𑁪. 𑀤𑀩𑁆𑀩𑀫𑀮𑁆𑀮𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁮. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀮𑁄𑀓𑀯𑀺𑀤𑀽 𑀫𑀼𑀦𑀺;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

𑁧𑁦𑁯. ‘‘𑀑𑀯𑀸𑀤𑀓𑁄 𑀯𑀺𑀜𑁆𑀜𑀸𑀧𑀓𑁄, 𑀢𑀸𑀭𑀓𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀤𑁂𑀲𑀦𑀸𑀓𑀼𑀲𑀮𑁄 𑀩𑀼𑀤𑁆𑀥𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁧𑁧𑁦. ‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀫𑁆𑀧𑀢𑁆𑀢𑁂 𑀢𑀺𑀢𑁆𑀣𑀺𑀬𑁂 𑀲𑀩𑁆𑀩𑁂, 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀧𑀺 [𑀧𑀢𑀺𑀝𑁆𑀞𑀳𑀺 (𑀲𑁆𑀬𑀸. 𑀓.)].

𑁧𑁧𑁧. ‘‘𑀏𑀯𑀁 𑀦𑀺𑀭𑀸𑀓𑀼𑀮𑀁 𑀆𑀲𑀺, 𑀲𑀼𑀜𑁆𑀜𑀢𑀁 [𑀲𑀼𑀜𑁆𑀜𑀓𑀁 (𑀲𑀻.) 𑀏𑀯𑀫𑀼𑀧𑀭𑀺𑀧𑀺] 𑀢𑀺𑀢𑁆𑀣𑀺𑀬𑁂𑀳𑀺 𑀘;

𑀯𑀺𑀘𑀺𑀢𑁆𑀢𑀁 𑀅𑀭𑀳𑀦𑁆𑀢𑁂𑀳𑀺, 𑀯𑀲𑀻𑀪𑀽𑀢𑁂𑀳𑀺 𑀢𑀸𑀤𑀺𑀪𑀺.

𑁧𑁧𑁨. ‘‘𑀭𑀢𑀦𑀸𑀦𑀝𑁆𑀞𑀧𑀜𑁆𑀜𑀸𑀲𑀁, 𑀉𑀕𑁆𑀕𑀢𑁄 𑀲𑁄 𑀫𑀳𑀸𑀫𑀼𑀦𑀺;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄.

𑁧𑁧𑁩. ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁧𑁧𑁪. ‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀫𑀳𑀸𑀬𑀲𑁄;

𑀉𑀧𑁂𑀢𑁆𑀯𑀸 𑀮𑁄𑀓𑀧𑀚𑁆𑀚𑁄𑀢𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁.

𑁧𑁧𑁫. ‘‘𑀲𑁂𑀦𑀸𑀲𑀦𑀸𑀦𑀺 𑀪𑀺𑀓𑁆𑀔𑀽𑀦𑀁, 𑀧𑀜𑁆𑀜𑀸𑀧𑁂𑀦𑁆𑀢𑀁 𑀲𑀲𑀸𑀯𑀓𑀁;

𑀓𑀺𑀢𑁆𑀢𑀬𑀦𑁆𑀢𑀲𑁆𑀲 𑀯𑀘𑀦𑀁, 𑀲𑀼𑀡𑀺𑀢𑁆𑀯𑀸 𑀫𑀼𑀤𑀺𑀢𑁄 𑀅𑀳𑀁.

𑁧𑁧𑁬. ‘‘𑀅𑀥𑀺𑀓𑀸𑀭𑀁 𑀲𑀲𑀗𑁆𑀖𑀲𑁆𑀲, 𑀓𑀢𑁆𑀯𑀸 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁.

𑁧𑁧𑁭. ‘‘𑀢𑀤𑀸𑀳 𑀲 𑀫𑀳𑀸𑀯𑀻𑀭𑁄, 𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑀬𑀁;

‘𑀬𑁄 𑀲𑀲𑀗𑁆𑀖𑀫𑀪𑁄𑀚𑁂𑀲𑀺, 𑀲𑀢𑁆𑀢𑀸𑀳𑀁 𑀮𑁄𑀓𑀦𑀸𑀬𑀓𑀁.

𑁧𑁧𑁮. ‘‘‘𑀲𑁄𑀬𑀁 𑀓𑀫𑀮𑀧𑀢𑁆𑀢𑀓𑁆𑀔𑁄, 𑀲𑀻𑀳𑀁𑀲𑁄 𑀓𑀦𑀓𑀢𑁆𑀢𑀘𑁄;

𑀫𑀫 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺 [𑀧𑀢𑀺𑀢𑁄 (𑀧𑀻.)], 𑀧𑀢𑁆𑀣𑀬𑀁 𑀞𑀸𑀦𑀫𑀼𑀢𑁆𑀢𑀫𑀁.

𑁧𑁧𑁯. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁨𑁦. ‘‘‘𑀲𑀸𑀯𑀓𑁄 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀤𑀩𑁆𑀩𑁄 𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑁄;

𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁄, 𑀅𑀕𑁆𑀕𑁄 𑀳𑁂𑀲𑁆𑀲𑀢𑀺𑀬𑀁 𑀢𑀤𑀸’.

𑁧𑁨𑁧. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁨𑁨. ‘‘𑀲𑀢𑀸𑀦𑀁 𑀢𑀻𑀡𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁧𑁨𑁩. ‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑁄 𑀆𑀲𑀺𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸.

𑁧𑁨𑁪. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑀺𑀧𑀲𑁆𑀲𑀻 𑀦𑀸𑀫 𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀘𑀸𑀭𑀼𑀤𑀲𑁆𑀲𑀦𑁄 [𑀘𑀸𑀭𑀼𑀦𑀬𑀦𑁄 (𑀲𑀻. 𑀲𑁆𑀬𑀸. 𑀧𑀻.)], 𑀲𑀩𑁆𑀩𑀥𑀫𑁆𑀫𑀯𑀺𑀧𑀲𑁆𑀲𑀓𑁄.

𑁧𑁨𑁫. ‘‘𑀤𑀼𑀝𑁆𑀞𑀘𑀺𑀢𑁆𑀢𑁄 𑀉𑀧𑀯𑀤𑀺𑀁, 𑀲𑀸𑀯𑀓𑀁 𑀢𑀲𑁆𑀲 𑀢𑀸𑀤𑀺𑀦𑁄;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀁, 𑀲𑀼𑀤𑁆𑀥𑁄𑀢𑀺 𑀘 𑀯𑀺𑀚𑀸𑀦𑀺𑀬.

𑁧𑁨𑁬. ‘‘𑀢𑀲𑁆𑀲𑁂𑀯 𑀦𑀭𑀯𑀻𑀭𑀲𑁆𑀲, 𑀲𑀸𑀯𑀓𑀸𑀦𑀁 𑀫𑀳𑁂𑀲𑀺𑀦𑀁;

𑀲𑀮𑀸𑀓𑀜𑁆𑀘 𑀕𑀳𑁂𑀢𑁆𑀯𑀸𑀦 [𑀲𑀮𑀸𑀓𑀁 𑀧𑀕𑁆𑀕𑀳𑁂𑀢𑁆𑀯𑀸𑀦 (𑀲𑀻. 𑀧𑀻.)], 𑀔𑀻𑀭𑁄𑀤𑀦𑀫𑀤𑀸𑀲𑀳𑀁.

𑁧𑁨𑁭. ‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

𑁧𑁨𑁮. ‘‘𑀲𑀸𑀲𑀦𑀁 𑀚𑁄𑀢𑀬𑀺𑀢𑁆𑀯𑀸𑀦, 𑀅𑀪𑀺𑀪𑀼𑀬𑁆𑀬 𑀓𑀼𑀢𑀺𑀢𑁆𑀣𑀺𑀬𑁂;

𑀯𑀺𑀦𑁂𑀬𑁆𑀬𑁂 𑀯𑀺𑀦𑀬𑀺𑀢𑁆𑀯𑀸𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁧𑁨𑁯. ‘‘𑀲𑀲𑀺𑀲𑁆𑀲𑁂 𑀦𑀺𑀩𑁆𑀩𑀼𑀢𑁂 𑀦𑀸𑀣𑁂, 𑀅𑀢𑁆𑀣𑀫𑁂𑀦𑁆𑀢𑀫𑁆𑀳𑀺 𑀲𑀸𑀲𑀦𑁂;

𑀤𑁂𑀯𑀸 𑀓𑀦𑁆𑀤𑀺𑀁𑀲𑀼 𑀲𑀁𑀯𑀺𑀕𑁆𑀕𑀸, 𑀫𑀼𑀢𑁆𑀢𑀓𑁂𑀲𑀸 𑀭𑀼𑀤𑀫𑁆𑀫𑀼𑀔𑀸.

𑁧𑁩𑁦. ‘‘𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺 𑀥𑀫𑁆𑀫𑀓𑁆𑀔𑁄, 𑀦 𑀧𑀲𑁆𑀲𑀺𑀲𑁆𑀲𑀸𑀫 𑀲𑀼𑀩𑁆𑀩𑀢𑁂;

𑀦 𑀲𑀼𑀡𑀺𑀲𑁆𑀲𑀸𑀫 𑀲𑀤𑁆𑀥𑀫𑁆𑀫𑀁, 𑀅𑀳𑁄 𑀦𑁄 𑀅𑀧𑁆𑀧𑀧𑀼𑀜𑁆𑀜𑀢𑀸.

𑁧𑁩𑁧. ‘‘𑀢𑀤𑀸𑀬𑀁 𑀧𑀣𑀯𑀻 𑀲𑀩𑁆𑀩𑀸, 𑀅𑀘𑀮𑀸 𑀲𑀸 𑀘𑀮𑀸𑀘𑀮𑀸 [𑀘𑀮𑀸𑀘𑀮𑀻 (𑀲𑀻.), 𑀧𑀼𑀮𑀸𑀧𑀼𑀮𑀻 (𑀲𑁆𑀬𑀸.)];

𑀲𑀸𑀕𑀭𑁄 𑀘 𑀲𑀲𑁄𑀓𑁄𑀯, 𑀯𑀺𑀦𑀤𑀻 𑀓𑀭𑀼𑀡𑀁 𑀕𑀺𑀭𑀁.

𑁧𑁩𑁨. ‘‘𑀘𑀢𑀼𑀤𑁆𑀤𑀺𑀲𑀸 𑀤𑀼𑀦𑁆𑀤𑀼𑀪𑀺𑀬𑁄, 𑀦𑀸𑀤𑀬𑀺𑀁𑀲𑀼 𑀅𑀫𑀸𑀦𑀼𑀲𑀸;

𑀲𑀫𑀦𑁆𑀢𑀢𑁄 𑀅𑀲𑀦𑀺𑀬𑁄, 𑀨𑀮𑀺𑀁𑀲𑀼 𑀘 𑀪𑀬𑀸𑀯𑀳𑀸.

𑁧𑁩𑁩. ‘‘𑀉𑀓𑁆𑀓𑀸 𑀧𑀢𑀺𑀁𑀲𑀼 𑀦𑀪𑀲𑀸, 𑀥𑀽𑀫𑀓𑁂𑀢𑀼 𑀘 𑀤𑀺𑀲𑁆𑀲𑀢𑀺;

𑀲𑀥𑀽𑀫𑀸 𑀚𑀸𑀮𑀯𑀝𑁆𑀝𑀸 𑀘 [𑀲𑀩𑁆𑀩𑀣𑀮𑀚𑀲𑀢𑁆𑀢𑀸 𑀘 (𑀲𑀻.)], 𑀭𑀯𑀺𑀁𑀲𑀼 𑀓𑀭𑀼𑀡𑀁 𑀫𑀺𑀕𑀸.

𑁧𑁩𑁪. ‘‘𑀉𑀧𑁆𑀧𑀸𑀤𑁂 𑀤𑀸𑀭𑀼𑀡𑁂 𑀤𑀺𑀲𑁆𑀯𑀸, 𑀲𑀸𑀲𑀦𑀢𑁆𑀣𑀗𑁆𑀕𑀲𑀽𑀘𑀓𑁂;

𑀲𑀁𑀯𑀺𑀕𑁆𑀕𑀸 𑀪𑀺𑀓𑁆𑀔𑀯𑁄 𑀲𑀢𑁆𑀢, 𑀘𑀺𑀦𑁆𑀢𑀬𑀺𑀫𑁆𑀳 𑀫𑀬𑀁 𑀢𑀤𑀸.

𑁧𑁩𑁫. ‘‘𑀲𑀸𑀲𑀦𑁂𑀦 𑀯𑀺𑀦𑀸𑀫𑁆𑀳𑀸𑀓𑀁, 𑀚𑀻𑀯𑀺𑀢𑁂𑀦 𑀅𑀮𑀁 𑀫𑀬𑀁;

𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀭𑀜𑁆𑀜𑀁, 𑀬𑀼𑀜𑁆𑀚𑀸𑀫 𑀚𑀺𑀦𑀲𑀸𑀲𑀦𑀁.

𑁧𑁩𑁬. ‘‘𑀅𑀤𑁆𑀤𑀲𑀫𑁆𑀳 𑀢𑀤𑀸𑀭𑀜𑁆𑀜𑁂, 𑀉𑀩𑁆𑀩𑀺𑀤𑁆𑀥𑀁 𑀲𑁂𑀮𑀫𑀼𑀢𑁆𑀢𑀫𑀁;

𑀦𑀺𑀲𑁆𑀲𑁂𑀡𑀺𑀬𑀸 𑀢𑀫𑀸𑀭𑀼𑀬𑁆𑀳, 𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑀬𑀺𑀫𑁆𑀳𑀲𑁂.

𑁧𑁩𑁭. ‘‘𑀢𑀤𑀸 𑀑𑀯𑀤𑀺 𑀦𑁄 𑀣𑁂𑀭𑁄, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀲𑀼𑀤𑀼𑀮𑁆𑀮𑀪𑁄;

𑀲𑀤𑁆𑀥𑀸𑀢𑀺𑀤𑀼𑀮𑁆𑀮𑀪𑀸 𑀮𑀤𑁆𑀥𑀸, 𑀣𑁄𑀓𑀁 𑀲𑁂𑀲𑀜𑁆𑀘 𑀲𑀸𑀲𑀦𑀁.

𑁧𑁩𑁮. ‘‘𑀦𑀺𑀧𑀢𑀦𑁆𑀢𑀺 𑀔𑀡𑀸𑀢𑀻𑀢𑀸, 𑀅𑀦𑀦𑁆𑀢𑁂 𑀤𑀼𑀓𑁆𑀔𑀲𑀸𑀕𑀭𑁂;

𑀢𑀲𑁆𑀫𑀸 𑀧𑀬𑁄𑀕𑁄 𑀓𑀢𑁆𑀢𑀩𑁆𑀩𑁄, 𑀬𑀸𑀯 𑀞𑀸𑀢𑀺 𑀫𑀼𑀦𑁂 𑀫𑀢𑀁 [𑀬𑀸𑀯 𑀢𑀺𑀝𑁆𑀞𑀢𑀺 𑀲𑀸𑀲𑀦𑀁 (𑀲𑁆𑀬𑀸.)].

𑁧𑁩𑁯. ‘‘𑀅𑀭𑀳𑀸 𑀆𑀲𑀺 𑀲𑁄 𑀣𑁂𑀭𑁄, 𑀅𑀦𑀸𑀕𑀸𑀫𑀻 𑀢𑀤𑀸𑀦𑀼𑀕𑁄;

𑀲𑀼𑀲𑀻𑀮𑀸 𑀇𑀢𑀭𑁂 𑀬𑀼𑀢𑁆𑀢𑀸, 𑀤𑁂𑀯𑀮𑁄𑀓𑀁 𑀅𑀕𑀫𑁆𑀳𑀲𑁂.

𑁧𑁪𑁦. ‘‘𑀦𑀺𑀩𑁆𑀩𑀼𑀢𑁄 𑀢𑀺𑀡𑁆𑀡𑀲𑀁𑀲𑀸𑀭𑁄, 𑀲𑀼𑀤𑁆𑀥𑀸𑀯𑀸𑀲𑁂 𑀘 𑀏𑀓𑀓𑁄;

𑀅𑀳𑀜𑁆𑀘 𑀧𑀓𑁆𑀓𑀼𑀲𑀸𑀢𑀺 𑀘, 𑀲𑀪𑀺𑀬𑁄 𑀩𑀸𑀳𑀺𑀬𑁄 𑀢𑀣𑀸.

𑁧𑁪𑁧. ‘‘𑀓𑀼𑀫𑀸𑀭𑀓𑀲𑁆𑀲𑀧𑁄 𑀘𑁂𑀯, 𑀢𑀢𑁆𑀣 𑀢𑀢𑁆𑀣𑀽𑀧𑀕𑀸 𑀫𑀬𑀁;

𑀲𑀁𑀲𑀸𑀭𑀩𑀦𑁆𑀥𑀦𑀸 𑀫𑀼𑀢𑁆𑀢𑀸, 𑀕𑁄𑀢𑀫𑁂𑀦𑀸𑀦𑀼𑀓𑀫𑁆𑀧𑀺𑀢𑀸.

𑁧𑁪𑁨. ‘‘𑀫𑀮𑁆𑀮𑁂𑀲𑀼 𑀓𑀼𑀲𑀺𑀦𑀸𑀭𑀸𑀬𑀁, 𑀚𑀸𑀢𑁄 𑀕𑀩𑁆𑀪𑁂𑀯 𑀫𑁂 𑀲𑀢𑁄;

𑀫𑀸𑀢𑀸 𑀫𑀢𑀸 𑀘𑀺𑀢𑀸𑀭𑀼𑀴𑁆𑀳𑀸, 𑀢𑀢𑁄 𑀦𑀺𑀧𑁆𑀧𑀢𑀺𑀢𑁄 𑀅𑀳𑀁.

𑁧𑁪𑁩. ‘‘𑀧𑀢𑀺𑀢𑁄 𑀤𑀩𑁆𑀩𑀧𑀼𑀜𑁆𑀚𑀫𑁆𑀳𑀺, 𑀢𑀢𑁄 𑀤𑀩𑁆𑀩𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀩𑁆𑀭𑀳𑁆𑀫𑀘𑀸𑀭𑀻𑀩𑀮𑁂𑀦𑀸𑀳𑀁, 𑀯𑀺𑀫𑀼𑀢𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑁄.

𑁧𑁪𑁪. ‘‘𑀔𑀻𑀭𑁄𑀤𑀦𑀩𑀮𑁂𑀦𑀸𑀳𑀁, 𑀧𑀜𑁆𑀘𑀳𑀗𑁆𑀕𑁂𑀳𑀼𑀧𑀸𑀕𑀢𑁄;

𑀔𑀻𑀡𑀸𑀲𑀯𑁄𑀧𑀯𑀸𑀤𑁂𑀦, 𑀧𑀸𑀧𑁂𑀳𑀺 𑀩𑀳𑀼𑀘𑁄𑀤𑀺𑀢𑁄.

𑁧𑁪𑁫. ‘‘𑀉𑀪𑁄 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀯𑀻𑀢𑀺𑀯𑀢𑁆𑀢𑁄𑀫𑁆𑀳𑀺 𑀤𑀸𑀦𑀺𑀳𑀁;

𑀧𑀢𑁆𑀯𑀸𑀦 𑀧𑀭𑀫𑀁 𑀲𑀦𑁆𑀢𑀺𑀁, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪𑁬. ‘‘𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑀬𑀺𑀁, 𑀳𑀸𑀲𑀬𑀺𑀢𑁆𑀯𑀸𑀦 𑀲𑀼𑀩𑁆𑀩𑀢𑁂;

𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁧𑁪𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁪𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀤𑀩𑁆𑀩𑀫𑀮𑁆𑀮𑀧𑀼𑀢𑁆𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀤𑀩𑁆𑀩𑀫𑀮𑁆𑀮𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.