𑁩. 𑀲𑀩𑁆𑀩𑀓𑀺𑀢𑁆𑀢𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁦𑁪. ‘‘𑀓𑀡𑀺𑀓𑀸𑀭𑀁𑀯 𑀚𑀮𑀺𑀢𑀁 [𑀚𑁄𑀢𑀦𑁆𑀢𑀁 (𑀲𑀻.)], 𑀤𑀻𑀧𑀭𑀼𑀓𑁆𑀔𑀁𑀯 𑀉𑀚𑁆𑀚𑀮𑀁 [𑀚𑁄𑀢𑀺𑀢𑀁 (𑀲𑁆𑀬𑀸.)];

𑀑𑀲𑀥𑀺𑀁𑀯 𑀯𑀺𑀭𑁄𑀘𑀦𑁆𑀢𑀁, 𑀯𑀺𑀚𑁆𑀚𑀼𑀢𑀁 𑀕𑀕𑀦𑁂 𑀬𑀣𑀸.

𑁩𑁦𑁫. ‘‘𑀅𑀲𑀫𑁆𑀪𑀻𑀢𑀁 𑀅𑀦𑀼𑀢𑁆𑀢𑀸𑀲𑀺𑀁, 𑀫𑀺𑀕𑀭𑀸𑀚𑀁𑀯 𑀓𑁂𑀲𑀭𑀺𑀁;

𑀜𑀸𑀡𑀸𑀮𑁄𑀓𑀁 𑀧𑀓𑀸𑀲𑁂𑀦𑁆𑀢𑀁, 𑀫𑀤𑁆𑀤𑀦𑁆𑀢𑀁 𑀢𑀺𑀢𑁆𑀣𑀺𑀬𑁂 𑀕𑀡𑁂.

𑁩𑁦𑁬. ‘‘𑀉𑀤𑁆𑀥𑀭𑀦𑁆𑀢𑀁 𑀇𑀫𑀁 𑀮𑁄𑀓𑀁, 𑀙𑀺𑀤𑁆𑀤𑀦𑁆𑀢𑀁 𑀲𑀩𑁆𑀩𑀲𑀁𑀲𑀬𑀁;

𑀕𑀚𑁆𑀚𑀦𑁆𑀢𑀁 [𑀅𑀲𑀫𑁆𑀪𑀻𑀢𑀁 (𑀲𑁆𑀬𑀸.), 𑀕𑀘𑁆𑀙𑀦𑁆𑀢𑀁 (𑀓.)] 𑀫𑀺𑀕𑀭𑀸𑀚𑀁𑀯, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁩𑁦𑁭. ‘‘𑀚𑀝𑀸𑀚𑀺𑀦𑀥𑀭𑁄 𑀆𑀲𑀺𑀁, 𑀩𑁆𑀭𑀳𑀸 𑀉𑀚𑀼 𑀧𑀢𑀸𑀧𑀯𑀸;

𑀯𑀸𑀓𑀘𑀻𑀭𑀁 𑀕𑀳𑁂𑀢𑁆𑀯𑀸𑀦, 𑀧𑀸𑀤𑀫𑀽𑀮𑁂 𑀅𑀧𑀢𑁆𑀣𑀭𑀺𑀁.

𑁩𑁦𑁮. ‘‘𑀓𑀸𑀴𑀸𑀦𑀼𑀲𑀸𑀭𑀺𑀬𑀁 𑀕𑀬𑁆𑀳, 𑀅𑀦𑀼𑀮𑀺𑀫𑁆𑀧𑀺𑀁 𑀢𑀣𑀸𑀕𑀢𑀁;

𑀲𑀫𑁆𑀩𑀼𑀤𑁆𑀥𑀫𑀦𑀼𑀮𑀺𑀫𑁆𑀧𑁂𑀢𑁆𑀯𑀸, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁩𑁦𑁯. ‘‘𑀲𑀫𑀼𑀤𑁆𑀥𑀭𑀲𑀺𑀫𑀁 𑀮𑁄𑀓𑀁, 𑀑𑀖𑀢𑀺𑀡𑁆𑀡 [𑀑𑀖𑀢𑀺𑀡𑁆𑀡𑁄 (𑀲𑁆𑀬𑀸. 𑀓.)] 𑀫𑀳𑀸𑀫𑀼𑀦𑀺;

𑀜𑀸𑀡𑀸𑀮𑁄𑀓𑁂𑀦 𑀚𑁄𑀢𑁂𑀲𑀺, 𑀦𑀸𑀯𑀝𑀁 [𑀧𑀯𑀭𑀁 (𑀲𑁆𑀬𑀸.), 𑀯𑀚𑀺𑀭 (𑀧𑀻.)] 𑀜𑀸𑀡𑀫𑀼𑀢𑁆𑀢𑀫𑀁.

𑁩𑁧𑁦. ‘‘𑀥𑀫𑁆𑀫𑀘𑀓𑁆𑀓𑀁 [𑀢𑀼𑀯𑀁 𑀘𑀓𑁆𑀓𑀁 (𑀓.)] 𑀧𑀯𑀢𑁆𑀢𑁂𑀲𑀺, 𑀫𑀤𑁆𑀤𑀲𑁂 𑀧𑀭𑀢𑀺𑀢𑁆𑀣𑀺𑀬𑁂;

𑀉𑀲𑀪𑁄 𑀚𑀺𑀢𑀲𑀗𑁆𑀕𑀸𑀫𑁄, 𑀲𑀫𑁆𑀧𑀓𑀫𑁆𑀧𑁂𑀲𑀺 𑀫𑁂𑀤𑀦𑀺𑀁.

𑁩𑁧𑁧. ‘‘𑀫𑀳𑀸𑀲𑀫𑀼𑀤𑁆𑀤𑁂 𑀊𑀫𑀺𑀬𑁄, 𑀯𑁂𑀮𑀦𑁆𑀢𑀫𑁆𑀳𑀺 𑀧𑀪𑀺𑀚𑁆𑀚𑀭𑁂;

𑀢𑀣𑁂𑀯 𑀢𑀯 𑀜𑀸𑀡𑀫𑁆𑀳𑀺, 𑀲𑀩𑁆𑀩𑀤𑀺𑀝𑁆𑀞𑀻 𑀧𑀪𑀺𑀚𑁆𑀚𑀭𑁂.

𑁩𑁧𑁨. ‘‘𑀲𑀼𑀔𑀼𑀫𑀘𑁆𑀙𑀺𑀓𑀚𑀸𑀮𑁂𑀦, 𑀲𑀭𑀫𑁆𑀳𑀺 𑀲𑀫𑁆𑀧𑀢𑀸𑀦𑀺𑀢𑁂;

𑀅𑀦𑁆𑀢𑁄𑀚𑀸𑀮𑀺𑀓𑀢𑀸 [𑀚𑀸𑀮𑀕𑀢𑀸 (𑀲𑀻.)] 𑀧𑀸𑀡𑀸, 𑀧𑀻𑀴𑀺𑀢𑀸 𑀳𑁄𑀦𑁆𑀢𑀺 𑀢𑀸𑀯𑀤𑁂.

𑁩𑁧𑁩. ‘‘𑀢𑀣𑁂𑀯 𑀢𑀺𑀢𑁆𑀣𑀺𑀬𑀸 𑀮𑁄𑀓𑁂, 𑀧𑀼𑀣𑀼𑀧𑀸𑀲𑀡𑁆𑀟𑀦𑀺𑀲𑁆𑀲𑀺𑀢𑀸 [𑀫𑀽𑀴𑁆𑀳𑀸 𑀲𑀘𑁆𑀘𑀯𑀺𑀦𑀺𑀲𑁆𑀲𑀝𑀸 (𑀲𑁆𑀬𑀸.), 𑀫𑀼𑀝𑁆𑀞𑀲𑀘𑁆𑀘𑀯𑀺𑀦𑀺𑀲𑁆𑀲𑀝𑀸 (𑀓.)];

𑀅𑀦𑁆𑀢𑁄𑀜𑀸𑀡𑀯𑀭𑁂 𑀢𑀼𑀬𑁆𑀳𑀁, 𑀧𑀭𑀺𑀯𑀢𑁆𑀢𑀦𑁆𑀢𑀺 𑀫𑀸𑀭𑀺𑀲.

𑁩𑁧𑁪. ‘‘𑀧𑀢𑀺𑀝𑁆𑀞𑀸 𑀯𑀼𑀬𑁆𑀳𑀢𑀁 𑀑𑀖𑁂, 𑀢𑁆𑀯𑀜𑁆𑀳𑀺 𑀦𑀸𑀣𑁄 𑀅𑀩𑀦𑁆𑀥𑀼𑀦𑀁;

𑀪𑀬𑀝𑁆𑀝𑀺𑀢𑀸𑀦𑀁 𑀲𑀭𑀡𑀁, 𑀫𑀼𑀢𑁆𑀢𑀺𑀢𑁆𑀣𑀻𑀦𑀁 𑀧𑀭𑀸𑀬𑀡𑀁.

𑁩𑁧𑁫. ‘‘𑀏𑀓𑀯𑀻𑀭𑁄 𑀅𑀲𑀤𑀺𑀲𑁄, 𑀫𑁂𑀢𑁆𑀢𑀸𑀓𑀭𑀼𑀡𑀲𑀜𑁆𑀘𑀬𑁄 [𑀲𑀜𑁆𑀜𑀼𑀢𑁄 (𑀲𑁆𑀬𑀸.)];

𑀅𑀲𑀫𑁄 𑀲𑀼𑀲𑀫𑁄 𑀲𑀦𑁆𑀢𑁄 [𑀲𑀼𑀲𑀻𑀮𑁄 𑀅𑀲𑀫𑁄 𑀲𑀦𑁆𑀢𑁄 (𑀲𑀻.), 𑀧𑀜𑁆𑀜𑀯𑀸 𑀬𑀼𑀢𑁆𑀢𑀘𑀸𑀕𑁄 𑀘 (𑀲𑁆𑀬𑀸.)], 𑀯𑀲𑀻 𑀢𑀸𑀤𑀻 𑀚𑀺𑀢𑀜𑁆𑀚𑀬𑁄.

𑁩𑁧𑁬. ‘‘𑀥𑀻𑀭𑁄 𑀯𑀺𑀕𑀢𑀲𑀫𑁆𑀫𑁄𑀳𑁄, 𑀅𑀦𑁂𑀚𑁄 𑀅𑀓𑀣𑀁𑀓𑀣𑀻;

𑀢𑀼𑀲𑀺𑀢𑁄 [𑀯𑀼𑀲𑀺𑀢𑁄 (𑀲𑀻.)] 𑀯𑀦𑁆𑀢𑀤𑁄𑀲𑁄𑀲𑀺, 𑀦𑀺𑀫𑁆𑀫𑀮𑁄 𑀲𑀁𑀬𑀢𑁄 𑀲𑀼𑀘𑀺.

𑁩𑁧𑁭. ‘‘𑀲𑀗𑁆𑀕𑀸𑀢𑀺𑀕𑁄 𑀳𑀢𑀫𑀤𑁄 [𑀕𑀢𑀫𑀤𑁄 (𑀲𑁆𑀬𑀸.), 𑀢𑀫𑀦𑀼𑀤𑁄 (𑀓.)], 𑀢𑁂𑀯𑀺𑀚𑁆𑀚𑁄 𑀢𑀺𑀪𑀯𑀦𑁆𑀢𑀕𑁄;

𑀲𑀻𑀫𑀸𑀢𑀺𑀕𑁄 𑀥𑀫𑁆𑀫𑀕𑀭𑀼, 𑀕𑀢𑀢𑁆𑀣𑁄 𑀳𑀺𑀢𑀯𑀩𑁆𑀪𑀼𑀢𑁄 [𑀳𑀺𑀢𑀯𑀧𑁆𑀧𑀣𑁄 (𑀲𑀻. 𑀲𑁆𑀬𑀸.)].

𑁩𑁧𑁮. ‘‘𑀢𑀸𑀭𑀓𑁄 𑀢𑁆𑀯𑀁 𑀬𑀣𑀸 𑀦𑀸𑀯𑀸, 𑀦𑀺𑀥𑀻𑀯𑀲𑁆𑀲𑀸𑀲𑀓𑀸𑀭𑀓𑁄;

𑀅𑀲𑀫𑁆𑀪𑀻𑀢𑁄 𑀬𑀣𑀸 𑀲𑀻𑀳𑁄, 𑀕𑀚𑀭𑀸𑀚𑀸𑀯 𑀤𑀧𑁆𑀧𑀺𑀢𑁄.

𑁩𑁧𑁯. ‘‘𑀣𑁄𑀫𑁂𑀢𑁆𑀯𑀸 𑀤𑀲𑀕𑀸𑀣𑀸𑀳𑀺, 𑀧𑀤𑀼𑀫𑀼𑀢𑁆𑀢𑀭𑀁 𑀫𑀳𑀸𑀬𑀲𑀁;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀢𑀼𑀡𑁆𑀳𑀻 𑀅𑀝𑁆𑀞𑀸𑀲𑀳𑀁 𑀢𑀤𑀸.

𑁩𑁨𑁦. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁩𑁨𑁧. ‘‘‘𑀬𑁄 𑀫𑁂 𑀲𑀻𑀮𑀜𑁆𑀘 𑀜𑀸𑀡𑀜𑁆𑀘, 𑀲𑀤𑁆𑀥𑀫𑁆𑀫𑀜𑁆𑀘𑀸𑀧𑀺 𑀯𑀡𑁆𑀡𑀬𑀺 [𑀥𑀫𑁆𑀫𑀜𑁆𑀘𑀸𑀧𑀺 𑀧𑀓𑀺𑀢𑁆𑀢𑀬𑀺 (𑀲𑀻. 𑀲𑁆𑀬𑀸.)];

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁩𑁨𑁨. ‘‘‘𑀲𑀝𑁆𑀞𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀅𑀜𑁆𑀜𑁂 𑀤𑁂𑀯𑁂𑀪𑀺𑀪𑀯𑀺𑀢𑁆𑀯𑀸, 𑀇𑀲𑁆𑀲𑀭𑀁 𑀓𑀸𑀭𑀬𑀺𑀲𑁆𑀲𑀢𑀺.

𑁩𑁨𑁩. ‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑁂 𑀧𑀩𑁆𑀩𑀚𑀺𑀲𑁆𑀲𑀢𑀺.

𑁩𑁨𑁪. ‘‘‘𑀧𑀩𑁆𑀩𑀚𑀺𑀢𑁆𑀯𑀸𑀦 𑀓𑀸𑀬𑁂𑀦, 𑀧𑀸𑀧𑀓𑀫𑁆𑀫𑀁 𑀯𑀺𑀯𑀚𑁆𑀚𑀺𑀬;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁩𑁨𑁫. ‘‘𑀬𑀣𑀸𑀧𑀺 𑀫𑁂𑀖𑁄 𑀣𑀦𑀬𑀁, 𑀢𑀧𑁆𑀧𑁂𑀢𑀺 𑀫𑁂𑀤𑀺𑀦𑀺𑀁 𑀇𑀫𑀁;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀥𑀫𑁆𑀫𑁂𑀦 𑀢𑀧𑁆𑀧𑀬𑀻 𑀫𑀫𑀁.

𑁩𑁨𑁬. ‘‘𑀲𑀻𑀮𑀁 𑀧𑀜𑁆𑀜𑀜𑁆𑀘 𑀥𑀫𑁆𑀫𑀜𑁆𑀘, 𑀣𑀯𑀺𑀢𑁆𑀯𑀸 𑀮𑁄𑀓𑀦𑀸𑀬𑀓𑀁;

𑀧𑀢𑁆𑀢𑁄𑀫𑁆𑀳𑀺 𑀧𑀭𑀫𑀁 𑀲𑀦𑁆𑀢𑀺𑀁, 𑀦𑀺𑀩𑁆𑀩𑀸𑀦𑀁 𑀧𑀤𑀫𑀘𑁆𑀘𑀼𑀢𑀁.

𑁩𑁨𑁭. ‘‘𑀅𑀳𑁄 𑀦𑀽𑀦 𑀲 𑀪𑀕𑀯𑀸, 𑀘𑀺𑀭𑀁 𑀢𑀺𑀝𑁆𑀞𑁂𑀬𑁆𑀬 𑀘𑀓𑁆𑀔𑀼𑀫𑀸;

𑀅𑀜𑁆𑀜𑀸𑀢𑀜𑁆𑀘 𑀯𑀺𑀚𑀸𑀦𑁂𑀬𑁆𑀬𑀼𑀁, 𑀨𑀼𑀲𑁂𑀬𑁆𑀬𑀼𑀁 [𑀅𑀜𑁆𑀜𑀸𑀢𑀜𑁆𑀘𑀸𑀧𑀺 𑀚𑀸𑀦𑁂𑀬𑁆𑀬, 𑀧𑀲𑁆𑀲𑁂𑀬𑁆𑀬 (𑀓.)] 𑀅𑀫𑀢𑀁 𑀧𑀤𑀁.

𑁩𑁨𑁮. ‘‘𑀅𑀬𑀁 𑀫𑁂 𑀧𑀘𑁆𑀙𑀺𑀫𑀸 𑀚𑀸𑀢𑀺, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁨𑁯. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀣𑁄𑀫𑀬𑀺𑀁

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁩𑁩𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁩𑁩𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁩𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀩𑁆𑀩𑀓𑀺𑀢𑁆𑀢𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀩𑁆𑀩𑀓𑀺𑀢𑁆𑀢𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.