𑁭. 𑀏𑀓𑀥𑀫𑁆𑀫𑀲𑁆𑀲𑀯𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁮. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄, 𑀲𑀦𑁆𑀢𑀸𑀭𑁂𑀲𑀺 𑀩𑀳𑀼𑀁 𑀚𑀦𑀁.

𑁮𑁯. ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀥𑀼𑀦𑀦𑁆𑀢𑁄 𑀯𑀸𑀓𑀘𑀻𑀭𑀸𑀦𑀺, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

𑁯𑁦. ‘‘𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀉𑀧𑀭𑀺, 𑀕𑀦𑁆𑀢𑀼𑀁 𑀦 𑀯𑀺𑀲𑀳𑀸𑀫𑀳𑀁;

𑀧𑀓𑁆𑀔𑀻𑀯 𑀲𑁂𑀮𑀫𑀸𑀲𑀚𑁆𑀚, 𑀕𑀫𑀦𑀁 𑀦 𑀮𑀪𑀸𑀫𑀳𑀁.

𑁯𑁧. ‘‘𑀉𑀤𑀓𑁂 𑀯𑁄𑀓𑁆𑀓𑀫𑀺𑀢𑁆𑀯𑀸𑀦, 𑀏𑀯𑀁 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂;

𑀦 𑀫𑁂 𑀇𑀤𑀁 𑀪𑀽𑀢𑀧𑀼𑀩𑁆𑀩𑀁, 𑀇𑀭𑀺𑀬𑀸𑀧𑀣𑀯𑀺𑀓𑁄𑀧𑀦𑀁.

𑁯𑁨. ‘‘𑀳𑀦𑁆𑀤 𑀫𑁂𑀢𑀁 𑀕𑀯𑁂𑀲𑀺𑀲𑁆𑀲𑀁, 𑀅𑀧𑁆𑀧𑁂𑀯𑀢𑁆𑀣𑀁 𑀮𑀪𑁂𑀬𑁆𑀬𑀳𑀁;

𑀑𑀭𑁄𑀳𑀦𑁆𑀢𑁄 𑀅𑀦𑁆𑀢𑀮𑀺𑀓𑁆𑀔𑀸, 𑀲𑀤𑁆𑀤𑀫𑀲𑁆𑀲𑁄𑀲𑀺 𑀲𑀢𑁆𑀣𑀼𑀦𑁄.

𑁯𑁩. ‘‘𑀲𑀭𑁂𑀦 𑀭𑀚𑀦𑀻𑀬𑁂𑀦, 𑀲𑀯𑀦𑀻𑀬𑁂𑀦 𑀯𑀕𑁆𑀕𑀼𑀦𑀸;

𑀅𑀦𑀺𑀘𑁆𑀘𑀢𑀁 𑀓𑀣𑁂𑀦𑁆𑀢𑀲𑁆𑀲, 𑀢𑀜𑁆𑀜𑁂𑀯 𑀉𑀕𑁆𑀕𑀳𑀺𑀁 𑀢𑀤𑀸;

𑀅𑀦𑀺𑀘𑁆𑀘𑀲𑀜𑁆𑀜𑀫𑀼𑀕𑁆𑀕𑀬𑁆𑀳, 𑀅𑀕𑀫𑀸𑀲𑀺𑀁 𑀫𑀫𑀲𑁆𑀲𑀫𑀁.

𑁯𑁪. ‘‘𑀬𑀸𑀯𑀢𑀸𑀬𑀼𑀁 𑀯𑀲𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁;

𑀘𑀭𑀺𑀫𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀲𑀭𑀺𑀁.

𑁯𑁫. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁯𑁬. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀁 𑀅𑀳𑀁;

𑀏𑀓𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁯𑁭. ‘‘𑀏𑀓𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘 [𑀏𑀓𑀢𑀺𑀁𑀲𑀢𑀺… (𑀲𑁆𑀬𑀸.)], 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁯𑁮. ‘‘𑀅𑀦𑀼𑀪𑁄𑀫𑀺 𑀲𑀓𑀁 𑀧𑀼𑀜𑁆𑀜𑀁, 𑀲𑀼𑀔𑀺𑀢𑁄𑀳𑀁 𑀪𑀯𑀸𑀪𑀯𑁂;

𑀅𑀦𑀼𑀲𑁆𑀲𑀭𑀸𑀫𑀺 𑀢𑀁 𑀲𑀜𑁆𑀜𑀁, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀦 𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑀸𑀫𑀺, 𑀦𑀺𑀩𑁆𑀩𑀸𑀦𑀁 𑀅𑀘𑁆𑀘𑀼𑀢𑀁 𑀧𑀤𑀁.

𑁯𑁯. ‘‘𑀧𑀺𑀢𑀼𑀕𑁂𑀳𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀫𑀡𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄;

𑀓𑀣𑀁𑀲 [𑀓𑀣𑀬𑀁 (𑀲𑀻. 𑀧𑀻. 𑀓.)] 𑀧𑀭𑀺𑀤𑀻𑀧𑁂𑀦𑁆𑀢𑁄, 𑀅𑀦𑀺𑀘𑁆𑀘𑀢𑀫𑀼𑀤𑀸𑀳𑀭𑀺.

𑁧𑁦𑁦. ‘‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’.

𑁧𑁦𑁧. ‘‘𑀲𑀳 𑀕𑀸𑀣𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀼𑀩𑁆𑀩𑀲𑀜𑁆𑀜𑀫𑀦𑀼𑀲𑁆𑀲𑀭𑀺𑀁;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁦𑁨. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀻 𑀩𑀼𑀤𑁆𑀥𑁄, 𑀥𑀫𑁆𑀫𑀲𑁆𑀲𑀯𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁩. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀥𑀫𑁆𑀫𑀫𑀲𑀼𑀡𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀥𑀫𑁆𑀫𑀲𑁆𑀲𑀯𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦𑁫. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁦𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀥𑀫𑁆𑀫𑀲𑁆𑀲𑀯𑀦𑀺𑀬𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀥𑀫𑁆𑀫𑀲𑁆𑀲𑀯𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.