𑁫. 𑀫𑁄𑀖𑀭𑀸𑀚𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁪. ‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀩𑁆𑀬𑀽𑀴𑁆𑀳𑁄, 𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀣.

𑁬𑁫. ‘‘𑀲𑀺𑀲𑁆𑀲𑁂𑀳𑀺 𑀲𑀫𑁆𑀧𑀭𑀺𑀯𑀼𑀢𑁄, 𑀖𑀭𑀫𑁆𑀳𑀸 𑀅𑀪𑀺𑀦𑀺𑀓𑁆𑀔𑀫𑀺𑀁;

𑀦𑀺𑀓𑁆𑀔𑀫𑀺𑀢𑁆𑀯𑀸𑀦𑀳𑀁 𑀢𑀢𑁆𑀣, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁬𑁬. ‘‘𑀅𑀪𑀺𑀯𑀸𑀤𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁬𑁭. ‘‘𑀬𑀸𑀯𑀢𑀸 𑀭𑀽𑀧𑀺𑀦𑁄 𑀲𑀢𑁆𑀢𑀸, 𑀅𑀭𑀽𑀧𑀻 𑀯𑀸 𑀅𑀲𑀜𑁆𑀜𑀺𑀦𑁄;

𑀲𑀩𑁆𑀩𑁂 𑀢𑁂 𑀢𑀯 𑀜𑀸𑀡𑀫𑁆𑀳𑀺, 𑀅𑀦𑁆𑀢𑁄 𑀳𑁄𑀦𑁆𑀢𑀺 𑀲𑀫𑁄𑀕𑀥𑀸.

𑁬𑁮. ‘‘𑀲𑀼𑀔𑀼𑀫𑀘𑁆𑀙𑀺𑀓𑀚𑀸𑀮𑁂𑀦, 𑀉𑀤𑀓𑀁 𑀬𑁄 𑀧𑀭𑀺𑀓𑁆𑀔𑀺𑀧𑁂;

𑀬𑁂 𑀓𑁂𑀘𑀺 𑀉𑀤𑀓𑁂 𑀧𑀸𑀡𑀸, 𑀅𑀦𑁆𑀢𑁄𑀚𑀸𑀮𑁂 𑀪𑀯𑀦𑁆𑀢𑀺 𑀢𑁂.

𑁬𑁯. ‘‘𑀬𑁂𑀲𑀜𑁆𑀘 𑀘𑁂𑀢𑀦𑀸 𑀅𑀢𑁆𑀣𑀺, 𑀭𑀽𑀧𑀺𑀦𑁄 𑀘 𑀅𑀭𑀽𑀧𑀺𑀦𑁄;

𑀲𑀩𑁆𑀩𑁂 𑀢𑁂 𑀢𑀯 𑀜𑀸𑀡𑀫𑁆𑀳𑀺, 𑀅𑀦𑁆𑀢𑁄 𑀳𑁄𑀦𑁆𑀢𑀺 𑀲𑀫𑁄𑀕𑀥𑀸.

𑁭𑁦. ‘‘𑀲𑀫𑀼𑀤𑁆𑀥𑀭𑀲𑀺𑀫𑀁 𑀮𑁄𑀓𑀁, 𑀅𑀦𑁆𑀥𑀓𑀸𑀭𑀲𑀫𑀸𑀓𑀼𑀮𑀁;

𑀢𑀯 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀓𑀗𑁆𑀔𑀸𑀲𑁄𑀢𑀁 𑀢𑀭𑀦𑁆𑀢𑀺 𑀢𑁂.

𑁭𑁧. ‘‘𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑁂 𑀮𑁄𑀓𑁂, 𑀅𑀦𑁆𑀥𑀓𑀸𑀭𑁂𑀦 𑀑𑀢𑁆𑀣𑀝𑁂;

𑀢𑀯 𑀜𑀸𑀡𑀫𑁆𑀳𑀺 𑀚𑁄𑀢𑀦𑁆𑀢𑁂, 𑀅𑀦𑁆𑀥𑀓𑀸𑀭𑀸 𑀧𑀥𑀁𑀲𑀺𑀢𑀸.

𑁭𑁨. ‘‘𑀢𑀼𑀯𑀁 𑀘𑀓𑁆𑀔𑀽𑀲𑀺 𑀲𑀩𑁆𑀩𑁂𑀲𑀁, 𑀫𑀳𑀸𑀢𑀫𑀧𑀦𑀽𑀤𑀦𑁄;

𑀢𑀯 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀦𑀺𑀩𑁆𑀩𑀸𑀬𑀢𑀺 𑀩𑀳𑀼𑀚𑁆𑀚𑀦𑁄.

𑁭𑁩. ‘‘𑀧𑀼𑀝𑀓𑀁 𑀧𑀽𑀭𑀬𑀺𑀢𑁆𑀯𑀸𑀦 [𑀧𑀻𑀞𑀭𑀁 (𑀲𑀻.), 𑀧𑀼𑀢𑀭𑀁 (𑀲𑁆𑀬𑀸.)], 𑀫𑀥𑀼𑀔𑀼𑀤𑁆𑀤𑀫𑀦𑁂𑀴𑀓𑀁;

𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀉𑀧𑀦𑁂𑀲𑀺𑀁 𑀫𑀳𑁂𑀲𑀺𑀦𑁄.

𑁭𑁪. ‘‘𑀧𑀝𑀺𑀕𑁆𑀕𑀡𑁆𑀳𑀺 𑀫𑀳𑀸𑀯𑀻𑀭𑁄, 𑀲𑀳𑀢𑁆𑀣𑁂𑀦 𑀫𑀳𑀸 𑀇𑀲𑀻;

𑀪𑀼𑀜𑁆𑀚𑀺𑀢𑁆𑀯𑀸 𑀢𑀜𑁆𑀘 𑀲𑀩𑁆𑀩𑀜𑁆𑀜𑀽, 𑀯𑁂𑀳𑀸𑀲𑀁 𑀦𑀪𑀫𑀼𑀕𑁆𑀕𑀫𑀺.

𑁭𑁫. ‘‘𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀲𑀢𑁆𑀣𑀸, 𑀅𑀢𑁆𑀣𑀤𑀲𑁆𑀲𑀻 𑀦𑀭𑀸𑀲𑀪𑁄;

𑀫𑀫 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁭𑁬. ‘‘‘𑀬𑁂𑀦𑀺𑀤𑀁 𑀣𑀯𑀺𑀢𑀁 𑀜𑀸𑀡𑀁, 𑀩𑀼𑀤𑁆𑀥𑀲𑁂𑀝𑁆𑀞𑁄 𑀘 𑀣𑁄𑀫𑀺𑀢𑁄;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑀼𑀕𑁆𑀕𑀢𑀺𑀁 𑀲𑁄 𑀦 𑀕𑀘𑁆𑀙𑀢𑀺.

𑁭𑁭. ‘‘‘𑀘𑀢𑀼𑀤𑁆𑀤𑀲𑀜𑁆𑀘𑀓𑁆𑀔𑀢𑁆𑀢𑀼𑀁 [𑀘𑀢𑀼𑀲𑀝𑁆𑀞𑀺𑀜𑁆𑀘 (𑀲𑁆𑀬𑀸.)] 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀅𑀝𑁆𑀞𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁭𑁮. ‘‘‘𑀧𑀜𑁆𑀘𑁂𑀯 𑀲𑀢𑀓𑁆𑀔𑀢𑁆𑀢𑀼𑀜𑁆𑀘 [𑀅𑀣 𑀧𑀜𑁆𑀘𑀲𑀢𑀓𑁆𑀔𑀢𑁆𑀢𑀼𑀁 (𑀲𑀻.)], 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀅𑀲𑀗𑁆𑀔𑁂𑀬𑁆𑀬𑀁, 𑀫𑀳𑀺𑀬𑀸 𑀓𑀸𑀭𑀬𑀺𑀲𑁆𑀲𑀢𑀺.

𑁭𑁯. ‘‘‘𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑁂 𑀧𑀩𑁆𑀩𑀚𑀺𑀲𑁆𑀲𑀢𑀺.

𑁮𑁦. ‘‘‘𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀅𑀢𑁆𑀣𑀁, 𑀜𑀸𑀡𑁂𑀦 𑀯𑀺𑀘𑀺𑀦𑀺𑀲𑁆𑀲𑀢𑀺;

𑀫𑁄𑀖𑀭𑀸𑀚𑀸𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁮𑁧. ‘‘‘𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀲𑀫𑁆𑀧𑀦𑁆𑀦𑀁, 𑀓𑀢𑀓𑀺𑀘𑁆𑀘𑀫𑀦𑀸𑀲𑀯𑀁;

𑀕𑁄𑀢𑀫𑁄 𑀲𑀢𑁆𑀣𑀯𑀸𑀳𑀕𑁆𑀕𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑁆𑀲𑀢𑀺’.

𑁮𑁨. ‘‘𑀳𑀺𑀢𑁆𑀯𑀸 𑀫𑀸𑀦𑀼𑀲𑀓𑀁 𑀬𑁄𑀕𑀁, 𑀙𑁂𑀢𑁆𑀯𑀸𑀦 𑀪𑀯𑀩𑀦𑁆𑀥𑀦𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁮𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑁄𑀖𑀭𑀸𑀚𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀫𑁄𑀖𑀭𑀸𑀚𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.