𑁮. 𑀘𑀗𑁆𑀓𑀫𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁯𑁩. ‘‘𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀇𑀝𑁆𑀞𑀓𑀸𑀳𑀺 𑀘𑀺𑀦𑀺𑀢𑁆𑀯𑀸𑀦, 𑀘𑀗𑁆𑀓𑀫𑀁 𑀓𑀸𑀭𑀬𑀺𑀁 𑀅𑀳𑀁.

𑁯𑁪. ‘‘𑀉𑀘𑁆𑀘𑀢𑁄 𑀧𑀜𑁆𑀘𑀭𑀢𑀦𑀁, 𑀘𑀗𑁆𑀓𑀫𑀁 𑀲𑀸𑀥𑀼𑀫𑀸𑀧𑀺𑀢𑀁;

𑀆𑀬𑀸𑀫𑀢𑁄 𑀳𑀢𑁆𑀣𑀲𑀢𑀁, 𑀪𑀸𑀯𑀦𑀻𑀬𑁆𑀬𑀁 𑀫𑀦𑁄𑀭𑀫𑀁.

𑁯𑁫. ‘‘𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀅𑀢𑁆𑀣𑀤𑀲𑁆𑀲𑀻 𑀦𑀭𑀼𑀢𑁆𑀢𑀫𑁄;

𑀳𑀢𑁆𑀣𑁂𑀦 𑀧𑀼𑀮𑀺𑀦𑀁 𑀕𑀬𑁆𑀳, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁯𑁬. ‘‘‘𑀇𑀫𑀺𑀦𑀸 𑀧𑀼𑀮𑀺𑀦𑀤𑀸𑀦𑁂𑀦, 𑀘𑀗𑁆𑀓𑀫𑀁 𑀲𑀼𑀓𑀢𑁂𑀦 𑀘;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀁, 𑀧𑀼𑀮𑀺𑀦𑀁 𑀅𑀦𑀼𑀪𑁄𑀲𑁆𑀲𑀢𑀺.

𑁯𑁭. ‘‘‘𑀢𑀻𑀡𑀺 𑀓𑀧𑁆𑀧𑀸𑀦𑀺 𑀤𑁂𑀯𑁂𑀲𑀼, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀅𑀦𑀼𑀪𑁄𑀲𑁆𑀲𑀢𑀺 𑀲𑀫𑁆𑀧𑀢𑁆𑀢𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁯𑁮. ‘‘‘𑀫𑀦𑀼𑀲𑁆𑀲𑀮𑁄𑀓𑀫𑀸𑀕𑀦𑁆𑀢𑁆𑀯𑀸, 𑀭𑀸𑀚𑀸 𑀭𑀝𑁆𑀞𑁂 𑀪𑀯𑀺𑀲𑁆𑀲𑀢𑀺;

𑀢𑀺𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻 𑀘, 𑀫𑀳𑀺𑀬𑀸 𑀲𑁄 𑀪𑀯𑀺𑀲𑁆𑀲𑀢𑀺’.

𑁯𑁯. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀘𑀗𑁆𑀓𑀫𑀲𑁆𑀲 𑀇𑀤𑀁 𑀨𑀮𑀁.

𑁧𑁦𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀗𑁆𑀓𑀫𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀘𑀗𑁆𑀓𑀫𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.