𑁭. 𑀆𑀭𑀸𑀫𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁨. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀆𑀭𑀸𑀫𑁄 𑀭𑁄𑀧𑀺𑀢𑁄 𑀫𑀬𑀸;

𑀲𑀦𑁆𑀤𑀘𑁆𑀙𑀸𑀬𑁂𑀲𑀼 [𑀲𑀻𑀢𑀙𑀸𑀬𑁂𑀲𑀼 (𑀲𑁆𑀬𑀸.), 𑀲𑀦𑁆𑀢𑀘𑁆𑀙𑀸𑀬𑁂𑀲𑀼 (𑀓.)] 𑀭𑀼𑀓𑁆𑀔𑁂𑀲𑀼, 𑀉𑀧𑀸𑀲𑀦𑁆𑀢𑁂𑀲𑀼 𑀧𑀓𑁆𑀔𑀺𑀲𑀼.

𑁩𑁩. ‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀆𑀭𑀸𑀫𑀁 𑀅𑀪𑀺𑀦𑀸𑀫𑁂𑀲𑀺𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁.

𑁩𑁪. ‘‘𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀨𑀮𑀁 𑀧𑀼𑀧𑁆𑀨𑀫𑀤𑀸𑀲𑀳𑀁;

𑀢𑀢𑁄 𑀚𑀸𑀢𑀧𑁆𑀧𑀲𑀸𑀤𑁄𑀯, 𑀢𑀁 𑀯𑀦𑀁 𑀧𑀭𑀺𑀡𑀸𑀫𑀬𑀺𑀁.

𑁩𑁫. ‘‘𑀩𑀼𑀤𑁆𑀥𑀲𑁆𑀲 𑀬𑀫𑀺𑀤𑀁 𑀤𑀸𑀲𑀺𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀳𑀺, 𑀦𑀺𑀩𑁆𑀩𑀢𑁆𑀢𑀢𑀺 𑀨𑀮𑀁 𑀫𑀫.

𑁩𑁬. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀆𑀭𑀸𑀫𑀫𑀤𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀆𑀭𑀸𑀫𑀲𑁆𑀲 𑀇𑀤𑀁 𑀨𑀮𑀁.

𑁩𑁭. ‘‘𑀲𑀢𑁆𑀢𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀲𑀢𑁆𑀢𑀸𑀲𑀼𑀁 𑀫𑀼𑀤𑀼𑀲𑀻𑀢𑀮𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀭𑀸𑀫𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀭𑀸𑀫𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.