𑁮. 𑀲𑀼𑀘𑀺𑀦𑁆𑀢𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁭. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀅𑀳𑁄𑀲𑀺𑀁 𑀓𑀲𑁆𑀲𑀓𑁄 𑀢𑀤𑀸;

𑀓𑀲𑀺𑀓𑀫𑁆𑀫𑁂𑀦 𑀚𑀻𑀯𑀸𑀫𑀺, 𑀢𑁂𑀦 𑀧𑁄𑀲𑁂𑀫𑀺 𑀤𑀸𑀭𑀓𑁂.

𑁧𑁦𑁮. ‘‘𑀲𑀼𑀲𑀫𑁆𑀧𑀦𑁆𑀦𑀁 𑀢𑀤𑀸 𑀔𑁂𑀢𑁆𑀢𑀁, 𑀥𑀜𑁆𑀜𑀁 𑀫𑁂 𑀨𑀮𑀺𑀦𑀁 [𑀨𑀮𑀺𑀢𑀁 (𑀲𑀻. 𑀧𑀻.)] 𑀅𑀳𑀼;

𑀧𑀸𑀓𑀓𑀸𑀮𑁂 𑀘 𑀲𑀫𑁆𑀧𑀢𑁆𑀢𑁂, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

𑁧𑁦𑁯. ‘‘𑀦𑀘𑁆𑀙𑀦𑁆𑀦𑀁 𑀦𑀧𑁆𑀧𑀢𑀺𑀭𑀽𑀧𑀁, 𑀚𑀸𑀦𑀦𑁆𑀢𑀲𑁆𑀲 𑀕𑀼𑀡𑀸𑀕𑀼𑀡𑀁;

𑀬𑁄𑀳𑀁 𑀲𑀗𑁆𑀖𑁂 𑀅𑀤𑀢𑁆𑀯𑀸𑀦, 𑀅𑀕𑁆𑀕𑀁 𑀪𑀼𑀜𑁆𑀚𑁂𑀬𑁆𑀬 𑀘𑁂 𑀢𑀤𑀸 [𑀫𑀢𑁆𑀢𑀦𑀸 (𑀲𑁆𑀬𑀸.)].

𑁧𑁧𑁦. ‘‘𑀅𑀬𑀁 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀢𑀢𑁄 𑀧𑀪𑀸𑀯𑀺𑀢𑁄 𑀲𑀗𑁆𑀖𑁄, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁄 𑀅𑀦𑀼𑀢𑁆𑀢𑀭𑁄.

𑁧𑁧𑁧. ‘‘𑀢𑀢𑁆𑀣 𑀤𑀲𑁆𑀲𑀸𑀫𑀳𑀁 𑀤𑀸𑀦𑀁, 𑀦𑀯𑀲𑀲𑁆𑀲𑀁 𑀧𑀼𑀭𑁂 𑀧𑀼𑀭𑁂;

𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀳𑀝𑁆𑀞𑁄 𑀧𑀻𑀡𑀺𑀢𑀫𑀸𑀦𑀲𑁄 [𑀧𑀻𑀢𑀺𑀓… (𑀲𑁆𑀬𑀸.)].

𑁧𑁧𑁨. ‘‘𑀔𑁂𑀢𑁆𑀢𑀢𑁄 𑀥𑀜𑁆𑀜𑀫𑀸𑀳𑀢𑁆𑀯𑀸, 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀁;

𑀉𑀧𑀲𑀗𑁆𑀓𑀫𑁆𑀫 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁧𑁧𑁩. ‘‘‘𑀦𑀯𑀲𑀲𑁆𑀲𑀜𑁆𑀘 𑀲𑀫𑁆𑀧𑀦𑁆𑀦𑀁, 𑀆𑀬𑀸𑀕𑁄𑀲𑀺 [𑀇𑀥 𑀳𑁄𑀲𑀺 (𑀲𑁆𑀬𑀸.)] 𑀘 𑀢𑁆𑀯𑀁 𑀫𑀼𑀦𑁂;

𑀅𑀦𑀼𑀓𑀫𑁆𑀧𑀫𑀼𑀧𑀸𑀤𑀸𑀬, 𑀅𑀥𑀺𑀯𑀸𑀲𑁂𑀳𑀺 𑀘𑀓𑁆𑀔𑀼𑀫’.

𑁧𑁧𑁪. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁧𑁫. ‘‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄;

𑀬𑀚𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁.

𑁧𑁧𑁬. ‘‘‘𑀓𑀭𑁄𑀢𑁄𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀢𑀲𑁆𑀫𑀺𑀁 𑀲𑀗𑁆𑀖𑁂𑀯 [𑀲𑀁𑀖𑁂 𑀘 (𑀲𑁆𑀬𑀸. 𑀧𑀻.)] 𑀤𑀸𑀢𑀩𑁆𑀩𑀁, 𑀢𑀯 𑀲𑀲𑁆𑀲𑀁 𑀢𑀣𑁂𑀢𑀭𑀁.

𑁧𑁧𑁭. ‘‘‘𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸𑀦, 𑀪𑀺𑀓𑁆𑀔𑀽 𑀦𑁂𑀢𑁆𑀯𑀸𑀦 𑀲𑀁𑀖𑀭𑀁;

𑀧𑀝𑀺𑀬𑀢𑁆𑀢𑀁 𑀖𑀭𑁂 𑀲𑀦𑁆𑀢𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑁂𑀳𑀺 𑀢𑁆𑀯𑀁’.

𑁧𑁧𑁮. ‘‘𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸𑀦, 𑀪𑀺𑀓𑁆𑀔𑀽 𑀦𑁂𑀢𑁆𑀯𑀸𑀦 𑀲𑀁𑀖𑀭𑀁;

𑀬𑀁 𑀖𑀭𑁂 𑀧𑀝𑀺𑀬𑀢𑁆𑀢𑀁 𑀫𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀤𑀸𑀲𑀳𑀁.

𑁧𑁧𑁯. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁨𑁦. ‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀲𑁄𑀯𑀡𑁆𑀡𑀁 𑀲𑀧𑁆𑀧𑀪𑀲𑁆𑀲𑀭𑀁;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑀏𑀓𑀽𑀦𑀯𑀻𑀲𑀢𑀺𑀫𑀁 𑀪𑀸𑀡𑀯𑀸𑀭𑀁.

𑁧𑁨𑁧. ‘‘𑀆𑀓𑀺𑀡𑁆𑀡𑀁 𑀪𑀯𑀦𑀁 𑀫𑀬𑁆𑀳𑀁, 𑀦𑀸𑀭𑀻𑀕𑀡𑀲𑀫𑀸𑀓𑀼𑀮𑀁;

𑀢𑀢𑁆𑀣 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀯𑀲𑀸𑀫𑀺 𑀢𑀺𑀤𑀲𑁂 𑀅𑀳𑀁.

𑁧𑁨𑁨. ‘‘𑀲𑀢𑀸𑀦𑀁 𑀢𑀻𑀡𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁨𑁩. ‘‘𑀪𑀯𑀸𑀪𑀯𑁂 𑀲𑀁𑀲𑀭𑀦𑁆𑀢𑁄, 𑀮𑀪𑀸𑀫𑀺 𑀅𑀫𑀺𑀢𑀁 𑀥𑀦𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁪. ‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀲𑀺𑀯𑀺𑀓𑀁 𑀲𑀦𑁆𑀤𑀫𑀸𑀦𑀺𑀓𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁 [𑀲𑀩𑁆𑀩𑀫𑁂𑀢𑀫𑁆𑀧𑀺 (𑀓.)], 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁫. ‘‘𑀦𑀯𑀯𑀢𑁆𑀣𑀁 𑀦𑀯𑀨𑀮𑀁, 𑀦𑀯𑀕𑁆𑀕𑀭𑀲𑀪𑁄𑀚𑀦𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁬. ‘‘𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀺𑀬𑀸𑀦𑀺, 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀺 𑀘;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁭. ‘‘𑀤𑀸𑀲𑀻𑀕𑀡𑀁 𑀤𑀸𑀲𑀕𑀡𑀁, 𑀦𑀸𑀭𑀺𑀬𑁄 𑀘 𑀅𑀮𑀗𑁆𑀓𑀢𑀸;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁮. ‘‘𑀦 𑀫𑀁 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸, 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀺;

𑀅𑀣𑁄 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁, 𑀳𑀤𑀬𑁂 𑀫𑁂 𑀦 𑀯𑀺𑀚𑁆𑀚𑀢𑀺.

𑁧𑁨𑁯. ‘‘𑀇𑀤𑀁 𑀔𑀸𑀤 𑀇𑀤𑀁 𑀪𑀼𑀜𑁆𑀚, 𑀇𑀫𑀫𑁆𑀳𑀺 𑀲𑀬𑀦𑁂 𑀲𑀬;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁦. ‘‘𑀅𑀬𑀁 𑀧𑀘𑁆𑀙𑀺𑀫𑀓𑁄 𑀤𑀸𑀦𑀺, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀅𑀚𑁆𑀚𑀸𑀧𑀺 𑀤𑁂𑀬𑁆𑀬𑀥𑀫𑁆𑀫𑁄 𑀫𑁂, 𑀨𑀮𑀁 𑀢𑁄𑀲𑁂𑀲𑀺 𑀲𑀩𑁆𑀩𑀤𑀸.

𑁧𑁩𑁧. ‘‘𑀦𑀯𑀲𑀲𑁆𑀲𑀁 𑀤𑀤𑀺𑀢𑁆𑀯𑀸𑀦, 𑀲𑀗𑁆𑀖𑁂 𑀕𑀡𑀯𑀭𑀼𑀢𑁆𑀢𑀫𑁂;

𑀅𑀝𑁆𑀞𑀸𑀦𑀺𑀲𑀁𑀲𑁂 𑀅𑀦𑀼𑀪𑁄𑀫𑀺, 𑀓𑀫𑁆𑀫𑀸𑀦𑀼𑀘𑁆𑀙𑀯𑀺𑀓𑁂 𑀫𑀫.

𑁧𑁩𑁨. ‘‘𑀯𑀡𑁆𑀡𑀯𑀸 𑀬𑀲𑀯𑀸 𑀳𑁄𑀫𑀺, 𑀫𑀳𑀸𑀪𑁄𑀕𑁄 𑀅𑀦𑀻𑀢𑀺𑀓𑁄;

𑀫𑀳𑀸𑀧𑀓𑁆𑀔𑁄 [𑀫𑀳𑀸𑀪𑀓𑁆𑀔𑁄 (𑀲𑁆𑀬𑀸. 𑀓.)] 𑀲𑀤𑀸 𑀳𑁄𑀫𑀺, 𑀅𑀪𑁂𑀚𑁆𑀚𑀧𑀭𑀺𑀲𑁄 𑀲𑀤𑀸.

𑁧𑁩𑁩. ‘‘𑀲𑀩𑁆𑀩𑁂 𑀫𑀁 𑀅𑀧𑀘𑀸𑀬𑀦𑁆𑀢𑀺, 𑀬𑁂 𑀓𑁂𑀘𑀺 𑀧𑀣𑀯𑀺𑀲𑁆𑀲𑀺𑀢𑀸;

𑀤𑁂𑀬𑁆𑀬𑀥𑀫𑁆𑀫𑀸 𑀘 𑀬𑁂 𑀓𑁂𑀘𑀺, 𑀧𑀼𑀭𑁂 𑀧𑀼𑀭𑁂 𑀮𑀪𑀸𑀫𑀳𑀁.

𑁧𑁩𑁪. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀸 𑀫𑀚𑁆𑀛𑁂, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀫𑁆𑀫𑀼𑀔𑀸;

𑀲𑀩𑁆𑀩𑁂𑀧𑀺 𑀲𑀫𑀢𑀺𑀓𑁆𑀓𑀫𑁆𑀫, 𑀤𑁂𑀦𑁆𑀢𑀺 𑀫𑀫𑁂𑀯 𑀤𑀸𑀬𑀓𑀸.

𑁧𑁩𑁫. ‘‘𑀧𑀞𑀫𑀁 𑀦𑀯𑀲𑀲𑁆𑀲𑀜𑁆𑀳𑀺, 𑀤𑀢𑁆𑀯𑀸 𑀲𑀗𑁆𑀖𑁂 𑀕𑀡𑀼𑀢𑁆𑀢𑀫𑁂;

𑀇𑀫𑀸𑀦𑀺𑀲𑀁𑀲𑁂 𑀅𑀦𑀼𑀪𑁄𑀫𑀺, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁬. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄;

𑁧𑁩𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁩𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀘𑀺𑀦𑁆𑀢𑀺𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀘𑀺𑀦𑁆𑀢𑀺𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.