𑁩. 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁬. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀉𑀤𑀺𑀢𑁄 𑀅𑀚𑀝𑀸𑀓𑀸𑀲𑁂 [𑀚𑀕𑀤𑀸𑀓𑀸𑀲𑁂 (𑀲𑀻.), 𑀚𑀮𑀤𑀸𑀓𑀸𑀲𑁂 (𑀧𑀻.)], 𑀭𑀯𑀻𑀯 𑀲𑀭𑀤𑀫𑁆𑀩𑀭𑁂.

𑁬𑁭. ‘‘𑀯𑀘𑀦𑀸𑀪𑀸𑀬 𑀩𑁄𑀥𑁂𑀢𑀺, 𑀯𑁂𑀦𑁂𑀬𑁆𑀬𑀧𑀤𑀼𑀫𑀸𑀦𑀺 𑀲𑁄;

𑀓𑀺𑀮𑁂𑀲𑀧𑀗𑁆𑀓𑀁 𑀲𑁄𑀲𑁂𑀢𑀺, 𑀫𑀢𑀺𑀭𑀁𑀲𑀻𑀳𑀺 𑀦𑀸𑀬𑀓𑁄.

𑁬𑁮. ‘‘𑀢𑀺𑀢𑁆𑀣𑀺𑀬𑀸𑀦𑀁 𑀬𑀲𑁂 [𑀬𑀲𑁄 (𑀲𑀻. 𑀧𑀻.)] 𑀳𑀦𑁆𑀢𑀺, 𑀔𑀚𑁆𑀚𑁄𑀢𑀸𑀪𑀸 𑀬𑀣𑀸 𑀭𑀯𑀺;

𑀲𑀘𑁆𑀘𑀢𑁆𑀣𑀸𑀪𑀁 𑀧𑀓𑀸𑀲𑁂𑀢𑀺, 𑀭𑀢𑀦𑀁𑀯 𑀤𑀺𑀯𑀸𑀓𑀭𑁄.

𑁬𑁯. ‘‘𑀕𑀼𑀡𑀸𑀦𑀁 𑀆𑀬𑀢𑀺𑀪𑀽𑀢𑁄, 𑀭𑀢𑀦𑀸𑀦𑀁𑀯 𑀲𑀸𑀕𑀭𑁄;

𑀧𑀚𑁆𑀚𑀼𑀦𑁆𑀦𑁄𑀭𑀺𑀯 𑀪𑀽𑀢𑀸𑀦𑀺, 𑀥𑀫𑁆𑀫𑀫𑁂𑀖𑁂𑀦 𑀯𑀲𑁆𑀲𑀢𑀺.

𑁭𑁦. ‘‘𑀅𑀓𑁆𑀔𑀤𑀲𑁆𑀲𑁄 𑀢𑀤𑀸 𑀆𑀲𑀺𑀁, 𑀦𑀕𑀭𑁂 𑀳𑀁𑀲𑀲𑀯𑁆𑀳𑀬𑁂;

𑀉𑀧𑁂𑀘𑁆𑀘 𑀥𑀫𑁆𑀫𑀫𑀲𑁆𑀲𑁄𑀲𑀺𑀁, 𑀚𑀮𑀚𑀼𑀢𑁆𑀢𑀫𑀦𑀸𑀫𑀺𑀦𑁄.

𑁭𑁧. ‘‘𑀑𑀯𑀸𑀤𑀓𑀲𑁆𑀲 𑀪𑀺𑀓𑁆𑀔𑀽𑀦𑀁, 𑀲𑀸𑀯𑀓𑀲𑁆𑀲 𑀓𑀢𑀸𑀯𑀺𑀦𑁄;

𑀕𑀼𑀡𑀁 𑀧𑀓𑀸𑀲𑀬𑀦𑁆𑀢𑀲𑁆𑀲, 𑀢𑀧𑁆𑀧𑀬𑀦𑁆𑀢𑀲𑁆𑀲 [𑀢𑁄𑀲𑀬𑀦𑁆𑀢𑀲𑁆𑀲 (𑀲𑀻.), 𑀳𑀸𑀲𑀬𑀦𑁆𑀢𑀲𑁆𑀲 (𑀲𑁆𑀬𑀸.), 𑀯𑀸𑀲𑀬𑀦𑁆𑀢𑀲𑁆𑀲 (𑀧𑀻.)] 𑀫𑁂 𑀫𑀦𑀁.

𑁭𑁨. ‘‘𑀲𑀼𑀢𑁆𑀯𑀸 𑀧𑀢𑀻𑀢𑁄 𑀲𑀼𑀫𑀦𑁄, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀲𑀲𑀺𑀲𑁆𑀲𑀁 𑀪𑁄𑀚𑀬𑀺𑀢𑁆𑀯𑀸𑀦, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁.

𑁭𑁩. ‘‘𑀢𑀤𑀸 𑀳𑀁𑀲𑀲𑀫𑀪𑀸𑀕𑁄, 𑀳𑀁𑀲𑀤𑀼𑀦𑁆𑀤𑀼𑀪𑀺𑀦𑀺𑀲𑁆𑀲𑀦𑁄 [𑀳𑀁𑀲𑀤𑀼𑀦𑁆𑀤𑀼𑀪𑀺𑀲𑀼𑀲𑁆𑀲𑀭𑁄 (𑀲𑀻.)];

𑀧𑀲𑁆𑀲𑀣𑁂𑀢𑀁 𑀫𑀳𑀸𑀫𑀢𑁆𑀢𑀁, 𑀯𑀺𑀦𑀺𑀘𑁆𑀙𑀬𑀯𑀺𑀲𑀸𑀭𑀤𑀁.

𑁭𑁪. ‘‘𑀧𑀢𑀺𑀢𑀁 𑀧𑀸𑀤𑀫𑀽𑀮𑁂 𑀫𑁂, 𑀲𑀫𑀼𑀕𑁆𑀕𑀢𑀢𑀦𑀽𑀭𑀼𑀳𑀁;

𑀚𑀻𑀫𑀽𑀢𑀯𑀡𑁆𑀡𑀁 𑀧𑀻𑀡𑀁𑀲𑀁, 𑀧𑀲𑀦𑁆𑀦𑀦𑀬𑀦𑀸𑀦𑀦𑀁.

𑁭𑁫. ‘‘𑀧𑀭𑀺𑀯𑀸𑀭𑁂𑀦 𑀫𑀳𑀢𑀸, 𑀭𑀸𑀚𑀬𑀼𑀢𑁆𑀢𑀁 𑀫𑀳𑀸𑀬𑀲𑀁;

𑀏𑀲𑁄 𑀓𑀢𑀸𑀯𑀺𑀦𑁄 𑀞𑀸𑀦𑀁, 𑀧𑀢𑁆𑀣𑁂𑀢𑀺 𑀫𑀼𑀤𑀺𑀢𑀸𑀲𑀬𑁄.

𑁭𑁬. ‘‘‘𑀇𑀫𑀺𑀦𑀸 𑀧𑀡𑀺𑀧𑀸𑀢𑁂𑀦, 𑀘𑀸𑀕𑁂𑀦 𑀧𑀡𑀺𑀥𑀻𑀳𑀺 𑀘 [𑀧𑀺𑀡𑁆𑀟𑀧𑀸𑀢𑁂𑀦, 𑀘𑁂𑀢𑀦𑀸 𑀧𑀡𑀺𑀥𑀻𑀳𑀺 𑀘 (𑀲𑀻.)];

𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺, 𑀦𑀼𑀧𑀧𑀚𑁆𑀚𑀢𑀺 𑀤𑀼𑀕𑁆𑀕𑀢𑀺𑀁.

𑁭𑁭. ‘‘‘𑀤𑁂𑀯𑁂𑀲𑀼 𑀤𑁂𑀯𑀲𑁄𑀪𑀕𑁆𑀕𑀁, 𑀫𑀦𑀼𑀲𑁆𑀲𑁂𑀲𑀼 𑀫𑀳𑀦𑁆𑀢𑀢𑀁;

𑀅𑀦𑀼𑀪𑁄𑀢𑁆𑀯𑀸𑀦 𑀲𑁂𑀲𑁂𑀦 [𑀅𑀪𑀼𑀢𑁆𑀯𑀸𑀯 𑀲𑁂𑀲𑁂𑀦 (𑀲𑀻.), 𑀅𑀦𑀼𑀪𑁄𑀢𑁆𑀯𑀸𑀯 𑀲𑁂𑀲𑁂𑀦 (𑀲𑁆𑀬𑀸.)], 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺.

𑁭𑁮. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁭𑁯. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀧𑁆𑀧𑀺𑀦𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁮𑁦. ‘‘𑀢𑀢𑁄𑀳𑀁 𑀲𑀼𑀓𑀢𑀁 𑀓𑀸𑀭𑀁, 𑀓𑀢𑁆𑀯𑀸𑀦 𑀚𑀺𑀦𑀲𑀸𑀲𑀦𑁂;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀼𑀲𑀺𑀢𑀁 𑀅𑀕𑀫𑀸𑀲𑀳𑀁.

𑁮𑁧. ‘‘𑀤𑁂𑀯𑀫𑀸𑀦𑀼𑀲𑀭𑀚𑁆𑀚𑀸𑀦𑀺, 𑀲𑀢𑀲𑁄 𑀅𑀦𑀼𑀲𑀸𑀲𑀺𑀬;

𑀩𑀸𑀭𑀸𑀡𑀲𑀺𑀬𑀫𑀸𑀲𑀦𑁆𑀦𑁂, 𑀚𑀸𑀢𑁄 𑀓𑁂𑀦𑀺𑀬𑀚𑀸𑀢𑀺𑀬𑀁.

𑁮𑁨. ‘‘𑀲𑀳𑀲𑁆𑀲𑀧𑀭𑀺𑀯𑀸𑀭𑁂𑀦 [𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 (𑀲𑁆𑀬𑀸.)], 𑀲𑀧𑀚𑀸𑀧𑀢𑀺𑀓𑁄 𑀅𑀳𑀁;

𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀲𑀢𑀸𑀦𑀺 𑀲𑀫𑀼𑀧𑀝𑁆𑀞𑀳𑀺𑀁.

𑁮𑁩. ‘‘𑀢𑁂𑀫𑀸𑀲𑀁 𑀪𑁄𑀚𑀬𑀺𑀢𑁆𑀯𑀸𑀦, 𑀧𑀘𑁆𑀙𑀸𑀤𑀫𑁆𑀳 𑀢𑀺𑀘𑀻𑀯𑀭𑀁;

𑀢𑀢𑁄 𑀘𑀼𑀢𑀸 𑀫𑀬𑀁 𑀲𑀩𑁆𑀩𑁂, 𑀅𑀳𑀼𑀫𑁆𑀳 𑀢𑀺𑀤𑀲𑀽𑀧𑀕𑀸.

𑁮𑁪. ‘‘𑀧𑀼𑀦𑁄 𑀲𑀩𑁆𑀩𑁂 𑀫𑀦𑀼𑀲𑁆𑀲𑀢𑁆𑀢𑀁, 𑀅𑀕𑀫𑀺𑀫𑁆𑀳 𑀢𑀢𑁄 𑀘𑀼𑀢𑀸;

𑀓𑀼𑀓𑁆𑀓𑀼𑀝𑀫𑁆𑀳𑀺 𑀧𑀼𑀭𑁂 𑀚𑀸𑀢𑀸, 𑀳𑀺𑀫𑀯𑀦𑁆𑀢𑀲𑁆𑀲 𑀧𑀲𑁆𑀲𑀢𑁄.

𑁮𑁫. ‘‘𑀓𑀧𑁆𑀧𑀺𑀦𑁄 𑀦𑀸𑀫𑀳𑀁 𑀆𑀲𑀺𑀁, 𑀭𑀸𑀚𑀧𑀼𑀢𑁆𑀢𑁄 𑀫𑀳𑀸𑀬𑀲𑁄;

𑀲𑁂𑀲𑀸𑀫𑀘𑁆𑀘𑀓𑀼𑀮𑁂 𑀚𑀸𑀢𑀸, 𑀫𑀫𑁂𑀯 𑀧𑀭𑀺𑀯𑀸𑀭𑀬𑀼𑀁.

𑁮𑁬. ‘‘𑀫𑀳𑀸𑀭𑀚𑁆𑀚𑀲𑀼𑀔𑀁 𑀧𑀢𑁆𑀢𑁄, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀫𑀸;

𑀯𑀸𑀡𑀺𑀚𑁂𑀳𑀺 𑀲𑀫𑀓𑁆𑀔𑀸𑀢𑀁, 𑀩𑀼𑀤𑁆𑀥𑀼𑀧𑁆𑀧𑀸𑀤𑀫𑀳𑀁 𑀲𑀼𑀡𑀺𑀁.

𑁮𑁭. ‘‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀅𑀲𑀫𑁄 𑀏𑀓𑀧𑀼𑀕𑁆𑀕𑀮𑁄;

𑀲𑁄 𑀧𑀓𑀸𑀲𑁂𑀢𑀺 𑀲𑀤𑁆𑀥𑀫𑁆𑀫𑀁, 𑀅𑀫𑀢𑀁 𑀲𑀼𑀔𑀫𑀼𑀢𑁆𑀢𑀫𑀁.

𑁮𑁮. ‘‘‘𑀲𑀼𑀬𑀼𑀢𑁆𑀢𑀸 𑀢𑀲𑁆𑀲 𑀲𑀺𑀲𑁆𑀲𑀸 𑀘, 𑀲𑀼𑀫𑀼𑀢𑁆𑀢𑀸 𑀘 𑀅𑀦𑀸𑀲𑀯𑀸’;

‘‘𑀲𑀼𑀢𑁆𑀯𑀸 𑀦𑁂𑀲𑀁 𑀲𑀼𑀯𑀘𑀦𑀁, 𑀲𑀓𑁆𑀓𑀭𑀺𑀢𑁆𑀯𑀸𑀦 𑀯𑀸𑀡𑀺𑀚𑁂.

𑁮𑁯. ‘‘𑀧𑀳𑀸𑀬 𑀭𑀚𑁆𑀚𑀁 𑀲𑀸𑀫𑀘𑁆𑀘𑁄, 𑀦𑀺𑀓𑁆𑀔𑀫𑀺𑀁 𑀩𑀼𑀤𑁆𑀥𑀫𑀸𑀫𑀓𑁄;

𑀦𑀤𑀺𑀁 𑀤𑀺𑀲𑁆𑀯𑀸 𑀫𑀳𑀸𑀘𑀦𑁆𑀤𑀁, 𑀧𑀽𑀭𑀺𑀢𑀁 𑀲𑀫𑀢𑀺𑀢𑁆𑀢𑀺𑀓𑀁.

𑁯𑁦. ‘‘𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀮𑀫𑁆𑀩𑀁, 𑀤𑀼𑀢𑁆𑀢𑀭𑀁 𑀲𑀻𑀖𑀯𑀸𑀳𑀺𑀦𑀺𑀁;

𑀕𑀼𑀡𑀁 𑀲𑀭𑀺𑀢𑁆𑀯𑀸 𑀩𑀼𑀤𑁆𑀥𑀲𑁆𑀲, 𑀲𑁄𑀢𑁆𑀣𑀺𑀦𑀸 𑀲𑀫𑀢𑀺𑀓𑁆𑀓𑀫𑀺𑀁.

𑁯𑁧. ‘‘‘𑀪𑀯𑀲𑁄𑀢𑀁 𑀲𑀘𑁂 𑀩𑀼𑀤𑁆𑀥𑁄, 𑀢𑀺𑀡𑁆𑀡𑁄 𑀮𑁄𑀓𑀦𑁆𑀢𑀕𑀽 𑀯𑀺𑀤𑀽 [𑀯𑀺𑀪𑀽 (𑀓.)];

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀕𑀫𑀦𑀁 𑀫𑁂 𑀲𑀫𑀺𑀚𑁆𑀛𑀢𑀼.

𑁯𑁨. ‘‘‘𑀬𑀤𑀺 𑀲𑀦𑁆𑀢𑀺𑀕𑀫𑁄 𑀫𑀕𑁆𑀕𑁄, 𑀫𑁄𑀓𑁆𑀔𑁄 𑀘𑀘𑁆𑀘𑀦𑁆𑀢𑀺𑀓𑀁 [𑀫𑁄𑀓𑁆𑀔𑀤𑀁 𑀲𑀦𑁆𑀢𑀺𑀓𑀁 (𑀲𑁆𑀬𑀸.)] 𑀲𑀼𑀔𑀁;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀕𑀫𑀦𑀁 𑀫𑁂 𑀲𑀫𑀺𑀚𑁆𑀛𑀢𑀼.

𑁯𑁩. ‘‘‘𑀲𑀗𑁆𑀖𑁄 𑀘𑁂 𑀢𑀺𑀡𑁆𑀡𑀓𑀦𑁆𑀢𑀸𑀭𑁄, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁄 𑀅𑀦𑀼𑀢𑁆𑀢𑀭𑁄;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀕𑀫𑀦𑀁 𑀫𑁂 𑀲𑀫𑀺𑀚𑁆𑀛𑀢𑀼’.

𑁯𑁪. ‘‘𑀲𑀳 𑀓𑀢𑁂 𑀲𑀘𑁆𑀘𑀯𑀭𑁂, 𑀫𑀕𑁆𑀕𑀸 𑀅𑀧𑀕𑀢𑀁 𑀚𑀮𑀁;

𑀢𑀢𑁄 𑀲𑀼𑀔𑁂𑀦 𑀉𑀢𑁆𑀢𑀺𑀡𑁆𑀡𑁄, 𑀦𑀤𑀻𑀢𑀻𑀭𑁂 𑀫𑀦𑁄𑀭𑀫𑁂.

𑁯𑁫. ‘‘𑀦𑀺𑀲𑀺𑀦𑁆𑀦𑀁 𑀅𑀤𑁆𑀤𑀲𑀁 𑀩𑀼𑀤𑁆𑀥𑀁, 𑀉𑀤𑁂𑀦𑁆𑀢𑀁𑀯 𑀧𑀪𑀗𑁆𑀓𑀭𑀁;

𑀚𑀮𑀦𑁆𑀢𑀁 𑀳𑁂𑀫𑀲𑁂𑀮𑀁𑀯, 𑀤𑀻𑀧𑀭𑀼𑀓𑁆𑀔𑀁𑀯 𑀚𑁄𑀢𑀺𑀢𑀁.

𑁯𑁬. ‘‘𑀲𑀲𑀺𑀁𑀯 𑀢𑀸𑀭𑀸𑀲𑀳𑀺𑀢𑀁, 𑀲𑀸𑀯𑀓𑁂𑀳𑀺 𑀧𑀼𑀭𑀓𑁆𑀔𑀢𑀁;

𑀯𑀸𑀲𑀯𑀁 𑀯𑀺𑀬 𑀯𑀲𑁆𑀲𑀦𑁆𑀢𑀁, 𑀤𑁂𑀲𑀦𑀸𑀚𑀮𑀤𑀦𑁆𑀢𑀭𑀁 [𑀤𑁂𑀯𑁂𑀦 𑀚𑀮𑀦𑀦𑁆𑀤𑀦𑀁 (𑀲𑁆𑀬𑀸. 𑀧𑀻.)].

𑁯𑁭. ‘‘𑀯𑀦𑁆𑀤𑀺𑀢𑁆𑀯𑀸𑀦 𑀲𑀳𑀸𑀫𑀘𑁆𑀘𑁄, 𑀏𑀓𑀫𑀦𑁆𑀢𑀫𑀼𑀧𑀸𑀯𑀺𑀲𑀺𑀁;

𑀢𑀢𑁄 𑀦𑁄 𑀆𑀲𑀬𑀁 [𑀢𑀢𑁄 𑀅𑀚𑁆𑀛𑀸𑀲𑀬𑀁 (𑀲𑁆𑀬𑀸.)] 𑀜𑀢𑁆𑀯𑀸, 𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑀬𑀺.

𑁯𑁮. ‘‘𑀲𑀼𑀢𑁆𑀯𑀸𑀦 𑀥𑀫𑁆𑀫𑀁 𑀯𑀺𑀫𑀮𑀁, 𑀅𑀯𑁄𑀘𑀼𑀫𑁆𑀳 𑀫𑀬𑀁 𑀚𑀺𑀦𑀁;

‘𑀧𑀩𑁆𑀩𑀸𑀚𑁂𑀳𑀺 𑀫𑀳𑀸𑀯𑀻𑀭, 𑀦𑀺𑀩𑁆𑀩𑀺𑀦𑁆𑀤𑀸𑀫𑁆𑀳 [𑀦𑀺𑀩𑁆𑀩𑀺𑀦𑁆𑀦𑀸𑀫𑁆𑀳 (𑀲𑀻. 𑀧𑀻.), 𑀑𑀢𑀺𑀡𑁆𑀡𑀫𑁆𑀳 (𑀲𑁆𑀬𑀸.)] 𑀫𑀬𑀁 𑀪𑀯𑁂’.

𑁯𑁯. ‘‘‘𑀲𑁆𑀯𑀓𑁆𑀔𑀸𑀢𑁄 𑀪𑀺𑀓𑁆𑀔𑀯𑁂 𑀥𑀫𑁆𑀫𑁄, 𑀤𑀼𑀓𑁆𑀔𑀦𑁆𑀢𑀓𑀭𑀡𑀸𑀬 𑀯𑁄;

𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁’, 𑀇𑀘𑁆𑀘𑀸𑀳 𑀫𑀼𑀦𑀺𑀲𑀢𑁆𑀢𑀫𑁄.

𑁧𑁦𑁦. ‘‘𑀲𑀳 𑀯𑀸𑀘𑀸𑀬 𑀲𑀩𑁆𑀩𑁂𑀧𑀺, 𑀪𑀺𑀓𑁆𑀔𑀼𑀯𑁂𑀲𑀥𑀭𑀸 𑀫𑀬𑀁;

𑀅𑀳𑀼𑀫𑁆𑀳 𑀉𑀧𑀲𑀫𑁆𑀧𑀦𑁆𑀦𑀸, 𑀲𑁄𑀢𑀸𑀧𑀦𑁆𑀦𑀸 𑀘 𑀲𑀸𑀲𑀦𑁂.

𑁧𑁦𑁧. ‘‘𑀢𑀢𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸, 𑀅𑀦𑀼𑀲𑀸𑀲𑀺 𑀯𑀺𑀦𑀸𑀬𑀓𑁄;

𑀅𑀦𑀼𑀲𑀺𑀝𑁆𑀞𑁄 𑀚𑀺𑀦𑁂𑀦𑀸𑀳𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁦𑁨. ‘‘𑀢𑀢𑁄 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 [𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀢𑀁 (𑀲𑀻. 𑀧𑀻.)], 𑀅𑀦𑀼𑀲𑀸𑀲𑀺𑀫𑀳𑀁 𑀢𑀤𑀸;

𑀫𑀫𑀸𑀦𑀼𑀲𑀸𑀲𑀦𑀓𑀭𑀸, 𑀢𑁂𑀧𑀺 𑀆𑀲𑀼𑀁 𑀅𑀦𑀸𑀲𑀯𑀸.

𑁧𑁦𑁩. ‘‘𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁;

𑀪𑀺𑀓𑁆𑀔𑀼𑀑𑀯𑀸𑀤𑀓𑀸𑀦𑀕𑁆𑀕𑁄, 𑀓𑀧𑁆𑀧𑀺𑀦𑁄𑀢𑀺 𑀫𑀳𑀸𑀚𑀦𑁂.

𑁧𑁦𑁪. ‘‘𑀲𑀢𑀲𑀳𑀲𑁆𑀲𑁂 𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥;

𑀧𑀫𑀼𑀢𑁆𑀢𑁄 𑀲𑀭𑀯𑁂𑀕𑁄𑀯, 𑀓𑀺𑀮𑁂𑀲𑁂 𑀛𑀸𑀧𑀬𑀺𑀁 [𑀛𑀸𑀧𑀬𑀻 (𑀲𑀻.)] 𑀫𑀫.

𑁧𑁦𑁫. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦𑁬. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁦𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.