𑁫. 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁫𑁦. ‘‘𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄;

𑀲𑀩𑁆𑀩𑀮𑁄𑀓𑀳𑀺𑀢𑁄 𑀯𑀻𑀭𑁄, 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀓𑁄.

𑁧𑁫𑁧. ‘‘𑀢𑀤𑀸𑀳𑀁 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸, 𑀯𑀺𑀲𑁆𑀲𑀼𑀢𑁄 𑀯𑁂𑀤𑀧𑀸𑀭𑀕𑀽;

𑀤𑀺𑀯𑀸𑀯𑀺𑀳𑀸𑀭𑀁 𑀯𑀺𑀘𑀭𑀁, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁧𑁫𑁨. ‘‘𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑀁, 𑀩𑁄𑀥𑀬𑀦𑁆𑀢𑀁 𑀲𑀤𑁂𑀯𑀓𑀁;

𑀯𑀺𑀘𑀺𑀢𑁆𑀢𑀓𑀣𑀺𑀓𑀸𑀦𑀕𑁆𑀕𑀁, 𑀯𑀡𑁆𑀡𑀬𑀦𑁆𑀢𑀁 𑀫𑀳𑀸𑀚𑀦𑁂.

𑁧𑁫𑁩. ‘‘𑀢𑀤𑀸 𑀫𑀼𑀤𑀺𑀢𑀘𑀺𑀢𑁆𑀢𑁄𑀳𑀁, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀦𑀸𑀦𑀸𑀭𑀢𑁆𑀢𑁂𑀳𑀺 𑀯𑀢𑁆𑀣𑁂𑀳𑀺, 𑀅𑀮𑀗𑁆𑀓𑀭𑀺𑀢𑁆𑀯𑀸𑀦 𑀫𑀡𑁆𑀟𑀧𑀁.

𑁧𑁫𑁪. ‘‘𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑀁, 𑀲𑀲𑀗𑁆𑀖𑀁 𑀪𑁄𑀚𑀬𑀺𑀁 𑀢𑀳𑀺𑀁;

𑀪𑁄𑀚𑀬𑀺𑀢𑁆𑀯𑀸𑀦 𑀲𑀢𑁆𑀢𑀸𑀳𑀁, 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁.

𑁧𑁫𑁫. ‘‘𑀦𑀸𑀦𑀸𑀘𑀺𑀢𑁆𑀢𑁂𑀳𑀺 [𑀦𑀸𑀦𑀸𑀯𑀡𑁆𑀡𑁂𑀳𑀺 (𑀲𑀻.)] 𑀧𑀼𑀧𑁆𑀨𑁂𑀳𑀺, 𑀧𑀽𑀚𑀬𑀺𑀢𑁆𑀯𑀸 𑀲𑀲𑀸𑀯𑀓𑀁 [𑀫𑀳𑀸𑀯𑀻𑀭𑀁 (𑀓.)];

𑀦𑀺𑀧𑀘𑁆𑀘 𑀧𑀸𑀤𑀫𑀽𑀮𑀫𑁆𑀳𑀺, 𑀢𑀁 𑀞𑀸𑀦𑀁 𑀧𑀢𑁆𑀣𑀬𑀺𑀁 𑀅𑀳𑀁.

𑁧𑁫𑁬. ‘‘𑀢𑀤𑀸 𑀫𑀼𑀦𑀺𑀯𑀭𑁄 𑀆𑀳, 𑀓𑀭𑀼𑀡𑁂𑀓𑀭𑀲𑀸𑀲𑀬𑁄 [𑀓𑀭𑀼𑀡𑁄 𑀓𑀭𑀼𑀡𑀸𑀮𑀬𑁄 (𑀲𑁆𑀬𑀸.)];

‘𑀧𑀲𑁆𑀲𑀣𑁂𑀢𑀁 𑀤𑀺𑀚𑀯𑀭𑀁, 𑀧𑀤𑀼𑀫𑀸𑀦𑀦𑀮𑁄𑀘𑀦𑀁.

𑁧𑁫𑁭. ‘‘‘𑀧𑀻𑀢𑀺𑀧𑀸𑀫𑁄𑀚𑁆𑀚𑀩𑀳𑀼𑀮𑀁, 𑀲𑀫𑀼𑀕𑁆𑀕𑀢𑀢𑀦𑀽𑀭𑀼𑀳𑀁;

𑀳𑀸𑀲𑀫𑁆𑀳𑀺𑀢𑀯𑀺𑀲𑀸𑀮𑀓𑁆𑀔𑀁, 𑀫𑀫 𑀲𑀸𑀲𑀦𑀮𑀸𑀮𑀲𑀁.

𑁧𑁫𑁮. ‘‘‘𑀧𑀢𑀺𑀢𑀁 𑀧𑀸𑀤𑀫𑀽𑀮𑁂 𑀫𑁂, 𑀏𑀓𑀸𑀯𑀢𑁆𑀣𑀲𑀼𑀫𑀸𑀦𑀲𑀁 [𑀏𑀓𑀯𑀢𑁆𑀣𑀁 𑀲𑀼𑀫𑀸𑀦𑀲𑀁 (𑀲𑁆𑀬𑀸. 𑀓.)];

𑀏𑀲 𑀧𑀢𑁆𑀣𑁂𑀢𑀺 𑀢𑀁 𑀞𑀸𑀦𑀁, 𑀯𑀺𑀘𑀺𑀢𑁆𑀢𑀓𑀣𑀺𑀓𑀢𑁆𑀢𑀦𑀁 [𑀯𑀺𑀘𑀺𑀢𑁆𑀢𑀓𑀣𑀺𑀓𑀢𑁆𑀢𑀤𑀁 (𑀲𑀻. 𑀧𑀻.)].

𑁧𑁫𑁯. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁬𑁦. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀼𑀫𑀸𑀭𑀓𑀲𑁆𑀲𑀧𑁄 𑀦𑀸𑀫, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁧𑁬𑁧. ‘‘‘𑀯𑀺𑀘𑀺𑀢𑁆𑀢𑀧𑀼𑀧𑁆𑀨𑀤𑀼𑀲𑁆𑀲𑀸𑀦𑀁, 𑀭𑀢𑀦𑀸𑀦𑀜𑁆𑀘 𑀯𑀸𑀳𑀲𑀸;

𑀯𑀺𑀘𑀺𑀢𑁆𑀢𑀓𑀣𑀺𑀓𑀸𑀦𑀁 𑀲𑁄, 𑀅𑀕𑁆𑀕𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺’.

𑁧𑁬𑁨. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁬𑁩. ‘‘𑀧𑀭𑀺𑀩𑁆𑀪𑀫𑀁 𑀪𑀯𑀸𑀪𑀯𑁂 [𑀪𑀯𑀸𑀓𑀸𑀲𑁂 (𑀲𑀻. 𑀧𑀻.)], 𑀭𑀗𑁆𑀕𑀫𑀚𑁆𑀛𑁂 𑀬𑀣𑀸 𑀦𑀝𑁄;

𑀲𑀸𑀔𑀫𑀺𑀕𑀢𑁆𑀭𑀚𑁄 𑀳𑀼𑀢𑁆𑀯𑀸, 𑀫𑀺𑀕𑀺𑀬𑀸 𑀓𑀼𑀘𑁆𑀙𑀺𑀫𑁄𑀓𑁆𑀓𑀫𑀺𑀁.

𑁧𑁬𑁪. ‘‘𑀢𑀤𑀸 𑀫𑀬𑀺 𑀓𑀼𑀘𑁆𑀙𑀺𑀕𑀢𑁂, 𑀯𑀚𑁆𑀛𑀯𑀸𑀭𑁄 𑀉𑀧𑀝𑁆𑀞𑀺𑀢𑁄;

𑀲𑀸𑀔𑁂𑀦 𑀘𑀢𑁆𑀢𑀸 𑀫𑁂 𑀫𑀸𑀢𑀸, 𑀦𑀺𑀕𑁆𑀭𑁄𑀥𑀁 𑀲𑀭𑀡𑀁 𑀕𑀢𑀸.

𑁧𑁬𑁫. ‘‘𑀢𑁂𑀦 𑀲𑀸 𑀫𑀺𑀕𑀭𑀸𑀚𑁂𑀦, 𑀫𑀭𑀡𑀸 𑀧𑀭𑀺𑀫𑁄𑀘𑀺𑀢𑀸;

𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀧𑀸𑀡𑀁 [𑀲𑀁𑀧𑀸𑀡𑀁 (𑀲𑀻. 𑀧𑀻.)], 𑀫𑀫𑁂𑀯𑀁 𑀑𑀯𑀤𑀻 𑀢𑀤𑀸.

𑁧𑁬𑁬. ‘‘‘𑀦𑀺𑀕𑁆𑀭𑁄𑀥𑀫𑁂𑀯 𑀲𑁂𑀯𑁂𑀬𑁆𑀬, 𑀦 𑀲𑀸𑀔𑀫𑀼𑀧𑀲𑀁𑀯𑀲𑁂;

𑀦𑀺𑀕𑁆𑀭𑁄𑀥𑀲𑁆𑀫𑀺𑀁 𑀫𑀢𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀲𑀸𑀔𑀫𑁆𑀳𑀺 𑀚𑀻𑀯𑀺𑀢𑀁’.

𑁧𑁬𑁭. ‘‘𑀢𑁂𑀦𑀸𑀦𑀼𑀲𑀺𑀝𑁆𑀞𑀸 𑀫𑀺𑀕𑀬𑀽𑀣𑀧𑁂𑀦, 𑀅𑀳𑀜𑁆𑀘 𑀫𑀸𑀢𑀸 𑀘 𑀢𑀣𑁂𑀢𑀭𑁂 𑀘 [𑀘𑀺𑀢𑀭𑁂 𑀘 (𑀲𑁆𑀬𑀸.), 𑀢𑀲𑁆𑀲𑁄𑀯𑀸𑀤𑁂𑀦 (𑀧𑀻.), 𑀘𑀺𑀢𑀭𑁂 𑀘 𑀢𑀲𑁆𑀲𑁄𑀯𑀸𑀤𑀁 (𑀓.)];

𑀆𑀕𑀫𑁆𑀫 𑀭𑀫𑁆𑀫𑀁 𑀢𑀼𑀲𑀺𑀢𑀸𑀥𑀺𑀯𑀸𑀲𑀁, 𑀕𑀢𑀸 𑀧𑀯𑀸𑀲𑀁 𑀲𑀖𑀭𑀁 𑀬𑀣𑁂𑀯.

𑁧𑁬𑁮. ‘‘𑀧𑀼𑀦𑁄 𑀓𑀲𑁆𑀲𑀧𑀯𑀻𑀭𑀲𑁆𑀲, 𑀅𑀢𑁆𑀣𑀫𑁂𑀦𑁆𑀢𑀫𑁆𑀳𑀺 𑀲𑀸𑀲𑀦𑁂;

𑀆𑀭𑀼𑀬𑁆𑀳 𑀲𑁂𑀮𑀲𑀺𑀔𑀭𑀁, 𑀬𑀼𑀜𑁆𑀚𑀺𑀢𑁆𑀯𑀸 𑀚𑀺𑀦𑀲𑀸𑀲𑀦𑀁.

𑁧𑁬𑁯. ‘‘𑀇𑀤𑀸𑀦𑀸𑀳𑀁 𑀭𑀸𑀚𑀕𑀳𑁂, 𑀚𑀸𑀢𑁄 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀼𑀁;

𑀆𑀧𑀦𑁆𑀦𑀲𑀢𑁆𑀢𑀸 𑀫𑁂 𑀫𑀸𑀢𑀸, 𑀧𑀩𑁆𑀩𑀚𑀺 𑀅𑀦𑀕𑀸𑀭𑀺𑀬𑀁.

𑁧𑁭𑁦. ‘‘𑀲𑀕𑀩𑁆𑀪𑀁 𑀢𑀁 𑀯𑀺𑀤𑀺𑀢𑁆𑀯𑀸𑀦, 𑀤𑁂𑀯𑀤𑀢𑁆𑀢𑀫𑀼𑀧𑀸𑀦𑀬𑀼𑀁;

𑀲𑁄 𑀅𑀯𑁄𑀘 ‘𑀯𑀺𑀦𑀸𑀲𑁂𑀣, 𑀧𑀸𑀧𑀺𑀓𑀁 𑀪𑀺𑀓𑁆𑀔𑀼𑀦𑀺𑀁 𑀇𑀫𑀁’.

𑁧𑁭𑁧. ‘‘𑀇𑀤𑀸𑀦𑀺𑀧𑀺 𑀫𑀼𑀦𑀺𑀦𑁆𑀤𑁂𑀦, 𑀚𑀺𑀦𑁂𑀦 𑀅𑀦𑀼𑀓𑀫𑁆𑀧𑀺𑀢𑀸;

𑀲𑀼𑀔𑀺𑀦𑀻 𑀅𑀚𑀦𑀻 𑀫𑀬𑁆𑀳𑀁, 𑀫𑀸𑀢𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂.

𑁧𑁭𑁨. ‘‘𑀢𑀁 𑀯𑀺𑀤𑀺𑀢𑁆𑀯𑀸 𑀫𑀳𑀻𑀧𑀸𑀮𑁄, 𑀓𑁄𑀲𑀮𑁄 𑀫𑀁 𑀅𑀧𑁄𑀲𑀬𑀺;

𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦, 𑀦𑀸𑀫𑁂𑀦𑀸𑀳𑀜𑁆𑀘 𑀓𑀲𑁆𑀲𑀧𑁄.

𑁧𑁭𑁩. ‘‘𑀫𑀳𑀸𑀓𑀲𑁆𑀲𑀧𑀫𑀸𑀕𑀫𑁆𑀫, 𑀅𑀳𑀁 𑀓𑀼𑀫𑀸𑀭𑀓𑀲𑁆𑀲𑀧𑁄;

𑀯𑀫𑁆𑀫𑀺𑀓𑀲𑀤𑀺𑀲𑀁 𑀓𑀸𑀬𑀁, 𑀲𑀼𑀢𑁆𑀯𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁.

𑁧𑁭𑁪. ‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀅𑀦𑀼𑀧𑀸𑀤𑀸𑀬 𑀲𑀩𑁆𑀩𑀲𑁄;

𑀧𑀸𑀬𑀸𑀲𑀺𑀁 𑀤𑀫𑀬𑀺𑀢𑁆𑀯𑀸𑀳𑀁, 𑀏𑀢𑀤𑀕𑁆𑀕𑀫𑀧𑀸𑀧𑀼𑀡𑀺𑀁.

𑁧𑁭𑁫. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁭𑁬. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁭𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑀘𑀢𑀼𑀯𑀻𑀲𑀢𑀺𑀫𑀁 𑀪𑀸𑀡𑀯𑀸𑀭𑀁.