𑁧𑁦. 𑀫𑁄𑀖𑀭𑀸𑀚𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁨𑁭. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀮𑁄𑀓𑀯𑀺𑀤𑀽 𑀫𑀼𑀦𑀺;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

𑁩𑁨𑁮. ‘‘𑀑𑀯𑀸𑀤𑀓𑁄 𑀯𑀺𑀜𑁆𑀜𑀸𑀧𑀓𑁄, 𑀢𑀸𑀭𑀓𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀤𑁂𑀲𑀦𑀸𑀓𑀼𑀲𑀮𑁄 𑀩𑀼𑀤𑁆𑀥𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁨𑁯. ‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀫𑁆𑀧𑀢𑁆𑀢𑁂 𑀢𑀺𑀢𑁆𑀣𑀺𑀬𑁂 𑀲𑀩𑁆𑀩𑁂, 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀧𑀺.

𑁩𑁩𑁦. ‘‘𑀏𑀯𑀁 𑀦𑀺𑀭𑀸𑀓𑀼𑀮𑀁 𑀆𑀲𑀺, 𑀲𑀼𑀜𑁆𑀜𑀢𑀁 𑀢𑀺𑀢𑁆𑀣𑀺𑀬𑁂𑀳𑀺 𑀘;

𑀯𑀺𑀘𑀺𑀢𑁆𑀢𑀁 𑀅𑀭𑀳𑀦𑁆𑀢𑁂𑀳𑀺, 𑀯𑀲𑀻𑀪𑀽𑀢𑁂𑀳𑀺 𑀢𑀸𑀤𑀺𑀪𑀺.

𑁩𑁩𑁧. ‘‘𑀭𑀢𑀦𑀸𑀦𑀝𑁆𑀞𑀧𑀜𑁆𑀜𑀸𑀲𑀁, 𑀉𑀕𑁆𑀕𑀢𑁄 𑀲𑁄 𑀫𑀳𑀸𑀫𑀼𑀦𑀺;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄.

𑁩𑁩𑁨. ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁩𑁩. ‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀓𑀼𑀮𑁂 𑀅𑀜𑁆𑀜𑀢𑀭𑁂 𑀅𑀳𑀼𑀁;

𑀧𑀭𑀓𑀫𑁆𑀫𑀸𑀬𑀦𑁂 𑀬𑀼𑀢𑁆𑀢𑁄, 𑀦𑀢𑁆𑀣𑀺 𑀫𑁂 𑀓𑀺𑀜𑁆𑀘𑀺 𑀲𑀁𑀥𑀦𑀁.

𑁩𑁩𑁪. ‘‘𑀧𑀝𑀺𑀓𑁆𑀓𑀫𑀦𑀲𑀸𑀮𑀸𑀬𑀁, 𑀯𑀲𑀦𑁆𑀢𑁄 𑀓𑀢𑀪𑀽𑀫𑀺𑀬𑀁;

𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑀬𑀺𑀁 𑀢𑀢𑁆𑀣, 𑀤𑀴𑁆𑀳𑀁 𑀓𑀡𑁆𑀳𑀸𑀲𑀺 𑀲𑀸 [𑀓𑀡𑁆𑀳𑀸 𑀲𑀺𑀬𑀸 (𑀲𑀻. 𑀧𑀻.), 𑀟𑀬𑁆𑀳𑀓𑀡𑁆𑀳𑀸 𑀲𑀺𑀮𑀸 (𑀲𑁆𑀬𑀸.)] 𑀳𑀻.

𑁩𑁩𑁫. ‘‘𑀢𑀤𑀸 𑀧𑀭𑀺𑀲𑀢𑀺𑀁 𑀦𑀸𑀣𑁄, 𑀘𑀢𑀼𑀲𑀘𑁆𑀘𑀧𑀓𑀸𑀲𑀓𑁄;

𑀲𑀸𑀯𑀓𑀁 𑀲𑀫𑁆𑀧𑀓𑀺𑀢𑁆𑀢𑁂𑀲𑀺, 𑀮𑀽𑀔𑀘𑀻𑀯𑀭𑀥𑀸𑀭𑀓𑀁.

𑁩𑁩𑁬. ‘‘𑀢𑀲𑁆𑀲 𑀢𑀫𑁆𑀳𑀺 𑀕𑀼𑀡𑁂 𑀢𑀼𑀝𑁆𑀞𑁄, 𑀧𑀡𑀺𑀧𑀘𑁆𑀘 [𑀧𑀢𑀺𑀧𑀚𑁆𑀚 (𑀲𑁆𑀬𑀸.)] 𑀢𑀣𑀸𑀕𑀢𑀁;

𑀮𑀽𑀔𑀘𑀻𑀯𑀭𑀥𑀸𑀭𑀕𑁆𑀕𑀁, 𑀧𑀢𑁆𑀣𑀬𑀺𑀁 𑀞𑀸𑀦𑀫𑀼𑀢𑁆𑀢𑀫𑀁.

𑁩𑁩𑁭. ‘‘𑀢𑀤𑀸 𑀅𑀯𑁄𑀘 𑀪𑀕𑀯𑀸, 𑀲𑀸𑀯𑀓𑁂 𑀧𑀤𑀼𑀫𑀼𑀢𑁆𑀢𑀭𑁄;

‘𑀧𑀲𑁆𑀲𑀣𑁂𑀢𑀁 𑀧𑀼𑀭𑀺𑀲𑀓𑀁, 𑀓𑀼𑀘𑁂𑀮𑀁 𑀢𑀦𑀼𑀤𑁂𑀳𑀓𑀁.

𑁩𑁩𑁮. ‘‘‘𑀧𑀻𑀢𑀺𑀧𑁆𑀧𑀲𑀦𑁆𑀦𑀯𑀤𑀦𑀁, 𑀲𑀤𑁆𑀥𑀸𑀥𑀦𑀲𑀫𑀦𑁆𑀯𑀺𑀢𑀁 [𑀲𑀤𑁆𑀥𑀸𑀲𑁆𑀦𑁂𑀳𑀲𑀫𑀦𑁆𑀯𑀢𑀁 (𑀓.)];

𑀉𑀤𑀕𑁆𑀕𑀢𑀦𑀼𑀚𑀁 𑀳𑀝𑁆𑀞𑀁, 𑀅𑀘𑀮𑀁 𑀲𑀸𑀮𑀧𑀺𑀡𑁆𑀟𑀺𑀢𑀁.

𑁩𑁩𑁯. ‘‘‘𑀏𑀲𑁄 𑀧𑀢𑁆𑀣𑁂𑀢𑀺 𑀢𑀁 𑀞𑀸𑀦𑀁, 𑀲𑀘𑁆𑀘𑀲𑁂𑀦𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀮𑀽𑀔𑀘𑀻𑀯𑀭𑀥𑀸𑀭𑀺𑀲𑁆𑀲, 𑀢𑀲𑁆𑀲 𑀯𑀡𑁆𑀡𑀲𑀺𑀢𑀸𑀲𑀬𑁄 [𑀯𑀡𑁆𑀡𑀕𑀢𑀸𑀲𑀬𑁄 (𑀲𑀻. 𑀲𑁆𑀬𑀸. 𑀧𑀻.)].

𑁩𑁪𑁦. ‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀦𑀺𑀧𑀘𑁆𑀘 𑀲𑀺𑀭𑀲𑀸 𑀚𑀺𑀦𑀁;

𑀬𑀸𑀯𑀚𑀻𑀯𑀁 𑀲𑀼𑀪𑀁 𑀓𑀫𑁆𑀫𑀁, 𑀓𑀭𑀺𑀢𑁆𑀯𑀸 𑀚𑀺𑀦𑀲𑀸𑀲𑀦𑁂.

𑁩𑁪𑁧. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑁄 𑀅𑀳𑀁.

𑁩𑁪𑁨. ‘‘𑀧𑀝𑀺𑀓𑁆𑀓𑀫𑀦𑀲𑀸𑀮𑀸𑀬𑀁, 𑀪𑀽𑀫𑀺𑀤𑀸𑀳𑀓𑀓𑀫𑁆𑀫𑀼𑀦𑀸;

𑀲𑀫𑀲𑀳𑀲𑁆𑀲𑀁 𑀦𑀺𑀭𑀬𑁂, 𑀅𑀤𑀬𑁆𑀳𑀺𑀁 𑀯𑁂𑀤𑀦𑀸𑀝𑁆𑀝𑀺𑀢𑁄.

𑁩𑁪𑁩. ‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺𑀳𑀁;

𑀫𑀦𑀼𑀲𑁆𑀲𑁄 𑀓𑀼𑀮𑀚𑁄 𑀳𑀼𑀢𑁆𑀯𑀸, 𑀚𑀸𑀢𑀺𑀬𑀸 𑀮𑀓𑁆𑀔𑀡𑀗𑁆𑀓𑀺𑀢𑁄.

𑁩𑁪𑁪. ‘‘𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑁂𑀯, 𑀓𑀼𑀝𑁆𑀞𑀭𑁄𑀕𑀲𑀫𑀧𑁆𑀧𑀺𑀢𑁄;

𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸.

𑁩𑁪𑁫. ‘‘𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀉𑀧𑀭𑀺𑀝𑁆𑀞𑀁 𑀬𑀲𑀲𑁆𑀲𑀺𑀦𑀁;

𑀧𑀺𑀡𑁆𑀟𑀧𑀸𑀢𑁂𑀦 𑀢𑀧𑁆𑀧𑁂𑀲𑀺𑀁, 𑀧𑀲𑀦𑁆𑀦𑀫𑀸𑀦𑀲𑁄 𑀅𑀳𑀁.

𑁩𑁪𑁬. ‘‘𑀢𑁂𑀦 𑀓𑀫𑁆𑀫𑀯𑀺𑀲𑁂𑀲𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁩𑁪𑁭. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀅𑀚𑀸𑀬𑀺𑀁 𑀔𑀢𑁆𑀢𑀺𑀬𑁂 𑀓𑀼𑀮𑁂;

𑀧𑀺𑀢𑀼𑀦𑁄 𑀅𑀘𑁆𑀘𑀬𑁂𑀦𑀸𑀳𑀁, 𑀫𑀳𑀸𑀭𑀚𑁆𑀚𑀲𑀫𑀧𑁆𑀧𑀺𑀢𑁄.

𑁩𑁪𑁮. ‘‘𑀓𑀼𑀝𑁆𑀞𑀭𑁄𑀕𑀸𑀥𑀺𑀪𑀽𑀢𑁄𑀳𑀁, 𑀦 𑀭𑀢𑀺𑀁 𑀦 𑀲𑀼𑀔𑀁 𑀮𑀪𑁂;

𑀫𑁄𑀖𑀁 𑀭𑀚𑁆𑀚𑀁 𑀲𑀼𑀔𑀁 𑀬𑀲𑁆𑀫𑀸, 𑀫𑁄𑀖𑀭𑀸𑀚𑀸 𑀢𑀢𑁄 𑀅𑀳𑀁.

𑁩𑁪𑁯. ‘‘𑀓𑀸𑀬𑀲𑁆𑀲 𑀤𑁄𑀲𑀁 𑀤𑀺𑀲𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀩𑀸𑀯𑀭𑀺𑀲𑁆𑀲 𑀤𑀺𑀚𑀕𑁆𑀕𑀲𑁆𑀲, 𑀲𑀺𑀲𑁆𑀲𑀢𑁆𑀢𑀁 𑀅𑀚𑁆𑀛𑀼𑀧𑀸𑀕𑀫𑀺𑀁.

𑁩𑁫𑁦. ‘‘𑀫𑀳𑀢𑀸 𑀧𑀭𑀺𑀯𑀸𑀭𑁂𑀦, 𑀉𑀧𑁂𑀘𑁆𑀘 𑀦𑀭𑀦𑀸𑀬𑀓𑀁;

𑀅𑀧𑀼𑀘𑁆𑀙𑀺𑀁 𑀦𑀺𑀧𑀼𑀡𑀁 𑀧𑀜𑁆𑀳𑀁, 𑀢𑀁 𑀯𑀻𑀭𑀁 𑀯𑀸𑀤𑀺𑀲𑀽𑀤𑀦𑀁.

𑁩𑁫𑁧. ‘‘‘𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄, 𑀩𑁆𑀭𑀳𑁆𑀫𑀮𑁄𑀓𑁄 𑀲𑀤𑁂𑀯𑀓𑁄;

𑀤𑀺𑀝𑁆𑀞𑀺𑀁 𑀦𑁄 [𑀤𑀺𑀝𑁆𑀞𑀸 𑀦𑁄 (𑀲𑀻.), 𑀤𑀺𑀝𑁆𑀞𑀁 𑀦𑁄 (𑀧𑀻.), 𑀤𑀺𑀝𑁆𑀞𑀺𑀁 𑀢𑁂 (𑀲𑁆𑀬𑀸.)] 𑀦𑀸𑀪𑀺𑀚𑀸𑀦𑀸𑀫𑀺, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁩𑁫𑁨. ‘‘‘𑀏𑀯𑀸𑀪𑀺𑀓𑁆𑀓𑀦𑁆𑀢𑀤𑀲𑁆𑀲𑀸𑀯𑀺𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀣𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀺’.

𑁩𑁫𑁩. ‘‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀉𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸.

𑁩𑁫𑁪. ‘‘‘𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀺’;

𑀇𑀢𑀺 𑀫𑀁 𑀅𑀪𑀡𑀺 𑀩𑀼𑀤𑁆𑀥𑁄, 𑀲𑀩𑁆𑀩𑀭𑁄𑀕𑀢𑀺𑀓𑀺𑀘𑁆𑀙𑀓𑁄.

𑁩𑁫𑁫. ‘‘𑀲𑀳 𑀕𑀸𑀣𑀸𑀯𑀲𑀸𑀦𑁂𑀦, 𑀓𑁂𑀲𑀫𑀲𑁆𑀲𑀼𑀯𑀺𑀯𑀚𑁆𑀚𑀺𑀢𑁄;

𑀓𑀸𑀲𑀸𑀯𑀯𑀢𑁆𑀣𑀯𑀲𑀦𑁄, 𑀆𑀲𑀺𑀁 𑀪𑀺𑀓𑁆𑀔𑀼 𑀢𑀣𑀸𑀭𑀳𑀸.

𑁩𑁫𑁬. ‘‘𑀲𑀗𑁆𑀖𑀺𑀓𑁂𑀲𑀼 𑀯𑀺𑀳𑀸𑀭𑁂𑀲𑀼, 𑀦 𑀯𑀲𑀺𑀁 𑀭𑁄𑀕𑀧𑀻𑀴𑀺𑀢𑁄;

𑀫𑀸 𑀯𑀺𑀳𑀸𑀭𑁄 𑀧𑀤𑀼𑀲𑁆𑀲𑀻𑀢𑀺, 𑀯𑀸𑀢𑀭𑁄𑀕𑁂𑀳𑀺 𑀧𑀻𑀴𑀺𑀢𑁄 [𑀯𑀸𑀘𑀸𑀬𑀸𑀪𑀺𑀲𑀼𑀧𑀻𑀴𑀺𑀢𑁄 (𑀲𑁆𑀬𑀸. 𑀧𑀻.), 𑀯𑀸𑀢𑀭𑁄𑀕𑀻 𑀲𑀼𑀧𑀻𑀴𑀺𑀢𑁄 (𑀓.)].

𑁩𑁫𑁭. ‘‘𑀲𑀗𑁆𑀓𑀸𑀭𑀓𑀽𑀝𑀸 𑀆𑀳𑀺𑀢𑁆𑀯𑀸, 𑀲𑀼𑀲𑀸𑀦𑀸 𑀭𑀣𑀺𑀓𑀸𑀳𑀺 𑀘;

𑀢𑀢𑁄 𑀲𑀗𑁆𑀖𑀸𑀝𑀺𑀁 𑀓𑀭𑀺𑀢𑁆𑀯𑀸, 𑀥𑀸𑀭𑀬𑀺𑀁 𑀮𑀽𑀔𑀘𑀻𑀯𑀭𑀁.

𑁩𑁫𑁮. ‘‘𑀫𑀳𑀸𑀪𑀺𑀲𑀓𑁆𑀓𑁄 𑀢𑀲𑁆𑀫𑀺𑀁 𑀫𑁂, 𑀕𑀼𑀡𑁂 𑀢𑀼𑀝𑁆𑀞𑁄 𑀯𑀺𑀦𑀸𑀬𑀓𑁄;

𑀮𑀽𑀔𑀘𑀻𑀯𑀭𑀥𑀸𑀭𑀻𑀦𑀁, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁩𑁫𑁯. ‘‘𑀧𑀼𑀜𑁆𑀜𑀧𑀸𑀧𑀧𑀭𑀺𑀓𑁆𑀔𑀻𑀡𑁄, 𑀲𑀩𑁆𑀩𑀭𑁄𑀕𑀯𑀺𑀯𑀚𑁆𑀚𑀺𑀢𑁄;

𑀲𑀺𑀔𑀻𑀯 𑀅𑀦𑀼𑀧𑀸𑀤𑀸𑀦𑁄, 𑀦𑀺𑀩𑁆𑀩𑀸𑀬𑀺𑀲𑁆𑀲𑀫𑀦𑀸𑀲𑀯𑁄.

𑁩𑁬𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁬𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁬𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑁄𑀖𑀭𑀸𑀚𑀸 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑁄𑀖𑀭𑀸𑀚𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀓𑀘𑁆𑀘𑀸𑀬𑀦𑀯𑀕𑁆𑀕𑁄 𑀘𑀢𑀼𑀧𑀜𑁆𑀜𑀸𑀲𑀫𑁄.