𑁨. 𑀏𑀓𑀙𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁨. ‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀫;

𑀲𑀼𑀲𑀼𑀤𑁆𑀥𑀧𑀼𑀮𑀺𑀦𑀸𑀓𑀺𑀡𑁆𑀡𑁄, 𑀧𑀦𑁆𑀦𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁩𑁩. ‘‘𑀉𑀢𑁆𑀢𑀸𑀦𑀓𑀽𑀮𑀸 𑀦𑀤𑀺𑀓𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀫𑀘𑁆𑀙𑀓𑀘𑁆𑀙𑀧𑀲𑀫𑁆𑀧𑀦𑁆𑀦𑀸 [… 𑀲𑀜𑁆𑀙𑀦𑁆𑀦𑀸 (𑀓.)], 𑀲𑀼𑀲𑀼𑀫𑀸𑀭𑀦𑀺𑀲𑁂𑀯𑀺𑀢𑀸.

𑁩𑁪. ‘‘𑀅𑀘𑁆𑀙𑀸 𑀤𑀻𑀧𑀻 𑀘 𑀫𑀬𑀽𑀭𑀸, 𑀓𑀭𑀯𑀻𑀓𑀸 𑀘 𑀲𑀸𑀴𑀺𑀓𑀸;

𑀓𑀽𑀚𑀦𑁆𑀢𑀺 𑀲𑀩𑁆𑀩𑀤𑀸 𑀏𑀢𑁂, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁩𑁫. ‘‘𑀓𑁄𑀓𑀺𑀮𑀸 𑀫𑀜𑁆𑀚𑀼𑀪𑀸𑀡𑀻 𑀘, 𑀳𑀁𑀲𑀸 𑀘 𑀫𑀥𑀼𑀭𑀲𑁆𑀲𑀭𑀸;

𑀅𑀪𑀺𑀓𑀽𑀚𑀦𑁆𑀢𑀺 𑀢𑁂 𑀢𑀢𑁆𑀣, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁩𑁬. ‘‘𑀲𑀻𑀳𑀸 𑀩𑁆𑀬𑀕𑁆𑀖𑀸 𑀯𑀭𑀸𑀳𑀸 𑀘, 𑀅𑀘𑁆𑀙 [𑀯𑀓 (𑀲𑀻. 𑀧𑀻.), 𑀩𑀓𑀸 (𑀲𑁆𑀬𑀸.), 𑀯𑀓𑀸 (𑀓.)] 𑀓𑁄𑀓𑀢𑀭𑀘𑁆𑀙𑀓𑀸;

𑀕𑀺𑀭𑀺𑀤𑀼𑀕𑁆𑀕𑀫𑁆𑀳𑀺 𑀦𑀸𑀤𑁂𑀦𑁆𑀢𑀺, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁩𑁭. ‘‘𑀏𑀡𑀻𑀫𑀺𑀕𑀸 𑀘 𑀲𑀭𑀪𑀸, 𑀪𑁂𑀭𑀡𑁆𑀟𑀸 𑀲𑀽𑀓𑀭𑀸 𑀩𑀳𑀽;

𑀕𑀺𑀭𑀺𑀤𑀼𑀕𑁆𑀕𑀫𑁆𑀳𑀺 𑀦𑀸𑀤𑁂𑀦𑁆𑀢𑀺, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁩𑁮. ‘‘𑀉𑀤𑁆𑀤𑀸𑀮𑀓𑀸 𑀘𑀫𑁆𑀧𑀓𑀸 𑀘, 𑀧𑀸𑀝𑀮𑀻 𑀲𑀺𑀦𑁆𑀤𑀼𑀯𑀸𑀭𑀓𑀸;

𑀅𑀢𑀺𑀫𑀼𑀢𑁆𑀢𑀸 𑀅𑀲𑁄𑀓𑀸 𑀘, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁 [𑀧𑀼𑀧𑁆𑀨𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂 (𑀲𑀻. 𑀧𑀻.)].

𑁩𑁯. ‘‘𑀅𑀗𑁆𑀓𑁄𑀮𑀸 𑀬𑀽𑀣𑀺𑀓𑀸 𑀘𑁂𑀯, 𑀲𑀢𑁆𑀢𑀮𑀻 𑀩𑀺𑀫𑁆𑀩𑀺𑀚𑀸𑀮𑀺𑀓𑀸;

𑀓𑀡𑀺𑀓𑀸𑀭𑀸 𑀘 𑀧𑀼𑀧𑁆𑀨𑀦𑁆𑀢𑀺, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁 [𑀓𑀡𑀺𑀓𑀸𑀓𑀡𑀺𑀓𑀸𑀭𑀸 𑀘, 𑀧𑀼𑀧𑁆𑀨𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂 (𑀲𑀻. 𑀲𑁆𑀬𑀸. 𑀧𑀻.)].

𑁪𑁦. ‘‘𑀦𑀸𑀕𑀸 𑀲𑀸𑀮𑀸 𑀘 𑀲𑀴𑀮𑀸, 𑀧𑀼𑀡𑁆𑀟𑀭𑀻𑀓𑁂𑀢𑁆𑀣 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁪𑁧. ‘‘𑀅𑀚𑁆𑀚𑀼𑀦𑀸 𑀅𑀲𑀦𑀸 𑀘𑁂𑀢𑁆𑀣, 𑀫𑀳𑀸𑀦𑀸𑀫𑀸 𑀘 𑀧𑀼𑀧𑁆𑀨𑀺𑀢𑀸;

𑀲𑀸𑀮𑀸 𑀘 𑀓𑀗𑁆𑀕𑀼𑀧𑀼𑀧𑁆𑀨𑀸 𑀘, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁪𑁨. ‘‘𑀅𑀫𑁆𑀩𑀸 𑀚𑀫𑁆𑀩𑀽 𑀘 𑀢𑀺𑀮𑀓𑀸, 𑀦𑀺𑀫𑁆𑀩𑀸 𑀘 𑀲𑀸𑀮𑀓𑀮𑁆𑀬𑀸𑀡𑀻;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁪𑁩. ‘‘𑀅𑀲𑁄𑀓𑀸 𑀘 𑀓𑀧𑀺𑀝𑁆𑀞𑀸 𑀘, 𑀕𑀺𑀭𑀺𑀫𑀸𑀮𑁂𑀢𑁆𑀣 [𑀪𑀕𑀺𑀦𑀺𑀫𑀸𑀮𑁂𑀢𑁆𑀣 (𑀲𑀻. 𑀧𑀻.), 𑀪𑀕𑀺𑀦𑀺𑀫𑀸𑀮𑀸 𑀘 (𑀲𑁆𑀬𑀸.)] 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁪𑁪. ‘‘𑀓𑀤𑀫𑁆𑀩𑀸 𑀓𑀤𑀮𑀻 𑀘𑁂𑀯, 𑀇𑀲𑀺𑀫𑀼𑀕𑁆𑀕𑀸 𑀘 𑀭𑁄𑀧𑀺𑀢𑀸;

𑀥𑀼𑀯𑀁 𑀨𑀮𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁪𑁫. ‘‘𑀳𑀭𑀻𑀢𑀓𑀸 𑀆𑀫𑀮𑀓𑀸, 𑀅𑀫𑁆𑀩𑀚𑀫𑁆𑀩𑀼𑀯𑀺𑀪𑀻𑀢𑀓𑀸;

𑀓𑁄𑀮𑀸 𑀪𑀮𑁆𑀮𑀸𑀢𑀓𑀸 𑀩𑀺𑀮𑁆𑀮𑀸, 𑀨𑀮𑀺𑀦𑁄 𑀫𑀫 𑀅𑀲𑁆𑀲𑀫𑁂.

𑁪𑁬. ‘‘𑀅𑀯𑀺𑀤𑀽𑀭𑁂 𑀧𑁄𑀓𑁆𑀔𑀭𑀡𑀻, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀫𑀦𑁆𑀤𑀸𑀮𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀧𑀤𑀼𑀫𑀼𑀧𑁆𑀧𑀮𑀓𑁂𑀳𑀺 𑀘.

𑁪𑁭. ‘‘𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺 𑀧𑀤𑀼𑀫𑀸, 𑀅𑀜𑁆𑀜𑁂 𑀧𑀼𑀧𑁆𑀨𑀦𑁆𑀢𑀺 𑀓𑁂𑀲𑀭𑀻;

𑀑𑀧𑀢𑁆𑀢𑀓𑀡𑁆𑀡𑀺𑀓𑀸 𑀘𑁂𑀯, 𑀧𑀼𑀧𑁆𑀨𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂.

𑁪𑁮. ‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀅𑀘𑁆𑀙𑁄𑀤𑀓𑀫𑁆𑀳𑀺 𑀯𑀺𑀘𑀭𑀁, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁪𑁯. ‘‘𑀦𑀬𑀺𑀢𑀸 𑀅𑀫𑁆𑀩𑀕𑀦𑁆𑀥𑀻 𑀘, 𑀅𑀦𑀼𑀓𑀽𑀮𑁂 𑀘 𑀓𑁂𑀢𑀓𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁫𑁦. ‘‘𑀫𑀥𑀼 𑀪𑀺𑀲𑀫𑁆𑀳𑀸 𑀲𑀯𑀢𑀺, 𑀔𑀻𑀭𑀲𑀧𑁆𑀧𑀺 𑀫𑀼𑀴𑀸𑀮𑀺𑀪𑀺;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁫𑁧. ‘‘𑀧𑀼𑀮𑀺𑀦𑀸 𑀲𑁄𑀪𑀦𑀸 𑀢𑀢𑁆𑀣, 𑀆𑀓𑀺𑀡𑁆𑀡𑀸 𑀚𑀮𑀲𑁂𑀯𑀺𑀢𑀸;

𑀑𑀧𑀼𑀧𑁆𑀨𑀸 𑀧𑀼𑀧𑁆𑀨𑀺𑀢𑀸 𑀲𑁂𑀦𑁆𑀢𑀺, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁫𑁨. ‘‘𑀚𑀝𑀸𑀪𑀸𑀭𑁂𑀦 𑀪𑀭𑀺𑀢𑀸, 𑀅𑀚𑀺𑀦𑀼𑀢𑁆𑀢𑀭𑀯𑀸𑀲𑀦𑀸;

𑀯𑀸𑀓𑀘𑀻𑀭𑀥𑀭𑀸 𑀲𑀩𑁆𑀩𑁂, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁫𑁩. ‘‘𑀬𑀼𑀕𑀫𑀢𑁆𑀢𑀫𑀧𑁂𑀓𑁆𑀔𑀦𑁆𑀢𑀸, 𑀦𑀺𑀧𑀓𑀸 𑀲𑀦𑁆𑀢𑀯𑀼𑀢𑁆𑀢𑀺𑀦𑁄;

𑀓𑀸𑀫𑀪𑁄𑀕𑁂 𑀅𑀦𑀧𑁂𑀓𑁆𑀔𑀸, 𑀯𑀲𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂.

𑁫𑁪. ‘‘𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀸, 𑀧𑀗𑁆𑀓𑀤𑀦𑁆𑀢𑀸 𑀭𑀚𑀲𑁆𑀲𑀺𑀭𑀸;

𑀭𑀚𑁄𑀚𑀮𑁆𑀮𑀥𑀭𑀸 𑀲𑀩𑁆𑀩𑁂, 𑀯𑀲𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂.

𑁫𑁫. ‘‘𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑀸, 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀘 𑀢𑁂;

𑀉𑀕𑁆𑀕𑀘𑁆𑀙𑀦𑁆𑀢𑀸 𑀦𑀪𑀁 𑀏𑀢𑁂, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁫𑁬. ‘‘𑀢𑁂𑀳𑀺 𑀲𑀺𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄, 𑀯𑀲𑀸𑀫𑀺 𑀯𑀺𑀧𑀺𑀦𑁂 𑀢𑀤𑀸;

𑀭𑀢𑁆𑀢𑀺𑀦𑁆𑀤𑀺𑀯𑀁 𑀦 𑀚𑀸𑀦𑀸𑀫𑀺, 𑀲𑀤𑀸 𑀛𑀸𑀦𑀲𑀫𑀧𑁆𑀧𑀺𑀢𑁄.

𑁫𑁭. ‘‘𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀢𑀫𑀦𑁆𑀥𑀓𑀸𑀭𑀁 𑀦𑀸𑀲𑁂𑀦𑁆𑀢𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄.

𑁫𑁮. ‘‘𑀅𑀣 𑀅𑀜𑁆𑀜𑀢𑀭𑁄 𑀲𑀺𑀲𑁆𑀲𑁄, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁;

𑀫𑀦𑁆𑀢𑁂 𑀅𑀚𑁆𑀛𑁂𑀢𑀼𑀓𑀸𑀫𑁄 𑀲𑁄, 𑀙𑀴𑀗𑁆𑀕𑀁 𑀦𑀸𑀫 𑀮𑀓𑁆𑀔𑀡𑀁.

𑁫𑁯. ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄, 𑀤𑁂𑀲𑁂𑀢𑀺 𑀅𑀫𑀢𑀁 𑀧𑀤𑀁.

𑁬𑁦. ‘‘𑀢𑀼𑀝𑁆𑀞𑀳𑀝𑁆𑀞𑁄 𑀧𑀫𑀼𑀤𑀺𑀢𑁄, 𑀥𑀫𑁆𑀫𑀦𑁆𑀢𑀭𑀕𑀢𑀸𑀲𑀬𑁄;

𑀅𑀲𑁆𑀲𑀫𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁬𑁧. ‘‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀏𑀣 𑀲𑀩𑁆𑀩𑁂 𑀕𑀫𑀺𑀲𑁆𑀲𑀸𑀫, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀦𑁆𑀢𑀺𑀓𑀁’.

𑁬𑁨. ‘‘𑀑𑀯𑀸𑀤𑀧𑀝𑀺𑀓𑀭𑀸 𑀢𑁂, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑀸;

𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀉𑀢𑁆𑀢𑀫𑀢𑁆𑀣𑀕𑀯𑁂𑀲𑀓𑀸.

𑁬𑁩. ‘‘𑀚𑀝𑀸𑀪𑀸𑀭𑀪𑀭𑀺𑀢𑀸 𑀢𑁂 [𑀚𑀝𑀸𑀪𑀸𑀭𑁂𑀦 𑀪𑀭𑀺𑀢𑀸 (𑀓.)], 𑀅𑀚𑀺𑀦𑀼𑀢𑁆𑀢𑀭𑀯𑀸𑀲𑀦𑀸;

𑀉𑀢𑁆𑀢𑀫𑀢𑁆𑀣𑀁 𑀕𑀯𑁂𑀲𑀦𑁆𑀢𑀸, 𑀦𑀺𑀓𑁆𑀔𑀫𑀺𑀁𑀲𑀼 𑀯𑀦𑀸 𑀢𑀤𑀸.

𑁬𑁪. ‘‘𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄, 𑀤𑁂𑀲𑁂𑀢𑀺 𑀅𑀫𑀢𑀁 𑀧𑀤𑀁.

𑁬𑁫. ‘‘𑀲𑁂𑀢𑀘𑁆𑀙𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀥𑀸𑀭𑀬𑀺𑀁;

𑀏𑀓𑀸𑀳𑀁 𑀥𑀸𑀭𑀬𑀺𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀯𑀦𑁆𑀤𑀳𑀁.

𑁬𑁬. ‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁬𑁭. ‘‘‘𑀬𑁄 𑀫𑁂 𑀙𑀢𑁆𑀢𑀁 𑀅𑀥𑀸𑀭𑁂𑀲𑀺, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁬𑁮. ‘‘‘𑀇𑀫𑀲𑁆𑀲 𑀚𑀸𑀬𑀫𑀸𑀦𑀲𑁆𑀲, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀥𑀸𑀭𑁂𑀲𑁆𑀲𑀢𑀺 𑀲𑀤𑀸 𑀙𑀢𑁆𑀢𑀁, 𑀙𑀢𑁆𑀢𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁯. ‘‘‘𑀲𑀢𑁆𑀢𑀲𑀢𑁆𑀢𑀢𑀺𑀓𑀧𑁆𑀧𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁭𑁦. ‘‘‘𑀲𑀢𑁆𑀢𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁭𑁧. ‘‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀢𑀫𑀦𑁆𑀥𑀓𑀸𑀭𑀁 𑀦𑀸𑀲𑁂𑀦𑁆𑀢𑁄, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.

𑁭𑁨. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁭𑁩. ‘‘𑀬𑀢𑁄 𑀅𑀳𑀁 𑀓𑀫𑁆𑀫𑀫𑀓𑀁, 𑀙𑀢𑁆𑀢𑀁 𑀩𑀼𑀤𑁆𑀥𑀲𑁆𑀲 𑀥𑀸𑀭𑀬𑀁;

𑀏𑀢𑁆𑀣𑀦𑁆𑀢𑀭𑁂 𑀦 𑀚𑀸𑀦𑀸𑀫𑀺, 𑀲𑁂𑀢𑀘𑁆𑀙𑀢𑁆𑀢𑀁 𑀅𑀥𑀸𑀭𑀺𑀢𑀁.

𑁭𑁪. ‘‘𑀇𑀤𑀁 𑀧𑀘𑁆𑀙𑀺𑀫𑀓𑀁 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀙𑀢𑁆𑀢𑀥𑀸𑀭𑀡𑀫𑀚𑁆𑀚𑀸𑀧𑀺, 𑀯𑀢𑁆𑀢𑀢𑁂 𑀦𑀺𑀘𑁆𑀘𑀓𑀸𑀮𑀺𑀓𑀁.

𑁭𑁫. ‘‘𑀅𑀳𑁄 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀁, 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀢𑀸𑀤𑀺𑀦𑁄;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁭𑁬. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀙𑀢𑁆𑀢𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀏𑀓𑀙𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.