𑁯. 𑀲𑀼𑀪𑀤𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁧. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀚𑀦𑀢𑀁 𑀉𑀤𑁆𑀥𑀭𑀺𑀢𑁆𑀯𑀸𑀦, 𑀦𑀺𑀩𑁆𑀩𑀸𑀬𑀢𑀺 𑀫𑀳𑀸𑀬𑀲𑁄.

𑁧𑁦𑁨. ‘‘𑀦𑀺𑀩𑁆𑀩𑀸𑀬𑀦𑁆𑀢𑁂 𑀘 𑀲𑀫𑁆𑀩𑀼𑀤𑁆𑀥𑁂, 𑀤𑀲𑀲𑀳𑀲𑁆𑀲𑀺 𑀓𑀫𑁆𑀧𑀣;

𑀚𑀦𑀓𑀸𑀬𑁄 𑀫𑀳𑀸 𑀆𑀲𑀺, 𑀤𑁂𑀯𑀸 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸.

𑁧𑁦𑁩. ‘‘𑀘𑀦𑁆𑀤𑀦𑀁 𑀧𑀽𑀭𑀬𑀺𑀢𑁆𑀯𑀸𑀦, 𑀢𑀕𑀭𑀸𑀫𑀮𑁆𑀮𑀺𑀓𑀸𑀳𑀺 𑀘;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀆𑀭𑁄𑀧𑀬𑀺𑀁 [𑀆𑀮𑁂𑀧𑁂𑀲𑀺𑀁 (𑀲𑀻.), 𑀆𑀭𑁄𑀧𑁂𑀲𑀺𑀁 (𑀲𑁆𑀬𑀸.)] 𑀦𑀭𑀼𑀢𑁆𑀢𑀫𑀁.

𑁧𑁦𑁪. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀦𑀺𑀧𑀦𑁆𑀦𑀓𑁄𑀯 𑀲𑀫𑁆𑀩𑀼𑀤𑁆𑀥𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁦𑁫. ‘‘‘𑀬𑁄 𑀫𑁂 𑀧𑀘𑁆𑀙𑀺𑀫𑀓𑁂 𑀓𑀸𑀮𑁂, 𑀕𑀦𑁆𑀥𑀫𑀸𑀮𑁂𑀦 [𑀕𑀦𑁆𑀥𑀫𑀮𑁆𑀮𑁂𑀦 (𑀲𑁆𑀬𑀸. 𑀓.) 𑀦𑀧𑀼𑀁𑀲𑀓𑁂𑀓𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁] 𑀙𑀸𑀤𑀬𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁧𑁦𑁬. ‘‘‘𑀇𑀢𑁄 𑀘𑀼𑀢𑁄 𑀅𑀬𑀁 𑀧𑁄𑀲𑁄, 𑀢𑀼𑀲𑀺𑀢𑀓𑀸𑀬𑀁 𑀕𑀫𑀺𑀲𑁆𑀲𑀢𑀺;

𑀢𑀢𑁆𑀣 𑀭𑀚𑁆𑀚𑀁 𑀓𑀭𑀺𑀢𑁆𑀯𑀸𑀦, 𑀦𑀺𑀫𑁆𑀫𑀸𑀦𑀁 𑀲𑁄 𑀕𑀫𑀺𑀲𑁆𑀲𑀢𑀺.

𑁧𑁦𑁭. ‘‘‘𑀏𑀢𑁂𑀦𑁂𑀯 𑀉𑀧𑀸𑀬𑁂𑀦, 𑀤𑀢𑁆𑀯𑀸 𑀫𑀸𑀮𑀁 [𑀫𑀮𑁆𑀬𑀁 (𑀲𑀻.), 𑀫𑀮𑁆𑀮𑀁 (𑀲𑁆𑀬𑀸. 𑀓.)] 𑀯𑀭𑀼𑀢𑁆𑀢𑀫𑀁;

𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄 𑀲𑁄, 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀲𑁆𑀲𑀢𑀺.

𑁧𑁦𑁮. ‘‘‘𑀧𑀼𑀦𑀸𑀧𑀺 𑀢𑀼𑀲𑀺𑀢𑁂 𑀓𑀸𑀬𑁂, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺𑀬𑀁 𑀦𑀭𑁄;

𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺.

𑁧𑁦𑁯. ‘‘‘𑀲𑀓𑁆𑀬𑀧𑀼𑀢𑁆𑀢𑁄 𑀫𑀳𑀸𑀦𑀸𑀕𑁄, 𑀅𑀕𑁆𑀕𑁄 𑀮𑁄𑀓𑁂 𑀲𑀤𑁂𑀯𑀓𑁂;

𑀩𑁄𑀥𑀬𑀺𑀢𑁆𑀯𑀸 𑀩𑀳𑀽 𑀲𑀢𑁆𑀢𑁂, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.

𑁧𑁧𑁦. ‘‘‘𑀢𑀤𑀸 𑀲𑁄𑀧𑀕𑀢𑁄 𑀲𑀦𑁆𑀢𑁄, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀉𑀧𑀲𑀗𑁆𑀓𑀫𑁆𑀫 𑀲𑀫𑁆𑀩𑀼𑀤𑁆𑀥𑀁, 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺 𑀢𑀤𑀸.

𑁧𑁧𑁧. ‘‘‘𑀳𑀸𑀲𑀬𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑁄;

𑀧𑀼𑀜𑁆𑀜𑀓𑀫𑁆𑀫𑀁 𑀧𑀭𑀺𑀜𑁆𑀜𑀸𑀬, 𑀲𑀘𑁆𑀘𑀸𑀦𑀺 𑀯𑀺𑀯𑀭𑀺𑀲𑁆𑀲𑀢𑀺.

𑁧𑁧𑁨. ‘‘‘𑀆𑀭𑀤𑁆𑀥𑁄 𑀘 𑀅𑀬𑀁 𑀧𑀜𑁆𑀳𑁄, 𑀢𑀼𑀝𑁆𑀞𑁄 𑀏𑀓𑀕𑁆𑀕𑀫𑀸𑀦𑀲𑁄;

𑀲𑀢𑁆𑀣𑀸𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀩𑁆𑀩𑀚𑁆𑀚𑀁 𑀬𑀸𑀘𑀬𑀺𑀲𑁆𑀲𑀢𑀺.

𑁧𑁧𑁩. ‘‘‘𑀧𑀲𑀦𑁆𑀦𑀫𑀸𑀦𑀲𑀁 𑀤𑀺𑀲𑁆𑀯𑀸, 𑀲𑀓𑀓𑀫𑁆𑀫𑁂𑀦 𑀢𑁄𑀲𑀺𑀢𑀁;

𑀧𑀩𑁆𑀩𑀸𑀚𑁂𑀲𑁆𑀲𑀢𑀺 𑀲𑁄 𑀩𑀼𑀤𑁆𑀥𑁄, 𑀅𑀕𑁆𑀕𑀫𑀕𑁆𑀕𑀲𑁆𑀲 𑀓𑁄𑀯𑀺𑀤𑁄.

𑁧𑁧𑁪. ‘‘‘𑀯𑀸𑀬𑀫𑀺𑀢𑁆𑀯𑀸𑀦𑀬𑀁 𑀧𑁄𑀲𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑀧𑀜𑁆𑀘𑀫𑀪𑀸𑀡𑀯𑀸𑀭𑀁.

𑁧𑁧𑁫. ‘‘𑀧𑀼𑀩𑁆𑀩𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑁄, 𑀏𑀓𑀕𑁆𑀕𑁄 𑀲𑀼𑀲𑀫𑀸𑀳𑀺𑀢𑁄;

𑀩𑀼𑀤𑁆𑀥𑀲𑁆𑀲 𑀑𑀭𑀲𑁄 𑀧𑀼𑀢𑁆𑀢𑁄, 𑀥𑀫𑁆𑀫𑀚𑁄𑀫𑁆𑀳𑀺 𑀲𑀼𑀦𑀺𑀫𑁆𑀫𑀺𑀢𑁄.

𑁧𑁧𑁬. ‘‘𑀥𑀫𑁆𑀫𑀭𑀸𑀚𑀁 𑀉𑀧𑀕𑀫𑁆𑀫, 𑀅𑀧𑀼𑀘𑁆𑀙𑀺𑀁 𑀧𑀜𑁆𑀳𑀫𑀼𑀢𑁆𑀢𑀫𑀁;

𑀓𑀣𑀬𑀦𑁆𑀢𑁄 𑀘 𑀫𑁂 𑀧𑀜𑁆𑀳𑀁, 𑀥𑀫𑁆𑀫𑀲𑁄𑀢𑀁 𑀉𑀧𑀸𑀦𑀬𑀺.

𑁧𑁧𑁭. ‘‘𑀢𑀲𑁆𑀲𑀸𑀳𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀺𑀳𑀸𑀲𑀺𑀁 𑀲𑀸𑀲𑀦𑁂 𑀭𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁧𑁮. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀚𑀮𑀚𑀼𑀢𑁆𑀢𑀫𑀦𑀸𑀬𑀓𑁄;

𑀦𑀺𑀩𑁆𑀩𑀸𑀬𑀺 𑀅𑀦𑀼𑀧𑀸𑀤𑀸𑀦𑁄, 𑀤𑀻𑀧𑁄𑀯 𑀢𑁂𑀮𑀲𑀗𑁆𑀔𑀬𑀸.

𑁧𑁧𑁯. ‘‘𑀲𑀢𑁆𑀢𑀬𑁄𑀚𑀦𑀺𑀓𑀁 𑀆𑀲𑀺, 𑀣𑀽𑀧𑀜𑁆𑀘 𑀭𑀢𑀦𑀸𑀫𑀬𑀁;

𑀥𑀚𑀁 𑀢𑀢𑁆𑀣 𑀅𑀧𑀽𑀚𑁂𑀲𑀺𑀁, 𑀲𑀩𑁆𑀩𑀪𑀤𑁆𑀤𑀁 𑀫𑀦𑁄𑀭𑀫𑀁.

𑁧𑁨𑁦. ‘‘𑀓𑀲𑁆𑀲𑀧𑀲𑁆𑀲 𑀘 𑀩𑀼𑀤𑁆𑀥𑀲𑁆𑀲, 𑀢𑀺𑀲𑁆𑀲𑁄 𑀦𑀸𑀫𑀕𑁆𑀕𑀲𑀸𑀯𑀓𑁄;

𑀧𑀼𑀢𑁆𑀢𑁄 𑀫𑁂 𑀑𑀭𑀲𑁄 𑀆𑀲𑀺, 𑀤𑀸𑀬𑀸𑀤𑁄 𑀚𑀺𑀦𑀲𑀸𑀲𑀦𑁂.

𑁧𑁨𑁧. ‘‘𑀢𑀲𑁆𑀲 𑀳𑀻𑀦𑁂𑀦 𑀫𑀦𑀲𑀸, 𑀯𑀸𑀘𑀁 𑀪𑀸𑀲𑀺𑀁 𑀅𑀪𑀤𑁆𑀤𑀓𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀘𑁆𑀙𑀸 𑀫𑁂 𑀆𑀲𑀺 𑀪𑀤𑁆𑀤𑀓𑀁 [𑀧𑀘𑁆𑀙𑀺𑀫𑁂 𑀅𑀤𑁆𑀤𑀲𑀁 𑀚𑀺𑀦𑀁 (𑀲𑀻.)].

𑁧𑁨𑁨. ‘‘𑀉𑀧𑀯𑀢𑁆𑀢𑀦𑁂 𑀲𑀸𑀮𑀯𑀦𑁂, 𑀧𑀘𑁆𑀙𑀺𑀫𑁂 𑀲𑀬𑀦𑁂 𑀫𑀼𑀦𑀺;

𑀧𑀩𑁆𑀩𑀸𑀚𑁂𑀲𑀺 𑀫𑀳𑀸𑀯𑀻𑀭𑁄, 𑀳𑀺𑀢𑁄 𑀓𑀸𑀭𑀼𑀡𑀺𑀓𑁄 𑀚𑀺𑀦𑁄.

𑁧𑁨𑁩. ‘‘𑀅𑀚𑁆𑀚𑁂𑀯 𑀤𑀸𑀦𑀺 𑀧𑀩𑁆𑀩𑀚𑁆𑀚𑀸, 𑀅𑀚𑁆𑀚𑁂𑀯 𑀉𑀧𑀲𑀫𑁆𑀧𑀤𑀸;

𑀅𑀚𑁆𑀚𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀲𑀫𑁆𑀫𑀼𑀔𑀸 𑀤𑁆𑀯𑀺𑀧𑀤𑀼𑀢𑁆𑀢𑀫𑁂.

𑁧𑁨𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀪𑀤𑁆𑀤𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀪𑀤𑁆𑀤𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.