𑁮. 𑀢𑀺𑀭𑀁𑀲𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁯. ‘‘𑀓𑁂𑀲𑀭𑀺𑀁 𑀅𑀪𑀺𑀚𑀸𑀢𑀁𑀯, 𑀅𑀕𑁆𑀕𑀺𑀓𑁆𑀔𑀦𑁆𑀥𑀁𑀯 𑀧𑀩𑁆𑀩𑀢𑁂;

𑀑𑀪𑀸𑀲𑁂𑀦𑁆𑀢𑀁 𑀤𑀺𑀲𑀸 𑀲𑀩𑁆𑀩𑀸 [𑀦𑀺𑀯𑀸𑀲𑁂𑀦𑁆𑀢𑀁 (𑀓.), 𑀤𑀺𑀲𑀸𑀲𑀺𑀦𑁆𑀦𑀁 (𑀲𑁆𑀬𑀸.)], 𑀲𑀺𑀤𑁆𑀥𑀢𑁆𑀣𑀁 𑀧𑀩𑁆𑀩𑀢𑀦𑁆𑀢𑀭𑁂.

𑁪𑁦. ‘‘𑀲𑀽𑀭𑀺𑀬𑀲𑁆𑀲 𑀘 𑀆𑀮𑁄𑀓𑀁, 𑀘𑀦𑁆𑀤𑀸𑀮𑁄𑀓𑀁 𑀢𑀣𑁂𑀯 𑀘;

𑀩𑀼𑀤𑁆𑀥𑀸𑀮𑁄𑀓𑀜𑁆𑀘 𑀤𑀺𑀲𑁆𑀯𑀸𑀦, 𑀯𑀺𑀢𑁆𑀢𑀺 𑀫𑁂 𑀉𑀤𑀧𑀚𑁆𑀚𑀣.

𑁪𑁧. ‘‘𑀢𑀬𑁄 𑀆𑀮𑁄𑀓𑁂 𑀤𑀺𑀲𑁆𑀯𑀸𑀦, 𑀲𑀫𑁆𑀩𑀼𑀤𑁆𑀥𑀁 [𑀩𑀼𑀤𑁆𑀥𑀜𑁆𑀘 (𑀲𑀻.)] 𑀲𑀸𑀯𑀓𑀼𑀢𑁆𑀢𑀫𑀁;

𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁪𑁨. ‘‘𑀢𑀬𑁄 𑀳𑀺 𑀆𑀮𑁄𑀓𑀓𑀭𑀸, 𑀮𑁄𑀓𑁂 𑀮𑁄𑀓𑀢𑀫𑁄𑀦𑀼𑀤𑀸;

𑀘𑀦𑁆𑀤𑁄 𑀘 𑀲𑀽𑀭𑀺𑀬𑁄 𑀘𑀸𑀧𑀺, 𑀩𑀼𑀤𑁆𑀥𑁄 𑀘 𑀮𑁄𑀓𑀦𑀸𑀬𑀓𑁄.

𑁪𑁩. ‘‘𑀑𑀧𑀫𑁆𑀫𑀁 𑀉𑀧𑀤𑀲𑁆𑀲𑁂𑀢𑁆𑀯𑀸, 𑀓𑀺𑀢𑁆𑀢𑀺𑀢𑁄 𑀫𑁂 𑀫𑀳𑀸𑀫𑀼𑀦𑀺;

𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀓𑀺𑀢𑁆𑀢𑁂𑀢𑁆𑀯𑀸, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀳𑀁.

𑁪𑁪. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀓𑀺𑀢𑁆𑀢𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁪𑁫. ‘‘𑀏𑀓𑀲𑀝𑁆𑀞𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀏𑀓𑁄 𑀜𑀸𑀡𑀥𑀭𑁄 𑀅𑀳𑀼;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀭𑀁𑀲𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀭𑀁𑀲𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.