𑁯. 𑀲𑁄𑀯𑀡𑁆𑀡𑀓𑀺𑀗𑁆𑀓𑀡𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁪𑁦. ‘‘𑀲𑀤𑁆𑀥𑀸𑀬 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀯𑀸𑀓𑀘𑀻𑀭𑀥𑀭𑁄 𑀆𑀲𑀺𑀁, 𑀢𑀧𑁄𑀓𑀫𑁆𑀫𑀫𑀧𑀲𑁆𑀲𑀺𑀢𑁄.

𑁧𑁪𑁧. ‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀉𑀧𑁆𑀧𑀚𑁆𑀚𑀺 𑀢𑀫𑁆𑀳𑀺 𑀲𑀫𑀬𑁂, 𑀢𑀸𑀭𑀬𑀦𑁆𑀢𑁄 𑀫𑀳𑀸𑀚𑀦𑀁.

𑁧𑁪𑁨. ‘‘𑀩𑀮𑀜𑁆𑀘 𑀯𑀢 𑀫𑁂 𑀔𑀻𑀡𑀁, 𑀩𑁆𑀬𑀸𑀥𑀺𑀦𑀸 𑀧𑀭𑀫𑁂𑀦 𑀢𑀁;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀭𑀺𑀢𑁆𑀯𑀸𑀦, 𑀧𑀼𑀮𑀺𑀦𑁂 𑀣𑀽𑀧𑀫𑀼𑀢𑁆𑀢𑀫𑀁.

𑁧𑁪𑁩. ‘‘𑀓𑀭𑀺𑀢𑁆𑀯𑀸 𑀳𑀝𑁆𑀞𑀘𑀺𑀢𑁆𑀢𑁄𑀳𑀁, 𑀲𑀳𑀢𑁆𑀣𑁂𑀦 [𑀧𑀲𑀸𑀤𑁂𑀦 (𑀓.)] 𑀲𑀫𑁄𑀓𑀺𑀭𑀺𑀁;

𑀲𑁄𑀡𑁆𑀡𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀺, 𑀉𑀤𑀕𑁆𑀕𑀫𑀦𑀲𑁄 𑀅𑀳𑀁.

𑁧𑁪𑁪. ‘‘𑀲𑀫𑁆𑀫𑀼𑀔𑀸 𑀯𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀣𑀽𑀧𑀁 𑀧𑀭𑀺𑀘𑀭𑀺𑀁 𑀅𑀳𑀁;

𑀢𑁂𑀦 𑀘𑁂𑀢𑁄𑀧𑀲𑀸𑀤𑁂𑀦, 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀢𑀸𑀤𑀺𑀦𑁄.

𑁧𑁪𑁫. ‘‘𑀤𑁂𑀯𑀮𑁄𑀓𑀁 𑀕𑀢𑁄 𑀲𑀦𑁆𑀢𑁄, 𑀮𑀪𑀸𑀫𑀺 𑀯𑀺𑀧𑀼𑀮𑀁 𑀲𑀼𑀔𑀁;

𑀲𑀼𑀯𑀡𑁆𑀡𑀯𑀡𑁆𑀡𑁄 𑀢𑀢𑁆𑀣𑀸𑀲𑀺𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁪𑁬. ‘‘𑀅𑀲𑀻𑀢𑀺𑀓𑁄𑀝𑀺𑀬𑁄 𑀫𑀬𑁆𑀳𑀁, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑀤𑀸 𑀫𑀬𑁆𑀳𑀁 𑀉𑀧𑀝𑁆𑀞𑀦𑁆𑀢𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁪𑁭. ‘‘𑀲𑀝𑁆𑀞𑀺𑀢𑀼𑀭𑀺𑀬𑀲𑀳𑀲𑁆𑀲𑀸𑀦𑀺 [𑀲𑀝𑁆𑀞𑀺𑀢𑀽𑀭𑀺𑀬… (𑀓.)], 𑀪𑁂𑀭𑀺𑀬𑁄 𑀧𑀡𑀯𑀸𑀦𑀺 𑀘;

𑀲𑀗𑁆𑀔𑀸 𑀘 𑀟𑀺𑀡𑁆𑀟𑀺𑀫𑀸 𑀢𑀢𑁆𑀣, 𑀯𑀕𑁆𑀕𑀽 𑀯𑀚𑁆𑀚𑀦𑁆𑀢𑀺 [𑀦𑀤𑀦𑁆𑀢𑀺 (𑀲𑀻.), 𑀯𑀤𑀦𑁆𑀢𑀺 (𑀧𑀻.)] 𑀤𑀼𑀦𑁆𑀤𑀼𑀪𑀻.

𑁧𑁪𑁮. ‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀳𑀢𑁆𑀣𑀺𑀦𑁄 𑀲𑀫𑀮𑀗𑁆𑀓𑀢𑀸;

𑀢𑀺𑀥𑀸𑀧𑀪𑀺𑀦𑁆𑀦𑀫𑀸𑀢𑀗𑁆𑀕𑀸, 𑀓𑀼𑀜𑁆𑀚𑀭𑀸 𑀲𑀝𑁆𑀞𑀺𑀳𑀸𑀬𑀦𑀸.

𑁧𑁪𑁯. ‘‘𑀳𑁂𑀫𑀚𑀸𑀮𑀸𑀪𑀺𑀲𑀜𑁆𑀙𑀦𑁆𑀦𑀸, 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺 𑀫𑁂;

𑀩𑀮𑀓𑀸𑀬𑁂 𑀕𑀚𑁂 𑀘𑁂𑀯, 𑀊𑀦𑀢𑀸 𑀫𑁂 𑀦 𑀯𑀺𑀚𑁆𑀚𑀢𑀺.

𑁧𑁫𑁦. ‘‘𑀲𑁄𑀡𑁆𑀡𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀁, 𑀯𑀺𑀧𑀸𑀓𑀁 𑀅𑀦𑀼𑀪𑁄𑀫𑀳𑀁;

𑀅𑀝𑁆𑀞𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁧𑁫𑁧. ‘‘𑀏𑀓𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀏𑀓𑀲𑀢𑀁, 𑀫𑀳𑀺𑀬𑀸 𑀓𑀸𑀭𑀬𑀺𑀁 𑀅𑀳𑀁.

𑁧𑁫𑁨. ‘‘𑀲𑁄 𑀤𑀸𑀦𑀺 𑀅𑀫𑀢𑀁 𑀧𑀢𑁆𑀢𑁄, 𑀅𑀲𑀗𑁆𑀔𑀢𑀁 𑀲𑀼𑀤𑀼𑀤𑁆𑀤𑀲𑀁 [𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀧𑀤𑀁 (𑀲𑁆𑀬𑀸.)];

𑀲𑀁𑀬𑁄𑀚𑀦𑀧𑀭𑀺𑀓𑁆𑀔𑀻𑀡𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁫𑁩. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁫𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁫𑁫. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁫𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑁄𑀯𑀡𑁆𑀡𑀓𑀺𑀗𑁆𑀓𑀡𑀺𑀬𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑁄𑀯𑀡𑁆𑀡𑀓𑀺𑀗𑁆𑀓𑀡𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.