‘𑀢𑀤𑀸𑀳𑀁 𑀓𑀸𑀭𑀁 𑀓𑀢𑁆𑀯𑀸𑀦, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂;

𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀢𑀁 𑀞𑀸𑀦𑀁 𑀅𑀪𑀺𑀧𑀢𑁆𑀣𑀬𑀺𑀁.

𑁩𑁦𑁫. ‘‘𑀢𑀢𑁄 𑀫𑀁 𑀪𑀕𑀯𑀸 𑀆𑀳, 𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀫𑀧𑁆𑀧𑀪𑁄;

𑀲𑀭𑁂𑀦 𑀭𑀚𑀦𑀻𑀬𑁂𑀦, 𑀓𑀺𑀮𑁂𑀲𑀫𑀮𑀳𑀸𑀭𑀺𑀦𑀸.

𑁩𑁦𑁬. ‘‘‘𑀲𑀼𑀔𑀻 𑀪𑀯𑀲𑁆𑀲𑀼 𑀤𑀻𑀖𑀸𑀬𑀼, 𑀲𑀺𑀚𑁆𑀛𑀢𑀼 𑀧𑀡𑀺𑀥𑀻 𑀢𑀯;

𑀲𑀲𑀗𑁆𑀖𑁂 𑀫𑁂 𑀓𑀢𑀁 𑀓𑀸𑀭𑀁, 𑀅𑀢𑀻𑀯 𑀯𑀺𑀧𑀼𑀮𑀁 𑀢𑀬𑀸.

𑁩𑁦𑁭. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁩𑁦𑁮. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀭𑀸𑀥𑁄𑀢𑀺 𑀦𑀸𑀫𑀥𑁂𑀬𑁆𑀬𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁩𑁦𑁯. ‘‘‘𑀲 𑀢𑁂 𑀳𑁂𑀢𑀼𑀕𑀼𑀡𑁂 𑀢𑀼𑀝𑁆𑀞𑁄, 𑀲𑀓𑁆𑀬𑀧𑀼𑀢𑁆𑀢𑁄 𑀦𑀭𑀸𑀲𑀪𑁄 [𑀇𑀤𑀁 𑀧𑀸𑀤𑀤𑁆𑀯𑀬𑀁 𑀲𑁆𑀬𑀸𑀫𑀫𑀽𑀮𑁂 𑀦𑀢𑁆𑀣𑀻];

𑀧𑀝𑀺𑀪𑀸𑀦𑁂𑀬𑁆𑀬𑀓𑀸𑀦𑀕𑁆𑀕𑀁, 𑀧𑀜𑁆𑀜𑀧𑁂𑀲𑁆𑀲𑀢𑀺 𑀦𑀸𑀬𑀓𑁄’.

𑁩𑁧𑁦. ‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀘𑀭𑀺𑀁, 𑀲𑀢𑁄 𑀧𑀜𑁆𑀜𑀸𑀲𑀫𑀸𑀳𑀺𑀢𑁄.

𑁩𑁧𑁧. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁩𑁧𑁨. ‘‘𑀲𑀢𑀸𑀦𑀁 𑀢𑀻𑀡𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁩𑁧𑁩. ‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑁄 𑀆𑀲𑀺𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸.

𑁩𑁧𑁪. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀕𑀺𑀭𑀺𑀩𑁆𑀩𑀚𑀧𑀼𑀭𑀼𑀢𑁆𑀢𑀫𑁂;

𑀚𑀸𑀢𑁄 𑀯𑀺𑀧𑁆𑀧𑀓𑀼𑀮𑁂 𑀦𑀺𑀤𑁆𑀥𑁂, 𑀯𑀺𑀓𑀮𑀘𑁆𑀙𑀸𑀤𑀦𑀸𑀲𑀦𑁂.

𑁩𑁧𑁫. ‘‘𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀧𑀸𑀤𑀸𑀲𑀺𑀁, 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀬𑀤𑀸 𑀚𑀺𑀡𑁆𑀡𑁄 𑀘 𑀯𑀼𑀤𑁆𑀥𑁄 𑀘, 𑀢𑀤𑀸𑀭𑀸𑀫𑀫𑀼𑀧𑀸𑀕𑀫𑀺𑀁.

𑁩𑁧𑁬. ‘‘𑀧𑀩𑁆𑀩𑀚𑀢𑀺 𑀦 𑀫𑀁 𑀓𑁄𑀘𑀺 [𑀧𑀩𑁆𑀩𑀸𑀚𑁂𑀦𑁆𑀢𑀺 𑀦 𑀫𑀁 𑀓𑁂𑀘𑀺 (𑀲𑀻. 𑀲𑁆𑀬𑀸 𑀧𑀻.)], 𑀚𑀺𑀡𑁆𑀡𑀤𑀼𑀩𑁆𑀩𑀮𑀣𑀸𑀫𑀓𑀁;

𑀢𑁂𑀦 𑀤𑀻𑀦𑁄 𑀯𑀺𑀯𑀡𑁆𑀡𑀗𑁆𑀕𑁄 [𑀯𑀺𑀯𑀡𑁆𑀡𑀓𑁄 (𑀓.)], 𑀲𑁄𑀓𑁄 𑀘𑀸𑀲𑀺𑀁 𑀢𑀤𑀸 𑀅𑀳𑀁.

𑁩𑁧𑁭. ‘‘𑀤𑀺𑀲𑁆𑀯𑀸 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀫𑀫𑀫𑀸𑀳 [𑀫𑀫𑀸𑀳 𑀲𑁄 (𑀲𑀻.), 𑀫𑀫𑀸𑀳 𑀘 (𑀧𑀻.)] 𑀫𑀳𑀸𑀫𑀼𑀦𑀺;

‘𑀓𑀺𑀫𑀢𑁆𑀣𑀁 𑀧𑀼𑀢𑁆𑀢𑀲𑁄𑀓𑀝𑁆𑀝𑁄, 𑀩𑁆𑀭𑀽𑀳𑀺 𑀢𑁂 𑀘𑀺𑀢𑁆𑀢𑀚𑀁 𑀭𑀼𑀚𑀁’.

𑁩𑁧𑁮. ‘‘‘𑀧𑀩𑁆𑀩𑀚𑁆𑀚𑀁 𑀦 𑀮𑀪𑁂 𑀯𑀻𑀭, 𑀲𑁆𑀯𑀸𑀓𑁆𑀔𑀸𑀢𑁂 𑀢𑀯 𑀲𑀸𑀲𑀦𑁂;

𑀢𑁂𑀦 𑀲𑁄𑀓𑁂𑀦 𑀤𑀻𑀦𑁄𑀲𑁆𑀫𑀺, 𑀲𑀭𑀡𑀁 𑀳𑁄𑀳𑀺 𑀦𑀸𑀬𑀓’.

𑁩𑁧𑁯. ‘‘𑀢𑀤𑀸 𑀪𑀺𑀓𑁆𑀔𑀽 𑀲𑀫𑀸𑀦𑁂𑀢𑁆𑀯𑀸, 𑀅𑀧𑀼𑀘𑁆𑀙𑀺 𑀫𑀼𑀦𑀺𑀲𑀢𑁆𑀢𑀫𑁄;

‘𑀇𑀫𑀲𑁆𑀲 𑀅𑀥𑀺𑀓𑀸𑀭𑀁 𑀬𑁂, 𑀲𑀭𑀦𑁆𑀢𑀺 𑀩𑁆𑀬𑀸𑀳𑀭𑀦𑁆𑀢𑀼 𑀢𑁂’.

𑁩𑁨𑁦. ‘‘𑀲𑀸𑀭𑀺𑀧𑀼𑀢𑁆𑀢𑁄 𑀢𑀤𑀸𑀯𑁄𑀘, ‘𑀓𑀸𑀭𑀫𑀲𑁆𑀲 𑀲𑀭𑀸𑀫𑀳𑀁;

𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀸𑀧𑁂𑀲𑀺, 𑀧𑀺𑀡𑁆𑀟𑀸𑀬 𑀘𑀭𑀢𑁄 𑀫𑀫’.

𑁩𑁨𑁧. ‘‘‘𑀲𑀸𑀥𑀼 𑀲𑀸𑀥𑀼 𑀓𑀢𑀜𑁆𑀜𑀽𑀲𑀺, 𑀲𑀸𑀭𑀺𑀧𑀼𑀢𑁆𑀢 𑀇𑀫𑀁 𑀢𑀼𑀯𑀁;

𑀧𑀩𑁆𑀩𑀸𑀚𑁂𑀳𑀺 𑀤𑀺𑀚𑀁 𑀯𑀼𑀟𑁆𑀠𑀁, 𑀳𑁂𑀲𑁆𑀲𑀢𑀸𑀚𑀸𑀦𑀺𑀬𑁄 𑀅𑀬𑀁’.

𑁩𑁨𑁨. ‘‘𑀢𑀢𑁄 𑀅𑀮𑀢𑁆𑀣𑀁 𑀧𑀩𑁆𑀩𑀚𑁆𑀚𑀁, 𑀓𑀫𑁆𑀫𑀯𑀸𑀘𑁄𑀧𑀲𑀫𑁆𑀧𑀤𑀁;

𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀧𑀸𑀧𑀼𑀡𑀺𑀁 𑀆𑀲𑀯𑀓𑁆𑀔𑀬𑀁.

𑁩𑁨𑁩. ‘‘𑀲𑀓𑁆𑀓𑀘𑁆𑀘𑀁 𑀫𑀼𑀦𑀺𑀦𑁄 𑀯𑀸𑀓𑁆𑀬𑀁, 𑀲𑀼𑀡𑀸𑀫𑀺 𑀫𑀼𑀤𑀺𑀢𑁄 𑀬𑀢𑁄;

𑀧𑀝𑀺𑀪𑀸𑀦𑁂𑀬𑁆𑀬𑀓𑀸𑀦𑀕𑁆𑀕𑀁, 𑀢𑀢𑁄 𑀫𑀁 𑀞𑀧𑀬𑀻 𑀚𑀺𑀦𑁄.

𑁩𑁨𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁨𑁫. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁨𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀭𑀸𑀥𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀭𑀸𑀥𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.