𑁬. 𑀩𑀸𑀳𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁭𑁮. ‘‘𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄;

𑀫𑀳𑀧𑁆𑀧𑀪𑁄 𑀢𑀺𑀮𑁄𑀓𑀕𑁆𑀕𑁄, 𑀦𑀸𑀫𑁂𑀦 𑀧𑀤𑀼𑀫𑀼𑀢𑁆𑀢𑀭𑁄.

𑁧𑁭𑁯. ‘‘𑀔𑀺𑀧𑁆𑀧𑀸𑀪𑀺𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀕𑀼𑀡𑀁 𑀓𑀺𑀢𑁆𑀢𑀬𑀢𑁄 𑀫𑀼𑀦𑁂;

𑀲𑀼𑀢𑁆𑀯𑀸 𑀉𑀤𑀕𑁆𑀕𑀘𑀺𑀢𑁆𑀢𑁄𑀳𑀁, 𑀓𑀸𑀭𑀁 𑀓𑀢𑁆𑀯𑀸 𑀫𑀳𑁂𑀲𑀺𑀦𑁄.

𑁧𑁮𑁦. ‘‘𑀤𑀢𑁆𑀯𑀸 𑀲𑀢𑁆𑀢𑀸𑀳𑀺𑀓𑀁 𑀤𑀸𑀦𑀁, 𑀲𑀲𑀺𑀲𑁆𑀲𑀲𑁆𑀲 𑀫𑀼𑀦𑁂 𑀅𑀳𑀁;

𑀅𑀪𑀺𑀯𑀸𑀤𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀢𑀁 𑀞𑀸𑀦𑀁 𑀧𑀢𑁆𑀣𑀬𑀺𑀁 𑀢𑀤𑀸.

𑁧𑁮𑁧. ‘‘𑀢𑀢𑁄 𑀫𑀁 𑀩𑁆𑀬𑀸𑀓𑀭𑀺 𑀩𑀼𑀤𑁆𑀥𑁄, ‘𑀏𑀢𑀁 𑀧𑀲𑁆𑀲𑀣 𑀩𑁆𑀭𑀸𑀳𑁆𑀫𑀡𑀁;

𑀧𑀢𑀺𑀢𑀁 𑀧𑀸𑀤𑀫𑀽𑀮𑁂 𑀫𑁂, 𑀘𑀭𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 [𑀧𑀲𑀦𑁆𑀦𑀦𑀬𑀦𑀸𑀦𑀦𑀁 (𑀲𑀻.), 𑀧𑀻𑀦𑀲𑀫𑁆𑀧𑀦𑁆𑀦𑀯𑁂𑀓𑁆𑀔𑀡𑀁 (𑀲𑁆𑀬𑀸.), 𑀧𑀻𑀡𑀁𑀲𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 (𑀧𑀻.)].

𑁧𑁮𑁨. ‘‘‘𑀳𑁂𑀫𑀬𑀜𑁆𑀜𑁄𑀧𑀘𑀺𑀢𑀗𑁆𑀕𑀁, 𑀅𑀯𑀤𑀸𑀢𑀢𑀦𑀼𑀢𑁆𑀢𑀘𑀁;

𑀧𑀮𑀫𑁆𑀩𑀩𑀺𑀫𑁆𑀩𑀢𑀫𑁆𑀩𑁄𑀝𑁆𑀞𑀁, 𑀲𑁂𑀢𑀢𑀺𑀡𑁆𑀳𑀲𑀫𑀁 𑀤𑀺𑀚𑀁.

𑁧𑁮𑁩. ‘‘‘𑀕𑀼𑀡𑀣𑀸𑀫𑀩𑀳𑀼𑀢𑀭𑀁, 𑀲𑀫𑀼𑀕𑁆𑀕𑀢𑀢𑀦𑀽𑀭𑀼𑀳𑀁;

𑀕𑀼𑀡𑁄𑀖𑀸𑀬𑀢𑀦𑀻𑀪𑀽𑀢𑀁, 𑀧𑀻𑀢𑀺𑀲𑀫𑁆𑀨𑀼𑀮𑁆𑀮𑀺𑀢𑀸𑀦𑀦𑀁.

𑁧𑁮𑁪. ‘‘‘𑀏𑀲𑁄 𑀧𑀢𑁆𑀣𑀬𑀢𑁂 𑀞𑀸𑀦𑀁, 𑀔𑀺𑀧𑁆𑀧𑀸𑀪𑀺𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀦𑀸𑀕𑀢𑁂 𑀫𑀳𑀸𑀯𑀻𑀭𑁄, 𑀕𑁄𑀢𑀫𑁄 𑀦𑀸𑀫 𑀳𑁂𑀲𑁆𑀲𑀢𑀺.

𑁧𑁮𑁫. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀩𑀸𑀳𑀺𑀬𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁧𑁮𑁬. ‘‘𑀢𑀤𑀸 𑀳𑀺 𑀢𑀼𑀝𑁆𑀞𑁄 𑀯𑀼𑀝𑁆𑀞𑀸𑀬, 𑀬𑀸𑀯𑀚𑀻𑀯𑀁 𑀫𑀳𑀸𑀫𑀼𑀦𑁂;

𑀓𑀸𑀭𑀁 𑀓𑀢𑁆𑀯𑀸 𑀘𑀼𑀢𑁄 𑀲𑀕𑁆𑀕𑀁, 𑀅𑀕𑀁 𑀲𑀪𑀯𑀦𑀁 𑀬𑀣𑀸.

𑁧𑁮𑁭. ‘‘𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀲𑀼𑀔𑀺𑀢𑁄 𑀢𑀲𑁆𑀲 𑀓𑀫𑁆𑀫𑀼𑀦𑁄;

𑀯𑀸𑀳𑀲𑀸 𑀲𑀁𑀲𑀭𑀺𑀢𑁆𑀯𑀸𑀦, 𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑁄𑀫𑀳𑀁.

𑁧𑁮𑁮. ‘‘𑀧𑀼𑀦 𑀓𑀲𑁆𑀲𑀧𑀯𑀻𑀭𑀲𑁆𑀲, 𑀅𑀢𑁆𑀣𑀫𑁂𑀦𑁆𑀢𑀫𑁆𑀳𑀺 [𑀅𑀢𑁆𑀣𑀗𑁆𑀕𑀢𑀫𑁆𑀳𑀺 (𑀲𑁆𑀬𑀸.)] 𑀲𑀸𑀲𑀦𑁂;

𑀆𑀭𑀼𑀬𑁆𑀳 𑀲𑁂𑀮𑀲𑀺𑀔𑀭𑀁, 𑀬𑀼𑀜𑁆𑀚𑀺𑀢𑁆𑀯𑀸 𑀚𑀺𑀦𑀲𑀸𑀲𑀦𑀁.

𑁧𑁮𑁯. ‘‘𑀯𑀺𑀲𑀼𑀤𑁆𑀥𑀲𑀻𑀮𑁄 𑀲𑀧𑁆𑀧𑀜𑁆𑀜𑁄, 𑀚𑀺𑀦𑀲𑀸𑀲𑀦𑀓𑀸𑀭𑀓𑁄;

𑀢𑀢𑁄 𑀘𑀼𑀢𑀸 𑀧𑀜𑁆𑀘 𑀚𑀦𑀸, 𑀤𑁂𑀯𑀮𑁄𑀓𑀁 𑀅𑀕𑀫𑁆𑀳𑀲𑁂.

𑁧𑁯𑁦. ‘‘𑀢𑀢𑁄𑀳𑀁 𑀩𑀸𑀳𑀺𑀬𑁄 𑀚𑀸𑀢𑁄, 𑀪𑀸𑀭𑀼𑀓𑀘𑁆𑀙𑁂 𑀧𑀼𑀭𑀼𑀢𑁆𑀢𑀫𑁂;

𑀢𑀢𑁄 𑀦𑀸𑀯𑀸𑀬 𑀧𑀓𑁆𑀔𑀦𑁆𑀤𑁄 [𑀧𑀓𑁆𑀔𑀦𑁆𑀢𑁄 (𑀲𑀻.), 𑀧𑀓𑁆𑀓𑀦𑁆𑀢𑁄 (𑀧𑀻.)], 𑀲𑀸𑀕𑀭𑀁 𑀅𑀧𑁆𑀧𑀲𑀺𑀤𑁆𑀥𑀺𑀬𑀁 [𑀅𑀢𑁆𑀣𑀲𑀺𑀤𑁆𑀥𑀺𑀬𑀁 (𑀓.)].

𑁧𑁯𑁧. ‘‘𑀢𑀢𑁄 𑀦𑀸𑀯𑀸 𑀅𑀪𑀺𑀚𑁆𑀚𑀺𑀢𑁆𑀣, 𑀕𑀦𑁆𑀢𑁆𑀯𑀸𑀦 𑀓𑀢𑀺𑀧𑀸𑀳𑀓𑀁;

𑀢𑀤𑀸 𑀪𑀻𑀲𑀦𑀓𑁂 𑀖𑁄𑀭𑁂, 𑀧𑀢𑀺𑀢𑁄 𑀫𑀓𑀭𑀸𑀓𑀭𑁂.

𑁧𑁯𑁨. ‘‘𑀢𑀤𑀸𑀳𑀁 𑀯𑀸𑀬𑀫𑀺𑀢𑁆𑀯𑀸𑀦, 𑀲𑀦𑁆𑀢𑀭𑀺𑀢𑁆𑀯𑀸 𑀫𑀳𑁄𑀤𑀥𑀺𑀁;

𑀲𑀼𑀧𑁆𑀧𑀸𑀤𑀧𑀝𑁆𑀝𑀦𑀯𑀭𑀁 [𑀲𑀼𑀧𑁆𑀧𑀸𑀭𑀧𑀝𑁆𑀝𑀦𑀯𑀭𑀁 (𑀲𑀻. 𑀧𑀻.)], 𑀲𑀫𑁆𑀧𑀢𑁆𑀢𑁄 𑀫𑀦𑁆𑀤𑀯𑁂𑀥𑀺𑀢𑁄 [𑀫𑀦𑁆𑀤𑀫𑁂𑀥𑀺𑀓𑁄 (𑀲𑀻.), 𑀫𑀦𑁆𑀤𑀯𑁂𑀤𑀺𑀢𑁄 (𑀲𑁆𑀬𑀸.), 𑀫𑀤𑁆𑀤𑀯𑁂𑀭𑀢𑀁 (𑀓.)].

𑁧𑁯𑁩. ‘‘𑀤𑀸𑀭𑀼𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁;

𑀢𑀤𑀸𑀳 𑀲𑁄 𑀚𑀦𑁄 𑀢𑀼𑀝𑁆𑀞𑁄, 𑀅𑀭𑀳𑀸𑀬𑀫𑀺𑀥𑀸𑀕𑀢𑁄.

𑁧𑁯𑁪. ‘‘𑀇𑀫𑀁 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀯𑀢𑁆𑀣𑁂𑀦 𑀲𑀬𑀦𑁂𑀦 𑀘;

𑀪𑁂𑀲𑀚𑁆𑀚𑁂𑀦 𑀘 𑀲𑀓𑁆𑀓𑀢𑁆𑀯𑀸, 𑀳𑁂𑀲𑁆𑀲𑀸𑀫 𑀲𑀼𑀔𑀺𑀢𑀸 𑀫𑀬𑀁.

𑁧𑁯𑁫. ‘‘𑀧𑀘𑁆𑀘𑀬𑀸𑀦𑀁 𑀢𑀤𑀸 𑀮𑀸𑀪𑀻, 𑀢𑁂𑀳𑀺 𑀲𑀓𑁆𑀓𑀢𑀧𑀽𑀚𑀺𑀢𑁄;

𑀅𑀭𑀳𑀸𑀳𑀦𑁆𑀢𑀺 𑀲𑀗𑁆𑀓𑀧𑁆𑀧𑀁, 𑀉𑀧𑁆𑀧𑀸𑀤𑁂𑀲𑀺𑀁 𑀅𑀬𑁄𑀦𑀺𑀲𑁄.

𑁧𑁯𑁬. ‘‘𑀢𑀢𑁄 𑀫𑁂 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀘𑁄𑀤𑀬𑀻 𑀧𑀼𑀩𑁆𑀩𑀤𑁂𑀯𑀢𑀸;

‘𑀦 𑀢𑁆𑀯𑀁 𑀉𑀧𑀸𑀬𑀫𑀕𑁆𑀕𑀜𑁆𑀜𑀽, 𑀓𑀼𑀢𑁄 𑀢𑁆𑀯𑀁 𑀅𑀭𑀳𑀸 𑀪𑀯𑁂’.

𑁧𑁯𑁭. ‘‘𑀘𑁄𑀤𑀺𑀢𑁄 𑀢𑀸𑀬 𑀲𑀁𑀯𑀺𑀕𑁆𑀕𑁄, 𑀢𑀤𑀸𑀳𑀁 𑀧𑀭𑀺𑀧𑀼𑀘𑁆𑀙𑀺 𑀢𑀁;

‘𑀓𑁂 𑀯𑀸 𑀏𑀢𑁂 𑀓𑀼𑀳𑀺𑀁 𑀮𑁄𑀓𑁂, 𑀅𑀭𑀳𑀦𑁆𑀢𑁄 𑀦𑀭𑀼𑀢𑁆𑀢𑀫𑀸.

𑁧𑁯𑁮. ‘‘‘𑀲𑀸𑀯𑀢𑁆𑀣𑀺𑀬𑀁 𑀓𑁄𑀲𑀮𑀫𑀦𑁆𑀤𑀺𑀭𑁂 𑀚𑀺𑀦𑁄, 𑀧𑀳𑀽𑀢𑀧𑀜𑁆𑀜𑁄 𑀯𑀭𑀪𑀽𑀭𑀺𑀫𑁂𑀥𑀲𑁄;

𑀲𑁄 𑀲𑀓𑁆𑀬𑀧𑀼𑀢𑁆𑀢𑁄 𑀅𑀭𑀳𑀸 𑀅𑀦𑀸𑀲𑀯𑁄, 𑀤𑁂𑀲𑁂𑀢𑀺 𑀥𑀫𑁆𑀫𑀁 𑀅𑀭𑀳𑀢𑁆𑀢𑀧𑀢𑁆𑀢𑀺𑀬𑀸.

𑁧𑁯𑁯. ‘‘‘𑀢𑀤𑀲𑁆𑀲 𑀲𑀼𑀢𑁆𑀯𑀸 𑀯𑀘𑀦𑀁 𑀲𑀼𑀧𑀻𑀡𑀺𑀢𑁄 [𑀧𑀻𑀡𑀺𑀢𑁆𑀯𑀸 (𑀓.)], 𑀦𑀺𑀥𑀺𑀁𑀯 𑀮𑀤𑁆𑀥𑀸 𑀓𑀧𑀡𑁄𑀢𑀺 𑀯𑀺𑀫𑁆𑀳𑀺𑀢𑁄;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀅𑀭𑀳𑀢𑁆𑀢𑀫𑀼𑀢𑁆𑀢𑀫𑀁, 𑀲𑀼𑀤𑀲𑁆𑀲𑀦𑀁 𑀤𑀝𑁆𑀞𑀼𑀫𑀦𑀦𑁆𑀢𑀕𑁄𑀘𑀭𑀁.

𑁨𑁦𑁦. ‘‘‘𑀢𑀤𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀲𑀢𑁆𑀣𑀼𑀦𑁄 [𑀦𑀺𑀓𑁆𑀔𑀫𑀺𑀢𑀼𑀦 𑀲𑀢𑁆𑀣𑀼𑀯𑀭𑀁 (𑀲𑀻.)], 𑀲𑀤𑀸 𑀚𑀺𑀦𑀁 𑀧𑀲𑁆𑀲𑀸𑀫𑀺 𑀯𑀺𑀫𑀮𑀸𑀦𑀦𑀁 [𑀧𑀭𑀸𑀚𑀺𑀦𑀁 𑀧𑀲𑁆𑀲𑀸𑀫𑀺 𑀓𑀫𑀮𑀸𑀦𑀦𑀁 (𑀓.)];

𑀉𑀧𑁂𑀘𑁆𑀘 𑀭𑀫𑁆𑀫𑀁 𑀯𑀺𑀚𑀺𑀢𑀯𑁆𑀳𑀬𑀁 𑀯𑀦𑀁, 𑀤𑀺𑀚𑁂 𑀅𑀧𑀼𑀘𑁆𑀙𑀺𑀁 𑀓𑀼𑀳𑀺𑀁 𑀮𑁄𑀓𑀦𑀦𑁆𑀤𑀦𑁄.

𑁨𑁦𑁧. ‘‘‘𑀢𑀢𑁄 𑀅𑀯𑁄𑀘𑀼𑀁 𑀦𑀭𑀤𑁂𑀯𑀯𑀦𑁆𑀤𑀺𑀢𑁄, 𑀧𑀼𑀭𑀁 𑀧𑀯𑀺𑀝𑁆𑀞𑁄 𑀅𑀲𑀦𑁂𑀲𑀦𑀸𑀬 𑀲𑁄;

𑀲𑀲𑁄𑀯 [𑀧𑀘𑁆𑀘𑁂𑀳𑀺 (𑀲𑀻. 𑀲𑁆𑀬𑀸.)] 𑀔𑀺𑀧𑁆𑀧𑀁 𑀫𑀼𑀦𑀺𑀤𑀲𑁆𑀲𑀦𑀼𑀲𑁆𑀲𑀼𑀓𑁄, 𑀉𑀧𑁂𑀘𑁆𑀘 𑀯𑀦𑁆𑀤𑀸𑀳𑀺 𑀢𑀫𑀕𑁆𑀕𑀧𑀼𑀕𑁆𑀕𑀮𑀁’.

𑁨𑁦𑁨. ‘‘𑀢𑀢𑁄𑀳𑀁 𑀢𑀼𑀯𑀝𑀁 𑀕𑀦𑁆𑀢𑁆𑀯𑀸, 𑀲𑀸𑀯𑀢𑁆𑀣𑀺𑀁 𑀧𑀼𑀭𑀫𑀼𑀢𑁆𑀢𑀫𑀁;

𑀯𑀺𑀘𑀭𑀦𑁆𑀢𑀁 𑀢𑀫𑀤𑁆𑀤𑀓𑁆𑀔𑀺𑀁, 𑀧𑀺𑀡𑁆𑀟𑀢𑁆𑀣𑀁 𑀅𑀧𑀺𑀳𑀸𑀕𑀺𑀥𑀁.

𑁨𑁦𑁩. ‘‘𑀧𑀢𑁆𑀢𑀧𑀸𑀡𑀺𑀁 𑀅𑀮𑁄𑀮𑀓𑁆𑀔𑀁, 𑀧𑀸𑀘𑀬𑀦𑁆𑀢𑀁 𑀧𑀻𑀢𑀸𑀓𑀭𑀁 [𑀪𑀸𑀚𑀬𑀦𑁆𑀢𑀁 𑀯𑀺𑀬𑀸𑀫𑀢𑀁 (𑀲𑀻.), 𑀚𑁄𑀢𑀬𑀦𑁆𑀢𑀁 𑀇𑀥𑀸𑀫𑀢𑀁 (𑀲𑁆𑀬𑀸.), 𑀪𑀸𑀚𑀬𑀦𑁆𑀢𑀁 𑀇𑀤𑀁𑀫𑀢𑀁 (𑀧𑀻.)];

𑀲𑀺𑀭𑀻𑀦𑀺𑀮𑀬𑀲𑀗𑁆𑀓𑀸𑀲𑀁, 𑀭𑀯𑀺𑀤𑀺𑀢𑁆𑀢𑀺𑀳𑀭𑀸𑀦𑀦𑀁.

𑁨𑁦𑁪. ‘‘𑀢𑀁 𑀲𑀫𑁂𑀘𑁆𑀘 𑀦𑀺𑀧𑀘𑁆𑀘𑀸𑀳𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

‘𑀓𑀼𑀧𑀣𑁂 𑀯𑀺𑀧𑁆𑀧𑀦𑀝𑁆𑀞𑀲𑁆𑀲, 𑀲𑀭𑀡𑀁 𑀳𑁄𑀳𑀺 𑀕𑁄𑀢𑀫.

𑁨𑁦𑁫. ‘‘‘𑀧𑀸𑀡𑀲𑀦𑁆𑀢𑀸𑀭𑀡𑀢𑁆𑀣𑀸𑀬, 𑀧𑀺𑀡𑁆𑀟𑀸𑀬 𑀯𑀺𑀘𑀭𑀸𑀫𑀳𑀁;

𑀦 𑀢𑁂 𑀥𑀫𑁆𑀫𑀓𑀣𑀸𑀓𑀸𑀮𑁄, 𑀇𑀘𑁆𑀘𑀸𑀳 𑀫𑀼𑀦𑀺𑀲𑀢𑁆𑀢𑀫𑁄’.

𑁨𑁦𑁬. ‘‘𑀢𑀤𑀸 𑀧𑀼𑀦𑀧𑁆𑀧𑀼𑀦𑀁 𑀩𑀼𑀤𑁆𑀥𑀁, 𑀆𑀬𑀸𑀘𑀺𑀁 𑀥𑀫𑁆𑀫𑀮𑀸𑀮𑀲𑁄;

𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀕𑀫𑁆𑀪𑀻𑀭𑀁 𑀲𑀼𑀜𑁆𑀜𑀢𑀁 𑀧𑀤𑀁.

𑁨𑁦𑁭. ‘‘𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀸𑀧𑀼𑀡𑀺𑀁 𑀆𑀲𑀯𑀓𑁆𑀔𑀬𑀁;

𑀧𑀭𑀺𑀓𑁆𑀔𑀻𑀡𑀸𑀬𑀼𑀓𑁄 𑀲𑀦𑁆𑀢𑁄, 𑀅𑀳𑁄 𑀲𑀢𑁆𑀣𑀸𑀦𑀼𑀓𑀫𑁆𑀧𑀓𑁄.

𑁨𑁦𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁦𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁧𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁧𑁧. ‘‘𑀏𑀯𑀁 𑀣𑁂𑀭𑁄 𑀯𑀺𑀬𑀸𑀓𑀸𑀲𑀺, 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄;

𑀲𑀗𑁆𑀓𑀸𑀭𑀓𑀽𑀝𑁂 𑀧𑀢𑀺𑀢𑁄, 𑀪𑀽𑀢𑀸𑀯𑀺𑀝𑁆𑀞𑀸𑀬 𑀕𑀸𑀯𑀺𑀬𑀸.

𑁨𑁧𑁨. ‘‘𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀬𑀁, 𑀓𑀺𑀢𑁆𑀢𑀬𑀺𑀢𑁆𑀯𑀸 𑀫𑀳𑀸𑀫𑀢𑀺;

𑀧𑀭𑀺𑀦𑀺𑀩𑁆𑀩𑀸𑀬𑀺 𑀲𑁄 𑀣𑁂𑀭𑁄 [𑀯𑀻𑀭𑁄 (𑀲𑀻.), 𑀥𑀻𑀭𑁄 (𑀲𑁆𑀬𑀸.)], 𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑀼𑀢𑁆𑀢𑀫𑁂.

𑁨𑁧𑁩. ‘‘𑀦𑀕𑀭𑀸 𑀦𑀺𑀓𑁆𑀔𑀫𑀦𑁆𑀢𑁄 𑀢𑀁, 𑀤𑀺𑀲𑁆𑀯𑀸𑀦 𑀇𑀲𑀺𑀲𑀢𑁆𑀢𑀫𑁄;

𑀤𑀸𑀭𑀼𑀘𑀻𑀭𑀥𑀭𑀁 𑀥𑀻𑀭𑀁, 𑀩𑀸𑀳𑀺𑀬𑀁 𑀩𑀸𑀳𑀺𑀢𑀸𑀕𑀫𑀁.

𑁨𑁧𑁪. ‘‘𑀪𑀽𑀫𑀺𑀬𑀁 𑀧𑀢𑀺𑀢𑀁 𑀤𑀦𑁆𑀢𑀁, 𑀇𑀦𑁆𑀤𑀓𑁂𑀢𑀽𑀯 𑀧𑀸𑀢𑀺𑀢𑀁;

𑀕𑀢𑀸𑀬𑀼𑀁 𑀲𑀼𑀓𑁆𑀔𑀓𑀺𑀮𑁂𑀲𑀁 [𑀕𑀢𑀸𑀬𑀼 𑀲𑀁𑀕𑀢𑀓𑁆𑀮𑁂𑀲𑀁 (𑀲𑀻. 𑀧𑀻.), 𑀢𑀤𑀸𑀬𑀼 𑀲𑀗𑁆𑀓𑀢𑀸𑀮𑁂𑀲𑀁 (𑀓.)], 𑀚𑀺𑀦𑀲𑀸𑀲𑀦𑀓𑀸𑀭𑀓𑀁.

𑁨𑁧𑁫. ‘‘𑀢𑀢𑁄 𑀆𑀫𑀦𑁆𑀢𑀬𑀻 𑀲𑀢𑁆𑀣𑀸, 𑀲𑀸𑀯𑀓𑁂 𑀲𑀸𑀲𑀦𑁂 𑀭𑀢𑁂;

‘𑀕𑀡𑁆𑀳𑀣 𑀦𑁂𑀢𑁆𑀯𑀸 [𑀳𑀼𑀢𑁆𑀯𑀸 (𑀲𑁆𑀬𑀸. 𑀧𑀻. 𑀓.)] 𑀛𑀸𑀧𑁂𑀣, 𑀢𑀦𑀼𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄.

𑁨𑁧𑁬. ‘‘‘𑀣𑀽𑀧𑀁 𑀓𑀭𑁄𑀣 𑀧𑀽𑀚𑁂𑀣, 𑀦𑀺𑀩𑁆𑀩𑀼𑀢𑁄 𑀲𑁄 𑀫𑀳𑀸𑀫𑀢𑀺;

𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀫𑁂𑀲𑀕𑁆𑀕𑁄, 𑀲𑀸𑀯𑀓𑁄 𑀫𑁂 𑀯𑀘𑁄𑀓𑀭𑁄.

𑁨𑁧𑁭. ‘‘‘𑀲𑀳𑀲𑁆𑀲𑀫𑀧𑀺 𑀘𑁂 𑀕𑀸𑀣𑀸, 𑀅𑀦𑀢𑁆𑀣𑀧𑀤𑀲𑀜𑁆𑀳𑀺𑀢𑀸;

𑀏𑀓𑀁 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀺.

𑁨𑁧𑁮. ‘‘‘𑀬𑀢𑁆𑀣 𑀆𑀧𑁄 𑀘 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀦 𑀕𑀸𑀥𑀢𑀺;

𑀦 𑀢𑀢𑁆𑀣 𑀲𑀼𑀓𑁆𑀓𑀸 𑀚𑁄𑀢𑀦𑁆𑀢𑀺, 𑀆𑀤𑀺𑀘𑁆𑀘𑁄 𑀦 𑀧𑀓𑀸𑀲𑀢𑀺.

𑁨𑁧𑁯. ‘‘‘𑀦 𑀢𑀢𑁆𑀣 𑀘𑀦𑁆𑀤𑀺𑀫𑀸 𑀪𑀸𑀢𑀺, 𑀢𑀫𑁄 𑀢𑀢𑁆𑀣 𑀦 𑀯𑀺𑀚𑁆𑀚𑀢𑀺;

𑀬𑀤𑀸 𑀘 𑀅𑀢𑁆𑀢𑀦𑀸 𑀯𑁂𑀤𑀺, 𑀫𑀼𑀦𑀺𑀫𑁄𑀦𑁂𑀦 𑀩𑁆𑀭𑀸𑀳𑁆𑀫𑀡𑁄.

𑁨𑁨𑁦. ‘‘‘𑀅𑀣 𑀭𑀽𑀧𑀸 𑀅𑀭𑀽𑀧𑀸 𑀘, 𑀲𑀼𑀔𑀤𑀼𑀓𑁆𑀔𑀸 𑀯𑀺𑀫𑀼𑀘𑁆𑀘𑀢𑀺’;

𑀇𑀘𑁆𑀘𑁂𑀯𑀁 𑀅𑀪𑀡𑀻 𑀦𑀸𑀣𑁄, 𑀢𑀺𑀮𑁄𑀓𑀲𑀭𑀡𑁄 𑀫𑀼𑀦𑀺’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑀸𑀳𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑀸𑀳𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.