𑁮. 𑀉𑀭𑀼𑀯𑁂𑀴𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁫𑁧. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀮𑁄𑀓𑀯𑀺𑀤𑀽 𑀫𑀼𑀦𑀺;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

𑁨𑁫𑁨. ‘‘𑀑𑀯𑀸𑀤𑀓𑁄 𑀯𑀺𑀜𑁆𑀜𑀸𑀧𑀓𑁄, 𑀢𑀸𑀭𑀓𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀤𑁂𑀲𑀦𑀸𑀓𑀼𑀲𑀮𑁄 𑀩𑀼𑀤𑁆𑀥𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁫𑁩. ‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀫𑁆𑀧𑀢𑁆𑀢𑁂 𑀢𑀺𑀢𑁆𑀣𑀺𑀬𑁂 𑀲𑀩𑁆𑀩𑁂, 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀧𑀺.

𑁨𑁫𑁪. ‘‘𑀏𑀯𑀁 𑀦𑀺𑀭𑀸𑀓𑀼𑀮𑀁 𑀆𑀲𑀺, 𑀲𑀼𑀜𑁆𑀜𑀢𑀁 𑀢𑀺𑀢𑁆𑀣𑀺𑀬𑁂𑀳𑀺 𑀘;

𑀯𑀺𑀘𑀺𑀢𑁆𑀢𑀁 𑀅𑀭𑀳𑀦𑁆𑀢𑁂𑀳𑀺, 𑀯𑀲𑀻𑀪𑀽𑀢𑁂𑀳𑀺 𑀢𑀸𑀤𑀺𑀪𑀺.

𑁨𑁫𑁫. ‘‘𑀭𑀢𑀦𑀸𑀦𑀝𑁆𑀞𑀧𑀜𑁆𑀜𑀸𑀲𑀁, 𑀉𑀕𑁆𑀕𑀢𑁄 𑀲𑁄 𑀫𑀳𑀸𑀫𑀼𑀦𑀺;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄.

𑁨𑁫𑁬. ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁫𑁭. ‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀸, 𑀩𑁆𑀭𑀸𑀳𑁆𑀫𑀡𑁄 𑀲𑀸𑀥𑀼𑀲𑀫𑁆𑀫𑀢𑁄;

𑀉𑀧𑁂𑀘𑁆𑀘 𑀮𑁄𑀓𑀧𑀚𑁆𑀚𑁄𑀢𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁.

𑁨𑁫𑁮. ‘‘𑀢𑀤𑀸 𑀫𑀳𑀸𑀧𑀭𑀺𑀲𑀢𑀺𑀁, 𑀫𑀳𑀸𑀧𑀭𑀺𑀲𑀲𑀸𑀯𑀓𑀁;

𑀞𑀧𑁂𑀦𑁆𑀢𑀁 𑀏𑀢𑀤𑀕𑁆𑀕𑀫𑁆𑀳𑀺, 𑀲𑀼𑀢𑁆𑀯𑀸𑀦 𑀫𑀼𑀤𑀺𑀢𑁄 𑀅𑀳𑀁.

𑁨𑁫𑁯. ‘‘𑀫𑀳𑀢𑀸 𑀧𑀭𑀺𑀯𑀸𑀭𑁂𑀦, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀚𑀺𑀦𑀁;

𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀳𑀲𑁆𑀲𑁂𑀦, 𑀲𑀳𑀤𑀸𑀦𑀫𑀤𑀸𑀲𑀳𑀁.

𑁨𑁬𑁦. ‘‘𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀅𑀪𑀺𑀯𑀸𑀤𑀺𑀬 𑀦𑀸𑀬𑀓𑀁;

𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑀝𑁆𑀞𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁨𑁬𑁧. ‘‘‘𑀢𑀬𑀺 𑀲𑀤𑁆𑀥𑀸𑀬 𑀫𑁂 𑀯𑀻𑀭, 𑀅𑀥𑀺𑀓𑀸𑀭𑀕𑀼𑀡𑁂𑀦 𑀘;

𑀧𑀭𑀺𑀲𑀸 𑀫𑀳𑀢𑀻 𑀳𑁄𑀢𑀼, 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀳𑀺𑀁 𑀢𑀳𑀺𑀁’.

𑁨𑁬𑁨. ‘‘𑀢𑀤𑀸 𑀅𑀯𑁄𑀘 𑀧𑀭𑀺𑀲𑀁, 𑀕𑀚𑀕𑀚𑁆𑀚𑀺𑀢𑀲𑀼𑀲𑁆𑀲𑀭𑁄;

𑀓𑀭𑀯𑀻𑀓𑀭𑀼𑀢𑁄 𑀲𑀢𑁆𑀣𑀸, ‘𑀏𑀢𑀁 𑀧𑀲𑁆𑀲𑀣 𑀩𑁆𑀭𑀸𑀳𑁆𑀫𑀡𑀁.

𑁨𑁬𑁩. ‘‘‘𑀳𑁂𑀫𑀯𑀡𑁆𑀡𑀁 𑀫𑀳𑀸𑀩𑀸𑀳𑀼𑀁, 𑀓𑀫𑀮𑀸𑀦𑀦𑀮𑁄𑀘𑀦𑀁;

𑀉𑀤𑀕𑁆𑀕𑀢𑀦𑀼𑀚𑀁 𑀳𑀝𑁆𑀞𑀁, 𑀲𑀤𑁆𑀥𑀯𑀦𑁆𑀢𑀁 𑀕𑀼𑀡𑁂 𑀫𑀫.

𑁨𑁬𑁪. ‘‘‘𑀏𑀲 𑀧𑀢𑁆𑀣𑀬𑀢𑁂 𑀞𑀸𑀦𑀁 [𑀧𑀢𑁆𑀣𑀬𑀺 𑀢𑀁 𑀞𑀸𑀦𑀁 (𑀲𑁆𑀬𑀸.)], 𑀲𑀻𑀳𑀖𑁄𑀲𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀮𑀘𑁆𑀙𑀲𑁂 𑀢𑀁 𑀫𑀦𑁄𑀭𑀣𑀁.

𑁨𑁬𑁫. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁨𑁬𑁬. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁨𑁬𑁭. ‘‘𑀇𑀢𑁄 𑀤𑁆𑀯𑁂𑀦𑀯𑀼𑀢𑁂 𑀓𑀧𑁆𑀧𑁂, 𑀅𑀳𑀼 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀅𑀦𑀽𑀧𑀫𑁄 𑀅𑀲𑀤𑀺𑀲𑁄, 𑀨𑀼𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄.

𑁨𑁬𑁮. ‘‘𑀲𑁄 𑀘 𑀲𑀩𑁆𑀩𑀁 𑀢𑀫𑀁 𑀳𑀦𑁆𑀢𑁆𑀯𑀸, 𑀯𑀺𑀚𑀝𑁂𑀢𑁆𑀯𑀸 𑀫𑀳𑀸𑀚𑀝𑀁;

𑀯𑀲𑁆𑀲𑀢𑁂 𑀅𑀫𑀢𑀁 𑀯𑀼𑀝𑁆𑀞𑀺𑀁, 𑀢𑀧𑁆𑀧𑀬𑀦𑁆𑀢𑁄 𑀲𑀤𑁂𑀯𑀓𑀁.

𑁨𑁬𑁯. ‘‘𑀢𑀤𑀸 𑀳𑀺 𑀩𑀸𑀭𑀸𑀡𑀲𑀺𑀬𑀁, 𑀭𑀸𑀚𑀸 𑀧𑀘𑁆𑀘𑀸 𑀅𑀳𑀼𑀫𑁆𑀳𑀲𑁂;

𑀪𑀸𑀢𑀭𑁄𑀫𑁆𑀳 𑀢𑀬𑁄 𑀲𑀩𑁆𑀩𑁂, 𑀲𑀁𑀯𑀺𑀲𑀝𑁆𑀞𑀸𑀯 𑀭𑀸𑀚𑀺𑀦𑁄.

𑁨𑁭𑁦. ‘‘𑀯𑀻𑀭𑀗𑁆𑀕𑀭𑀽𑀧𑀸 𑀩𑀮𑀺𑀦𑁄, 𑀲𑀗𑁆𑀕𑀸𑀫𑁂 𑀅𑀧𑀭𑀸𑀚𑀺𑀢𑀸;

𑀢𑀤𑀸 𑀓𑀼𑀧𑀺𑀢𑀧𑀘𑁆𑀘𑀦𑁆𑀢𑁄 [𑀓𑀼𑀧𑁆𑀧𑀢𑀺 𑀧𑀘𑁆𑀘𑀦𑁆𑀢𑁄 (𑀓.)], 𑀅𑀫𑁆𑀳𑁂 𑀆𑀳 𑀫𑀳𑀻𑀧𑀢𑀺.

𑁨𑁭𑁧. ‘‘‘𑀏𑀣 𑀕𑀦𑁆𑀢𑁆𑀯𑀸𑀦 𑀧𑀘𑁆𑀘𑀦𑁆𑀢𑀁, 𑀲𑁄𑀥𑁂𑀢𑁆𑀯𑀸 𑀅𑀝𑁆𑀝𑀯𑀻𑀩𑀮𑀁;

𑀔𑁂𑀫𑀁 𑀯𑀺𑀚𑀺𑀭𑀺𑀢𑀁 𑀓𑀢𑁆𑀯𑀸, 𑀧𑀼𑀦 𑀤𑁂𑀣𑀸𑀢𑀺 𑀪𑀸𑀲𑀣’.

𑁨𑁭𑁨. ‘‘𑀢𑀢𑁄 𑀫𑀬𑀁 𑀅𑀯𑁄𑀘𑀼𑀫𑁆𑀳, 𑀬𑀤𑀺 𑀤𑁂𑀬𑁆𑀬𑀸𑀲𑀺 𑀦𑀸𑀬𑀓𑀁;

𑀉𑀧𑀝𑁆𑀞𑀸𑀦𑀸𑀬 𑀅𑀫𑁆𑀳𑀸𑀓𑀁, 𑀲𑀸𑀥𑀬𑀺𑀲𑁆𑀲𑀸𑀫 𑀯𑁄 𑀢𑀢𑁄.

𑁨𑁭𑁩. ‘‘𑀢𑀢𑁄 𑀫𑀬𑀁 𑀮𑀤𑁆𑀥𑀯𑀭𑀸, 𑀪𑀽𑀫𑀺𑀧𑀸𑀮𑁂𑀦 𑀧𑁂𑀲𑀺𑀢𑀸;

𑀦𑀺𑀓𑁆𑀔𑀺𑀢𑁆𑀢𑀲𑀢𑁆𑀣𑀁 𑀧𑀘𑁆𑀘𑀦𑁆𑀢𑀁, 𑀓𑀢𑁆𑀯𑀸 𑀧𑀼𑀦𑀭𑀼𑀧𑀘𑁆𑀘 𑀢𑀁.

𑁨𑁭𑁪. ‘‘𑀬𑀸𑀘𑀺𑀢𑁆𑀯𑀸 𑀲𑀢𑁆𑀣𑀼𑀧𑀝𑁆𑀞𑀸𑀦𑀁, 𑀭𑀸𑀚𑀸𑀦𑀁 𑀮𑁄𑀓𑀦𑀸𑀬𑀓𑀁;

𑀫𑀼𑀦𑀺𑀯𑀻𑀭𑀁 𑀮𑀪𑀺𑀢𑁆𑀯𑀸𑀦, 𑀬𑀸𑀯𑀚𑀻𑀯𑀁 𑀬𑀚𑀺𑀫𑁆𑀳 𑀢𑀁.

𑁨𑁭𑁫. ‘‘𑀫𑀳𑀕𑁆𑀖𑀸𑀦𑀺 𑀘 𑀯𑀢𑁆𑀣𑀸𑀦𑀺, 𑀧𑀡𑀻𑀢𑀸𑀦𑀺 𑀭𑀲𑀸𑀦𑀺 𑀘;

𑀲𑁂𑀦𑀸𑀲𑀦𑀸𑀦𑀺 𑀭𑀫𑁆𑀫𑀸𑀦𑀺, 𑀪𑁂𑀲𑀚𑁆𑀚𑀸𑀦𑀺 𑀳𑀺𑀢𑀸𑀦𑀺 𑀘.

𑁨𑁭𑁬. ‘‘𑀤𑀢𑁆𑀯𑀸 𑀲𑀲𑀗𑁆𑀖𑀫𑀼𑀦𑀺𑀦𑁄 [𑀲𑀲𑀁𑀖𑀲𑁆𑀲 𑀫𑀼𑀦𑁂 (𑀲𑀻. 𑀧𑀻.)], 𑀥𑀫𑁆𑀫𑁂𑀦𑀼𑀧𑁆𑀧𑀸𑀤𑀺𑀢𑀸𑀦𑀺 𑀦𑁄;

𑀲𑀻𑀮𑀯𑀦𑁆𑀢𑁄 𑀓𑀸𑀭𑀼𑀡𑀺𑀓𑀸, 𑀪𑀸𑀯𑀦𑀸𑀬𑀼𑀢𑁆𑀢𑀫𑀸𑀦𑀲𑀸.

𑁨𑁭𑁭. ‘‘𑀲𑀤𑁆𑀥𑀸 𑀧𑀭𑀺𑀘𑀭𑀺𑀢𑁆𑀯𑀸𑀦, 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀦𑀸𑀬𑀓𑀁;

𑀦𑀺𑀩𑁆𑀩𑀼𑀢𑁂 𑀢𑀫𑁆𑀳𑀺 𑀮𑁄𑀓𑀕𑁆𑀕𑁂, 𑀧𑀽𑀚𑀁 𑀓𑀢𑁆𑀯𑀸 𑀬𑀣𑀸𑀩𑀮𑀁.

𑁨𑁭𑁮. ‘‘𑀢𑀢𑁄 𑀘𑀼𑀢𑀸 𑀲𑀦𑁆𑀢𑀼𑀲𑀺𑀢𑀁 [𑀢𑀸𑀯𑀢𑀺𑀁𑀲𑀁 (𑀲𑁆𑀬𑀸.)], 𑀕𑀢𑀸 𑀢𑀢𑁆𑀣 𑀫𑀳𑀸𑀲𑀼𑀔𑀁;

𑀅𑀦𑀼𑀪𑀽𑀢𑀸 𑀫𑀬𑀁 𑀲𑀩𑁆𑀩𑁂, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁭𑁯. ‘‘𑀫𑀸𑀬𑀸𑀓𑀸𑀭𑁄 𑀬𑀣𑀸 𑀭𑀗𑁆𑀕𑁂 [𑀮𑀤𑁆𑀥𑁄 (𑀲𑁆𑀬𑀸. 𑀧𑀻.)], 𑀤𑀲𑁆𑀲𑁂𑀲𑀺 𑀯𑀺𑀓𑀢𑀺𑀁 𑀩𑀳𑀼𑀁;

𑀢𑀣𑀸 𑀪𑀯𑁂 𑀪𑀫𑀦𑁆𑀢𑁄𑀳𑀁 [𑀕𑀫𑁂𑀦𑁆𑀢𑁄𑀳𑀁 (𑀓.), 𑀪𑀯𑀦𑁆𑀢𑁄𑀳𑀁 (𑀲𑁆𑀬𑀸.)], 𑀯𑀺𑀤𑁂𑀳𑀸𑀥𑀺𑀧𑀢𑀻 𑀅𑀳𑀼𑀁.

𑁨𑁮𑁦. ‘‘𑀕𑀼𑀡𑀸𑀘𑁂𑀴𑀲𑁆𑀲 𑀯𑀸𑀓𑁆𑀬𑁂𑀦, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀢𑀸𑀲𑀬𑁄;

𑀦𑀭𑀓𑀁 𑀫𑀕𑁆𑀕𑀫𑀸𑀭𑀽𑀴𑁆𑀳𑁄, 𑀭𑀼𑀘𑀸𑀬 𑀫𑀫 𑀥𑀻𑀢𑀼𑀬𑀸.

𑁨𑁮𑁧. ‘‘𑀑𑀯𑀸𑀤𑀁 𑀦𑀸𑀤𑀺𑀬𑀺𑀢𑁆𑀯𑀸𑀦, 𑀩𑁆𑀭𑀳𑁆𑀫𑀼𑀦𑀸 𑀦𑀸𑀭𑀤𑁂𑀦𑀳𑀁;

𑀩𑀳𑀼𑀥𑀸 𑀲𑀁𑀲𑀺𑀢𑁄 𑀲𑀦𑁆𑀢𑁄, 𑀤𑀺𑀝𑁆𑀞𑀺𑀁 𑀳𑀺𑀢𑁆𑀯𑀸𑀦 𑀧𑀸𑀧𑀺𑀓𑀁.

𑁨𑁮𑁨. ‘‘𑀧𑀽𑀭𑀬𑀺𑀢𑁆𑀯𑀸 𑀯𑀺𑀲𑁂𑀲𑁂𑀦, 𑀤𑀲 𑀓𑀫𑁆𑀫𑀧𑀣𑀸𑀦𑀺𑀳𑀁;

𑀳𑀺𑀢𑁆𑀯𑀸𑀦 𑀤𑁂𑀳𑀫𑀕𑀫𑀺𑀁, 𑀲𑀕𑁆𑀕𑀁 𑀲𑀪𑀯𑀦𑀁 𑀬𑀣𑀸.

𑁨𑁮𑁩. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀅𑀳𑁄𑀲𑀳𑀁;

𑀩𑀸𑀭𑀸𑀡𑀲𑀺𑀬𑀁 𑀨𑀻𑀢𑀸𑀬𑀁, 𑀚𑀸𑀢𑁄 𑀯𑀺𑀧𑁆𑀧𑀫𑀳𑀸𑀓𑀼𑀮𑁂.

𑁨𑁮𑁪. ‘‘𑀫𑀘𑁆𑀘𑀼𑀩𑁆𑀬𑀸𑀥𑀺𑀚𑀭𑀸 𑀪𑀻𑀢𑁄, 𑀑𑀕𑀸𑀳𑁂𑀢𑁆𑀯𑀸 𑀫𑀳𑀸𑀯𑀦𑀁 [𑀚𑀳𑀺𑀢𑁆𑀯𑀸𑀦 𑀫𑀳𑀸𑀥𑀦𑀁 (𑀲𑀻.), 𑀚𑀳𑀺𑀢𑁆𑀯𑀸 𑀘 𑀫𑀳𑀸𑀥𑀦𑀁 (𑀧𑀻.)];

𑀦𑀺𑀩𑁆𑀩𑀸𑀦𑀁 𑀧𑀤𑀫𑁂𑀲𑀦𑁆𑀢𑁄, 𑀚𑀝𑀺𑀮𑁂𑀲𑀼 𑀧𑀭𑀺𑀩𑁆𑀩𑀚𑀺𑀁.

𑁨𑁮𑁫. ‘‘𑀢𑀤𑀸 𑀤𑁆𑀯𑁂 𑀪𑀸𑀢𑀭𑁄 𑀫𑀬𑁆𑀳𑀁, 𑀧𑀩𑁆𑀩𑀚𑀺𑀁𑀲𑀼 𑀫𑀬𑀸 𑀲𑀳;

𑀉𑀭𑀼𑀯𑁂𑀴𑀸𑀬𑀁 𑀫𑀸𑀧𑁂𑀢𑁆𑀯𑀸, 𑀅𑀲𑁆𑀲𑀫𑀁 𑀦𑀺𑀯𑀲𑀺𑀁 𑀅𑀳𑀁.

𑁨𑁮𑁬. ‘‘𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀭𑀼𑀯𑁂𑀴𑀦𑀺𑀯𑀸𑀲𑀺𑀓𑁄 [𑀉𑀭𑀼𑀯𑁂𑀴𑀸𑀬 𑀦𑀺𑀯𑀲𑀺𑀁 (𑀲𑁆𑀬𑀸.)];

𑀢𑀢𑁄 𑀫𑁂 𑀆𑀲𑀺 𑀧𑀜𑁆𑀜𑀢𑁆𑀢𑀺, 𑀉𑀭𑀼𑀯𑁂𑀴𑀓𑀲𑁆𑀲𑀧𑁄 𑀇𑀢𑀺.

𑁨𑁮𑁭. ‘‘𑀦𑀤𑀻𑀲𑀓𑀸𑀲𑁂 𑀪𑀸𑀢𑀸 𑀫𑁂, 𑀦𑀤𑀻𑀓𑀲𑁆𑀲𑀧𑀲𑀯𑁆𑀳𑀬𑁄;

𑀆𑀲𑀻 𑀲𑀓𑀸𑀲𑀦𑀸𑀫𑁂𑀦, 𑀕𑀬𑀸𑀬𑀁 𑀕𑀬𑀸𑀓𑀲𑁆𑀲𑀧𑁄.

𑁨𑁮𑁮. ‘‘𑀤𑁆𑀯𑁂 𑀲𑀢𑀸𑀦𑀺 𑀓𑀦𑀺𑀝𑁆𑀞𑀲𑁆𑀲, 𑀢𑀻𑀡𑀺 𑀫𑀚𑁆𑀛𑀲𑁆𑀲 𑀪𑀸𑀢𑀼𑀦𑁄;

𑀫𑀫 𑀧𑀜𑁆𑀘 𑀲𑀢𑀸𑀦𑀽𑀦𑀸, 𑀲𑀺𑀲𑁆𑀲𑀸 𑀲𑀩𑁆𑀩𑁂 𑀫𑀫𑀸𑀦𑀼𑀕𑀸.

𑁨𑁮𑁯. ‘‘𑀢𑀤𑀸 𑀉𑀧𑁂𑀘𑁆𑀘 𑀫𑀁 𑀩𑀼𑀤𑁆𑀥𑁄, 𑀓𑀢𑁆𑀯𑀸𑀦 𑀯𑀺𑀯𑀺𑀥𑀸𑀦𑀺 𑀫𑁂 [𑀓𑀢𑁆𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀫𑁂 (𑀲𑀻.)];

𑀧𑀸𑀝𑀺𑀳𑀻𑀭𑀸𑀦𑀺 𑀮𑁄𑀓𑀕𑁆𑀕𑁄, 𑀯𑀺𑀦𑁂𑀲𑀺 𑀦𑀭𑀲𑀸𑀭𑀣𑀺.

𑁨𑁯𑁦. ‘‘𑀲𑀳𑀲𑁆𑀲𑀧𑀭𑀺𑀯𑀸𑀭𑁂𑀦, 𑀅𑀳𑁄𑀲𑀺𑀁 𑀏𑀳𑀺𑀪𑀺𑀓𑁆𑀔𑀼𑀓𑁄;

𑀢𑁂𑀳𑁂𑀯 𑀲𑀳 𑀲𑀩𑁆𑀩𑁂𑀳𑀺, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁨𑁯𑁧. ‘‘𑀢𑁂 𑀘𑁂𑀯𑀜𑁆𑀜𑁂 𑀘 𑀩𑀳𑀯𑁄, 𑀲𑀺𑀲𑁆𑀲𑀸 𑀫𑀁 𑀧𑀭𑀺𑀯𑀸𑀭𑀬𑀼𑀁;

𑀲𑀸𑀲𑀺𑀢𑀼𑀜𑁆𑀘 𑀲𑀫𑀢𑁆𑀣𑁄𑀳𑀁, 𑀢𑀢𑁄 𑀫𑀁 𑀇𑀲𑀺𑀲𑀢𑁆𑀢𑀫𑁄.

𑁨𑁯𑁨. ‘‘𑀫𑀳𑀸𑀧𑀭𑀺𑀲𑀪𑀸𑀯𑀲𑁆𑀫𑀺𑀁, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁;

𑀅𑀳𑁄 𑀩𑀼𑀤𑁆𑀥𑁂 𑀓𑀢𑀁 𑀓𑀸𑀭𑀁, 𑀲𑀨𑀮𑀁 𑀫𑁂 𑀅𑀚𑀸𑀬𑀣.

𑁨𑁯𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁯𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁯𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀭𑀼𑀯𑁂𑀴𑀓𑀲𑁆𑀲𑀧𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀭𑀼𑀯𑁂𑀴𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.