𑁭. 𑀤𑁂𑀲𑀓𑀺𑀢𑁆𑀢𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁧. ‘‘𑀉𑀧𑀲𑀸𑀮𑀓𑀦𑀸𑀫𑁄𑀳𑀁, 𑀅𑀳𑁄𑀲𑀺𑀁 𑀩𑁆𑀭𑀸𑀳𑁆𑀫𑀡𑁄 𑀢𑀤𑀸;

𑀓𑀸𑀦𑀦𑀁 𑀯𑀦𑀫𑁄𑀕𑀸𑀴𑁆𑀳𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁.

𑁩𑁨. ‘‘𑀤𑀺𑀲𑁆𑀯𑀸𑀦 𑀯𑀦𑁆𑀤𑀺𑀁 𑀧𑀸𑀤𑁂𑀲𑀼, 𑀮𑁄𑀓𑀸𑀳𑀼𑀢𑀺𑀧𑀝𑀺𑀕𑁆𑀕𑀳𑀁;

𑀧𑀲𑀦𑁆𑀦𑀘𑀺𑀢𑁆𑀢𑀁 𑀫𑀁 𑀜𑀢𑁆𑀯𑀸, 𑀩𑀼𑀤𑁆𑀥𑁄 𑀅𑀦𑁆𑀢𑀭𑀥𑀸𑀬𑀣.

𑁩𑁩. ‘‘𑀓𑀸𑀦𑀦𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀩𑀼𑀤𑁆𑀥𑀲𑁂𑀝𑁆𑀞𑀫𑀦𑀼𑀲𑁆𑀲𑀭𑀺𑀁;

𑀢𑀁 𑀤𑁂𑀲𑀁 𑀓𑀺𑀢𑁆𑀢𑀬𑀺𑀢𑁆𑀯𑀸𑀦, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀳𑀁.

𑁩𑁪. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑁂𑀲𑀫𑀪𑀺𑀓𑀺𑀢𑁆𑀢𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁩𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀤𑁂𑀲𑀓𑀺𑀢𑁆𑀢𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀤𑁂𑀲𑀓𑀺𑀢𑁆𑀢𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.