𑁪. 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁮. ‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀘𑀭𑀢𑁄 𑀘𑀸𑀭𑀺𑀓𑀁 𑀢𑀤𑀸.

𑁪𑁯. ‘‘𑀲𑀼𑀨𑀼𑀮𑁆𑀮𑀁 𑀧𑀤𑀼𑀫𑀁 𑀕𑀬𑁆𑀳, 𑀉𑀧𑁆𑀧𑀮𑀁 𑀫𑀮𑁆𑀮𑀺𑀓𑀜𑁆𑀘𑀳𑀁;

𑀧𑀭𑀫𑀦𑁆𑀦𑀁 𑀕𑀳𑁂𑀢𑁆𑀯𑀸𑀦, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁫𑁦. ‘‘𑀧𑀭𑀺𑀪𑀼𑀜𑁆𑀚𑀺 𑀫𑀳𑀸𑀯𑀻𑀭𑁄, 𑀧𑀭𑀫𑀦𑁆𑀦𑀁 𑀲𑀼𑀪𑁄𑀚𑀦𑀁;

𑀢𑀜𑁆𑀘 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀚𑀦𑀲𑁆𑀲 𑀲𑀫𑁆𑀧𑀤𑀲𑁆𑀲𑀬𑀺.

𑁫𑁧. ‘‘𑀇𑀝𑁆𑀞𑀁 𑀓𑀦𑁆𑀢𑀁 [𑀓𑀦𑁆𑀢𑀬𑀺𑀤𑀁 (𑀲𑁆𑀬𑀸.)], 𑀧𑀺𑀬𑀁 𑀮𑁄𑀓𑁂, 𑀚𑀮𑀚𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀲𑀼𑀤𑀼𑀓𑁆𑀓𑀭𑀁 𑀓𑀢𑀁 𑀢𑁂𑀦, 𑀬𑁄 𑀫𑁂 𑀧𑀼𑀧𑁆𑀨𑀁 𑀅𑀤𑀸𑀲𑀺𑀤𑀁.

𑁫𑁨. ‘‘𑀬𑁄 𑀧𑀼𑀧𑁆𑀨𑀫𑀪𑀺𑀭𑁄𑀧𑁂𑀲𑀺, 𑀧𑀭𑀫𑀦𑁆𑀦𑀜𑁆𑀘𑀤𑀸𑀲𑀺 𑀫𑁂;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁫𑁩. ‘‘‘𑀤𑀲 𑀅𑀝𑁆𑀞 𑀘𑀓𑁆𑀔𑀢𑁆𑀢𑀼𑀁 [𑀤𑀲 𑀘𑀝𑁆𑀞𑀓𑁆𑀔𑀢𑁆𑀢𑀼𑀁 (𑀲𑀻.), 𑀤𑀲𑀫𑀝𑁆𑀞𑀓𑁆𑀔𑀢𑁆𑀢𑀼𑀁 (𑀲𑁆𑀬𑀸.)] 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀉𑀧𑁆𑀧𑀮𑀁 𑀧𑀤𑀼𑀫𑀜𑁆𑀘𑀸𑀧𑀺, 𑀫𑀮𑁆𑀮𑀺𑀓𑀜𑁆𑀘 𑀢𑀤𑀼𑀢𑁆𑀢𑀭𑀺.

𑁫𑁪. ‘‘‘𑀅𑀲𑁆𑀲 𑀧𑀼𑀜𑁆𑀜𑀯𑀺𑀧𑀸𑀓𑁂𑀦, 𑀤𑀺𑀩𑁆𑀩𑀕𑀦𑁆𑀥𑀲𑀫𑀸𑀬𑀼𑀢𑀁;

𑀆𑀓𑀸𑀲𑁂 𑀙𑀤𑀦𑀁 𑀓𑀢𑁆𑀯𑀸, 𑀥𑀸𑀭𑀬𑀺𑀲𑁆𑀲𑀢𑀺 𑀢𑀸𑀯𑀤𑁂.

𑁫𑁫. ‘‘‘𑀧𑀜𑁆𑀘𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀧𑀜𑁆𑀘𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁫𑁬. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦 [𑀦𑀸𑀫𑁂𑀦 (𑀲𑀻. 𑀲𑁆𑀬𑀸. 𑀓.)], 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁫𑁭. ‘‘‘𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄 𑀲𑁄, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀓𑁆𑀬𑀸𑀦𑀁 𑀦𑀦𑁆𑀤𑀺𑀚𑀦𑀦𑁄, 𑀜𑀸𑀢𑀺𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺.

𑁫𑁮. ‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁫𑁯. ‘‘‘𑀧𑀝𑀺𑀲𑀫𑁆𑀪𑀺𑀤𑀫𑀦𑀼𑀧𑁆𑀧𑀢𑁆𑀢𑀁, 𑀓𑀢𑀓𑀺𑀘𑁆𑀘𑀫𑀦𑀸𑀲𑀯𑀁;

𑀕𑁄𑀢𑀫𑁄 𑀮𑁄𑀓𑀩𑀦𑁆𑀥𑀼 𑀢𑀁 [𑀲𑁄 (𑀲𑀻.)], 𑀏𑀢𑀤𑀕𑁆𑀕𑁂 𑀞𑀧𑁂𑀲𑁆𑀲𑀢𑀺.

𑁬𑁦. ‘‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀉𑀤𑀸𑀬𑀻 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁬𑁧. ‘‘𑀭𑀸𑀕𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀫𑀸𑀦𑁄 𑀫𑀓𑁆𑀔𑁄 𑀘 𑀥𑀁𑀲𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁨. ‘‘𑀢𑁄𑀲𑀬𑀺𑀜𑁆𑀘𑀸𑀧𑀺 𑀲𑀫𑁆𑀩𑀼𑀤𑁆𑀥𑀁, 𑀆𑀢𑀸𑀧𑀻 𑀦𑀺𑀧𑀓𑁄 𑀅𑀳𑀁;

𑀧𑀲𑀸𑀤𑀺𑀢𑁄 [𑀧𑀫𑁄𑀤𑀺𑀢𑁄 (𑀲𑀻.)] 𑀘 𑀲𑀫𑁆𑀩𑀼𑀤𑁆𑀥𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁬𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀸𑀴𑀼𑀤𑀸𑀬𑀻 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀓𑀸𑀴𑀼𑀤𑀸𑀬𑀻𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.