𑁩. 𑀢𑀺𑀡𑀲𑀽𑀮𑀓𑀙𑀸𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁯. ‘‘𑀚𑀸𑀢𑀺𑀁 𑀚𑀭𑀜𑁆𑀘 𑀫𑀭𑀡𑀁, 𑀧𑀘𑁆𑀘𑀯𑁂𑀓𑁆𑀔𑀺𑀁 𑀅𑀳𑀁 𑀢𑀤𑀸;

𑀏𑀓𑀓𑁄 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁮𑁦. ‘‘𑀘𑀭𑀫𑀸𑀦𑁄𑀦𑀼𑀧𑀼𑀩𑁆𑀩𑁂𑀦, 𑀕𑀗𑁆𑀕𑀸𑀢𑀻𑀭𑀁 𑀉𑀧𑀸𑀕𑀫𑀺𑀁;

𑀢𑀢𑁆𑀣𑀤𑁆𑀤𑀲𑀸𑀲𑀺𑀁 𑀧𑀣𑀯𑀺𑀁, 𑀕𑀗𑁆𑀕𑀸𑀢𑀻𑀭𑁂 𑀲𑀫𑀼𑀦𑁆𑀦𑀢𑀁.

𑁮𑁧. ‘‘𑀅𑀲𑁆𑀲𑀫𑀁 𑀢𑀢𑁆𑀣 𑀫𑀸𑀧𑁂𑀢𑁆𑀯𑀸, 𑀯𑀲𑀸𑀫𑀺 𑀅𑀲𑁆𑀲𑀫𑁂 𑀅𑀳𑀁;

𑀲𑀼𑀓𑀢𑁄 𑀘𑀗𑁆𑀓𑀫𑁄 𑀫𑀬𑁆𑀳𑀁, 𑀦𑀸𑀦𑀸𑀤𑀺𑀚𑀕𑀡𑀸𑀬𑀼𑀢𑁄.

𑁮𑁨. ‘‘𑀫𑀫𑀼𑀧𑁂𑀦𑁆𑀢𑀺 𑀘 𑀯𑀺𑀲𑁆𑀲𑀢𑁆𑀣𑀸, 𑀓𑀽𑀚𑀦𑁆𑀢𑀺 𑀘 𑀫𑀦𑁄𑀳𑀭𑀁;

𑀭𑀫𑀫𑀸𑀦𑁄 𑀲𑀳 𑀢𑁂𑀳𑀺, 𑀯𑀲𑀸𑀫𑀺 𑀅𑀲𑁆𑀲𑀫𑁂 𑀅𑀳𑀁.

𑁮𑁩. ‘‘𑀫𑀫 𑀅𑀲𑁆𑀲𑀫𑀲𑀸𑀫𑀦𑁆𑀢𑀸, 𑀫𑀺𑀕𑀭𑀸𑀚𑀸 𑀘𑀢𑀼𑀓𑁆𑀓𑀫𑁄;

𑀆𑀲𑀬𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀕𑀚𑁆𑀚𑀺 𑀲𑁄 𑀅𑀲𑀦𑀻 𑀯𑀺𑀬.

𑁮𑁪. ‘‘𑀦𑀤𑀺𑀢𑁂 𑀫𑀺𑀕𑀭𑀸𑀚𑁂 𑀘, 𑀳𑀸𑀲𑁄 𑀫𑁂 𑀉𑀤𑀧𑀚𑁆𑀚𑀣;

𑀫𑀺𑀕𑀭𑀸𑀚𑀁 𑀕𑀯𑁂𑀲𑀦𑁆𑀢𑁄, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁮𑁫. ‘‘𑀤𑀺𑀲𑁆𑀯𑀸𑀦𑀸𑀳𑀁 𑀤𑁂𑀯𑀤𑁂𑀯𑀁, 𑀢𑀺𑀲𑁆𑀲𑀁 𑀮𑁄𑀓𑀕𑁆𑀕𑀦𑀸𑀬𑀓𑀁;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀧𑀽𑀚𑀬𑀺𑀁 𑀦𑀸𑀕𑀓𑁂𑀲𑀭𑀁.

𑁮𑁬. ‘‘𑀉𑀕𑁆𑀕𑀘𑁆𑀙𑀦𑁆𑀢𑀁𑀯 𑀲𑀽𑀭𑀺𑀬𑀁, 𑀲𑀸𑀮𑀭𑀸𑀚𑀁𑀯 𑀧𑀼𑀧𑁆𑀨𑀺𑀢𑀁;

𑀑𑀲𑀥𑀺𑀁𑀯 𑀯𑀺𑀭𑁄𑀘𑀦𑁆𑀢𑀁, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁮𑁭. ‘‘‘𑀢𑀯 𑀜𑀸𑀡𑁂𑀦 𑀲𑀩𑁆𑀩𑀜𑁆𑀜𑀼, 𑀫𑁄𑀘𑁂𑀲𑀺𑀫𑀁 𑀲𑀤𑁂𑀯𑀓𑀁;

𑀢𑀯𑀁 𑀆𑀭𑀸𑀥𑀬𑀺𑀢𑁆𑀯𑀸𑀦, 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀭𑁂.

𑁮𑁮. ‘‘‘𑀅𑀤𑀲𑁆𑀲𑀦𑁂𑀦 𑀲𑀩𑁆𑀩𑀜𑁆𑀜𑀼, 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀤𑀲𑁆𑀲𑀺𑀦𑀁;

𑀧𑀢𑀦𑁆𑀢𑀺𑀯𑀻𑀘𑀺𑀦𑀺𑀭𑀬𑀁, 𑀭𑀸𑀕𑀤𑁄𑀲𑁂𑀳𑀺 𑀑𑀨𑀼𑀝𑀸 [𑀑𑀢𑁆𑀣𑀝𑀸 (𑀲𑁆𑀬𑀸.)].

𑁮𑁯. ‘‘‘𑀢𑀯 𑀤𑀲𑁆𑀲𑀦𑀫𑀸𑀕𑀫𑁆𑀫, 𑀲𑀩𑁆𑀩𑀜𑁆𑀜𑀼 𑀮𑁄𑀓𑀦𑀸𑀬𑀓;

𑀧𑀫𑀼𑀘𑁆𑀘𑀦𑁆𑀢𑀺 𑀪𑀯𑀸 𑀲𑀩𑁆𑀩𑀸, 𑀨𑀼𑀲𑀦𑁆𑀢𑀺 𑀅𑀫𑀢𑀁 𑀧𑀤𑀁.

𑁯𑁦. ‘‘‘𑀬𑀤𑀸 𑀩𑀼𑀤𑁆𑀥𑀸 𑀘𑀓𑁆𑀔𑀼𑀫𑀦𑁆𑀢𑁄, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀪𑀗𑁆𑀓𑀭𑀸;

𑀓𑀺𑀮𑁂𑀲𑁂 𑀛𑀸𑀧𑀬𑀺𑀢𑁆𑀯𑀸𑀦, 𑀆𑀮𑁄𑀓𑀁 𑀤𑀲𑁆𑀲𑀬𑀦𑁆𑀢𑀺 𑀢𑁂’.

𑁯𑁧. ‘‘𑀓𑀺𑀢𑁆𑀢𑀬𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀢𑀺𑀲𑁆𑀲𑀁 𑀮𑁄𑀓𑀕𑁆𑀕𑀦𑀸𑀬𑀓𑀁;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀢𑀺𑀡𑀲𑀽𑀮𑀁 𑀅𑀧𑀽𑀚𑀬𑀺𑀁.

𑁯𑁨. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀲𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁯𑁩. ‘‘‘𑀬𑁄 𑀫𑀁 𑀧𑀼𑀧𑁆𑀨𑁂𑀳𑀺 𑀙𑀸𑀤𑁂𑀲𑀺, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁯𑁪. ‘‘‘𑀧𑀜𑁆𑀘𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀁 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀜𑁆𑀘𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁯𑁫. ‘‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀢𑀲𑁆𑀲 𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 [𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁄 (𑀲𑀻. 𑀲𑁆𑀬𑀸. 𑀧𑀻.)], 𑀧𑀼𑀧𑁆𑀨𑀸𑀦𑀁 𑀧𑀽𑀚𑀦𑀸𑀬 𑀘 [𑀲𑁄 (𑀲𑁆𑀬𑀸. 𑀧𑀻.)].

𑁯𑁬. ‘‘‘𑀲𑀻𑀲𑀁𑀦𑁆𑀳𑀸𑀢𑁄 𑀘𑀬𑀁 𑀧𑁄𑀲𑁄, 𑀧𑀼𑀧𑁆𑀨𑀫𑀸𑀓𑀗𑁆𑀔𑀢𑁂 𑀬𑀤𑀺 [𑀲𑀸𑀬𑀁 𑀧𑀸𑀢𑁄 𑀘𑀬𑀁 𑀧𑁄𑀲𑁄, 𑀧𑀼𑀧𑁆𑀨𑁂𑀳𑀺 𑀫𑀁 𑀅𑀙𑀸𑀤𑀬𑀺 (𑀲𑁆𑀬𑀸.)];

𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑀁 [𑀲𑀁𑀬𑀼𑀢𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻.)], 𑀧𑀼𑀭𑀢𑁄 𑀧𑀸𑀢𑀼𑀪𑀯𑀺𑀲𑁆𑀲𑀢𑀺.

𑁯𑁭. ‘‘‘𑀬𑀁 𑀬𑀁 𑀇𑀘𑁆𑀙𑀢𑀺 𑀓𑀸𑀫𑁂𑀳𑀺, 𑀢𑀁 𑀢𑀁 𑀧𑀸𑀢𑀼𑀪𑀯𑀺𑀲𑁆𑀲𑀢𑀺;

𑀲𑀗𑁆𑀓𑀧𑁆𑀧𑀁 𑀧𑀭𑀺𑀧𑀽𑀭𑁂𑀢𑁆𑀯𑀸, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑀅𑀝𑁆𑀞𑀸𑀭𑀲𑀫𑀁 𑀪𑀸𑀡𑀯𑀸𑀭𑀁.

𑁯𑁮. ‘‘𑀓𑀺𑀮𑁂𑀲𑁂 𑀛𑀸𑀧𑀬𑀺𑀢𑁆𑀯𑀸𑀦, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁯𑁯. ‘‘𑀘𑀗𑁆𑀓𑀫𑀦𑁆𑀢𑁄 𑀦𑀺𑀧𑀚𑁆𑀚𑀦𑁆𑀢𑁄, 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀞𑀺𑀢𑁄;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀭𑀺𑀢𑁆𑀯𑀸𑀦, 𑀯𑀺𑀳𑀭𑀸𑀫𑀺 𑀅𑀳𑀁 𑀲𑀤𑀸.

𑁧𑁦𑁦. ‘‘𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀘, 𑀧𑀘𑁆𑀘𑀬𑁂 𑀲𑀬𑀦𑀸𑀲𑀦𑁂;

𑀢𑀢𑁆𑀣 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁦𑁧. ‘‘𑀲𑁄 𑀤𑀸𑀦𑀺 𑀧𑀢𑁆𑀢𑁄 𑀅𑀫𑀢𑀁, 𑀲𑀦𑁆𑀢𑀁 𑀧𑀤𑀫𑀦𑀼𑀢𑁆𑀢𑀭𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦𑁨. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁦𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁦𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀡𑀲𑀽𑀮𑀓𑀙𑀸𑀤𑀦𑀺𑀬𑁄 [𑀢𑀺𑀡𑀲𑀽𑀮𑀺𑀓𑀙𑀸𑀤𑀦𑀺𑀬𑁄 (𑀓.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀡𑀲𑀽𑀮𑀓𑀙𑀸𑀤𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.