𑁨. 𑀲𑁄𑀡𑀓𑁄𑀴𑀺𑀯𑀺𑀲𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁫. ‘‘𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀼𑀥𑀸𑀬 𑀮𑁂𑀧𑀦𑀁 𑀓𑀢𑁆𑀯𑀸, 𑀘𑀗𑁆𑀓𑀫𑀁 𑀓𑀸𑀭𑀬𑀺𑀁 𑀅𑀳𑀁.

𑁨𑁬. ‘‘𑀦𑀸𑀦𑀸𑀯𑀡𑁂𑀳𑀺 𑀧𑀼𑀧𑁆𑀨𑁂𑀳𑀺, 𑀘𑀗𑁆𑀓𑀫𑀁 𑀲𑀦𑁆𑀣𑀭𑀺𑀁 𑀅𑀳𑀁;

𑀆𑀓𑀸𑀲𑁂 𑀯𑀺𑀢𑀸𑀦𑀁 𑀓𑀢𑁆𑀯𑀸, 𑀪𑁄𑀚𑀬𑀺𑀁 𑀩𑀼𑀤𑁆𑀥𑀫𑀼𑀢𑁆𑀢𑀫𑀁.

𑁨𑁭. ‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀲𑀼𑀩𑁆𑀩𑀢𑀁 [𑀧𑀼𑀧𑁆𑀨𑀓𑀁 (𑀓.)];

𑀤𑀻𑀖𑀲𑀸𑀮𑀁 𑀪𑀕𑀯𑀢𑁄, 𑀦𑀺𑀬𑁆𑀬𑀸𑀤𑁂𑀲𑀺𑀫𑀳𑀁 𑀢𑀤𑀸.

𑁨𑁮. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀅𑀦𑀼𑀓𑀫𑁆𑀧𑀸𑀬 𑀘𑀓𑁆𑀔𑀼𑀫𑀸.

𑁨𑁯. ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀤𑀓𑁆𑀔𑀺𑀡𑁂𑀬𑁆𑀬𑁄 𑀲𑀤𑁂𑀯𑀓𑁂;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁩𑁦. ‘‘‘𑀬𑁄 𑀲𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀤𑀻𑀖𑀲𑀸𑀮𑀁 𑀅𑀤𑀸𑀲𑀺 [𑀅𑀓𑀸𑀲𑀺 (𑀲𑀻.)] 𑀫𑁂;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁩𑁧. ‘‘‘𑀇𑀫𑀲𑁆𑀲 𑀫𑀘𑁆𑀘𑀼𑀓𑀸𑀮𑀫𑁆𑀳𑀺, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀦𑁄;

𑀲𑀳𑀲𑁆𑀲𑀬𑀼𑀢𑁆𑀢𑀲𑁆𑀲𑀭𑀣𑁄, 𑀉𑀧𑀝𑁆𑀞𑀺𑀲𑁆𑀲𑀢𑀺 𑀢𑀸𑀯𑀤𑁂.

𑁩𑁨. ‘‘‘𑀢𑁂𑀦 𑀬𑀸𑀦𑁂𑀦𑀬𑀁 𑀧𑁄𑀲𑁄, 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀢𑀺;

𑀅𑀦𑀼𑀫𑁄𑀤𑀺𑀲𑁆𑀲𑀭𑁂 𑀤𑁂𑀯𑀸, 𑀲𑀫𑁆𑀧𑀢𑁆𑀢𑁂 𑀓𑀼𑀲𑀮𑀩𑁆𑀪𑀯𑁂 [𑀓𑀼𑀲𑀮𑁂 𑀪𑀯𑁂 (𑀲𑀻. 𑀲𑁆𑀬𑀸.)].

𑁩𑁩. ‘‘‘𑀫𑀳𑀸𑀭𑀳𑀁 𑀩𑁆𑀬𑀫𑁆𑀳𑀁 𑀲𑁂𑀝𑁆𑀞𑀁, 𑀭𑀢𑀦𑀫𑀢𑁆𑀢𑀺𑀓𑀮𑁂𑀧𑀦𑀁;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀁, 𑀩𑁆𑀬𑀫𑁆𑀳𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺.

𑁩𑁪. ‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀧𑀜𑁆𑀘𑀯𑀻𑀲𑀢𑀺 𑀓𑀧𑁆𑀧𑀸𑀦𑀺, 𑀤𑁂𑀯𑀭𑀸𑀚𑀸 𑀪𑀯𑀺𑀲𑁆𑀲𑀢𑀺.

𑁩𑁫. ‘‘‘𑀲𑀢𑁆𑀢𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀬𑀲𑁄𑀥𑀭𑀲𑀦𑀸𑀫𑀸 [𑀬𑀲𑁂𑀥𑀭𑀸 𑀲𑀫𑀸𑀦𑀸 (𑀲𑀻.)] 𑀢𑁂, 𑀲𑀩𑁆𑀩𑁂𑀧𑀺 𑀏𑀓𑀦𑀸𑀫𑀓𑀸.

𑁩𑁬. ‘‘‘𑀤𑁆𑀯𑁂 𑀲𑀫𑁆𑀧𑀢𑁆𑀢𑀻 𑀅𑀦𑀼𑀪𑁄𑀢𑁆𑀯𑀸, 𑀯𑀟𑁆𑀠𑁂𑀢𑁆𑀯𑀸 [𑀘𑀺𑀦𑀺𑀢𑁆𑀯𑀸 (𑀲𑁆𑀬𑀸.)] 𑀧𑀼𑀜𑁆𑀜𑀲𑀜𑁆𑀘𑀬𑀁;

𑀅𑀝𑁆𑀞𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁩𑁭. ‘‘‘𑀢𑀢𑁆𑀭𑀸𑀧𑀺 𑀩𑁆𑀬𑀫𑁆𑀳𑀁 𑀧𑀯𑀭𑀁, 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑀁;

𑀤𑀲𑀲𑀤𑁆𑀤𑀸𑀯𑀺𑀯𑀺𑀢𑁆𑀢𑀁 𑀢𑀁, 𑀧𑀼𑀭𑀫𑀚𑁆𑀛𑀸𑀯𑀲𑀺𑀲𑁆𑀲𑀢𑀺.

𑁩𑁮. ‘‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀪𑀽𑀫𑀺𑀧𑀸𑀮𑁄 𑀫𑀳𑀺𑀤𑁆𑀥𑀺𑀓𑁄;

𑀑𑀓𑁆𑀓𑀸𑀓𑁄 𑀦𑀸𑀫 𑀦𑀸𑀫𑁂𑀦, 𑀭𑀸𑀚𑀸 𑀭𑀝𑁆𑀞𑁂 𑀪𑀯𑀺𑀲𑁆𑀲𑀢𑀺.

𑁩𑁯. ‘‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀁, 𑀲𑀩𑁆𑀩𑀸𑀲𑀁 𑀧𑀯𑀭𑀸 𑀘 𑀲𑀸 [𑀧𑀯𑀭𑀸𑀯 𑀬𑀸 (𑀲𑁆𑀬𑀸.), 𑀧𑀯𑀭𑀸 𑀧𑀺𑀬𑀸 (?)];

𑀅𑀪𑀺𑀚𑀸𑀢𑀸 𑀔𑀢𑁆𑀢𑀺𑀬𑀸𑀦𑀻, 𑀦𑀯 𑀧𑀼𑀢𑁆𑀢𑁂 𑀚𑀦𑁂𑀲𑁆𑀲𑀢𑀺.

𑁪𑁦. ‘‘‘𑀦𑀯 𑀧𑀼𑀢𑁆𑀢𑁂 𑀚𑀦𑁂𑀢𑁆𑀯𑀸𑀦, 𑀔𑀢𑁆𑀢𑀺𑀬𑀸𑀦𑀻 𑀫𑀭𑀺𑀲𑁆𑀲𑀢𑀺;

𑀢𑀭𑀼𑀡𑀻 𑀘 𑀧𑀺𑀬𑀸 𑀓𑀜𑁆𑀜𑀸, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀢𑀺.

𑁪𑁧. ‘‘‘𑀑𑀓𑁆𑀓𑀸𑀓𑀁 𑀢𑁄𑀲𑀬𑀺𑀢𑁆𑀯𑀸𑀦, 𑀯𑀭𑀁 𑀓𑀜𑁆𑀜𑀸 𑀮𑀪𑀺𑀲𑁆𑀲𑀢𑀺;

𑀯𑀭𑀁 𑀮𑀤𑁆𑀥𑀸𑀦 𑀲𑀸 𑀓𑀜𑁆𑀜𑀸, 𑀧𑀼𑀢𑁆𑀢𑁂 𑀧𑀩𑁆𑀩𑀸𑀚𑀬𑀺𑀲𑁆𑀲𑀢𑀺.

𑁪𑁨. ‘‘‘𑀧𑀩𑁆𑀩𑀸𑀚𑀺𑀢𑀸 𑀘 𑀢𑁂 𑀲𑀩𑁆𑀩𑁂, 𑀕𑀫𑀺𑀲𑁆𑀲𑀦𑁆𑀢𑀺 𑀦𑀕𑀼𑀢𑁆𑀢𑀫𑀁;

𑀚𑀸𑀢𑀺𑀪𑁂𑀤𑀪𑀬𑀸 𑀲𑀩𑁆𑀩𑁂, 𑀪𑀕𑀺𑀦𑀻𑀳𑀺 𑀯𑀲𑀺𑀲𑁆𑀲𑀭𑁂 [𑀲𑀁𑀯𑀲𑀺𑀲𑁆𑀲𑀭𑁂 (𑀲𑀻.)].

𑁪𑁩. ‘‘‘𑀏𑀓𑀸 𑀘 𑀓𑀜𑁆𑀜𑀸 𑀩𑁆𑀬𑀸𑀥𑀻𑀳𑀺, 𑀪𑀯𑀺𑀲𑁆𑀲𑀢𑀺 𑀧𑀭𑀺𑀓𑁆𑀔𑀢𑀸 [𑀧𑀼𑀭𑀓𑁆𑀔𑀢𑀸 (𑀲𑁆𑀬𑀸. 𑀓.)];

𑀫𑀸 𑀦𑁄 𑀚𑀸𑀢𑀺 𑀧𑀪𑀺𑀚𑁆𑀚𑀻𑀢𑀺, 𑀦𑀺𑀔𑀡𑀺𑀲𑁆𑀲𑀦𑁆𑀢𑀺 𑀔𑀢𑁆𑀢𑀺𑀬𑀸.

𑁪𑁪. ‘‘‘𑀔𑀢𑁆𑀢𑀺𑀬𑁄 𑀦𑀻𑀳𑀭𑀺𑀢𑁆𑀯𑀸𑀦, 𑀢𑀸𑀬 𑀲𑀤𑁆𑀥𑀺𑀁 𑀯𑀲𑀺𑀲𑁆𑀲𑀢𑀺;

𑀪𑀯𑀺𑀲𑁆𑀲𑀢𑀺 𑀢𑀤𑀸 𑀪𑁂𑀤𑁄, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄.

𑁪𑁫. ‘‘‘𑀢𑁂𑀲𑀁 𑀧𑀚𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑁄𑀴𑀺𑀬𑀸 𑀦𑀸𑀫 𑀚𑀸𑀢𑀺𑀬𑀸;

𑀢𑀢𑁆𑀣 𑀫𑀸𑀦𑀼𑀲𑀓𑀁 𑀪𑁄𑀕𑀁, 𑀅𑀦𑀼𑀪𑁄𑀲𑁆𑀲𑀢𑀺𑀦𑀧𑁆𑀧𑀓𑀁.

𑁪𑁬. ‘‘‘𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸𑀦, 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀢𑀺;

𑀢𑀢𑁆𑀭𑀸𑀧𑀺 𑀧𑀯𑀭𑀁 𑀩𑁆𑀬𑀫𑁆𑀳𑀁, 𑀮𑀪𑀺𑀲𑁆𑀲𑀢𑀺 𑀫𑀦𑁄𑀭𑀫𑀁.

𑁪𑁭. ‘‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀆𑀕𑀦𑁆𑀢𑁆𑀯𑀸𑀦 𑀫𑀦𑀼𑀲𑁆𑀲𑀢𑁆𑀢𑀁, 𑀲𑁄𑀡𑁄 𑀦𑀸𑀫 𑀪𑀯𑀺𑀲𑁆𑀲𑀢𑀺.

𑁪𑁮. ‘‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀧𑀤𑀳𑀁 𑀲𑀢𑁆𑀣𑀼 𑀲𑀸𑀲𑀦𑁂;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁪𑁯. ‘‘‘𑀅𑀦𑀦𑁆𑀢𑀤𑀲𑁆𑀲𑀻 𑀪𑀕𑀯𑀸, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀯𑀺𑀲𑁂𑀲𑀜𑁆𑀜𑀽 𑀫𑀳𑀸𑀯𑀻𑀭𑁄, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀢𑀺’.

𑁫𑁦. ‘‘𑀯𑀼𑀝𑁆𑀞𑀫𑁆𑀳𑀺 𑀤𑁂𑀯𑁂 𑀘𑀢𑀼𑀭𑀗𑁆𑀕𑀼𑀮𑀫𑁆𑀳𑀺, 𑀢𑀺𑀡𑁂 𑀅𑀦𑀺𑀮𑁂𑀭𑀺𑀢𑀅𑀗𑁆𑀕𑀡𑀫𑁆𑀳𑀺;

𑀞𑀢𑁆𑀯𑀸𑀦 𑀬𑁄𑀕𑀲𑁆𑀲 𑀧𑀬𑀼𑀢𑁆𑀢𑀢𑀸𑀤𑀺𑀦𑁄, 𑀢𑀢𑁄𑀢𑁆𑀢𑀭𑀺𑀁 𑀧𑀸𑀭𑀫𑀢𑀸 𑀦 𑀯𑀺𑀚𑁆𑀚𑀢𑀺.

𑁫𑁧. ‘‘𑀉𑀢𑁆𑀢𑀫𑁂 𑀤𑀫𑀣𑁂 𑀤𑀦𑁆𑀢𑁄, 𑀘𑀺𑀢𑁆𑀢𑀁 𑀫𑁂 𑀲𑀼𑀧𑀡𑀻𑀳𑀺𑀢𑀁;

𑀪𑀸𑀭𑁄 𑀫𑁂 𑀑𑀳𑀺𑀢𑁄 𑀲𑀩𑁆𑀩𑁄, 𑀦𑀺𑀩𑁆𑀩𑀼𑀢𑁄𑀫𑁆𑀳𑀺 𑀅𑀦𑀸𑀲𑀯𑁄.

𑁫𑁨. ‘‘𑀅𑀗𑁆𑀕𑀻𑀭𑀲𑁄 𑀫𑀳𑀸𑀦𑀸𑀕𑁄, 𑀅𑀪𑀺𑀚𑀸𑀢𑁄𑀯 𑀓𑁂𑀲𑀭𑀻;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁫𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 [𑀓𑁄𑀴𑀺𑀬𑀯𑁂𑀲𑁆𑀲𑁄 (𑀲𑀻. 𑀲𑁆𑀬𑀸.), 𑀓𑁄𑀝𑀺𑀓𑀡𑁆𑀡𑁄 (𑀓.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑁄𑀡𑀓𑁄𑀴𑀺𑀯𑀺𑀲𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.