𑁧. 𑀪𑀸𑀕𑀺𑀦𑁂𑀬𑁆𑀬𑀼𑀧𑀸𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀧𑀭𑀺𑀯𑀼𑀢𑁄 [𑀧𑀭𑁂𑀢𑁄 (𑀓. 𑀅𑀝𑁆𑀞)] 𑀮𑁄𑀓𑀦𑀸𑀬𑀓𑁄;

𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄 𑀲𑁄, 𑀕𑀘𑁆𑀙𑀢𑁂 𑀧𑀝𑀺𑀲𑀮𑁆𑀮𑀺𑀢𑀼𑀁.

𑁨. ‘‘𑀅𑀚𑀺𑀦𑁂𑀦 𑀦𑀺𑀯𑀢𑁆𑀣𑁄𑀳𑀁, 𑀢𑀺𑀤𑀡𑁆𑀟𑀧𑀭𑀺𑀥𑀸𑀭𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀩𑁆𑀬𑀽𑀴𑁆𑀳𑀁, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁩. ‘‘𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁪. ‘‘𑀬𑀣𑀸𑀡𑁆𑀟𑀚𑀸 𑀘 𑀲𑀁𑀲𑁂𑀤𑀸, 𑀑𑀧𑀧𑀸𑀢𑀻 𑀚𑀮𑀸𑀩𑀼𑀚𑀸;

𑀓𑀸𑀓𑀸𑀤𑀺𑀧𑀓𑁆𑀔𑀺𑀦𑁄 𑀲𑀩𑁆𑀩𑁂, 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀤𑀸.

𑁫. ‘‘𑀬𑁂 𑀓𑁂𑀘𑀺 𑀧𑀸𑀡𑀪𑀽𑀢𑀢𑁆𑀣𑀺, 𑀲𑀜𑁆𑀜𑀺𑀦𑁄 𑀯𑀸 𑀅𑀲𑀜𑁆𑀜𑀺𑀦𑁄;

𑀲𑀩𑁆𑀩𑁂 𑀢𑁂 𑀢𑀯 𑀜𑀸𑀡𑀫𑁆𑀳𑀺, 𑀅𑀦𑁆𑀢𑁄 𑀳𑁄𑀦𑁆𑀢𑀺 𑀲𑀫𑁄𑀕𑀥𑀸.

𑁬. ‘‘𑀕𑀦𑁆𑀥𑀸 𑀘 𑀧𑀩𑁆𑀩𑀢𑁂𑀬𑁆𑀬𑀸 𑀬𑁂, 𑀳𑀺𑀫𑀯𑀦𑁆𑀢𑀦𑀕𑀼𑀢𑁆𑀢𑀫𑁂;

𑀲𑀩𑁆𑀩𑁂 𑀢𑁂 𑀢𑀯 𑀲𑀻𑀮𑀫𑁆𑀳𑀺, 𑀓𑀮𑀸𑀬𑀧𑀺 𑀦 𑀬𑀼𑀚𑁆𑀚𑀭𑁂.

𑁭. ‘‘𑀫𑁄𑀳𑀦𑁆𑀥𑀓𑀸𑀭𑀧𑀓𑁆𑀔𑀦𑁆𑀤𑁄, 𑀅𑀬𑀁 𑀮𑁄𑀓𑁄 𑀲𑀤𑁂𑀯𑀓𑁄;

𑀢𑀯 𑀜𑀸𑀡𑀫𑁆𑀳𑀺 𑀚𑁄𑀢𑀦𑁆𑀢𑁂, 𑀅𑀦𑁆𑀥𑀓𑀸𑀭𑀸 𑀯𑀺𑀥𑀁𑀲𑀺𑀢𑀸.

𑁮. ‘‘𑀬𑀣𑀸 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂, 𑀳𑁄𑀦𑁆𑀢𑀺 𑀲𑀢𑁆𑀢𑀸 𑀢𑀫𑁄𑀕𑀢𑀸;

𑀏𑀯𑀁 𑀩𑀼𑀤𑁆𑀥𑁂 𑀅𑀦𑀼𑀧𑁆𑀧𑀦𑁆𑀦𑁂, 𑀳𑁄𑀢𑀺 𑀮𑁄𑀓𑁄 𑀢𑀫𑁄𑀕𑀢𑁄.

𑁯. ‘‘𑀬𑀣𑁄𑀤𑀬𑀦𑁆𑀢𑁄 𑀆𑀤𑀺𑀘𑁆𑀘𑁄, 𑀯𑀺𑀦𑁄𑀤𑁂𑀢𑀺 𑀢𑀫𑀁 𑀲𑀤𑀸;

𑀢𑀣𑁂𑀯 𑀢𑁆𑀯𑀁 𑀩𑀼𑀤𑁆𑀥𑀲𑁂𑀝𑁆𑀞, 𑀯𑀺𑀤𑁆𑀥𑀁𑀲𑁂𑀲𑀺 𑀢𑀫𑀁 𑀲𑀤𑀸.

𑁧𑁦. ‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄𑀲𑀺, 𑀩𑀼𑀤𑁆𑀥𑁄 𑀮𑁄𑀓𑁂 𑀲𑀤𑁂𑀯𑀓𑁂;

𑀢𑀯 𑀓𑀫𑁆𑀫𑀸𑀪𑀺𑀭𑀤𑁆𑀥𑁂𑀦, 𑀢𑁄𑀲𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁧𑁧. ‘‘𑀢𑀁 𑀲𑀩𑁆𑀩𑀁 𑀅𑀦𑀼𑀫𑁄𑀤𑀺𑀢𑁆𑀯𑀸, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀥𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁧𑁨. ‘‘𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀫𑀳𑁂𑀲𑀺 𑀧𑀤𑀼𑀫𑀼𑀢𑁆𑀢𑀭𑁄;

𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁩. ‘‘𑀬𑁂𑀦𑀺𑀤𑀁 𑀣𑀯𑀺𑀢𑀁 𑀜𑀸𑀡𑀁, 𑀑𑀧𑀫𑁆𑀫𑁂𑀳𑀺 𑀲𑀫𑀸𑀬𑀼𑀢𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁧𑁪. ‘‘‘𑀅𑀝𑁆𑀞𑀸𑀭𑀲𑀜𑁆𑀘 𑀔𑀢𑁆𑀢𑀼𑀁 𑀲𑁄, 𑀤𑁂𑀯𑀭𑀸𑀚𑀸 𑀪𑀯𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀢𑀺𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁧𑁫. ‘‘‘𑀧𑀜𑁆𑀘𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁬. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁭. ‘‘‘𑀢𑀼𑀲𑀺𑀢𑀸 𑀳𑀺 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀳𑀻𑀦𑁄𑀯 𑀚𑀸𑀢𑀺𑀬𑀸 𑀲𑀦𑁆𑀢𑁄, 𑀉𑀧𑀸𑀮𑀺 𑀦𑀸𑀫 𑀳𑁂𑀲𑁆𑀲𑀢𑀺.

𑁧𑁮. ‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀯𑀺𑀭𑀸𑀚𑁂𑀢𑁆𑀯𑀸𑀦 𑀧𑀸𑀧𑀓𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁧𑁯. ‘‘‘𑀢𑀼𑀝𑁆𑀞𑁄 𑀘 𑀕𑁄𑀢𑀫𑁄 𑀩𑀼𑀤𑁆𑀥𑁄, 𑀲𑀓𑁆𑀬𑀧𑀼𑀢𑁆𑀢𑁄 𑀫𑀳𑀸𑀬𑀲𑁄;

𑀯𑀺𑀦𑀬𑀸𑀥𑀺𑀕𑀢𑀁 𑀢𑀲𑁆𑀲, 𑀏𑀢𑀤𑀕𑁆𑀕𑁂 𑀞𑀧𑁂𑀲𑁆𑀲𑀢𑀺’.

𑁨𑁦. ‘‘𑀲𑀤𑁆𑀥𑀸𑀬𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀓𑀢𑀓𑀺𑀘𑁆𑀘𑁄 𑀅𑀦𑀸𑀲𑀯𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁧. ‘‘𑀪𑀕𑀯𑀸 𑀘𑀸𑀦𑀼𑀓𑀫𑁆𑀧𑀻 𑀫𑀁, 𑀯𑀺𑀦𑀬𑁂𑀳𑀁 𑀯𑀺𑀲𑀸𑀭𑀤𑁄;

𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄 𑀘, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁨. ‘‘𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀫𑁆𑀳𑀺, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘 𑀧𑀜𑁆𑀘𑀲𑀼;

𑀥𑀸𑀭𑁂𑀫𑀺 𑀯𑀺𑀦𑀬𑀁 𑀲𑀩𑁆𑀩𑀁, 𑀓𑁂𑀯𑀮𑀁 𑀭𑀢𑀦𑀸𑀓𑀭𑀁 [𑀭𑀢𑀦𑀕𑁆𑀖𑀭𑀁 (𑀓.)].

𑁨𑁩. ‘‘𑀫𑀫𑀜𑁆𑀘 𑀕𑀼𑀡𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁨𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀧𑀸𑀮𑀺𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀪𑀸𑀕𑀺𑀦𑁂𑀬𑁆𑀬𑀼𑀧𑀸𑀮𑀺𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.