𑁧𑁦. 𑀘𑀼𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁨𑁫. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀅𑀕𑁆𑀖𑀺𑀬𑀁 𑀓𑀸𑀭𑀬𑀺𑀢𑁆𑀯𑀸𑀦, 𑀚𑀸𑀢𑀺𑀧𑀼𑀧𑁆𑀨𑁂𑀳𑀺 𑀙𑀸𑀤𑀬𑀺𑀁.

𑁧𑁨𑁬. ‘‘𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀦 𑀢𑀁 𑀧𑀼𑀧𑁆𑀨𑀁, 𑀩𑀼𑀤𑁆𑀥𑀲𑁆𑀲 𑀉𑀧𑀦𑀸𑀫𑀬𑀺𑀁;

𑀧𑀼𑀧𑁆𑀨𑀸𑀯𑀲𑁂𑀲𑀁 𑀧𑀕𑁆𑀕𑀬𑁆𑀳, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁧𑁨𑁭. ‘‘𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑀁, 𑀩𑀼𑀤𑁆𑀥𑀁 𑀮𑁄𑀓𑀕𑁆𑀕𑀦𑀸𑀬𑀓𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀼𑀧𑁆𑀨𑀕𑁆𑀖𑀺𑀬𑀫𑀼𑀧𑀸𑀦𑀬𑀺𑀁.

𑁧𑁨𑁮. ‘‘𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀲𑀫𑁆𑀩𑀼𑀤𑁆𑀥𑁄, 𑀢𑀺𑀡𑁆𑀡𑁄𑀖𑁂𑀳𑀺 𑀧𑀼𑀭𑀓𑁆𑀔𑀢𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁨𑁯. ‘‘‘𑀤𑀺𑀩𑁆𑀩𑀕𑀦𑁆𑀥𑀁 𑀧𑀯𑀸𑀬𑀦𑁆𑀢𑀁, 𑀬𑁄 𑀫𑁂 𑀧𑀼𑀧𑁆𑀨𑀕𑁆𑀖𑀺𑀬𑀁 𑀅𑀤𑀸;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁧𑁩𑁦. ‘‘‘𑀇𑀢𑁄 𑀘𑀼𑀢𑁄 𑀅𑀬𑀁 𑀧𑁄𑀲𑁄, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑁄;

𑀚𑀸𑀢𑀺𑀧𑀼𑀧𑁆𑀨𑁂𑀳𑀺 𑀧𑀭𑀺𑀓𑀺𑀡𑁆𑀡𑁄, 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀢𑀺.

𑁧𑁩𑁧. ‘‘‘𑀉𑀩𑁆𑀩𑀺𑀤𑁆𑀥𑀁 𑀪𑀯𑀦𑀁 𑀢𑀲𑁆𑀲, 𑀲𑁄𑀯𑀡𑁆𑀡𑀜𑁆𑀘 𑀫𑀡𑀻𑀫𑀬𑀁;

𑀩𑁆𑀬𑀫𑁆𑀳𑀁 𑀧𑀸𑀢𑀼𑀪𑀯𑀺𑀲𑁆𑀲𑀢𑀺, 𑀧𑀼𑀜𑁆𑀜𑀓𑀫𑁆𑀫𑀧𑁆𑀧𑀪𑀸𑀯𑀺𑀢𑀁.

𑁧𑁩𑁨. ‘‘‘𑀘𑀢𑀼𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀁 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀅𑀦𑀼𑀪𑁄𑀲𑁆𑀲𑀢𑀺 𑀲𑀫𑁆𑀧𑀢𑁆𑀢𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁧𑁩𑁩. ‘‘‘𑀧𑀣𑀩𑁆𑀬𑀸 𑀭𑀚𑁆𑀚𑀁 𑀢𑀺𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺;

𑀧𑀜𑁆𑀘𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁧𑁩𑁪. ‘‘‘𑀤𑀼𑀚𑁆𑀚𑀬𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀫𑀦𑀼𑀚𑀸𑀥𑀺𑀧𑁄;

𑀅𑀦𑀼𑀪𑁄𑀢𑁆𑀯𑀸𑀦 𑀢𑀁 𑀧𑀼𑀜𑁆𑀜𑀁, 𑀲𑀓𑀓𑀫𑁆𑀫𑀁 𑀅𑀧𑀲𑁆𑀲𑀺𑀢𑁄 [𑀲𑀓𑀓𑀫𑁆𑀫𑀽𑀧𑀲𑀁𑀳𑀺𑀢𑁄 (𑀲𑁆𑀬𑀸.)].

𑁧𑁩𑁫. ‘‘‘𑀯𑀺𑀦𑀺𑀧𑀸𑀢𑀁 𑀅𑀕𑀦𑁆𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀳𑀺𑀭𑀜𑁆𑀜𑀁 𑀢𑀲𑁆𑀲 [𑀳𑀺𑀭𑀜𑁆𑀜𑀲𑁆𑀲 𑀘 (𑀲𑀻. 𑀓.)] 𑀦𑀺𑀘𑀺𑀢𑀁, 𑀓𑁄𑀝𑀺𑀲𑀢𑀫𑀦𑀧𑁆𑀧𑀓𑀁.

𑁧𑁩𑁬. ‘‘‘𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀬𑁄𑀦𑀺𑀫𑁆𑀳𑀺, 𑀩𑁆𑀭𑀸𑀳𑁆𑀫𑀡𑁂 𑀲𑁄 𑀪𑀯𑀺𑀲𑁆𑀲𑀢𑀺;

𑀯𑀗𑁆𑀕𑀦𑁆𑀢𑀲𑁆𑀲 𑀲𑀼𑀢𑁄 𑀥𑀻𑀫𑀸, 𑀲𑀸𑀭𑀺𑀬𑀸 𑀑𑀭𑀲𑁄 𑀧𑀺𑀬𑁄.

𑁧𑁩𑁭. ‘‘‘𑀲𑁄 𑀘 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸, 𑀅𑀗𑁆𑀕𑀻𑀭𑀲𑀲𑁆𑀲 𑀲𑀸𑀲𑀦𑁂;

𑀘𑀽𑀴𑀘𑀼𑀦𑁆𑀤𑁄𑀢𑀺 [𑀘𑀽𑀮𑀘𑀼𑀦𑁆𑀤𑁄𑀢𑀺 (𑀲𑀻.)] 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁧𑁩𑁮. ‘‘‘𑀲𑀸𑀫𑀡𑁂𑀭𑁄𑀯 𑀲𑁄 𑀲𑀦𑁆𑀢𑁄, 𑀔𑀻𑀡𑀸𑀲𑀯𑁄 𑀪𑀯𑀺𑀲𑁆𑀲𑀢𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁧𑁩𑁯. ‘‘𑀉𑀧𑀝𑁆𑀞𑀳𑀺𑀁 𑀫𑀳𑀸𑀯𑀻𑀭𑀁, 𑀅𑀜𑁆𑀜𑁂 𑀘 𑀧𑁂𑀲𑀮𑁂 𑀩𑀳𑀽;

𑀪𑀸𑀢𑀭𑀁 𑀫𑁂 𑀘𑀼𑀧𑀝𑁆𑀞𑀸𑀲𑀺𑀁, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸.

𑁧𑁪𑁦. ‘‘𑀪𑀸𑀢𑀭𑀁 𑀫𑁂 𑀉𑀧𑀝𑁆𑀞𑀺𑀢𑁆𑀯𑀸, 𑀥𑀸𑀢𑀼𑀁 𑀧𑀢𑁆𑀢𑀫𑁆𑀳𑀺 𑀑𑀳𑀺𑀬 [𑀑𑀧𑀺𑀬 (𑀲𑀻.), 𑀑𑀘𑀺𑀬 (𑀲𑁆𑀬𑀸.)];

𑀲𑀫𑁆𑀩𑀼𑀤𑁆𑀥𑀁 𑀉𑀧𑀦𑀸𑀫𑁂𑀲𑀺𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁.

𑁧𑁪𑁧. ‘‘𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀩𑀼𑀤𑁆𑀥𑁄 𑀮𑁄𑀓𑁂 𑀲𑀤𑁂𑀯𑀓𑁂;

𑀲𑀦𑁆𑀤𑀲𑁆𑀲𑀬𑀦𑁆𑀢𑁄 𑀢𑀁 𑀥𑀸𑀢𑀼𑀁, 𑀓𑀺𑀢𑁆𑀢𑀬𑀺 𑀅𑀕𑁆𑀕𑀲𑀸𑀯𑀓𑀁.

𑁧𑁪𑁨. ‘‘𑀘𑀺𑀢𑁆𑀢𑀜𑁆𑀘 𑀲𑀼𑀯𑀺𑀫𑀼𑀢𑁆𑀢𑀁 𑀫𑁂, 𑀲𑀤𑁆𑀥𑀸 𑀫𑀬𑁆𑀳𑀁 𑀧𑀢𑀺𑀝𑁆𑀞𑀺𑀢𑀸;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸𑀦𑀼𑀧𑁆𑀧𑀢𑁆𑀢𑀸, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀨𑀲𑁆𑀲𑀺𑀢𑀸 [𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂 (𑀲𑁆𑀬𑀸.)];

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀼𑀦𑁆𑀤𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀘𑀼𑀦𑁆𑀤𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀉𑀧𑀸𑀮𑀺𑀯𑀕𑁆𑀕𑁄 𑀧𑀜𑁆𑀘𑀫𑁄.